𑌮𑌹𑍇𑌂𑌦𑍍𑌰 𑌕𑍃𑌤 𑌮𑌹𑌾𑌲𑌕𑍍𑌷𑍍𑌮𑍀 𑌸𑍍𑌤𑍋𑌤𑍍𑌰𑌂

𑌮𑌹𑍇𑌂𑌦𑍍𑌰 𑌉𑌵𑌾𑌚
𑌨𑌮𑌃 𑌕𑌮𑌲𑌵𑌾𑌸𑌿𑌨𑍍𑌯𑍈 𑌨𑌾𑌰𑌾𑌯𑌣𑍍𑌯𑍈 𑌨𑌮𑍋 𑌨𑌮𑌃 ।
𑌕𑍃𑌷𑍍𑌣𑌪𑍍𑌰𑌿𑌯𑌾𑌯𑍈 𑌸𑌾𑌰𑌾𑌯𑍈 𑌪𑌦𑍍𑌮𑌾𑌯𑍈 𑌚 𑌨𑌮𑍋 𑌨𑌮𑌃 ॥ 1 ॥

𑌪𑌦𑍍𑌮𑌪𑌤𑍍𑌰𑍇𑌕𑍍𑌷𑌣𑌾𑌯𑍈 𑌚 𑌪𑌦𑍍𑌮𑌾𑌸𑍍𑌯𑌾𑌯𑍈 𑌨𑌮𑍋 𑌨𑌮𑌃 ।
𑌪𑌦𑍍𑌮𑌾𑌸𑌨𑌾𑌯𑍈 𑌪𑌦𑍍𑌮𑌿𑌨𑍍𑌯𑍈 𑌵𑍈𑌷𑍍𑌣𑌵𑍍𑌯𑍈 𑌚 𑌨𑌮𑍋 𑌨𑌮𑌃 ॥ 2 ॥

𑌸𑌰𑍍𑌵𑌸𑌂𑌪𑌤𑍍𑌸𑍍𑌵𑌰𑍂𑌪𑌾𑌯𑍈 𑌸𑌰𑍍𑌵𑌦𑌾𑌤𑍍𑌰𑍍𑌯𑍈 𑌨𑌮𑍋 𑌨𑌮𑌃 ।
𑌸𑍁𑌖𑌦𑌾𑌯𑍈 𑌮𑍋𑌕𑍍𑌷𑌦𑌾𑌯𑍈 𑌸𑌿𑌦𑍍𑌧𑌿𑌦𑌾𑌯𑍈 𑌨𑌮𑍋 𑌨𑌮𑌃 ॥ 3 ॥

𑌹𑌰𑌿𑌭𑌕𑍍𑌤𑌿𑌪𑍍𑌰𑌦𑌾𑌤𑍍𑌰𑍍𑌯𑍈 𑌚 𑌹𑌰𑍍𑌷𑌦𑌾𑌤𑍍𑌰𑍍𑌯𑍈 𑌨𑌮𑍋 𑌨𑌮𑌃 ।
𑌕𑍃𑌷𑍍𑌣𑌵𑌕𑍍𑌷𑌃𑌸𑍍𑌥𑌿𑌤𑌾𑌯𑍈 𑌚 𑌕𑍃𑌷𑍍𑌣𑍇𑌶𑌾𑌯𑍈 𑌨𑌮𑍋 𑌨𑌮𑌃 ॥ 4 ॥

𑌕𑍃𑌷𑍍𑌣𑌶𑍋𑌭𑌾𑌸𑍍𑌵𑌰𑍂𑌪𑌾𑌯𑍈 𑌰𑌤𑍍𑌨𑌾𑌢𑍍𑌯𑌾𑌯𑍈 𑌨𑌮𑍋 𑌨𑌮𑌃 ।
𑌸𑌂𑌪𑌤𑍍𑌯𑌧𑌿𑌷𑍍𑌠𑌾𑌤𑍃𑌦𑍇𑌵𑍍𑌯𑍈 𑌮𑌹𑌾𑌦𑍇𑌵𑍍𑌯𑍈 𑌨𑌮𑍋 𑌨𑌮𑌃 ॥ 5 ॥

