Bhagavadgita Parayana – Chapter 2

ōṃ śrī paramātmanē namaḥ
atha dvitīyō’dhyāyaḥ
sāṅkhyayōgaḥ

sañjaya uvācha
taṃ tathā kṛpayā”viṣṭam aśrupūrṇākulēkṣaṇam ।
viṣīdantamidaṃ vākyam uvācha madhusūdanaḥ ॥1॥

śrī bhagavānuvācha
kutastvā kaśmalamidaṃ viṣamē samupasthitam ।
anāryajuṣṭamasvargyam akīrtikaramarjuna ॥2॥

klaibyaṃ mā sma gamaḥ pārtha naitattvayyupapadyatē ।
kṣudraṃ hṛdayadaurbalyaṃ tyaktvōttiṣṭha parantapa ॥3॥

arjuna uvācha
kathaṃ bhīṣmamahaṃ saṅkhyē drōṇaṃ cha madhusūdana ।
iṣubhiḥ pratiyōtsyāmi pūjārhāvarisūdana ॥4॥

gurūnahatvā hi mahānubhāvān śrēyō bhōktuṃ bhaikṣyamapīha lōkē ।
hatvārthakāmāṃstu gurūnihaiva bhuñjīya bhōgān rudhirapradigdhān ॥5॥

na chaitadvidmaḥ katarannō garīyaḥ yadvā jayēma yadi vā nō jayēyuḥ ।
yānēva hatvā na jijīviṣāmaḥ tē’vasthitāḥ pramukhē dhārtarāṣṭrāḥ ॥6॥

kārpaṇyadōṣōpahatasvabhāvaḥ pṛchChāmi tvāṃ dharmasammūḍhachētāḥ ।
yachChrēyaḥ syānniśchitaṃ brūhi tanmē śiṣyastē’haṃ śādhi māṃ tvāṃ prapannam ॥7॥

na hi prapaśyāmi mamāpanudyāt yachChōkamuchChōṣaṇamindriyāṇām ।
avāpya bhūmāvasapatnamṛddhaṃ rājyaṃ surāṇāmapi chādhipatyam ॥8॥

sañjaya uvācha
ēvamuktvā hṛṣīkēśaṃ guḍākēśaḥ parantapaḥ ।
na yōtsya iti gōvindam uktvā tūṣṇīṃ babhūva ha ॥9॥

tamuvācha hṛṣīkēśaḥ prahasanniva bhārata ।
sēnayōrubhayōrmadhyē viṣīdantamidaṃ vachaḥ ॥10॥

śrī bhagavānuvācha
aśōchyānanvaśōchastvaṃ prajñāvādāṃścha bhāṣasē ।
gatāsūnagatāsūṃścha nānuśōchanti paṇḍitāḥ ॥11॥

na tvēvāhaṃ jātu nāsaṃ na tvaṃ nēmē janādhipāḥ ।
na chaiva na bhaviṣyāmaḥ sarvē vayamataḥ param ॥12॥

dēhinō’sminyathā dēhē kaumāraṃ yauvanaṃ jarā ।
tathā dēhāntaraprāptiḥ dhīrastatra na muhyati ॥13॥

mātrāsparśāstu kauntēya śītōṣṇasukhaduḥkhadāḥ ।
āgamāpāyinō’nityāḥ tāṃstitikṣasva bhārata ॥14॥

yaṃ hi na vyathayantyētē puruṣaṃ puruṣarṣabha ।
samaduḥkhasukhaṃ dhīraṃ sō’mṛtatvāya kalpatē ॥15॥

nāsatō vidyatē bhāvaḥ nābhāvō vidyatē sataḥ ।
ubhayōrapi dṛṣṭō’ntaḥ tvanayōstattvadarśibhiḥ ॥16॥

avināśi tu tadviddhi yēna sarvamidaṃ tatam ।
vināśamavyayasyāsya na kaśchitkartumarhati ॥17॥

antavanta imē dēhāḥ nityasyōktāḥ śarīriṇaḥ ।
anāśinō’pramēyasya tasmādyudhyasva bhārata ॥18॥

ya ēnaṃ vētti hantāraṃ yaśchainaṃ manyatē hatam ।
ubhau tau na vijānītaḥ nāyaṃ hanti na hanyatē ॥19॥

na jāyatē mriyatē vā kadāchit nāyaṃ bhūtvā bhavitā vā na bhūyaḥ ।
ajō nityaḥ śāśvatō’yaṃ purāṇaḥ na hanyatē hanyamānē śarīrē ॥20॥

vēdāvināśinaṃ nityaṃ ya ēnamajamavyayam ।
kathaṃ sa puruṣaḥ pārtha kaṃ ghātayati hanti kam ॥21॥

vāsāṃsi jīrṇāni yathā vihāya navāni gṛhṇāti narō’parāṇi ।
tathā śarīrāṇi vihāya jīrṇāni anyāni saṃyāti navāni dēhī ॥22॥

