ଵିଦୁର ନୀତି – ଉଦ୍ୟୋଗ ପର୍ଵମ୍, ଅଧ୍ୟାୟଃ 35
॥ ଇତି ଶ୍ରୀମହାଭାରତେ ଉଦ୍ୟୋଗପର୍ଵଣି ପ୍ରଜାଗରପର୍ଵଣି
ଵିଦୁରହିତଵାକ୍ୟେ ପଂଚତ୍ରିଂଶୋଽଧ୍ୟାୟଃ ॥
ଧୃତରାଷ୍ଟ୍ର ଉଵାଚ ।
ବ୍ରୂହି ଭୂୟୋ ମହାବୁଦ୍ଧେ ଧର୍ମାର୍ଥସହିତଂ ଵଚଃ ।
ଶୃଣ୍ଵତୋ ନାସ୍ତି ମେ ତୃପ୍ତିର୍ଵିଚିତ୍ରାଣୀହ ଭାଷସେ ॥ 1॥
ଵିଦୁର ଉଵାଚ ।
ସର୍ଵତୀର୍ଥେଷୁ ଵା ସ୍ନାନଂ ସର୍ଵଭୂତେଷୁ ଚାର୍ଜଵମ୍ ।
ଉଭେ ଏତେ ସମେ ସ୍ୟାତାମାର୍ଜଵଂ ଵା ଵିଶିଷ୍ୟତେ ॥ 2॥
ଆର୍ଜଵଂ ପ୍ରତିପଦ୍ୟସ୍ଵ ପୁତ୍ରେଷୁ ସତତଂ ଵିଭୋ ।
ଇହ କୀର୍ତିଂ ପରାଂ ପ୍ରାପ୍ୟ ପ୍ରେତ୍ୟ ସ୍ଵର୍ଗମଵାପ୍ସ୍ୟସି ॥ 3॥
ୟାଵତ୍କୀର୍ତିର୍ମନୁଷ୍ୟସ୍ୟ ପୁଣ୍ୟା ଲୋକେଷୁ ଗୀୟତେ ।
ତାଵତ୍ସ ପୁରୁଷଵ୍ୟାଘ୍ର ସ୍ଵର୍ଗଲୋକେ ମହୀୟତେ ॥ 4॥
ଅତ୍ରାପ୍ୟୁଦାହରଂତୀମମିତିହାସଂ ପୁରାତନମ୍ ।
ଵିରୋଚନସ୍ୟ ସଂଵାଦଂ କେଶିନ୍ୟର୍ଥେ ସୁଧନ୍ଵନା ॥ 5॥
କେଶିନ୍ୟୁଵାଚ ।
କିଂ ବ୍ରାହ୍ମଣାଃ ସ୍ଵିଚ୍ଛ୍ରେୟାଂସୋ ଦିତିଜାଃ ସ୍ଵିଦ୍ଵିରୋଚନ ।
ଅଥ କେନ ସ୍ମ ପର୍ୟଂକଂ ସୁଧନ୍ଵା ନାଧିରୋହତି ॥ 6॥
ଵିରୋଚନ ଉଵାଚ ।
ପ୍ରାଜାପତ୍ୟା ହି ଵୈ ଶ୍ରେଷ୍ଠା ଵୟଂ କେଶିନି ସତ୍ତମାଃ ।
ଅସ୍ମାକଂ ଖଲ୍ଵିମେ ଲୋକାଃ କେ ଦେଵାଃ କେ ଦ୍ଵିଜାତୟଃ ॥ 7॥
କେଶିନ୍ୟୁଵାଚ ।
ଇହୈଵାସ୍ସ୍ଵ ପ୍ରତୀକ୍ଷାଵ ଉପସ୍ଥାନେ ଵିରୋଚନ ।
ସୁଧନ୍ଵା ପ୍ରାତରାଗଂତା ପଶ୍ୟେୟଂ ଵାଂ ସମାଗତୌ ॥ 8॥
ଵିରୋଚନ ଉଵାଚ ।
ତଥା ଭଦ୍ରେ କରିଷ୍ୟାମି ୟଥା ତ୍ଵଂ ଭୀରୁ ଭାଷସେ ।
