Gita Govindam Chapter 1 – Samoda Damodara

॥ gītagōvindam ॥
॥ aṣṭapadī ॥

॥ śrī gōpālaka dhyānam ॥

yadgōpīvadanēndumaṇḍanamabhūtkastūrikāpatrakaṃ yallakṣmīkuchaśātakumbha kalaśē vyāgōchamindīvaram ।
yannirvāṇavidhānasādhanavidhau siddhāñjanaṃ yōgināṃ tannaśyāmaḻamāvirastu hṛdayē kṛṣṇābhidhānaṃ mahaḥ ॥ 1 ॥

॥ śrī jayadēva dhyānam ॥

rādhāmanōramaramāvararāsalīla-gānāmṛtaikabhaṇitaṃ kavirājarājam ।
śrīmādhavārchchanavidhavanurāgasadma-padmāvatīpriyatamaṃ praṇatōsmi nityam ॥ 2 ॥

śrīgōpalavilāsinī valayasadratnādimugdhākṛti śrīrādhāpatipādapadmabhajanānandābdhimagnō’niśam ॥
lōkē satkavirājarāja iti yaḥ khyātō dayāmbhōnidhiḥ taṃ vandē jayadēvasadgurumahaṃ padmāvatīvallabham ॥ 3 ॥

॥ prathamaḥ sargaḥ ॥
॥ sāmōdadāmōdaraḥ ॥

mēghairmēduramambaraṃ vanabhuvaḥ śyāmāstamāladrumai-rnaktaṃ bhīrurayaṃ tvamēva tadimaṃ rādhē gṛhaṃ prāpaya ।
itthaṃ nandanidēśitaśchalitayōḥ pratyadhvakuñjadrumaṃ rādhāmādhavayōrjayanti yamunākūlē rahaḥkēlayaḥ ॥ 1 ॥

vāgdēvatācharitachitritachittasadmā padmāvatīcharaṇachāraṇachakravartī ।
śrīvāsudēvaratikēlikathāsamētaṃ ētaṃ karōti jayadēvakaviḥ prabandham ॥ 2 ॥

yadi harismaraṇē sarasaṃ manō yadi vilāsakalāsu kutūhalam ।
madhurakōmalakāntapadāvalīṃ śṛṇu tadā jayadēvasarasvatīm ॥ 3 ॥

vāchaḥ pallavayatyumāpatidharaḥ sandarbhaśuddhiṃ girāṃ jānītē jayadēva ēva śaraṇaḥ ślāghyō durūhadrutē ।
śṛṅgārōttarasatpramēyarachanairāchāryagōvardhana-spardhī kō’pi na viśrutaḥ śrutidharō dhōyī kavikṣmāpatiḥ ॥ 4 ॥

॥ gītaṃ 1 ॥

pralayapayōdhijalē dhṛtavānasi vēdam ।
vihitavahitracharitramakhēdam ॥
kēśava dhṛtamīnaśarīra jaya jagadīśa harē ॥ 1 ॥

kṣitirativipulatarē tava tiṣṭhati pṛṣṭhē ।
dharaṇidharaṇakiṇachakragariṣṭhē ॥
kēśava dhṛtakachChaparūpa jaya jagadīśa harē ॥ 2 ॥

vasati daśanaśikharē dharaṇī tava lagnā ।
śaśini kalaṅkakalēva nimagnā ॥
kēśava dhṛtasūkararūpa jaya jagadīśa harē ॥ 3 ॥

tava karakamalavarē nakhamadbhutaśṛṅgam ।
dalitahiraṇyakaśiputanubhṛṅgam ॥
kēśava dhṛtanaraharirūpa jaya jagadīśa harē ॥ 4 ॥

Chalayasi vikramaṇē balimadbhutavāmana ।
padanakhanīrajanitajanapāvana ॥
kēśava dhṛtavāmanarūpa jaya jagadīśa harē ॥ 5 ॥

kṣatriyarudhiramayē jagadapagatapāpam ।
snapayasi payasi śamitabhavatāpam ॥
kēśava dhṛtabhṛghupatirūpa jaya jagadīśa harē ॥ 6 ॥

vitarasi dikṣu raṇē dikpatikamanīyam ।
daśamukhamaulibaliṃ ramaṇīyam ॥
kēśava dhṛtarāmaśarīra jaya jagadīśa harē ॥ 7 ॥

vahasi vapuṣi viśadē vasanaṃ jaladābham ।
halahatibhītimilitayamunābham ॥
kēśava dhṛtahaladhararūpa jaya jagadīśa harē ॥ 8 ॥

nindasi yajñavidhērahaha śrutijātam ।
sadayahṛdayadarśitapaśughātam ॥
kēśava dhṛtabuddhaśarīra jaya jagadīśa harē ॥ 9 ॥

mlēchChanivahanidhanē kalayasi karavālam ।
dhūmakētumiva kimapi karālam ॥
kēśava dhṛtakalkiśarīra jaya jagadīśa harē ॥ 10 ॥