nainaṃ Chindanti śastrāṇi nainaṃ dahati pāvakaḥ ।
na chainaṃ klēdayantyāpaḥ na śōṣayati mārutaḥ ॥23॥

achChēdyō’yamadāhyō’yam aklēdyō’śōṣya ēva cha ।
nityaḥ sarvagataḥ sthāṇuḥ achalō’yaṃ sanātanaḥ ॥24॥

avyaktō’yamachintyō’yam avikāryō’yamuchyatē ।
tasmādēvaṃ viditvainaṃ nānuśōchitumarhasi ॥25॥

atha chainaṃ nityajātaṃ nityaṃ vā manyasē mṛtam ।
tathā’pi tvaṃ mahābāhō naivaṃ śōchitumarhasi ॥26॥

jātasya hi dhruvō mṛtyuḥ dhruvaṃ janma mṛtasya cha ।
tasmādaparihāryē’rthē na tvaṃ śōchitumarhasi ॥27॥

avyaktādīni bhūtāni vyaktamadhyāni bhārata ।
avyaktanidhanānyēva tatra kā paridēvanā ॥28॥

āścharyavatpaśyati kaśchidēnaṃ āścharyavadvadati tathaiva chānyaḥ ।
āścharyavachchainamanyaḥ śṛṇōti śrutvā’pyēnaṃ vēda na chaiva kaśchit ॥29॥

dēhī nityamavadhyō’yaṃ dēhē sarvasya bhārata ।
tasmātsarvāṇi bhūtāni na tvaṃ śōchitumarhasi ॥30॥

svadharmamapi chāvēkṣya na vikampitumarhasi ।
dharmyāddhi yuddhāchChrēyō’nyat kṣatriyasya na vidyatē ॥31॥

yadṛchChayā chōpapannaṃ svargadvāramapāvṛtam ।
sukhinaḥ kṣatriyāḥ pārtha labhantē yuddhamīdṛśam ॥32॥

atha chēttvamimaṃ dharmyaṃ saṅgrāmaṃ na kariṣyasi ।
tataḥ svadharmaṃ kīrtiṃ cha hitvā pāpamavāpsyasi ॥33॥

akīrtiṃ chāpi bhūtāni kathayiṣyanti tē’vyayām ।
sambhāvitasya chākīrtiḥ maraṇādatirichyatē ॥34॥

bhayādraṇāduparataṃ maṃsyantē tvāṃ mahārathāḥ ।
yēṣāṃ cha tvaṃ bahumataḥ bhūtvā yāsyasi lāghavam ॥35॥

avāchyavādāṃścha bahūn vadiṣyanti tavāhitāḥ ।
nindantastava sāmarthyaṃ tatō duḥkhataraṃ nu kim ॥36॥

hatō vā prāpsyasi svargaṃ jitvā vā bhōkṣyasēmahīm ।
tasmāduttiṣṭha kauntēya yuddhāya kṛtaniśchayaḥ ॥37॥

sukhaduḥkhē samē kṛtvā lābhālābhau jayājayau ।
tatō yuddhāya yujyasva naivaṃ pāpamavāpsyasi ॥38॥

ēṣā tē’bhihitā sāṅkhyē buddhiryōgē tvimāṃ śṛṇu ।
buddhyā yuktō yayā pārtha karmabandhaṃ prahāsyasi ॥39॥

nēhābhikramanāśō’sti pratyavāyō na vidyatē ।
svalpamapyasya dharmasya trāyatē mahatō bhayāt ॥40॥

vyavasāyātmikā buddhiḥ ēkēha kurunandana ।
bahuśākhā hyanantāścha buddhayō’vyavasāyinām ॥41॥

yāmimāṃ puṣpitāṃ vāchaṃ pravadantyavipaśchitaḥ ।
vēdavādaratāḥ pārtha nānyadastīti vādinaḥ ॥42॥

kāmātmānaḥ svargaparāḥ janmakarmaphalapradām ।
kriyāviśēṣabahulāṃ bhōgaiśvaryagatiṃ prati ॥43॥

bhōgaiśvaryaprasaktānāṃ tayā’pahṛtachētasām ।
vyavasāyātmikā buddhiḥ samādhau na vidhīyatē ॥44॥

traiguṇyaviṣayā vēdāḥ nistraiguṇyō bhavārjuna ।
nirdvandvō nityasattvasthaḥ niryōgakṣēma ātmavān ॥45॥

yāvānartha udapānē sarvataḥ samplutōdakē ।
tāvānsarvēṣu vēdēṣu brāhmaṇasya vijānataḥ ॥46॥

karmaṇyēvādhikārastē mā phalēṣu kadāchana ।
mā karmaphalahēturbhūḥ mā tē saṅgō’stvakarmaṇi ॥47॥

yōgasthaḥ kuru karmāṇi saṅgaṃ tyaktvā dhanañjaya ।
siddhyasiddhyōḥ samō bhūtvā samatvaṃ yōga uchyatē ॥48॥