ସୁଧନ୍ଵାନଂ ଚ ମାଂ ଚୈଵ ପ୍ରାତର୍ଦ୍ରଷ୍ଟାସି ସଂଗତୌ ॥ 9॥
ଵିଦୁର ଉଵାଚ ।
ଅନ୍ଵାଲଭେ ହିରଣ୍ମୟଂ ପ୍ରାହ୍ରାଦେଽହଂ ତଵାସନମ୍ ।
ଏକତ୍ଵମୁପସଂପନ୍ନୋ ନ ତ୍ଵାସେୟଂ ତ୍ଵୟା ସହ ॥ 10॥
ଵିରୋଚନ ଉଵାଚ ।
ଅନ୍ଵାହରଂତୁ ଫଲକଂ କୂର୍ଚଂ ଵାପ୍ୟଥ ଵା ବୃସୀମ୍ ।
ସୁଧନ୍ଵନ୍ନ ତ୍ଵମର୍ହୋଽସି ମୟା ସହ ସମାସନମ୍ ॥ 11॥
ସୁଧନ୍ଵୋଵାଚ ।
ପିତାପି ତେ ସମାସୀନମୁପାସୀତୈଵ ମାମଧଃ ।
ବାଲଃ ସୁଖୈଧିତୋ ଗେହେ ନ ତ୍ଵଂ କିଂ ଚନ ବୁଧ୍ୟସେ ॥ 12॥
ଵିରୋଚନ ଉଵାଚ ।
ହିରଣ୍ୟଂ ଚ ଗଵାଶ୍ଵଂ ଚ ୟଦ୍ଵିତ୍ତମସୁରେଷୁ ନଃ ।
ସୁଧନ୍ଵନ୍ଵିପଣେ ତେନ ପ୍ରଶ୍ନଂ ପୃଚ୍ଛାଵ ୟେ ଵିଦୁଃ ॥ 13॥
ସୁଧନ୍ଵୋଵାଚ ।
ହିରଣ୍ୟଂ ଚ ଗଵାଶ୍ଵଂ ଚ ତଵୈଵାସ୍ତୁ ଵିରୋଚନ ।
ପ୍ରାଣୟୋସ୍ତୁ ପଣଂ କୃତ୍ଵା ପ୍ରଶ୍ନଂ ପୃଚ୍ଛାଵ ୟେ ଵିଦୁଃ ॥ 14॥
ଵିରୋଚନ ଉଵାଚ ।
ଆଵାଂ କୁତ୍ର ଗମିଷ୍ୟାଵଃ ପ୍ରାଣୟୋର୍ଵିପଣେ କୃତେ ।
ନ ହି ଦେଵେଷ୍ଵହଂ ସ୍ଥାତା ନ ମନୁଷ୍ୟେଷୁ କର୍ହି ଚିତ୍ ॥ 15॥
ସୁଧନ୍ଵୋଵାଚ ।
ପିତରଂ ତେ ଗମିଷ୍ୟାଵଃ ପ୍ରାଣୟୋର୍ଵିପଣେ କୃତେ ।
ପୁତ୍ରସ୍ୟାପି ସ ହେତୋର୍ହି ପ୍ରହ୍ରାଦୋ ନାନୃତଂ ଵଦେତ୍ ॥ 16॥
ପ୍ରହ୍ଲାଦ ଉଵାଚ ।
ଇମୌ ତୌ ସଂପ୍ରଦୃଶ୍ୟେତେ ୟାଭ୍ୟାଂ ନ ଚରିତଂ ସହ ।
ଆଶୀଵିଷାଵିଵ କ୍ରୁଦ୍ଧାଵେକମାର୍ଗମିହାଗତୌ ॥ 17॥
କିଂ ଵୈ ସହୈଵ ଚରତୋ ନ ପୁରା ଚରତଃ ସହ ।
ଵିରୋଚନୈତତ୍ପୃଚ୍ଛାମି କିଂ ତେ ସଖ୍ୟଂ ସୁଧନ୍ଵନା ॥ 18॥
ଵିରୋଚନ ଉଵାଚ ।
ନ ମେ ସୁଧନ୍ଵନା ସଖ୍ୟଂ ପ୍ରାଣୟୋର୍ଵିପଣାଵହେ ।
