Ashtavakra Gita Chapter 15

aṣṭāvakra uvācha ॥
yathātathōpadēśēna kṛtārthaḥ sattvabuddhimān ।
ājīvamapi jijñāsuḥ parastatra vimuhyati ॥ 15-1॥

mōkṣō viṣayavairasyaṃ bandhō vaiṣayikō rasaḥ ।
ētāvadēva vijñānaṃ yathēchChasi tathā kuru ॥ 15-2॥

vāgmiprājñāmahōdyōgaṃ janaṃ mūkajaḍālasam ।
karōti tattvabōdhō’yamatastyaktō bubhukṣabhiḥ ॥ 15-3॥

na tvaṃ dēhō na tē dēhō bhōktā kartā na vā bhavān ।
chidrūpō’si sadā sākṣī nirapēkṣaḥ sukhaṃ chara ॥ 15-4॥

rāgadvēṣau manōdharmau na manastē kadāchana ।
nirvikalpō’si bōdhātmā nirvikāraḥ sukhaṃ chara ॥ 15-5॥

sarvabhūtēṣu chātmānaṃ sarvabhūtāni chātmani ।
vijñāya nirahaṅkārō nirmamastvaṃ sukhī bhava ॥ 15-6॥

viśvaṃ sphurati yatrēdaṃ taraṅgā iva sāgarē ।
tattvamēva na sandēhaśchinmūrtē vijvarō bhava ॥ 15-7॥

śraddhasva tāta śraddhasva nātra mōhaṃ kuruṣva bhōḥ ।
jñānasvarūpō bhagavānātmā tvaṃ prakṛtēḥ paraḥ ॥ 15-8॥

guṇaiḥ saṃvēṣṭitō dēhastiṣṭhatyāyāti yāti cha ।
ātmā na gantā nāgantā kimēnamanuśōchasi ॥ 15-9॥

dēhastiṣṭhatu kalpāntaṃ gachChatvadyaiva vā punaḥ ।
kva vṛddhiḥ kva cha vā hānistava chinmātrarūpiṇaḥ ॥ 15-10॥

tvayyanantamahāmbhōdhau viśvavīchiḥ svabhāvataḥ ।
udētu vāstamāyātu na tē vṛddhirna vā kṣatiḥ ॥ 15-11॥

tāta chinmātrarūpō’si na tē bhinnamidaṃ jagat ।
ataḥ kasya kathaṃ kutra hēyōpādēyakalpanā ॥ 15-12॥

ēkasminnavyayē śāntē chidākāśē’malē tvayi ।
kutō janma kutō karma kutō’haṅkāra ēva cha ॥ 15-13॥

yattvaṃ paśyasi tatraikastvamēva pratibhāsasē ।
kiṃ pṛthak bhāsatē svarṇāt kaṭakāṅgadanūpuram ॥ 15-14॥

ayaṃ sō’hamayaṃ nāhaṃ vibhāgamiti santyaja ।
sarvamātmēti niśchitya niḥsaṅkalpaḥ sukhī bhava ॥ 15-15॥

tavaivājñānatō viśvaṃ tvamēkaḥ paramārthataḥ ।
tvattō’nyō nāsti saṃsārī nāsaṃsārī cha kaśchana ॥ 15-16॥

bhrāntimātramidaṃ viśvaṃ na kiñchiditi niśchayī ।
nirvāsanaḥ sphūrtimātrō na kiñchidiva śāmyati ॥ 15-17॥

ēka ēva bhavāmbhōdhāvāsīdasti bhaviṣyati ।
na tē bandhō’sti mōkṣō vā kṛtakṛtyaḥ sukhaṃ chara ॥ 15-18॥

mā saṅkalpavikalpābhyāṃ chittaṃ kṣōbhaya chinmaya ।
upaśāmya sukhaṃ tiṣṭha svātmanyānandavigrahē ॥ 15-19॥

tyajaiva dhyānaṃ sarvatra mā kiñchid hṛdi dhāraya ।
ātmā tvaṃ mukta ēvāsi kiṃ vimṛśya kariṣyasi ॥ 15-20॥