Ashtavakra Gita Chapter 3

aṣṭāvakra uvācha ॥
avināśinamātmānamēkaṃ vijñāya tattvataḥ ।
tavātmajñānasya dhīrasya kathamarthārjanē ratiḥ ॥ 3-1॥

ātmājñānādahō prītirviṣayabhramagōcharē ।
śuktērajñānatō lōbhō yathā rajatavibhramē ॥ 3-2॥

viśvaṃ sphurati yatrēdaṃ taraṅgā iva sāgarē ।
sō’hamasmīti vijñāya kiṃ dīna iva dhāvasi ॥ 3-3॥

śrutvāpi śuddhachaitanya ātmānamatisundaram ।
upasthē’tyantasaṃsaktō mālinyamadhigachChati ॥ 3-4॥

sarvabhūtēṣu chātmānaṃ sarvabhūtāni chātmani ।
munērjānata āścharyaṃ mamatvamanuvartatē ॥ 3-5॥

āsthitaḥ paramādvaitaṃ mōkṣārthē’pi vyavasthitaḥ ।
āścharyaṃ kāmavaśagō vikalaḥ kēliśikṣayā ॥ 3-6॥

udbhūtaṃ jñānadurmitramavadhāryātidurbalaḥ ।
āścharyaṃ kāmamākāṅkṣēt kālamantamanuśritaḥ ॥ 3-7॥

ihāmutra viraktasya nityānityavivēkinaḥ ।
āścharyaṃ mōkṣakāmasya mōkṣād ēva vibhīṣikā ॥ 3-8॥

dhīrastu bhōjyamānō’pi pīḍyamānō’pi sarvadā ।
ātmānaṃ kēvalaṃ paśyan na tuṣyati na kupyati ॥ 3-9॥

chēṣṭamānaṃ śarīraṃ svaṃ paśyatyanyaśarīravat ।
saṃstavē chāpi nindāyāṃ kathaṃ kṣubhyēt mahāśayaḥ ॥ 3-10॥

māyāmātramidaṃ viśvaṃ paśyan vigatakautukaḥ ।
api sannihitē mṛtyau kathaṃ trasyati dhīradhīḥ ॥ 3-11॥

niḥspṛhaṃ mānasaṃ yasya nairāśyē’pi mahātmanaḥ ।
tasyātmajñānatṛptasya tulanā kēna jāyatē ॥ 3-12॥

svabhāvād ēva jānānō dṛśyamētanna kiñchana ।
idaṃ grāhyamidaṃ tyājyaṃ sa kiṃ paśyati dhīradhīḥ ॥ 3-13॥

antastyaktakaṣāyasya nirdvandvasya nirāśiṣaḥ ।
yadṛchChayāgatō bhōgō na duḥkhāya na tuṣṭayē ॥ 3-14॥