ପ୍ରହ୍ରାଦ ତତ୍ତ୍ଵାମୃପ୍ଚ୍ଛାମି ମା ପ୍ରଶ୍ନମନୃତଂ ଵଦୀଃ ॥ 19॥
ପ୍ରହ୍ଲାଦ ଉଵାଚ ।
ଉଦକଂ ମଧୁପର୍କଂ ଚାପ୍ୟାନୟଂତୁ ସୁଧନ୍ଵନେ ।
ବ୍ରହ୍ମନ୍ନଭ୍ୟର୍ଚନୀୟୋଽସି ଶ୍ଵେତା ଗୌଃ ପୀଵରୀ କୃତା ॥ 20॥
ସୁଧନ୍ଵୋଵାଚ ।
ଉଦକଂ ମଧୁପର୍କଂ ଚ ପଥ ଏଵାର୍ପିତଂ ମମ ।
ପ୍ରହ୍ରାଦ ତ୍ଵଂ ତୁ ନୌ ପ୍ରଶ୍ନଂ ତଥ୍ୟଂ ପ୍ରବ୍ରୂହି ପୃଚ୍ଛତୋଃ ॥ 21॥
ପ୍ରହ୍ଲାଦ ଉଵାଚ ।
ପୁର୍ତୋ ଵାନ୍ୟୋ ଭଵାନ୍ବ୍ରହ୍ମନ୍ସାକ୍ଷ୍ୟେ ଚୈଵ ଭଵେତ୍ସ୍ଥିତଃ ।
ତୟୋର୍ଵିଵଦତୋଃ ପ୍ରଶ୍ନଂ କଥମସ୍ମଦ୍ଵିଭୋ ଵଦେତ୍ ॥ 22॥
ଅଥ ୟୋ ନୈଵ ପ୍ରବ୍ରୂୟାତ୍ସତ୍ୟଂ ଵା ୟଦି ଵାନୃତମ୍ ।
ଏତତ୍ସୁଧନ୍ଵନ୍ପୃଚ୍ଛାମି ଦୁର୍ଵିଵକ୍ତା ସ୍ମ କିଂ ଵସେତ୍ ॥ 23॥
ସୁଧନ୍ଵୋଵାଚ ।
ୟାଂ ରାତ୍ରିମଧିଵିନ୍ନା ସ୍ତ୍ରୀ ୟାଂ ଚୈଵାକ୍ଷ ପରାଜିତଃ ।
ୟାଂ ଚ ଭାରାଭିତପ୍ତାଂଗୋ ଦୁର୍ଵିଵକ୍ତା ସ୍ମ ତାଂ ଵସେତ୍ ॥ 24॥
ନଗରେ ପ୍ରତିରୁଦ୍ଧଃ ସନ୍ବହିର୍ଦ୍ଵାରେ ବୁଭୁକ୍ଷିତଃ ।
ଅମିତ୍ରାନ୍ଭୂୟସଃ ପଶ୍ୟଂଦୁର୍ଵିଵକ୍ତା ସ୍ମ ତାଂ ଵସେତ୍ ॥ 25॥
ପଂଚ ପଶ୍ଵନୃତେ ହଂତି ଦଶ ହଂତି ଗଵାନୃତେ ।
ଶତମଶ୍ଵାନୃତେ ହଂତି ସହସ୍ରଂ ପୁରୁଷାନୃତେ ॥ 26॥
ହଂତି ଜାତାନଜାତାଂଶ୍ଚ ହିରଣ୍ୟାର୍ଥୋଽନୃତଂ ଵଦନ୍ ।
ସର୍ଵଂ ଭୂମ୍ୟନୃତେ ହଂତି ମା ସ୍ମ ଭୂମ୍ୟନୃତଂ ଵଦୀଃ ॥ 27॥
ପ୍ରହ୍ଲାଦ ଉଵାଚ ।
ମତ୍ତଃ ଶ୍ରେୟାନଂଗିରା ଵୈ ସୁଧନ୍ଵା ତ୍ଵଦ୍ଵିରୋଚନ ।
ମାତାସ୍ୟ ଶ୍ରେୟସୀ ମାତୁସ୍ତସ୍ମାତ୍ତ୍ଵଂ ତେନ ଵୈ ଜିତଃ ॥ 28॥
ଵିରୋଚନ ସୁଧନ୍ଵାୟଂ ପ୍ରାଣାନାମୀଶ୍ଵରସ୍ତଵ ।
