Gita Govindam Chapter 3 – Mugdha Madhusudana

॥ tṛtīyaḥ sargaḥ ॥
॥ mugdhamadhusūdanaḥ ॥

kaṃsārirapi saṃsāravāsanābandhaśṛṅkhalām ।
rādhāmādhāya hṛdayē tatyāja vrajasundarīḥ ॥ 18 ॥

itastatastāmanusṛtya rādhikā-manaṅgabāṇavraṇakhinnamānasaḥ ।
kṛtānutāpaḥ sa kalindanandinī-taṭāntakuñjē viṣasāda mādhavaḥ ॥ 19 ॥

॥ gītaṃ 7 ॥

māmiyaṃ chalitā vilōkya vṛtaṃ vadhūnichayēna ।
sāparādhatayā mayāpi na vāritātibhayēna ॥
hari hari hatādaratayā gatā sā kupitēva ॥ 1 ॥

kiṃ kariṣyati kiṃ vadiṣyati sā chiraṃ virahēṇa ।
kiṃ dhanēna janēna kiṃ mama jīvanēna gṛhēṇa ॥ 2 ॥

chintayāmi tadānanaṃ kuṭilabhru kōpabharēṇa ।
śōṇapadmamivōpari bhramatākulaṃ bhramarēṇa ॥ 3 ॥

tāmahaṃ hṛdi saṅgatāmaniśaṃ bhṛśaṃ ramayāmi ।
kiṃ vanē’nusarāmi tāmiha kiṃ vṛthā vilapāmi ॥ 4 ॥

tanvi khinnamasūyayā hṛdayaṃ tavākalayāmi ।
tanna vēdmi kutō gatāsi na tēna tē’nunayāmi ॥ 5 ॥

dṛśyatē puratō gatāgatamēva mē vidadhāsi ।
kiṃ purēva sasambhramaṃ parirambhaṇaṃ na dadāsi ॥ 6 ॥

kṣamyatāmaparaṃ kadāpi tavēdṛśaṃ na karōmi ।
dēhi sundari darśanaṃ mama manmathēna dunōmi ॥ 7 ॥

varṇitaṃ jayadēvakēna harēridaṃ pravaṇēna ।
kindubilvasamudrasambhavarōhiṇīramaṇēna ॥ 8 ॥

hṛdi bisalatāhārō nāyaṃ bhujaṅgamanāyakaḥ kuvalayadalaśrēṇī kaṇṭhē na sā garaladyutiḥ ।
malayajarajō nēdaṃ bhasma priyārahitē mayi prahara na harabhrāntyānaṅga krudhā kimu dhāvasi ॥ 20 ॥

pāṇau mā kuru chūtasāyakamamuṃ mā chāpamārōpaya krīḍānirjitaviśva mūrChitajanāghātēna kiṃ pauruṣam ।
tasyā ēva mṛgīdṛśō manasijaprēṅkhatkaṭākṣāśuga-śrēṇījarjaritaṃ manāgapi manō nādyāpi sandhukṣatē ॥ 21 ॥

bhrūchāpē nihitaḥ kaṭākṣaviśikhō nirmātu marmavyathāṃ śyāmātmā kuṭilaḥ karōtu kabarībhārō’pi mārōdyamam ।
mōhaṃ tāvadayaṃ cha tanvi tanutāṃ bimbādarō rāgavān sadvṛttastanamaṇdalastava kathaṃ prāṇairmama krīḍati ॥ 22 ॥

tāni sparśasukhāni tē cha taralāḥ snigdhā dṛśōrvibhramā-stadvaktrāmbujasaurabhaṃ sa cha sudhāsyandī girāṃ vakrimā ।
sā bimbādharamādhurīti viṣayāsaṅgē’pi chēnmānasaṃ tasyāṃ lagnasamādhi hanta virahavyādhiḥ kathaṃ vardhatē ॥ 23 ॥

bhrūpallavaṃ dhanurapāṅgataraṅgitāni bāṇāḥ guṇaḥ śravaṇapāliriti smarēṇa ।
tasyāmanaṅgajayajaṅgamadēvatāyāṃ astrāṇi nirjitajaganti kimarpitāni ॥ 24 ॥

[ēṣaḥ ślōkaḥ kēṣuchana saṃskaraṇēṣu vidyatē]

tiryakkaṇṭha vilōla mauli taralōttaṃ sasya vaṃśōchcharad-
dīptisthāna kṛtāvadhāna lalanā lakṣairna saṃlakṣitāḥ ।
sammugdhē madhusūdanasya madhurē rādhāmukhēndau sudhā-
sārē kandalitāśchiraṃ dadhatu vaḥ kṣēmaṃ kaṭākṣōrmmaya ॥ (25) ॥

॥ iti śrīgītagōvindē mugdhamadhusūdanō nāma tṛtīyaḥ sargaḥ ॥