କନକଧାରା ସ୍ତୋତ୍ରମ୍

ଵଂଦେ ଵଂଦାରୁ ମଂଦାରମିଂଦିରାନଂଦକଂଦଲମ୍ ।
ଅମଂଦାନଂଦସଂଦୋହ ବଂଧୁରଂ ସିଂଧୁରାନନମ୍ ॥

ଅଂଗଂ ହରେଃ ପୁଲକଭୂଷଣମାଶ୍ରୟଂତୀ
ଭୃଂଗାଂଗନେଵ ମୁକୁଳାଭରଣଂ ତମାଲମ୍ ।
ଅଂଗୀକୃତାଖିଲଵିଭୂତିରପାଂଗଲୀଲା
ମାଂଗଳ୍ୟଦାସ୍ତୁ ମମ ମଂଗଳଦେଵତାୟାଃ ॥ 1 ॥

ମୁଗ୍ଧା ମୁହୁର୍ଵିଦଧତୀ ଵଦନେ ମୁରାରେଃ
ପ୍ରେମତ୍ରପାପ୍ରଣିହିତାନି ଗତାଗତାନି ।
ମାଲା ଦୃଶୋର୍ମଧୁକରୀଵ ମହୋତ୍ପଲେ ୟା
ସା ମେ ଶ୍ରିୟଂ ଦିଶତୁ ସାଗରସଂଭଵାୟାଃ ॥ 2 ॥

ଆମୀଲିତାକ୍ଷମଧିଗମ୍ୟ ମୁଦା ମୁକୁଂଦମ୍-
ଆନଂଦକଂଦମନିମେଷମନଂଗତଂତ୍ରମ୍ ।
ଆକେକରସ୍ଥିତକନୀନିକପକ୍ଷ୍ମନେତ୍ରଂ
ଭୂତ୍ୟୈ ଭଵେନ୍ମମ ଭୁଜଂଗଶୟାଂଗନାୟାଃ ॥ 3 ॥

ବାହ୍ଵଂତରେ ମଧୁଜିତଃ ଶ୍ରିତକୌସ୍ତୁଭେ ୟା
ହାରାଵଳୀଵ ହରିନୀଲମୟୀ ଵିଭାତି ।
କାମପ୍ରଦା ଭଗଵତୋଽପି କଟାକ୍ଷମାଲା
କଲ୍ୟାଣମାଵହତୁ ମେ କମଲାଲୟାୟାଃ ॥ 4 ॥

କାଲାଂବୁଦାଳିଲଲିତୋରସି କୈଟଭାରେଃ
ଧାରାଧରେ ସ୍ଫୁରତି ୟା ତଟିଦଂଗନେଵ ।
ମାତୁସ୍ସମସ୍ତଜଗତାଂ ମହନୀୟମୂର୍ତିଃ
ଭଦ୍ରାଣି ମେ ଦିଶତୁ ଭାର୍ଗଵନଂଦନାୟାଃ ॥ 5 ॥

ପ୍ରାପ୍ତଂ ପଦଂ ପ୍ରଥମତଃ ଖଲୁ ୟତ୍ପ୍ରଭାଵାତ୍
ମାଂଗଳ୍ୟଭାଜି ମଧୁମାଥିନି ମନ୍ମଥେନ ।
ମୟ୍ୟାପତେତ୍ତଦିହ ମଂଥରମୀକ୍ଷଣାର୍ଧଂ
ମଂଦାଲସଂ ଚ ମକରାଲୟକନ୍ୟକାୟାଃ ॥ 6 ॥

ଵିଶ୍ଵାମରେଂଦ୍ରପଦଵିଭ୍ରମଦାନଦକ୍ଷଂ
ଆନଂଦହେତୁରଧିକଂ ମୁରଵିଦ୍ଵିଷୋଽପି ।
ଈଷନ୍ନିଷୀଦତୁ ମୟି କ୍ଷଣମୀକ୍ଷଣାର୍ଥଂ [କ୍ଷଣମୀକ୍ଷଣାର୍ଧଂ]
ଇଂଦୀଵରୋଦରସହୋଦରମିଂଦିରାୟାଃ ॥ 7 ॥