ସୁଧନ୍ଵନ୍ପୁନରିଚ୍ଛାମି ତ୍ଵୟା ଦତ୍ତଂ ଵିରୋଚନମ୍ ॥ 29॥
ସୁଧନ୍ଵୋଵାଚ ।
ୟଦ୍ଧର୍ମମଵୃଣୀଥାସ୍ତ୍ଵଂ ନ କାମାଦନୃତଂ ଵଦୀଃ ।
ପୁନର୍ଦଦାମି ତେ ତସ୍ମାତ୍ପୁତ୍ରଂ ପ୍ରହ୍ରାଦ ଦୁର୍ଲଭମ୍ ॥ 30॥
ଏଷ ପ୍ରହ୍ରାଦ ପୁତ୍ରସ୍ତେ ମୟା ଦତ୍ତୋ ଵିରୋଚନଃ ।
ପାଦପ୍ରକ୍ଷାଲନଂ କୁର୍ୟାତ୍କୁମାର୍ୟାଃ ସନ୍ନିଧୌ ମମ ॥ 31॥
ଵିଦୁର ଉଵାଚ ।
ତସ୍ମାଦ୍ରାଜେଂଦ୍ର ଭୂମ୍ୟର୍ଥେ ନାନୃତଂ ଵକ୍ତୁମର୍ହସି ।
ମା ଗମଃ ସ ସୁତାମାତ୍ୟୋଽତ୍ୟୟଂ ପୁତ୍ରାନନୁଭ୍ରମନ୍ ॥ 32॥
ନ ଦେଵା ୟଷ୍ଟିମାଦାୟ ରକ୍ଷଂତି ପଶୁପାଲଵତ୍ ।
ୟଂ ତୁ ରକ୍ଷିତୁମିଚ୍ଛଂତି ବୁଦ୍ଧ୍ୟା ସଂଵିଭଜଂତି ତମ୍ ॥ 33॥
ୟଥା ୟଥା ହି ପୁରୁଷଃ କଲ୍ୟାଣେ କୁରୁତେ ମନଃ ।
ତଥା ତଥାସ୍ୟ ସର୍ଵାର୍ଥାଃ ସିଧ୍ୟଂତେ ନାତ୍ର ସଂଶୟଃ ॥ 34॥
ନ ଛଂଦାଂସି ଵୃଜିନାତ୍ତାରୟଂତି
ଆୟାଵିନଂ ମାୟୟା ଵର୍ତମାନମ୍ ।
ନୀଡଂ ଶକୁଂତା ଇଵ ଜାତପକ୍ଷାଶ୍
ଛଂଦାଂସ୍ୟେନଂ ପ୍ରଜହତ୍ୟଂତକାଲେ ॥ 35॥
ମତ୍ତାପାନଂ କଲହଂ ପୂଗଵୈରଂ
ଭାର୍ୟାପତ୍ୟୋରଂତରଂ ଜ୍ଞାତିଭେଦମ୍ ।
ରାଜଦ୍ଵିଷ୍ଟଂ ସ୍ତ୍ରୀପୁମାଂସୋର୍ଵିଵାଦଂ
ଵର୍ଜ୍ୟାନ୍ୟାହୁର୍ୟଶ୍ଚ ପଂଥାଃ ପ୍ରଦୁଷ୍ଠଃ ॥ 36॥
ସାମୁଦ୍ରିକଂ ଵଣିଜଂ ଚୋରପୂର୍ଵଂ
ଶଲାକ ଧୂର୍ତଂ ଚ ଚିକିତ୍ସକଂ ଚ ।
ଅରିଂ ଚ ମିତ୍ରଂ ଚ କୁଶୀଲଵଂ ଚ
ନୈତାନ୍ସାଖ୍ୟେଷ୍ଵଧିକୁର୍ଵୀତ ସପ୍ତ ॥ 37॥
ମାନାଗ୍ନିହୋତ୍ରମୁତ ମାନମୌନଂ
ମାନେନାଧୀତମୁତ ମାନୟଜ୍ଞଃ ।
ଏତାନି ଚତ୍ଵାର୍ୟଭୟଂକରାଣି
ଭୟଂ ପ୍ରୟଚ୍ଛଂତ୍ୟୟଥା କୃତାନି ॥ 38॥
