ଶ୍ରୀ ଲକ୍ଷ୍ମୀ ଅଷ୍ଟୋତ୍ତର ଶତନାମ ସ୍ତୋତ୍ରମ୍

ଦେଵ୍ୟୁଵାଚ
ଦେଵଦେଵ! ମହାଦେଵ! ତ୍ରିକାଲଜ୍ଞ! ମହେଶ୍ଵର!
କରୁଣାକର ଦେଵେଶ! ଭକ୍ତାନୁଗ୍ରହକାରକ! ॥
ଅଷ୍ଟୋତ୍ତର ଶତଂ ଲକ୍ଷ୍ମ୍ୟାଃ ଶ୍ରୋତୁମିଚ୍ଛାମି ତତ୍ତ୍ଵତଃ ॥

ଈଶ୍ଵର ଉଵାଚ
ଦେଵି! ସାଧୁ ମହାଭାଗେ ମହାଭାଗ୍ୟ ପ୍ରଦାୟକମ୍ ।
ସର୍ଵୈଶ୍ଵର୍ୟକରଂ ପୁଣ୍ୟଂ ସର୍ଵପାପ ପ୍ରଣାଶନମ୍ ॥
ସର୍ଵଦାରିଦ୍ର୍ୟ ଶମନଂ ଶ୍ରଵଣାଦ୍ଭୁକ୍ତି ମୁକ୍ତିଦମ୍ ।
ରାଜଵଶ୍ୟକରଂ ଦିଵ୍ୟଂ ଗୁହ୍ୟାଦ୍-ଗୁହ୍ୟତରଂ ପରମ୍ ॥
ଦୁର୍ଲଭଂ ସର୍ଵଦେଵାନାଂ ଚତୁଷ୍ଷଷ୍ଟି କଳାସ୍ପଦମ୍ ।
ପଦ୍ମାଦୀନାଂ ଵରାଂତାନାଂ ନିଧୀନାଂ ନିତ୍ୟଦାୟକମ୍ ॥
ସମସ୍ତ ଦେଵ ସଂସେଵ୍ୟଂ ଅଣିମାଦ୍ୟଷ୍ଟ ସିଦ୍ଧିଦମ୍ ।
କିମତ୍ର ବହୁନୋକ୍ତେନ ଦେଵୀ ପ୍ରତ୍ୟକ୍ଷଦାୟକମ୍ ॥
ତଵ ପ୍ରୀତ୍ୟାଦ୍ୟ ଵକ୍ଷ୍ୟାମି ସମାହିତମନାଶ୍ଶୃଣୁ ।
ଅଷ୍ଟୋତ୍ତର ଶତସ୍ୟାସ୍ୟ ମହାଲକ୍ଷ୍ମିସ୍ତୁ ଦେଵତା ॥
କ୍ଲୀଂ ବୀଜ ପଦମିତ୍ୟୁକ୍ତଂ ଶକ୍ତିସ୍ତୁ ଭୁଵନେଶ୍ଵରୀ ।
ଅଂଗନ୍ୟାସଃ କରନ୍ୟାସଃ ସ ଇତ୍ୟାଦି ପ୍ରକୀର୍ତିତଃ ॥

ଧ୍ୟାନଂ
ଵଂଦେ ପଦ୍ମକରାଂ ପ୍ରସନ୍ନଵଦନାଂ ସୌଭାଗ୍ୟଦାଂ ଭାଗ୍ୟଦାଂ
ହସ୍ତାଭ୍ୟାମଭୟପ୍ରଦାଂ ମଣିଗଣୈଃ ନାନାଵିଧୈଃ ଭୂଷିତାମ୍ ।
ଭକ୍ତାଭୀଷ୍ଟ ଫଲପ୍ରଦାଂ ହରିହର ବ୍ରହ୍ମାଧିଭିସ୍ସେଵିତାଂ
ପାର୍ଶ୍ଵେ ପଂକଜ ଶଂଖପଦ୍ମ ନିଧିଭିଃ ୟୁକ୍ତାଂ ସଦା ଶକ୍ତିଭିଃ ॥

ସରସିଜ ନୟନେ ସରୋଜହସ୍ତେ ଧଵଳ ତରାଂଶୁକ ଗଂଧମାଲ୍ୟ ଶୋଭେ ।
ଭଗଵତି ହରିଵଲ୍ଲଭେ ମନୋଜ୍ଞେ ତ୍ରିଭୁଵନ ଭୂତିକରି ପ୍ରସୀଦମହ୍ୟମ୍ ॥

ଓଂ
ପ୍ରକୃତିଂ ଵିକୃତିଂ ଵିଦ୍ୟାଂ ସର୍ଵଭୂତ-ହିତପ୍ରଦାମ୍ ।
ଶ୍ରଦ୍ଧାଂ ଵିଭୂତିଂ ସୁରଭିଂ ନମାମି ପରମାତ୍ମିକାମ୍ ॥ 1 ॥