ଇଷ୍ଟା ଵିଶିଷ୍ଟମତୟୋଽପି ୟୟା ଦୟାର୍ଦ୍ର
ଦୃଷ୍ଟ୍ୟା ତ୍ରିଵିଷ୍ଟପପଦଂ ସୁଲଭଂ ଲଭଂତେ ।
ଦୃଷ୍ଟିଃ ପ୍ରହୃଷ୍ଟକମଲୋଦରଦୀପ୍ତି-ରିଷ୍ଟାଂ
ପୁଷ୍ଟିଂ କୃଷୀଷ୍ଟ ମମ ପୁଷ୍କରଵିଷ୍ଟରାୟାଃ ॥ 8 ॥

ଦଦ୍ୟାଦ୍ଦୟାନୁପଵନୋ ଦ୍ରଵିଣାଂବୁଧାରା-
ମସ୍ମି-ନ୍ନକିଂଚନ ଵିହଂଗଶିଶୌ ଵିଷଣ୍ଣେ ।
ଦୁଷ୍କର୍ମଘର୍ମମପନୀୟ ଚିରାୟ ଦୂରଂ
ନାରାୟଣପ୍ରଣୟିନୀନୟନାଂବୁଵାହଃ ॥ 9 ॥

ଗୀର୍ଦେଵତେତି ଗରୁଡଧ୍ଵଜସୁଂଦରୀତି
ଶାକଂଭରୀତି ଶଶିଶେଖରଵଲ୍ଲଭେତି ।
ସୃଷ୍ଟିସ୍ଥିତିପ୍ରଳୟକେଲିଷୁ ସଂସ୍ଥିତାୟୈ
ତସ୍ୟୈ ନମସ୍ତ୍ରିଭୁଵନୈକଗୁରୋସ୍ତରୁଣ୍ୟୈ ॥ 10 ॥

ଶ୍ରୁତ୍ୟୈ ନମୋଽସ୍ତୁ ଶୁଭକର୍ମଫଲପ୍ରସୂତ୍ୟୈ
ରତ୍ୟୈ ନମୋଽସ୍ତୁ ରମଣୀୟଗୁଣାର୍ଣଵାୟୈ ।
ଶକ୍ତ୍ୟୈ ନମୋଽସ୍ତୁ ଶତପତ୍ରନିକେତନାୟୈ
ପୁଷ୍ଟ୍ୟୈ ନମୋଽସ୍ତୁ ପୁରୁଷୋତ୍ତମଵଲ୍ଲଭାୟୈ ॥ 11 ॥

ନମୋଽସ୍ତୁ ନାଳୀକନିଭାନନାୟୈ
ନମୋଽସ୍ତୁ ଦୁଗ୍ଧୋଦଧିଜନ୍ମଭୂମ୍ୟୈ ।
ନମୋଽସ୍ତୁ ସୋମାମୃତସୋଦରାୟୈ
ନମୋଽସ୍ତୁ ନାରାୟଣଵଲ୍ଲଭାୟୈ ॥ 12 ॥

ନମୋଽସ୍ତୁ ହେମାଂବୁଜପୀଠିକାୟୈ
ନମୋଽସ୍ତୁ ଭୂମଂଡଲନାୟିକାୟୈ ।
ନମୋଽସ୍ତୁ ଦେଵାଦିଦୟାପରାୟୈ
ନମୋଽସ୍ତୁ ଶାରଂଗାୟୁଧଵଲ୍ଲଭାୟୈ ॥ 13 ॥

ନମୋଽସ୍ତୁ ଦେଵ୍ୟୈ ଭୃଗୁନଂଦନାୟୈ
ନମୋଽସ୍ତୁ ଵିଷ୍ଣୋରୁରସିସ୍ଥିତାୟୈ ।
ନମୋଽସ୍ତୁ ଲକ୍ଷ୍ମ୍ୟୈ କମଲାଲୟାୟୈ
ନମୋଽସ୍ତୁ ଦାମୋଦରଵଲ୍ଲଭାୟୈ ॥ 14 ॥