ଅଗାର ଦାହୀ ଗରଦଃ କୁଂଡାଶୀ ସୋମଵିକ୍ରୟୀ ।
ପର୍ଵ କାରଶ୍ଚ ସୂଚୀ ଚ ମିତ୍ର ଧ୍ରୁକ୍ପାରଦାରିକଃ ॥ 39॥
ଭ୍ରୂଣହା ଗୁରୁ ତଲ୍ପୀ ଚ ୟଶ୍ଚ ସ୍ୟାତ୍ପାନପୋ ଦ୍ଵିଜଃ ।
ଅତିତୀକ୍ଷ୍ଣଶ୍ଚ କାକଶ୍ଚ ନାସ୍ତିକୋ ଵେଦ ନିଂଦକଃ ॥ 40॥
ସ୍ରୁଵ ପ୍ରଗ୍ରହଣୋ ଵ୍ରାତ୍ୟଃ କୀନାଶଶ୍ଚାର୍ଥଵାନପି ।
ରକ୍ଷେତ୍ୟୁକ୍ତଶ୍ଚ ୟୋ ହିଂସ୍ୟାତ୍ସର୍ଵେ ବ୍ରହ୍ମଣ୍ହଣୈଃ ସମାଃ ॥ 41॥
ତୃଣୋକ୍ଲୟା ଜ୍ଞାୟତେ ଜାତରୂପଂ
ୟୁଗେ ଭଦ୍ରୋ ଵ୍ୟଵହାରେଣ ସାଧୁଃ ।
ଶୂରୋ ଭୟେଷ୍ଵର୍ଥକୃଚ୍ଛ୍ରେଷୁ ଧୀରଃ
କୃଚ୍ଛ୍ରାସ୍ଵାପତ୍ସୁ ସୁହୃଦଶ୍ଚାରୟଶ୍ ଚ ॥ 42॥
ଜରା ରୂପଂ ହରତି ହି ଧୈର୍ୟମାଶା
ମୃତ୍ୟୁଃ ପ୍ରାଣାଂଧର୍ମଚର୍ୟାମସୂୟା ।
କ୍ରୋଧଃ ଶ୍ରିୟଂ ଶୀଲମନାର୍ୟ ସେଵା
ହ୍ରିୟଂ କାମଃ ସର୍ଵମେଵାଭିମାନଃ ॥ 43॥
ଶ୍ରୀର୍ମଂଗଲାତ୍ପ୍ରଭଵତି ପ୍ରାଗଲ୍ଭ୍ୟାତ୍ସଂପ୍ରଵର୍ଧତେ ।
ଦାକ୍ଷ୍ୟାତ୍ତୁ କୁରୁତେ ମୂଲଂ ସଂୟମାତ୍ପ୍ରତିତିଷ୍ଠତି ॥ 44॥
ଅଷ୍ଟୌ ଗୁଣାଃ ପୁରୁଷଂ ଦୀପୟଂତି
ପ୍ରଜ୍ଞା ଚ କୌଲ୍ୟଂ ଚ ଦମଃ ଶ୍ରୁତଂ ଚ ।
ପରାକ୍ରମଶ୍ଚାବହୁ ଭାଷିତା ଚ
ଦାନଂ ୟଥାଶକ୍ତି କୃତଜ୍ଞତା ଚ ॥ 45॥
ଏତାନ୍ଗୁଣାଂସ୍ତାତ ମହାନୁଭାଵାନ୍
ଏକୋ ଗୁଣଃ ସଂଶ୍ରୟତେ ପ୍ରସହ୍ୟ ।
ରାଜା ୟଦା ସତ୍କୁରୁତେ ମନୁଷ୍ୟଂ
ସର୍ଵାନ୍ଗୁଣାନେଷ ଗୁଣୋଽତିଭାତି ॥ 46॥
ଅଷ୍ଟୌ ନୃପେମାନି ମନୁଷ୍ୟଲୋକେ
ସ୍ଵର୍ଗସ୍ୟ ଲୋକସ୍ୟ ନିଦର୍ଶନାନି ।
ଚତ୍ଵାର୍ୟେଷାମନ୍ଵଵେତାନି ସଦ୍ଭିଶ୍
ଚତ୍ଵାର୍ୟେଷାମନ୍ଵଵୟଂତି ସଂତଃ ॥ 47॥
ୟଜ୍ଞୋ ଦାନମଧ୍ୟୟନଂ ତପଶ୍ ଚ