śrījayadēvakavēridamuditamudāram ।
śṛṇu sukhadaṃ śubhadaṃ bhavasāram ॥
kēśava dhṛtadaśavidharūpa jaya jagadīśa harē ॥ 11 ॥

vēdānuddharatē jagannivahatē bhūgōlamudbibhratē daityaṃ dārayatē baliṃ Chalayatē kṣatrakṣayaṃ kurvatē ।
paulastyaṃ jayatē halaṃ kalayatē kāruṇyamātanvatē mlēchChānmūrchChayatē daśākṛtikṛtē kṛṣṇāya tubhyaṃ namaḥ ॥ 5 ॥

॥ gītaṃ 2 ॥

śritakamalākuchamaṇḍala! dhṛtakuṇḍala! ।
kalitalalitavanamāla! jaya, jaya, dēva! harē! ॥ 1 ॥

dinamaṇīmaṇḍalamaṇḍana! bhavakhaṇḍana! ।
munijanamānasahaṃsa! jaya, jaya, dēva! harē! ॥ 2 ॥

kāliyaviṣadharagañjana! janarañjana! ।
yadukulanalinadinēśa! jaya, jaya, dēva! harē! ॥ 3 ॥

madhumuranarakavināśana! garuḍāsana! ।
surakulakēlinidāna! jaya, jaya, dēva! harē! ॥ 4 ॥

amalakamaladalalōchana! bhavamōchan! ।
tribhuvanabhavananidhāna! jaya, jaya, dēva! harē! ॥ 5 ॥

janakasutākṛtabhūṣaṇa! jitadūṣaṇa! ।
samaraśamitadaśakaṇṭha! jaya, jaya, dēva! harē! ॥ 6 ॥

abhinavajaladharasundara! dhṛtamandara! ।
śrīmukhachandrachakōra! jaya, jaya, dēva! harē! ॥ 7 ॥

śrījayadēvakavēridaṃ kurutē mudam ।
maṅgalamujjvalagītaṃ; jaya, jaya, dēva! harē! ॥ 8 ॥

padmāpayōdharataṭīparirambhalagna-kāśmīramudritamurō madhusūdanasya ।
vyaktānurāgamiva khēladanaṅgakhēda-svēdāmbupūramanupūrayatu priyaṃ vaḥ ॥ 6 ॥

vasantē vāsantīkusumasukumārairavayavai-rbhramantīṃ kāntārē bahuvihitakṛṣṇānusaraṇām ।
amandaṃ kandarpajvarajanitachintākulatayā valadbādhāṃ rādhāṃ sarasamidamuchē sahacharī ॥ 7 ॥

॥ gītaṃ 3 ॥

lalitalavaṅgalatāpariśīlanakōmalamalayasamīrē ।
madhukaranikarakarambitakōkilakūjitakuñjakuṭīrē ॥
viharati haririha sarasavasantē nṛtyati yuvatijanēna samaṃ sakhi virahijanasya durantē ॥ 1 ॥

unmadamadanamanōrathapathikavadhūjanajanitavilāpē ।
alikulasaṅkulakusumasamūhanirākulabakulakalāpē ॥ 2 ॥

mṛgamadasaurabharabhasavaśaṃvadanavadalamālatamālē ।
yuvajanahṛdayavidāraṇamanasijanakharuchikiṃśukajālē ॥ 3 ॥

madanamahīpatikanakadaṇḍaruchikēśarakusumavikāsē ।
militaśilīmukhapāṭalipaṭalakṛtasmaratūṇavilāsē ॥ 4 ॥

vigalitalajjitajagadavalōkanataruṇakaruṇakṛtahāsē ।
virahinikṛntanakuntamukhākṛtikētakadanturitāśē ॥ 5 ॥

mādhavikāparimalalalitē navamālikajātisugandhau ।
munimanasāmapi mōhanakāriṇi taruṇākāraṇabandhau ॥ 6 ॥

sphuradatimuktalatāparirambhaṇamukulitapulakitachūtē ।
bṛndāvanavipinē parisaraparigatayamunājalapūtē ॥ 7 ॥

