Ashtavakra Gita Chapter 16

aṣṭāvakra uvācha ॥
āchakṣva śṛṇu vā tāta nānāśāstrāṇyanēkaśaḥ ।
tathāpi na tava svāsthyaṃ sarvavismaraṇādṛtē ॥ 16-1॥

bhōgaṃ karma samādhiṃ vā kuru vijña tathāpi tē ।
chittaṃ nirastasarvāśamatyarthaṃ rōchayiṣyati ॥ 16-2॥

āyāsātsakalō duḥkhī nainaṃ jānāti kaśchana ।
anēnaivōpadēśēna dhanyaḥ prāpnōti nirvṛtim ॥ 16-3॥

vyāpārē khidyatē yastu nimēṣōnmēṣayōrapi ।
tasyālasya dhurīṇasya sukhaṃ nānyasya kasyachit ॥ 16-4॥

idaṃ kṛtamidaṃ nēti dvandvairmuktaṃ yadā manaḥ ।
dharmārthakāmamōkṣēṣu nirapēkṣaṃ tadā bhavēt ॥ 16-5॥

viraktō viṣayadvēṣṭā rāgī viṣayalōlupaḥ ।
grahamōkṣavihīnastu na viraktō na rāgavān ॥ 16-6॥

hēyōpādēyatā tāvatsaṃsāraviṭapāṅkuraḥ ।
spṛhā jīvati yāvad vai nirvichāradaśāspadam ॥ 16-7॥

pravṛttau jāyatē rāgō nirvṛttau dvēṣa ēva hi ।
nirdvandvō bālavad dhīmān ēvamēva vyavasthitaḥ ॥ 16-8॥

hātumichChati saṃsāraṃ rāgī duḥkhajihāsayā ।
vītarāgō hi nirduḥkhastasminnapi na khidyati ॥ 16-9॥

yasyābhimānō mōkṣē’pi dēhē’pi mamatā tathā ।
na cha jñānī na vā yōgī kēvalaṃ duḥkhabhāgasau ॥ 16-10॥

harō yadyupadēṣṭā tē hariḥ kamalajō’pi vā ।
tathāpi na tava svāsthyaṃ sarvavismaraṇādṛtē ॥ 16-11॥