𑌸𑌸𑍍𑌯𑌾𑌧𑌿𑌷𑍍𑌠𑌾𑌤𑍃𑌦𑍇𑌵𑍍𑌯𑍈 𑌚 𑌸𑌸𑍍𑌯𑌲𑌕𑍍𑌷𑍍𑌮𑍍𑌯𑍈 𑌨𑌮𑍋 𑌨𑌮𑌃 ।
𑌨𑌮𑍋 𑌬𑍁𑌦𑍍𑌧𑌿𑌸𑍍𑌵𑌰𑍂𑌪𑌾𑌯𑍈 𑌬𑍁𑌦𑍍𑌧𑌿𑌦𑌾𑌯𑍈 𑌨𑌮𑍋 𑌨𑌮𑌃 ॥ 6 ॥

𑌵𑍈𑌕𑍁𑌂𑌠𑍇 𑌚 𑌮𑌹𑌾𑌲𑌕𑍍𑌷𑍍𑌮𑍀𑌰𑍍𑌲𑌕𑍍𑌷𑍍𑌮𑍀𑌃 𑌕𑍍𑌷𑍀𑌰𑍋𑌦𑌸𑌾𑌗𑌰𑍇 ।
𑌸𑍍𑌵𑌰𑍍𑌗𑌲𑌕𑍍𑌷𑍍𑌮𑍀𑌰𑌿𑌂𑌦𑍍𑌰𑌗𑍇𑌹𑍇 𑌰𑌾𑌜𑌲𑌕𑍍𑌷𑍍𑌮𑍀𑌰𑍍𑌨𑍃𑌪𑌾𑌲𑌯𑍇 ॥ 𑍭 ॥

𑌗𑍃𑌹𑌲𑌕𑍍𑌷𑍍𑌮𑍀𑌶𑍍𑌚 𑌗𑍃𑌹𑌿𑌣𑌾𑌂 𑌗𑍇𑌹𑍇 𑌚 𑌗𑍃𑌹𑌦𑍇𑌵𑌤𑌾 ।
𑌸𑍁𑌰𑌭𑌿𑌃 𑌸𑌾 𑌗𑌵𑌾𑌂 𑌮𑌾𑌤𑌾 𑌦𑌕𑍍𑌷𑌿𑌣𑌾 𑌯𑌜𑍍𑌞𑌕𑌾𑌮𑌿𑌨𑍀 ॥ 𑍮 ॥

𑌅𑌦𑌿𑌤𑌿𑌰𑍍𑌦𑍇𑌵𑌮𑌾𑌤𑌾 𑌤𑍍𑌵𑌂 𑌕𑌮𑌲𑌾 𑌕𑌮𑌲𑌾𑌲𑌯𑍇 ।
𑌸𑍍𑌵𑌾𑌹𑌾 𑌤𑍍𑌵𑌂 𑌚 𑌹𑌵𑌿𑌰𑍍𑌦𑌾𑌨𑍇 𑌕𑌵𑍍𑌯𑌦𑌾𑌨𑍇 𑌸𑍍𑌵𑌧𑌾 𑌸𑍍𑌮𑍃𑌤𑌾 ॥ 𑍯 ॥

𑌤𑍍𑌵𑌂 𑌹𑌿 𑌵𑌿𑌷𑍍𑌣𑍁𑌸𑍍𑌵𑌰𑍂𑌪𑌾 𑌚 𑌸𑌰𑍍𑌵𑌾𑌧𑌾𑌰𑌾 𑌵𑌸𑍁𑌂𑌧𑌰𑌾 ।
𑌶𑍁𑌦𑍍𑌧𑌸𑌤𑍍𑌤𑍍𑌵𑌸𑍍𑌵𑌰𑍂𑌪𑌾 𑌤𑍍𑌵𑌂 𑌨𑌾𑌰𑌾𑌯𑌣𑌪𑌰𑌾𑌯𑌾𑌣𑌾 ॥ 10 ॥