dūrēṇa hyavaraṃ karma buddhiyōgāddhanañjaya ।
buddhau śaraṇamanvichCha kṛpaṇāḥ phalahētavaḥ ॥49॥

buddhiyuktō jahātīha ubhē sukṛtaduṣkṛtē ।
tasmādyōgāya yujyasva yōgaḥ karmasu kauśalam ॥50॥

karmajaṃ buddhiyuktā hi phalaṃ tyaktvā manīṣiṇaḥ ।
janmabandhavinirmuktāḥ padaṃ gachChantyanāmayam ॥51॥

yadā tē mōhakalilaṃ buddhirvyatitariṣyati ।
tadā gantā’si nirvēdaṃ śrōtavyasya śrutasya cha ॥52॥

śrutivipratipannā tē yadā sthāsyati niśchalā ।
samādhāvachalā buddhiḥ tadā yōgamavāpsyasi ॥53॥

arjuna uvācha
sthitaprajñasya kā bhāṣā samādhisthasya kēśava ।
sthitadhīḥ kiṃ prabhāṣēta kimāsīta vrajēta kim ॥54॥

śrī bhagavānuvācha
prajahāti yadā kāmān sarvānpārtha manōgatān ।
ātmanyēvātmanā tuṣṭaḥ sthitaprajñastadōchyatē ॥55॥

duḥkhēṣvanudvignamanāḥ sukhēṣu vigataspṛhaḥ ।
vītarāgabhayakrōdhaḥ sthitadhīrmuniruchyatē ॥56॥

yaḥ sarvatrānabhisnēhaḥ tattatprāpya śubhāśubham ।
nābhinandati na dvēṣṭi tasya prajñā pratiṣṭhitā ॥57॥

yadā saṃharatē chāyaṃ kūrmō’ṅgānīva sarvaśaḥ ।
indriyāṇīndriyārthēbhyaḥ tasya prajñā pratiṣṭhitā ॥58॥

viṣayā vinivartantē nirāhārasya dēhinaḥ ।
rasavarjaṃ rasō’pyasya paraṃ dṛṣṭvā nivartatē ॥59॥

yatatō hyapi kauntēya puruṣasya vipaśchitaḥ ।
indriyāṇi pramāthīni haranti prasabhaṃ manaḥ ॥60॥

tāni sarvāṇi saṃyamya yukta āsīta matparaḥ ।
vaśē hi yasyēndriyāṇi tasya prajñā pratiṣṭhitā ॥61॥

dhyāyatō viṣayānpuṃsaḥ saṅgastēṣūpajāyatē ।
saṅgātsañjāyatē kāmaḥ kāmātkrōdhō’bhijāyatē ॥62॥

krōdhādbhavati sammōhaḥ sammōhātsmṛtivibhramaḥ ।
smṛtibhraṃśāt buddhināśaḥ buddhināśātpraṇaśyati ॥63॥

rāgadvēṣaviyuktaistu viṣayānindriyaiścharan ।
ātmavaśyairvidhēyātmā prasādamadhigachChati ॥64॥

prasādē sarvaduḥkhānāṃ hānirasyōpajāyatē ।
prasannachētasō hyāśu buddhiḥ paryavatiṣṭhatē ॥65॥

nā’sti buddhirayuktasya na chāyuktasya bhāvanā ।
na chābhāvayataḥ śāntiḥ aśāntasya kutaḥ sukham ॥66॥

indriyāṇāṃ hi charatāṃ yanmanō’nuvidhīyatē ।
tadasya harati prajñāṃ vāyurnāvamivāmbhasi ॥67॥

tasmādyasya mahābāhō nigṛhītāni sarvaśaḥ ।
indriyāṇīndriyārthēbhyaḥ tasya prajñā pratiṣṭhitā ॥68॥

yā niśā sarvabhūtānāṃ tasyāṃ jāgarti saṃyamī ।
yasyāṃ jāgrati bhūtāni sā niśā paśyatō munēḥ ॥69॥

āpūryamāṇamachalapratiṣṭhaṃ samudramāpaḥ praviśanti yadvat ।
tadvatkāmā yaṃ praviśanti sarvē sa śāntimāpnōti na kāmakāmī ॥70॥

vihāya kāmānyaḥ sarvān pumāṃścharati nisspṛhaḥ ।
nirmamō nirahaṅkāraḥ sa śāntimadhigachChati ॥71॥

ēṣā brāhmī sthitiḥ pārtha naināṃ prāpya vimuhyati ।
sthitvā’syāmantakālē’pi brahmanirvāṇamṛchChati ॥72॥

॥ ōṃ tatsaditi śrīmadbhagavadgītāsu upaniṣatsu brahmavidyāyāṃ
yōgaśāstrē śrīkṛṣṇārjunasaṃvādē sāṅkhyayōgō nāma dvitīyō’dhyāyaḥ ॥