Bhagavadgita Parayana – Chapter 8

ōṃ śrī paramātmanē namaḥ
atha aṣṭamō’dhyāyaḥ
akṣaraparabrahmayōgaḥ

arjuna uvācha
kiṃ tadbrahma kimadhyātmaṃ kiṃ karma puruṣōttama ।
adhibhūtaṃ cha kiṃ prōktam adhidaivaṃ kimuchyatē ॥1॥

adhiyajñaḥ kathaṃ kō’tra dēhē’sminmadhusūdana ।
prayāṇakālē cha kathaṃ jñēyō’si niyatātmabhiḥ ॥2॥

śrī bhagavānuvācha
akṣaraṃ brahma paramaṃ svabhāvō’dhyātmamuchyatē ।
bhūtabhāvōdbhavakaraḥ visargaḥ karmasañjñitaḥ ॥3॥

adhibhūtaṃ kṣarō bhāvaḥ puruṣaśchādhidaivatam ।
adhiyajñō’hamēvātra dēhē dēhabhṛtāṃ vara ॥4॥

antakālē cha māmēva smaranmuktvā kalēvaram ।
yaḥ prayāti sa madbhāvaṃ yāti nāstyatra saṃśayaḥ ॥5॥

yaṃ yaṃ vāpi smaranbhāvaṃ tyajatyantē kalēvaram ।
taṃ tamēvaiti kauntēya sadā tadbhāvabhāvitaḥ ॥6॥

tasmātsarvēṣu kālēṣu māmanusmara yudhya cha ।
mayyarpitamanōbuddhiḥ māmēvaiṣyasyasaṃśayam ॥7॥

abhyāsayōgayuktēna chētasā nānyagāminā ।
paramaṃ puruṣaṃ divyaṃ yāti pārthānuchintayan ॥8॥

kaviṃ purāṇamanuśāsitāram aṇōraṇīyāṃsamanusmarēdyaḥ ।
sarvasya dhātāramachintyarūpaṃ ādityavarṇaṃ tamasaḥ parastāt ॥9॥

prayāṇakālē manasā’chalēna bhaktyā yuktō yōgabalēna chaiva ।
bhruvōrmadhyē prāṇamāvēśya samyak sa taṃ paraṃ puruṣamupaiti divyam ॥10॥

yadakṣaraṃ vēdavidō vadanti viśanti yadyatayō vītarāgāḥ ।
yadichChantō brahmacharyaṃ charanti tattē padaṃ saṅgrahēṇa pravakṣyē ॥11॥

sarvadvārāṇi saṃyamya manō hṛdi nirudhya cha ।
mūrdhnyādhāyātmanaḥ prāṇam āsthitō yōgadhāraṇām ॥12॥

ōmityēkākṣaraṃ brahma vyāharanmāmanusmaran ।
yaḥ prayāti tyajandēhaṃ sa yāti paramāṃ gatim ॥13॥

ananyachētāḥ satataṃ yō māṃ smarati nityaśaḥ ।
tasyāhaṃ sulabhaḥ pārtha nityayuktasya yōginaḥ ॥14॥

māmupētya punarjanma duḥkhālayamaśāśvatam ।
nāpnuvanti mahātmānaḥ saṃsiddhiṃ paramāṃ gatāḥ ॥15॥

ābrahmabhuvanāllōkāḥ punarāvartinō’rjuna ।
māmupētya tu kauntēya punarjanma na vidyatē ॥16॥

sahasrayugaparyantam aharyadbrahmaṇō viduḥ ।
rātriṃ yugasahasrāntāṃ tē’hōrātravidō janāḥ ॥17॥

avyaktādvyaktayaḥ sarvāḥ prabhavantyaharāgamē ।
rātryāgamē pralīyantē tatraivāvyaktasañjñakē ॥18॥

bhūtagrāmaḥ sa ēvāyaṃ bhūtvā bhūtvā pralīyatē ।
rātryāgamē’vaśaḥ pārtha prabhavatyaharāgamē ॥19॥

parastasmāttu bhāvō’nyaḥ avyaktō’vyaktātsanātanaḥ ।
yaḥ sa sarvēṣu bhūtēṣu naśyatsu na vinaśyati ॥20॥

avyaktō’kṣara ityuktaḥ tamāhuḥ paramāṃ gatim ।
yaṃ prāpya na nivartantē taddhāma paramaṃ mama ॥21॥

puruṣaḥ sa paraḥ pārtha bhaktyā labhyastvananyayā ।
yasyāntaḥ sthāni bhūtāni yēna sarvamidaṃ tatam ॥22॥

yatra kālē tvanāvṛttim āvṛttiṃ chaiva yōginaḥ ।
prayātā yānti taṃ kālaṃ vakṣyāmi bharatarṣabha ॥23॥

agnirjyōtirahaḥ śuklaḥ ṣaṇmāsā uttarāyaṇam ।
tatra prayātā gachChanti brahma brahmavidō janāḥ ॥24॥

dhūmō rātristathā kṛṣṇaḥ ṣaṇmāsā dakṣiṇāyanam ।
tatra chāndramasaṃ jyōtiḥ yōgī prāpya nivartatē ॥25॥

śuklakṛṣṇē gatī hyētē jagataḥ śāśvatē matē ।
ēkayā yātyanāvṛttim anyayāvartatē punaḥ ॥26॥

naitē sṛtī pārtha jānan yōgī muhyati kaśchana ।
tasmātsarvēṣu kālēṣu yōgayuktō bhavārjuna ॥27॥

vēdēṣu yajñēṣu tapassu chaiva dānēṣu yatpuṇyaphalaṃ pradiṣṭam ।
atyēti tatsarvamidaṃ viditvā yōgī paraṃ sthānamupaiti chādyam ॥28॥

॥ ōṃ tatsaditi śrīmadbhagavadgītāsu upaniṣatsu brahmavidyāyāṃ
yōgaśāstrē śrīkṛṣṇārjunasaṃvādē akṣaraparabrahmayōgō nāma aṣṭamō’dhyāyaḥ ॥8