அஷ்டாவக்ர கீ³தா ஏகாத³ஶோத்⁴யாய:

அஷ்டாவக்ர உவாச ॥
பா⁴வாபா⁴வவிகாரஶ்ச ஸ்வபா⁴வாதி³தி நிஶ்சயீ ।
நிர்விகாரோ க³தக்லேஶ: ஸுகே²னைவோபஶாம்யதி ॥ 11-1॥

ஈஶ்வர: ஸர்வனிர்மாதா நேஹான்ய இதி நிஶ்சயீ ।
அந்தர்க³லிதஸர்வாஶ: ஶாந்த: க்வாபி ந ஸஜ்ஜதே ॥ 11-2॥

ஆபத:³ ஸம்பத:³ காலே தை³வாதே³வேதி நிஶ்சயீ ।
த்ருப்த: ஸ்வஸ்தே²ந்த்³ரியோ நித்யம் ந வாஞ்ச²தி ந ஶோசதி ॥ 11-3॥

ஸுக²து³:கே² ஜன்மம்ருத்யூ தை³வாதே³வேதி நிஶ்சயீ ।
ஸாத்⁴யாத³ர்ஶீ நிராயாஸ: குர்வன்னபி ந லிப்யதே ॥ 11-4॥

சிந்தயா ஜாயதே து³:க²ம் நான்யதே²ஹேதி நிஶ்சயீ ।
தயா ஹீன: ஸுகீ² ஶாந்த: ஸர்வத்ர க³லிதஸ்ப்ருஹ: ॥ 11-5॥

நாஹம் தே³ஹோ ந மே தே³ஹோ போ³தோ⁴ஹமிதி நிஶ்சயீ ।
கைவல்யமிவ ஸம்ப்ராப்தோ ந ஸ்மரத்யக்ருதம் க்ருதம் ॥ 11-6॥

ஆப்³ரஹ்மஸ்தம்ப³பர்யந்தமஹமேவேதி நிஶ்சயீ ।
நிர்விகல்ப: ஶுசி: ஶாந்த: ப்ராப்தாப்ராப்தவினிர்வ்ருத: ॥ 11-7॥

நானாஶ்சர்யமித³ம் விஶ்வம் ந கிஞ்சிதி³தி நிஶ்சயீ ।
நிர்வாஸன: ஸ்பூ²ர்திமாத்ரோ ந கிஞ்சிதி³வ ஶாம்யதி ॥ 11-8॥