ନମୋଽସ୍ତୁ କାଂତ୍ୟୈ କମଲେକ୍ଷଣାୟୈ
ନମୋଽସ୍ତୁ ଭୂତ୍ୟୈ ଭୁଵନପ୍ରସୂତ୍ୟୈ ।
ନମୋଽସ୍ତୁ ଦେଵାଦିଭିରର୍ଚିତାୟୈ
ନମୋଽସ୍ତୁ ନଂଦାତ୍ମଜଵଲ୍ଲଭାୟୈ ॥ 15 ॥

ସଂପତ୍କରାଣି ସକଲେଂଦ୍ରିୟନଂଦନାନି
ସାମ୍ରାଜ୍ୟଦାନଵିଭଵାନି ସରୋରୁହାକ୍ଷି ।
ତ୍ଵଦ୍ଵଂଦନାନି ଦୁରିତୋଦ୍ଧରଣୋଦ୍ୟତାନି
ମାମେଵ ମାତରନିଶଂ କଲୟଂତୁ ମାନ୍ୟେ ॥ 16 ॥

ୟତ୍କଟାକ୍ଷସମୁପାସନାଵିଧିଃ
ସେଵକସ୍ୟ ସକଲାର୍ଥସଂପଦଃ ।
ସଂତନୋତି ଵଚନାଂଗମାନସୈଃ
ତ୍ଵାଂ ମୁରାରିହୃଦୟେଶ୍ଵରୀଂ ଭଜେ ॥ 17 ॥

ସରସିଜନିଲୟେ ସରୋଜହସ୍ତେ [ସରସିଜନୟନେ]
ଧଵଳତମାଂଶୁକଗଂଧମାଲ୍ୟଶୋଭେ ।
ଭଗଵତି ହରିଵଲ୍ଲଭେ ମନୋଜ୍ଞେ
ତ୍ରିଭୁଵନଭୂତିକରି ପ୍ରସୀଦ ମହ୍ୟମ୍ ॥ 18 ॥

ଦିଗ୍ଘସ୍ତିଭିଃ କନକକୁଂଭମୁଖାଵସୃଷ୍ଟ
ସ୍ଵର୍ଵାହିନୀଵିମଲଚାରୁଜଲପ୍ଲୁତାଂଗୀମ୍ ।
ପ୍ରାତର୍ନମାମି ଜଗତାଂ ଜନନୀମଶେଷ
ଲୋକାଧିନାଥ-ଗୃହିଣୀମ୍-ଅମୃତାବ୍ଧିପୁତ୍ରୀମ୍ ॥ 19 ॥

କମଲେ କମଲାକ୍ଷଵଲ୍ଲଭେ ତ୍ଵଂ
କରୁଣାପୂରତରଂଗିତୈରପାଂଗୈଃ ।
ଅଵଲୋକୟ ମାମକିଂଚନାନାଂ
ପ୍ରଥମଂ ପାତ୍ରମକୃତ୍ରିମଂ ଦୟାୟାଃ ॥ 20 ॥

ସ୍ତୁଵଂତି ୟେ ସ୍ତୁତିଭିରମୂଭିରନ୍ଵହଂ
ତ୍ରୟୀମୟୀଂ ତ୍ରିଭୁଵନମାତରଂ ରମାମ୍ ।
ଗୁଣାଧିକା ଗୁରୁତର-ଭାଗ୍ୟ-ଭାଗିନୋ [ଭାଗିନଃ]
ଭଵଂତି ତେ ଭୁଵି ବୁଧଭାଵିତାଶୟାଃ ॥ 21 ॥

ସୁଵର୍ଣଧାରାସ୍ତୋତ୍ରଂ ୟଚ୍ଛଂକରାଚାର୍ୟ ନିର୍ମିତମ୍ ।
ତ୍ରିସଂଧ୍ୟଂ ୟଃ ପଠେନ୍ନିତ୍ୟଂ ସ କୁବେରସମୋ ଭଵେତ୍ ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ କନକଧାରାସ୍ତୋତ୍ରଂ ସଂପୂର୍ଣମ୍ ।