Narayaniyam Dashaka 86

sālvō bhaiṣmīvivāhē yadubalavijitaśchandrachūḍādvimānaṃ
vindan saubhaṃ sa māyī tvayi vasati kuruṃstvatpurīmabhyabhāṅkṣīt ।
pradyumnastaṃ nirundhannikhilayadubhaṭairnyagrahīdugravīryaṃ
tasyāmātyaṃ dyumantaṃ vyajani cha samaraḥ saptaviṃśatyahāntaḥ ॥1॥

tāvattvaṃ rāmaśālī tvaritamupagataḥ khaṇḍitaprāyasainyaṃ
saubhēśaṃ taṃ nyarundhāḥ sa cha kila gadayā śārṅgamabhraṃśayattē ।
māyātātaṃ vyahiṃsīdapi tava puratastattvayāpi kṣaṇārdhaṃ
nājñāyītyāhurēkē tadidamavamataṃ vyāsa ēva nyaṣēdhīt ॥2॥

kṣiptvā saubhaṃ gadāchūrṇitamudakanidhau maṅkṣu sālvē’pi chakrē-
ṇōtkṛttē dantavaktraḥ prasabhamabhipatannabhyamuñchadgadāṃ tē ।
kaumōdakyā hatō’sāvapi sukṛtanidhiśchaidyavatprāpadaikyaṃ
sarvēṣāmēṣa pūrvaṃ tvayi dhṛtamanasāṃ mōkṣaṇārthō’vatāraḥ ॥3॥

tvayyāyātē’tha jātē kila kurusadasi dyūtakē saṃyatāyāḥ
krandantyā yājñasēnyāḥ sakaruṇamakṛthāśchēlamālāmanantām ।
annāntaprāptaśarvāṃśajamunichakitadraupadīchintitō’tha
prāptaḥ śākānnamaśnan munigaṇamakṛthāstṛptimantaṃ vanāntē ॥4॥

yuddhōdyōgē’tha mantrē milati sati vṛtaḥ phalgunēna tvamēkaḥ
kauravyē dattasainyaḥ karipuramagamō dūtyakṛt pāṇḍavārtham ।
bhīṣmadrōṇādimānyē tava khalu vachanē dhikkṛtē kauravēṇa
vyāvṛṇvan viśvarūpaṃ munisadasi purīṃ kṣōbhayitvāgatō’bhūḥ ॥5॥

jiṣṇōstvaṃ kṛṣṇa sūtaḥ khalu samaramukhē bandhughātē dayāluṃ
khinnaṃ taṃ vīkṣya vīraṃ kimidamayi sakhē nitya ēkō’yamātmā ।
kō vadhyaḥ kō’tra hantā tadiha vadhabhiyaṃ prōjjhya mayyarpitātmā
dharmyaṃ yuddhaṃ charēti prakṛtimanayathā darśayan viśvarūpam ॥6॥

bhaktōttaṃsē’tha bhīṣmē tava dharaṇibharakṣēpakṛtyaikasaktē
nityaṃ nityaṃ vibhindatyayutasamadhikaṃ prāptasādē cha pārthē ।
niśśastratvapratijñāṃ vijahadarivaraṃ dhārayan krōdhaśālī-
vādhāvan prāñjaliṃ taṃ nataśirasamathō vīkṣya mōdādapāgāḥ ॥7॥

yuddhē drōṇasya hastisthiraraṇabhagadattēritaṃ vaiṣṇavāstraṃ
vakṣasyādhatta chakrasthagitaravimahāḥ prārdayatsindhurājam ।
nāgāstrē karṇamuktē kṣitimavanamayan kēvalaṃ kṛttamauliṃ
tatrē trāpi pārthaṃ kimiva nahi bhavān pāṇḍavānāmakārṣīt ॥8॥

yuddhādau tīrthagāmī sa khalu haladharō naimiśakṣētramṛchCha-
nnapratyutthāyisūtakṣayakṛdatha sutaṃ tatpadē kalpayitvā ।
yajñaghnaṃ valkalaṃ parvaṇi paridalayan snātatīrthō raṇāntē
samprāptō bhīmaduryōdhanaraṇamaśamaṃ vīkṣya yātaḥ purīṃ tē ॥9॥

saṃsuptadraupadēyakṣapaṇahatadhiyaṃ drauṇimētya tvaduktyā
tanmuktaṃ brāhmamastraṃ samahṛta vijayō mauliratnaṃ cha jahrē ।
uchChityai pāṇḍavānāṃ punarapi cha viśatyuttarāgarbhamastrē
rakṣannaṅguṣṭhamātraḥ kila jaṭharamagāśchakrapāṇirvibhō tvam ॥10॥

dharmaughaṃ dharmasūnōrabhidadhadakhilaṃ Chandamṛtyussa bhīṣma-
stvāṃ paśyan bhaktibhūmnaiva hi sapadi yayau niṣkalabrahmabhūyam ।
saṃyājyāthāśvamēdhaistribhiratimahitairdharmajaṃ pūrṇakāmaṃ
smprāptō dvarakāṃ tvaṃ pavanapurapatē pāhi māṃ sarvarōgāt ॥11॥