Bhagavadgita Parayana – Chapter 3

ōṃ śrī paramātmanē namaḥ
atha tṛtīyō’dhyāyaḥ
karmayōgaḥ

arjuna uvācha
jyāyasī chētkarmaṇastē matā buddhirjanārdana ।
tatkiṃ karmaṇi ghōrē māṃ niyōjayasi kēśava ॥1॥

vyāmiśrēṇēva vākyēna buddhiṃ mōhayasīva mē ।
tadēkaṃ vada niśchitya yēna śrēyō’hamāpnuyām ॥2॥

śrī bhagavānuvācha
lōkē’smin​dvividhā niṣṭhā purā prōktā mayā’nagha ।
jñānayōgēna sāṅkhyānāṃ karmayōgēna yōginām ॥3॥

na karmaṇāmanārambhāt naiṣkarmyaṃ puruṣō’śnutē ।
na cha sannyasanādēva siddhiṃ samadhigachChati ॥4॥

na hi kaśchitkṣaṇamapi jātu tiṣṭhatyakarmakṛt ।
kāryatē hyavaśaḥ karma sarvaḥ prakṛtijairguṇaiḥ ॥5॥

karmēndriyāṇi saṃyamya ya āstē manasā smaran ।
indriyārthānvimūḍhātmā mithyāchāraḥ sa uchyatē ॥6॥

yastvindriyāṇi manasā niyamyārabhatē’rjuna ।
karmēndriyaiḥ karmayōgam asaktaḥ sa viśiṣyatē ॥7॥

niyataṃ kuru karma tvaṃ karma jyāyō hyakarmaṇaḥ ।
śarīrayātrā’pi cha tē na prasiddhyēdakarmaṇaḥ ॥8॥

yajñārthātkarmaṇō’nyatra lōkō’yaṃ karmabandhanaḥ ।
tadarthaṃ karma kauntēya muktasaṅgaḥ samāchara ॥9॥

sahayajñāḥ prajāḥ sṛṣṭvā purōvācha prajāpatiḥ ।
anēna prasaviṣyadhvaṃ ēṣa vō’stviṣṭakāmadhuk ॥10॥

dēvānbhāvayatā’nēna tē dēvā bhāvayantu vaḥ ।
parasparaṃ bhāvayantaḥ śrēyaḥ paramavāpsyatha ॥11॥

iṣṭānbhōgānhi vō dēvāḥ dāsyantē yajñabhāvitāḥ ।
tairdattānapradāyaibhyaḥ yō bhuṅktē stēna ēva saḥ ॥12॥

yajñaśiṣṭāśinaḥ santaḥ muchyantē sarvakilbiṣaiḥ ।
bhuñjatē tē tvaghaṃ pāpāḥ yē pachantyātmakāraṇāt ॥13॥

annādbhavanti bhūtāni parjanyādannasambhavaḥ ।
yajñādbhavati parjanyaḥ yajñaḥ karmasamudbhavaḥ ॥14॥

karma brahmōdbhavaṃ viddhi brahmākṣarasamudbhavam ।
tasmātsarvagataṃ brahma nityaṃ yajñē pratiṣṭhitam ॥15॥

ēvaṃ pravartitaṃ chakraṃ nānuvartayatīha yaḥ ।
aghāyurindriyārāmaḥ mōghaṃ pārtha sa jīvati ॥16॥

yastvātmaratirēva syāt ātmatṛptaścha mānavaḥ ।
ātmanyēva cha santuṣṭaḥ tasya kāryaṃ na vidyatē ॥17॥

naiva tasya kṛtēnārthaḥ nākṛtēnēha kaśchana ।
na chāsya sarvabhūtēṣu kaśchidarthavyapāśrayaḥ ॥18॥

tasmādasaktaḥ satataṃ kāryaṃ karma samāchara ।
asaktō hyācharankarma paramāpnōti pūruṣaḥ ॥19॥

karmaṇaiva hi saṃsiddhiṃ āsthitā janakādayaḥ ।
lōkasaṅgrahamēvāpi sampaśyankartumarhasi ॥20॥

yadyadācharati śrēṣṭhaḥ tattadēvētarō janaḥ ।
sa yatpramāṇaṃ kurutē lōkastadanuvartatē ॥21॥

na mē pārthāsti kartavyaṃ triṣu lōkēṣu kiñchana ।
nānavāptamavāptavyaṃ varta ēva cha karmaṇi ॥22॥