ଵାଚଂ ପଦ୍ମାଲୟାଂ ପଦ୍ମାଂ ଶୁଚିଂ ସ୍ଵାହାଂ ସ୍ଵଧାଂ ସୁଧାମ୍ ।
ଧନ୍ୟାଂ ହିରଣ୍ମୟୟୀଂ ଲକ୍ଷ୍ମୀଂ ନିତ୍ୟପୁଷ୍ଟାଂ ଵିଭାଵରୀମ୍ ॥ 2 ॥

ଅଦିତିଂ ଚ ଦିତିଂ ଦୀପ୍ତାଂ ଵସୁଧାଂ ଵସୁଧାରିଣୀମ୍ ।
ନମାମି କମଲାଂ କାଂତାଂ କାମାକ୍ଷୀଂ କ୍ରୋଧସଂଭଵାମ୍ [କାମ୍ୟାଂ କ୍ଷୀରୋଦସଂଭଵାମ୍] ॥ 3 ॥

ଅନୁଗ୍ରହପ୍ରଦାଂ ବୁଦ୍ଧି-ମନଘାଂ ହରିଵଲ୍ଲଭାମ୍ ।
ଅଶୋକା-ମମୃତାଂ ଦୀପ୍ତାଂ ଲୋକଶୋକଵିନାଶିନୀମ୍ ॥ 4 ॥

ନମାମି ଧର୍ମନିଲୟାଂ କରୁଣାଂ ଲୋକମାତରମ୍ ।
ପଦ୍ମପ୍ରିୟାଂ ପଦ୍ମହସ୍ତାଂ ପଦ୍ମାକ୍ଷୀଂ ପଦ୍ମସୁଂଦରୀମ୍ ॥ 5 ॥

ପଦ୍ମୋଦ୍ଭଵାଂ ପଦ୍ମମୁଖୀଂ ପଦ୍ମନାଭପ୍ରିୟାଂ ରମାମ୍ ।
ପଦ୍ମମାଲାଧରାଂ ଦେଵୀଂ ପଦ୍ମିନୀଂ ପଦ୍ମଗଂଧିନୀମ୍ ॥ 6 ॥

ପୁଣ୍ୟଗଂଧାଂ ସୁପ୍ରସନ୍ନାଂ ପ୍ରସାଦାଭିମୁଖୀଂ ପ୍ରଭାମ୍ ।
ନମାମି ଚଂଦ୍ରଵଦନାଂ ଚଂଦ୍ରାଂ ଚଂଦ୍ରସହୋଦରୀମ୍ ॥ 7 ॥

ଚତୁର୍ଭୁଜାଂ ଚଂଦ୍ରରୂପା-ମିଂଦିରା-ମିଂଦୁଶୀତଲାମ୍ ।
ଆହ୍ଲାଦ ଜନନୀଂ ପୁଷ୍ଟିଂ ଶିଵାଂ ଶିଵକରୀଂ ସତୀମ୍ ॥ 8 ॥

ଵିମଲାଂ ଵିଶ୍ଵଜନନୀଂ ତୁଷ୍ଟିଂ ଦାରିଦ୍ର୍ୟନାଶିନୀମ୍ ।
ପ୍ରୀତିପୁଷ୍କରିଣୀଂ ଶାଂତାଂ ଶୁକ୍ଲମାଲ୍ୟାଂବରାଂ ଶ୍ରିୟମ୍ ॥ 9 ॥

ଭାସ୍କରୀଂ ବିଲ୍ଵନିଲୟାଂ ଵରାରୋହାଂ ୟଶସ୍ଵିନୀମ୍ ।
ଵସୁଂଧରା ମୁଦାରାଂଗାଂ ହରିଣୀଂ ହେମମାଲିନୀମ୍ ॥ 10 ॥

ଧନଧାନ୍ୟକରୀଂ ସିଦ୍ଧିଂ ସ୍ତ୍ରୈଣସୌମ୍ୟାଂ [ସଦାସୌମ୍ୟାଂ] ଶୁଭପ୍ରଦାମ୍ ।
ନୃପଵେଶ୍ମଗତାଂ ନଂଦାଂ ଵରଲକ୍ଷ୍ମୀଂ ଵସୁପ୍ରଦାମ୍ ॥ 11 ॥

ଶୁଭାଂ ହିରଣ୍ୟପ୍ରାକାରାଂ ସମୁଦ୍ରତନୟାଂ ଜୟାମ୍ ।
ନମାମି ମଂଗଳାଂ ଦେଵୀଂ ଵିଷ୍ଣୁଵକ୍ଷଃସ୍ଥଲସ୍ଥିତାମ୍ ॥ 12 ॥