𑌕𑍍𑌰𑍋𑌧𑌹𑌿𑌂𑌸𑌾𑌵𑌰𑍍𑌜𑌿𑌤𑌾 𑌚 𑌵𑌰𑌦𑌾 𑌚 𑌶𑍁𑌭𑌾𑌨𑌨𑌾 ।
𑌪𑌰𑌮𑌾𑌰𑍍𑌥𑌪𑍍𑌰𑌦𑌾 𑌤𑍍𑌵𑌂 𑌚 𑌹𑌰𑌿𑌦𑌾𑌸𑍍𑌯𑌪𑍍𑌰𑌦𑌾 𑌪𑌰𑌾 ॥ 11 ॥

𑌯𑌯𑌾 𑌵𑌿𑌨𑌾 𑌜𑌗𑌤𑍍𑌸𑌰𑍍𑌵𑌂 𑌭𑌸𑍍𑌮𑍀𑌭𑍂𑌤𑌮𑌸𑌾𑌰𑌕𑌮𑍍 ।
𑌜𑍀𑌵𑌨𑍍𑌮𑍃𑌤𑌂 𑌚 𑌵𑌿𑌶𑍍𑌵𑌂 𑌚 𑌶𑌵𑌤𑍁𑌲𑍍𑌯𑌂 𑌯𑌯𑌾 𑌵𑌿𑌨𑌾 ॥ 12 ॥

𑌸𑌰𑍍𑌵𑍇𑌷𑌾𑌂 𑌚 𑌪𑌰𑌾 𑌤𑍍𑌵𑌂 𑌹𑌿 𑌸𑌰𑍍𑌵𑌬𑌾𑌂𑌧𑌵𑌰𑍂𑌪𑌿𑌣𑍀 ।
𑌯𑌯𑌾 𑌵𑌿𑌨𑌾 𑌨 𑌸𑌂𑌭𑌾𑌷𑍍𑌯𑍋 𑌬𑌾𑌂𑌧𑌵𑍈𑌰𑍍𑌬𑌾𑌂𑌧𑌵𑌃 𑌸𑌦𑌾 ॥ 13 ॥

𑌤𑍍𑌵𑌯𑌾 𑌹𑍀𑌨𑍋 𑌬𑌂𑌧𑍁𑌹𑍀𑌨𑌸𑍍𑌤𑍍𑌵𑌯𑌾 𑌯𑍁𑌕𑍍𑌤𑌃 𑌸𑌬𑌾𑌂𑌧𑌵𑌃 ।
𑌧𑌰𑍍𑌮𑌾𑌰𑍍𑌥𑌕𑌾𑌮𑌮𑍋𑌕𑍍𑌷𑌾𑌣𑌾𑌂 𑌤𑍍𑌵𑌂 𑌚 𑌕𑌾𑌰𑌣𑌰𑍂𑌪𑌿𑌣𑍀 ॥ 14 ॥

𑌸𑍍𑌤𑌨𑌂𑌧𑌯𑌾𑌨𑌾𑌂 𑌤𑍍𑌵𑌂 𑌮𑌾𑌤𑌾 𑌶𑌿𑌶𑍂𑌨𑌾𑌂 𑌶𑍈𑌶𑌵𑍇 𑌯𑌥𑌾 ।
𑌤𑌥𑌾 𑌤𑍍𑌵𑌂 𑌸𑌰𑍍𑌵𑌦𑌾 𑌮𑌾𑌤𑌾 𑌸𑌰𑍍𑌵𑍇𑌷𑌾𑌂 𑌸𑌰𑍍𑌵𑌵𑌿𑌶𑍍𑌵𑌤𑌃 ॥ 15 ॥