yadi hyahaṃ na vartēya jātu karmaṇyatandritaḥ ।
mama vartmānuvartantē manuṣyāḥ pārtha sarvaśaḥ ॥23॥

utsīdēyurimē lōkāḥ na kuryāṃ karma chēdaham ।
saṅkarasya cha kartā syām upahanyāmimāḥ prajāḥ ॥24॥

saktāḥ karmaṇyavidvāṃsaḥ yathā kurvanti bhārata ।
kuryādvidvāṃstathā’saktaḥ chikīrṣurlōkasaṅgraham ॥25॥

na buddhibhēdaṃ janayēt ajñānāṃ karmasaṅginām ।
jōṣayētsarvakarmāṇi vidvānyuktaḥ samācharan ॥26॥

prakṛtēḥ kriyamāṇāni guṇaiḥ karmāṇi sarvaśaḥ ।
ahaṅkāravimūḍhātmā kartā’hamiti manyatē ॥27॥

tattvavittu mahābāhō guṇakarmavibhāgayōḥ ।
guṇā guṇēṣu vartantē iti matvā na sajjatē ॥28॥

prakṛtērguṇasammūḍhāḥ sajjantē guṇakarmasu ।
tānakṛtsnavidō mandān kṛtsnavinna vichālayēt ॥29॥

mayi sarvāṇi karmāṇi sannyasyādhyātmachētasā ।
nirāśīrnirmamō bhūtvā yudhyasva vigatajvaraḥ ॥30॥

yē mē matamidaṃ nityam anutiṣṭhanti mānavāḥ ।
śraddhāvantō’nasūyantaḥ muchyantē tē’pi karmabhiḥ ॥31॥

yē tvētadabhyasūyantaḥ nānutiṣṭhanti mē matam ।
sarvajñānavimūḍhāṃstān viddhi naṣṭānachētasaḥ ॥32॥

sadṛśaṃ chēṣṭatē svasyāḥ prakṛtērjñānavānapi ।
prakṛtiṃ yānti bhūtāni nigrahaḥ kiṃ kariṣyati ॥33॥

indriyasyēndriyasyārthē rāgadvēṣau vyavasthitau ।
tayōrna vaśamāgachChēt tau hyasya paripanthinau ॥34॥

śrēyānsvadharmō viguṇaḥ paradharmātsvanuṣṭhitāt ।
svadharmē nidhanaṃ śrēyaḥ paradharmō bhayāvahaḥ ॥35॥

arjuna uvācha
atha kēna prayuktō’yaṃ pāpaṃ charati pūruṣaḥ ।
anichChannapi vārṣṇēya balādiva niyōjitaḥ ॥36॥

śrī bhagavānuvācha
kāma ēṣa krōdha ēṣaḥ rajōguṇasamudbhavaḥ ।
mahāśanō mahāpāpmā viddhyēnamiha vairiṇam ॥37॥

dhūmēnāvriyatē vahniḥ yathā”darśō malēna cha ।
yathōlbēnāvṛtō garbhaḥ tathā tēnēdamāvṛtam ॥38॥

āvṛtaṃ jñānamētēna jñāninō nityavairiṇā ।
kāmarūpēṇa kauntēya duṣpūrēṇānalēna cha ॥39॥

indriyāṇi manō buddhiḥ asyādhiṣṭhānamuchyatē ।
ētairvimōhayatyēṣaḥ jñānamāvṛtya dēhinam ॥40॥

tasmāttvamindriyāṇyādau niyamya bharatarṣabha ।
pāpmānaṃ prajahi hyēnaṃ jñānavijñānanāśanam ॥41॥

indriyāṇi parāṇyāhuḥ indriyēbhyaḥ paraṃ manaḥ ।
manasastu parābuddhiḥ yō buddhēḥ paratastu saḥ ॥42॥

ēvaṃ buddhēḥ paraṃ buddhvā saṃstabhyātmānamātmanā ।
jahi śatruṃ mahābāhō kāmarūpaṃ durāsadam ॥43॥

॥ ōṃ tatsaditi śrīmadbhagavadgītāsu upaniṣatsu brahmavidyāyāṃ
yōgaśāstrē śrīkṛṣṇārjunasaṃvādē karmayōgō nāma tṛtīyō’dhyāyaḥ ॥