Srimad Bhagawad Gita Chapter 5

ōṃ śrī paramātmanē namaḥ
atha pañchamō’dhyāyaḥ ।
karmasannyāsayōgaḥ

arjuna uvācha
sannyāsaṃ karmaṇāṃ kṛṣṇa punaryōgaṃ cha śaṃsasi ।
yachChrēya ētayōrēkaṃ tanmē brūhi suniśchitam ॥ 1 ॥

śrībhagavānuvācha
sannyāsaḥ karmayōgaścha niḥśrēyasakarāvubhau ।
tayōstu karmasannyāsātkarmayōgō viśiṣyatē ॥ 2 ॥

jñēyaḥ sa nityasannyāsī yō na dvēṣṭi na kāṅkṣati ।
nirdvandvō hi mahābāhō sukhaṃ bandhātpramuchyatē ॥ 3 ॥

sāṅkhyayōgau pṛthagbālāḥ pravadanti na paṇḍitāḥ ।
ēkamapyāsthitaḥ samyagubhayōrvindatē phalam ॥ 4 ॥

yatsāṅkhyaiḥ prāpyatē sthānaṃ tadyōgairapi gamyatē ।
ēkaṃ sāṅkhyaṃ cha yōgaṃ cha yaḥ paśyati sa paśyati ॥ 5 ॥

sannyāsastu mahābāhō duḥkhamāptumayōgataḥ ।
yōgayuktō munirbrahma nachirēṇādhigachChati ॥ 6 ॥

yōgayuktō viśuddhātmā vijitātmā jitēndriyaḥ ।
sarvabhūtātmabhūtātmā kurvannapi na lipyatē ॥ 7 ॥

naiva kiñchitkarōmīti yuktō manyēta tattvavit ।
paśyañśṛṇvanspṛśañjighrannaśnangachChansvapañśvasan ॥ 8 ॥

pralapanvisṛjangṛhṇannunmiṣannimiṣannapi ।
indriyāṇīndriyārthēṣu vartanta iti dhārayan ॥ 9 ॥

brahmaṇyādhāya karmāṇi saṅgaṃ tyaktvā karōti yaḥ ।
lipyatē na sa pāpēna padmapatramivāmbhasā ॥ 10 ॥

kāyēna manasā buddhyā kēvalairindriyairapi ।
yōginaḥ karma kurvanti saṅgaṃ tyaktvātmaśuddhayē ॥ 11 ॥

yuktaḥ karmaphalaṃ tyaktvā śāntimāpnōti naiṣṭhikīm ।
ayuktaḥ kāmakārēṇa phalē saktō nibadhyatē ॥ 12 ॥

sarvakarmāṇi manasā sannyasyāstē sukhaṃ vaśī ।
navadvārē purē dēhī naiva kurvanna kārayan ॥ 13 ॥

na kartṛtvaṃ na karmāṇi lōkasya sṛjati prabhuḥ ।
na karmaphalasaṃyōgaṃ svabhāvastu pravartatē ॥ 14 ॥

nādattē kasyachitpāpaṃ na chaiva sukṛtaṃ vibhuḥ ।
ajñānēnāvṛtaṃ jñānaṃ tēna muhyanti jantavaḥ ॥ 15 ॥

jñānēna tu tadajñānaṃ yēṣāṃ nāśitamātmanaḥ ।
tēṣāmādityavajjñānaṃ prakāśayati tatparam ॥ 16 ॥

tadbuddhayastadātmānastanniṣṭhāstatparāyaṇāḥ ।
gachChantyapunarāvṛttiṃ jñānanirdhūtakalmaṣāḥ ॥ 17 ॥

vidyāvinayasampannē brāhmaṇē gavi hastini ।
śuni chaiva śvapākē cha paṇḍitāḥ samadarśinaḥ ॥ 18 ॥

ihaiva tairjitaḥ sargō yēṣāṃ sāmyē sthitaṃ manaḥ ।
nirdōṣaṃ hi samaṃ brahma tasmādbrahmaṇi tē sthitāḥ ॥ 19 ॥

na prahṛṣyētpriyaṃ prāpya nōdvijētprāpya chāpriyam ।
sthirabuddhirasammūḍhō brahmavidbrahmaṇi sthitaḥ ॥ 20 ॥

bāhyasparśēṣvasaktātmā vindatyātmani yatsukham ।
sa brahmayōgayuktātmā sukhamakṣayamaśnutē ॥ 21 ॥

yē hi saṃsparśajā bhōgā duḥkhayōnaya ēva tē ।
ādyantavantaḥ kauntēya na tēṣu ramatē budhaḥ ॥ 22 ॥

śaknōtīhaiva yaḥ sōḍhuṃ prākśarīravimōkṣaṇāt ।
kāmakrōdhōdbhavaṃ vēgaṃ sa yuktaḥ sa sukhī naraḥ ॥ 23 ॥

yō’ntaḥsukhō’ntarārāmastathāntarjyōtirēva yaḥ ।
sa yōgī brahmanirvāṇaṃ brahmabhūtō’dhigachChati ॥ 24 ॥

labhantē brahmanirvāṇamṛṣayaḥ kṣīṇakalmaṣāḥ ।
Chinnadvaidhā yatātmānaḥ sarvabhūtahitē ratāḥ ॥ 25 ॥

kāmakrōdhaviyuktānāṃ yatīnāṃ yatachētasām ।
abhitō brahmanirvāṇaṃ vartatē viditātmanām ॥ 26 ॥

sparśānkṛtvā bahirbāhyāṃśchakṣuśchaivāntarē bhruvōḥ ।
prāṇāpānau samau kṛtvā nāsābhyantarachāriṇau ॥ 27 ॥

yatēndriyamanōbuddhirmunirmōkṣaparāyaṇaḥ ।
vigatēchChābhayakrōdhō yaḥ sadā mukta ēva saḥ ॥ 28 ॥

bhōktāraṃ yajñatapasāṃ sarvalōkamahēśvaram ।
suhṛdaṃ sarvabhūtānāṃ jñātvā māṃ śāntimṛchChati ॥ 29 ॥

ōṃ tatsaditi śrīmadbhagavadgītāsūpaniṣatsu brahmavidyāyāṃ yōgaśāstrē
śrīkṛṣṇārjunasaṃvādē karmasannyāsayōgō nāma pañchamō’dhyāyaḥ ॥5 ॥