𑌤𑍍𑌯𑌕𑍍𑌤𑌸𑍍𑌤𑌨𑍋 𑌮𑌾𑌤𑍃𑌹𑍀𑌨𑌃 𑌸 𑌚𑍇𑌜𑍍𑌜𑍀𑌵𑌤𑌿 𑌦𑍈𑌵𑌤𑌃 ।
𑌤𑍍𑌵𑌯𑌾 𑌹𑍀𑌨𑍋 𑌜𑌨𑌃 𑌕𑍋𑌽𑌪𑌿 𑌨 𑌜𑍀𑌵𑌤𑍍𑌯𑍇𑌵 𑌨𑌿𑌶𑍍𑌚𑌿𑌤𑌮𑍍 ॥ 16 ॥

𑌸𑍁𑌪𑍍𑌰𑌸𑌨𑍍𑌨𑌸𑍍𑌵𑌰𑍂𑌪𑌾 𑌤𑍍𑌵𑌂 𑌮𑍇 𑌪𑍍𑌰𑌸𑌨𑍍𑌨𑌾 𑌭𑌵𑌾𑌂𑌬𑌿𑌕𑍇 ।
𑌵𑍈𑌰𑌿𑌗𑍍𑌰𑌸𑍍𑌤𑌂 𑌚 𑌵𑌿𑌷𑌯𑌂 𑌦𑍇𑌹𑌿 𑌮𑌹𑍍𑌯𑌂 𑌸𑌨𑌾𑌤𑌨𑌿 ॥ 1𑍭 ॥

𑌵𑌯𑌂 𑌯𑌾𑌵𑌤𑍍𑌤𑍍𑌵𑌯𑌾 𑌹𑍀𑌨𑌾 𑌬𑌂𑌧𑍁𑌹𑍀𑌨𑌾𑌶𑍍𑌚 𑌭𑌿𑌕𑍍𑌷𑍁𑌕𑌾𑌃 ।
𑌸𑌰𑍍𑌵𑌸𑌂𑌪𑌦𑍍𑌵𑌿𑌹𑍀𑌨𑌾𑌶𑍍𑌚 𑌤𑌾𑌵𑌦𑍇𑌵 𑌹𑌰𑌿𑌪𑍍𑌰𑌿𑌯𑍇 ॥ 1𑍮 ॥

𑌰𑌾𑌜𑍍𑌯𑌂 𑌦𑍇𑌹𑌿 𑌶𑍍𑌰𑌿𑌯𑌂 𑌦𑍇𑌹𑌿 𑌬𑌲𑌂 𑌦𑍇𑌹𑌿 𑌸𑍁𑌰𑍇𑌶𑍍𑌵𑌰𑌿 ।
𑌕𑍀𑌰𑍍𑌤𑌿𑌂 𑌦𑍇𑌹𑌿 𑌧𑌨𑌂 𑌦𑍇𑌹𑌿 𑌪𑍁𑌤𑍍𑌰𑌾𑌨𑍍𑌮𑌹𑍍𑌯𑌂 𑌚 𑌦𑍇𑌹𑌿 𑌵𑍈 ॥ 1𑍯 ॥

𑌕𑌾𑌮𑌂 𑌦𑍇𑌹𑌿 𑌮𑌤𑌿𑌂 𑌦𑍇𑌹𑌿 𑌭𑍋𑌗𑌾𑌨𑍍 𑌦𑍇𑌹𑌿 𑌹𑌰𑌿𑌪𑍍𑌰𑌿𑌯𑍇 ।
𑌜𑍍𑌞𑌾𑌨𑌂 𑌦𑍇𑌹𑌿 𑌚 𑌧𑌰𑍍𑌮𑌂 𑌚 𑌸𑌰𑍍𑌵𑌸𑍌𑌭𑌾𑌗𑍍𑌯𑌮𑍀𑌪𑍍𑌸𑌿𑌤𑌮𑍍 ॥ 20 ॥