śrījayadēvabhaṇitamidamudayati haricharaṇasmṛtisāram ।
sarasavasantasamayavanavarṇanamanugatamadanavikāram ॥ 8 ॥

daravidalitamallīvallichañchatparāga-prakaṭitapaṭavāsairvāsayan kānanāni ।
iha hi dahati chētaḥ kētakīgandhabandhuḥ prasaradasamabāṇaprāṇavadgandhavāhaḥ ॥ 8 ॥

unmīlanmadhugandhalubdhamadhupavyādhūtachūtāṅkura-krīḍatkōkilakākalīkalakalairudgīrṇakarṇajvarāḥ ।
nīyantē pathikaiḥ kathaṅkathamapi dhyānāvadhānakṣaṇa-prāptaprāṇasamāsamāgamarasōllāsairamī vāsarāḥ ॥ 9 ॥

anēkanārīparirambhasambhrama-sphuranmanōhārivilāsalālasam ।
murārimārādupadarśayantyasau sakhī samakṣaṃ punarāha rādhikām ॥ 10 ॥

॥ gītaṃ 4 ॥

chandanacharchitanīlakalēbarapītavasanavanamālī ।
kēlichalanmaṇikuṇḍalamaṇḍitagaṇḍayugasmitaśālī ॥
haririhamugdhavadhūnikarē vilāsini vilasati kēliparē ॥ 1 ॥

pīnapayōdharabhārabharēṇa hariṃ pariramya sarāgam ।
gōpavadhūranugāyati kāchidudañchitapañchamarāgam ॥ 2 ॥

kāpi vilāsavilōlavilōchanakhēlanajanitamanōjam ।
dhyāyati mugdhavadhūradhikaṃ madhusūdanavadanasarōjam ॥ 3 ॥

kāpi kapōlatalē militā lapituṃ kimapi śrutimūlē ।
chāru chuchumba nitambavatī dayitaṃ pulakairanukūlē ॥ 4 ॥

kēlikalākutukēna cha kāchidamuṃ yamunājalakūlē ।
mañjulavañjulakuñjagataṃ vichakarṣa karēṇa dukūlē ॥ 5 ॥

karatalatālataralavalayāvalikalitakalasvanavaṃśē ।
rāsarasē sahanṛtyaparā hariṇā yuvatiḥ praśaśaṃsē ॥ 6 ॥

śliṣyati kāmapi chumbati kāmapi kāmapi ramayati rāmām ।
paśyati sasmitachāruparāmaparāmanugachChati vāmām ॥ 7 ॥

śrījayadēvakavēridamadbhutakēśavakēlirahasyam ।
vṛndāvanavipinē lalitaṃ vitanōtu śubhāni yaśasyam ॥ 8 ॥

viśvēṣāmanurañjanēna janayannānandamindīvara-śrēṇīśyāmalakōmalairupanayannaṅgairanaṅgōtsavam ।
svachChandaṃ vrajasundarībhirabhitaḥ pratyaṅgamāliṅkitaḥ śṛṅgāraḥ sakhi mūrtimāniva madhau mugdhō hariḥ krīḍati ॥ 11 ॥

adyōtsaṅgavasadbhujaṅgakavalaklēśādivēśāchalaṃ prālēyaplavanēchChayānusarati śrīkhaṇḍaśailānilaḥ ।
kiṃ cha snigdharasālamaulimukulānyālōkya harṣōdayā-dunmīlanti kuhūḥ kuhūriti kalōttālāḥ pikānāṃ giraḥ ॥ 12 ॥

rāsōllāsabharēṇavibhramabhṛtāmābhīravāmabhruvā-mabhyarṇaṃ pariramyanirbharamuraḥ prēmāndhayā rādhayā ।
sādhu tvadvadanaṃ sudhāmayamiti vyāhṛtya gītastuti-vyājādudbhaṭachumbitasmitamanōharī hariḥ pātu vaḥ ॥ 13 ॥

॥ iti śrīgītagōvindē sāmōdadāmōdarō nāma prathamaḥ sargaḥ ॥