ଵିଷ୍ଣୁପତ୍ନୀଂ, ପ୍ରସନ୍ନାକ୍ଷୀଂ ନାରାୟଣସମାଶ୍ରିତାମ୍ ।
ଦାରିଦ୍ର୍ୟଧ୍ଵଂସିନୀଂ ଦେଵୀଂ ସର୍ଵୋପଦ୍ରଵଵାରିଣୀମ୍ ॥ 13 ॥

ନଵଦୁର୍ଗାଂ ମହାକାଳୀଂ ବ୍ରହ୍ମଵିଷ୍ଣୁଶିଵାତ୍ମିକାମ୍ ।
ତ୍ରିକାଲଜ୍ଞାନସଂପନ୍ନାଂ ନମାମି ଭୁଵନେଶ୍ଵରୀମ୍ ॥ 14 ॥

ଲକ୍ଷ୍ମୀଂ କ୍ଷୀରସମୁଦ୍ରରାଜ ତନୟାଂ ଶ୍ରୀରଂଗଧାମେଶ୍ଵରୀମ୍ ।
ଦାସୀଭୂତ ସମସ୍ତଦେଵ ଵନିତାଂ ଲୋକୈକ ଦୀପାଂକୁରାମ୍ ॥
ଶ୍ରୀମନ୍ମଂଦ କଟାକ୍ଷ ଲବ୍ଧ ଵିଭଵଦ୍-ବ୍ରହ୍ମେଂଦ୍ର ଗଂଗାଧରାମ୍ ।
ତ୍ଵାଂ ତ୍ରୈଲୋକ୍ୟ କୁଟୁଂବିନୀଂ ସରସିଜାଂ ଵଂଦେ ମୁକୁଂଦପ୍ରିୟାମ୍ ॥ 15 ॥

ମାତର୍ନମାମି! କମଲେ! କମଲାୟତାକ୍ଷି!
ଶ୍ରୀ ଵିଷ୍ଣୁ ହୃତ୍-କମଲଵାସିନି! ଵିଶ୍ଵମାତଃ!
କ୍ଷୀରୋଦଜେ କମଲ କୋମଲ ଗର୍ଭଗୌରି!
ଲକ୍ଷ୍ମୀ! ପ୍ରସୀଦ ସତତଂ ସମତାଂ ଶରଣ୍ୟେ ॥ 16 ॥

ତ୍ରିକାଲଂ ୟୋ ଜପେତ୍ ଵିଦ୍ଵାନ୍ ଷଣ୍ମାସଂ ଵିଜିତେଂଦ୍ରିୟଃ ।
ଦାରିଦ୍ର୍ୟ ଧ୍ଵଂସନଂ କୃତ୍ଵା ସର୍ଵମାପ୍ନୋତ୍-ୟୟତ୍ନତଃ ।
ଦେଵୀନାମ ସହସ୍ରେଷୁ ପୁଣ୍ୟମଷ୍ଟୋତ୍ତରଂ ଶତମ୍ ।
ୟେନ ଶ୍ରିୟ ମଵାପ୍ନୋତି କୋଟିଜନ୍ମ ଦରିଦ୍ରତଃ ॥ 17 ॥

ଭୃଗୁଵାରେ ଶତଂ ଧୀମାନ୍ ପଠେତ୍ ଵତ୍ସରମାତ୍ରକମ୍ ।
ଅଷ୍ଟୈଶ୍ଵର୍ୟ ମଵାପ୍ନୋତି କୁବେର ଇଵ ଭୂତଲେ ॥
ଦାରିଦ୍ର୍ୟ ମୋଚନଂ ନାମ ସ୍ତୋତ୍ରମଂବାପରଂ ଶତମ୍ ।
ୟେନ ଶ୍ରିୟ ମଵାପ୍ନୋତି କୋଟିଜନ୍ମ ଦରିଦ୍ରତଃ ॥ 18 ॥

ଭୁକ୍ତ୍ଵାତୁ ଵିପୁଲାନ୍ ଭୋଗାନ୍ ଅଂତେ ସାୟୁଜ୍ୟମାପ୍ନୁୟାତ୍ ।
ପ୍ରାତଃକାଲେ ପଠେନ୍ନିତ୍ୟଂ ସର୍ଵ ଦୁଃଖୋପ ଶାଂତୟେ ।
ପଠଂତୁ ଚିଂତୟେଦ୍ଦେଵୀଂ ସର୍ଵାଭରଣ ଭୂଷିତାମ୍ ॥ 19 ॥

ଇତି ଶ୍ରୀ ଲକ୍ଷ୍ମ୍ୟଷ୍ଟୋତ୍ତରଶତନାମସ୍ତୋତ୍ରଂ ସଂପୂର୍ଣଂ