𑌸𑌰𑍍𑌵𑌾𑌧𑌿𑌕𑌾𑌰𑌮𑍇𑌵𑌂 𑌵𑍈 𑌪𑍍𑌰𑌭𑌾𑌵𑌾𑌂 𑌚 𑌪𑍍𑌰𑌤𑌾𑌪𑌕𑌮𑍍 ।
𑌜𑌯𑌂 𑌪𑌰𑌾𑌕𑍍𑌰𑌮𑌂 𑌯𑍁𑌦𑍍𑌧𑍇 𑌪𑌰𑌮𑍈𑌶𑍍𑌵𑌰𑍍𑌯𑌮𑍈𑌵 𑌚 ॥ 21 ॥

𑌇𑌤𑍍𑌯𑍁𑌕𑍍𑌤𑍍𑌵𑌾 𑌤𑍁 𑌮𑌹𑍇𑌂𑌦𑍍𑌰𑌶𑍍𑌚 𑌸𑌰𑍍𑌵𑍈𑌃 𑌸𑍁𑌰𑌗𑌣𑍈𑌃 𑌸𑌹 ।
𑌨𑌨𑌾𑌮 𑌸𑌾𑌶𑍍𑌰𑍁𑌨𑍇𑌤𑍍𑌰𑍋𑌽𑌯𑌂 𑌮𑍂𑌰𑍍𑌧𑍍𑌨𑌾 𑌚𑍈𑌵 𑌪𑍁𑌨𑌃 𑌪𑍁𑌨𑌃 ॥ 22 ॥

𑌬𑍍𑌰𑌹𑍍𑌮𑌾 𑌚 𑌶𑌂𑌕𑌰𑌶𑍍𑌚𑍈𑌵 𑌶𑍇𑌷𑍋 𑌧𑌰𑍍𑌮𑌶𑍍𑌚 𑌕𑍇𑌶𑌵𑌃 ।
𑌸𑌰𑍍𑌵𑍇 𑌚𑌕𑍍𑌰𑍁𑌃 𑌪𑌰𑍀𑌹𑌾𑌰𑌂 𑌸𑍁𑌰𑌾𑌰𑍍𑌥𑍇 𑌚 𑌪𑍁𑌨𑌃 𑌪𑍁𑌨𑌃 ॥ 23 ॥

𑌦𑍇𑌵𑍇𑌭𑍍𑌯𑌶𑍍𑌚 𑌵𑌰𑌂 𑌦𑌤𑍍𑌤𑍍𑌵𑌾 𑌪𑍁𑌷𑍍𑌪𑌮𑌾𑌲𑌾𑌂 𑌮𑌨𑍋𑌹𑌰𑌾𑌮𑍍 ।
𑌕𑍇𑌶𑌵𑌾𑌯 𑌦𑌦𑍌 𑌲𑌕𑍍𑌷𑍍𑌮𑍀𑌃 𑌸𑌂𑌤𑍁𑌷𑍍𑌟𑌾 𑌸𑍁𑌰𑌸𑌂𑌸𑌦𑌿 ॥ 24 ॥

𑌯𑌯𑍁𑌰𑍍𑌦𑍈𑌵𑌾𑌶𑍍𑌚 𑌸𑌂𑌤𑍁𑌷𑍍𑌟𑌾𑌃 𑌸𑍍𑌵𑌂 𑌸𑍍𑌵𑌂 𑌸𑍍𑌥𑌾𑌨𑌂 𑌚 𑌨𑌾𑌰𑌦 ।
𑌦𑍇𑌵𑍀 𑌯𑌯𑍌 𑌹𑌰𑍇𑌃 𑌕𑍍𑌰𑍋𑌡𑌂 𑌹𑍃𑌷𑍍𑌟𑌾 𑌕𑍍𑌷𑍀𑌰𑍋𑌦𑌶𑌾𑌯𑌿𑌨𑌃 ॥ 25 ॥

𑌯𑌯𑌤𑍁𑌸𑍍𑌤𑍌 𑌸𑍍𑌵𑌸𑍍𑌵𑌗𑍃𑌹𑌂 𑌬𑍍𑌰𑌹𑍍𑌮𑍇𑌶𑌾𑌨𑍌 𑌚 𑌨𑌾𑌰𑌦 ।
𑌦𑌤𑍍𑌤𑍍𑌵𑌾 𑌶𑍁𑌭𑌾𑌶𑌿𑌷𑌂 𑌤𑍌 𑌚 𑌦𑍇𑌵𑍇𑌭𑍍𑌯𑌃 𑌪𑍍𑌰𑍀𑌤𑌿𑌪𑍂𑌰𑍍𑌵𑌕𑌮𑍍 ॥ 26 ॥

𑌇𑌦𑌂 𑌸𑍍𑌤𑍋𑌤𑍍𑌰𑌂 𑌮𑌹𑌾𑌪𑍁𑌣𑍍𑌯𑌂 𑌤𑍍𑌰𑌿𑌸𑌂𑌧𑍍𑌯𑌂 𑌯𑌃 𑌪𑌠𑍇𑌨𑍍𑌨𑌰𑌃 ।
𑌕𑍁𑌬𑍇𑌰𑌤𑍁𑌲𑍍𑌯𑌃 𑌸 𑌭𑌵𑍇𑌦𑍍𑌰𑌾𑌜𑌰𑌾𑌜𑍇𑌶𑍍𑌵𑌰𑍋 𑌮𑌹𑌾𑌨𑍍 ॥ 2𑍭 ॥

𑌸𑌿𑌦𑍍𑌧𑌸𑍍𑌤𑍋𑌤𑍍𑌰𑌂 𑌯𑌦𑌿 𑌪𑌠𑍇𑌤𑍍 𑌸𑍋𑌽𑌪𑌿 𑌕𑌲𑍍𑌪𑌤𑌰𑍁𑌰𑍍𑌨𑌰𑌃 ।
𑌪𑌂𑌚𑌲𑌕𑍍𑌷𑌜𑌪𑍇𑌨𑍈𑌵 𑌸𑍍𑌤𑍋𑌤𑍍𑌰𑌸𑌿𑌦𑍍𑌧𑌿𑌰𑍍𑌭𑌵𑍇𑌨𑍍𑌨𑍃𑌣𑌾𑌮𑍍 ॥ 2𑍮 ॥

𑌸𑌿𑌦𑍍𑌧𑌸𑍍𑌤𑍋𑌤𑍍𑌰𑌂 𑌯𑌦𑌿 𑌪𑌠𑍇𑌨𑍍𑌮𑌾𑌸𑌮𑍇𑌕𑌂 𑌚 𑌸𑌂𑌯𑌤𑌃 ।
𑌮𑌹𑌾𑌸𑍁𑌖𑍀 𑌚 𑌰𑌾𑌜𑍇𑌂𑌦𑍍𑌰𑍋 𑌭𑌵𑌿𑌷𑍍𑌯𑌤𑌿 𑌨 𑌸𑌂𑌶𑌯𑌃 ॥ 2𑍯 ॥

𑌇𑌤𑌿 𑌶𑍍𑌰𑍀𑌬𑍍𑌰𑌹𑍍𑌮𑌵𑍈𑌵𑌰𑍍𑌤𑍇 𑌮𑌹𑌾𑌪𑍁𑌰𑌾𑌣𑍇 𑌦𑍍𑌵𑌿𑌤𑍀𑌯𑍇 𑌪𑍍𑌰𑌕𑍃𑌤𑌿𑌖𑌂𑌡𑍇 𑌨𑌾𑌰𑌦𑌨𑌾𑌰𑌾𑌯𑌣𑌸𑌂𑌵𑌾𑌦𑍇 𑌏𑌕𑍋𑌨𑌚𑌤𑍍𑌵𑌾𑌰𑌿𑌂𑌶𑌤𑍍𑌤𑌮𑍋𑌽𑌧𑍍𑌯𑌾𑌯𑍇 𑌮𑌹𑍇𑌂𑌦𑍍𑌰 𑌕𑍃𑌤 𑌶𑍍𑌰𑍀 𑌮𑌹𑌾𑌲𑌕𑍍𑌷𑍍𑌮𑍀 𑌸𑍍𑌤𑍋𑌤𑍍𑌰𑌮𑍍 ।