ଚତ୍ଵାର୍ୟେତାନ୍ୟନ୍ଵଵେତାନି ସଦ୍ଭିଃ ।
ଦମଃ ସତ୍ୟମାର୍ଜଵମାନୃଶଂସ୍ୟଂ
ଚତ୍ଵାର୍ୟେତାନ୍ୟନ୍ଵଵୟଂତି ସଂତଃ ॥ 48॥
ନ ସା ସଭା ୟତ୍ର ନ ସଂତି ଵୃଦ୍ଧା
ନ ତେ ଵୃଦ୍ଧା ୟେ ନ ଵଦଂତି ଧର୍ମମ୍ ।
ନାସୌ ହର୍ମୋ ୟତନ ସତ୍ୟମସ୍ତି
ନ ତତ୍ସତ୍ୟଂ ୟଚ୍ଛଲେନାନୁଵିଦ୍ଧମ୍ ॥ 49॥
ସତ୍ୟଂ ରୂପଂ ଶ୍ରୁତଂ ଵିଦ୍ୟା କୌଲ୍ୟଂ ଶୀଲଂ ବଲଂ ଧନମ୍ ।
ଶୌର୍ୟଂ ଚ ଚିରଭାଷ୍ୟଂ ଚ ଦଶଃ ସଂସର୍ଗୟୋନୟଃ ॥ 50॥
ପାପଂ କୁର୍ଵନ୍ପାପକୀର୍ତିଃ ପାପମେଵାଶ୍ନୁତେ ଫଲମ୍ ।
ପୁଣ୍ୟଂ କୁର୍ଵନ୍ପୁଣ୍ୟକୀର୍ତିଃ ପୁଣ୍ୟମେଵାଶ୍ନୁତେ ଫଲମ୍ ॥ 51॥
ପାପଂ ପ୍ରଜ୍ଞାଂ ନାଶୟତି କ୍ରିୟମାଣଂ ପୁନଃ ପୁନଃ ।
ନଷ୍ଟପ୍ରଜ୍ଞଃ ପାପମେଵ ନିତ୍ୟମାରଭତେ ନରଃ ॥ 52॥
ପୁଣ୍ୟଂ ପ୍ରଜ୍ଞାଂ ଵର୍ଧୟତି କ୍ରିୟମାଣଂ ପୁନଃ ପୁନଃ ।
ଵୃଦ୍ଧପ୍ରଜ୍ଞଃ ପୁଣ୍ୟମେଵ ନିତ୍ୟମାରଭତେ ନରଃ ॥ 53॥
ଅସୂୟକୋ ଦଂଦ ଶୂକୋ ନିଷ୍ଠୁରୋ ଵୈରକୃନ୍ନରଃ ।
ସ କୃଚ୍ଛ୍ରଂ ମହଦାପ୍ନୋତୋ ନଚିରାତ୍ପାପମାଚରନ୍ ॥ 54॥
ଅନସୂୟଃ କୃତପ୍ରଜ୍ଞଃ ଶୋଭନାନ୍ୟାଚରନ୍ସଦା ।
ଅକୃଚ୍ଛ୍ରାତ୍ସୁଖମାପ୍ନୋତି ସର୍ଵତ୍ର ଚ ଵିରାଜତେ ॥ 55॥
ପ୍ରଜ୍ଞାମେଵାଗମୟତି ୟଃ ପ୍ରାଜ୍ଞେଭ୍ୟଃ ସ ପଂଡିତଃ ।
ପ୍ରାଜ୍ଞୋ ହ୍ୟଵାପ୍ୟ ଧର୍ମାର୍ଥୌ ଶକ୍ନୋତି ସୁଖମେଧିତୁମ୍ ॥ 56॥
ଦିଵସେନୈଵ ତତ୍କୁର୍ୟାଦ୍ୟେନ ରାତୌ ସୁଖଂ ଵସେତ୍ ।
ଅଷ୍ଟ ମାସେନ ତତ୍କୁର୍ୟାଦ୍ୟେନ ଵର୍ଷାଃ ସୁଖଂ ଵସେତ୍ ॥ 57॥
ପୂର୍ଵେ ଵୟସି ତତ୍କୁର୍ୟାଦ୍ୟେନ ଵୃଦ୍ଧସୁଖଂ ଵସେତ୍ ।
ୟାଵଜ୍ଜୀଵେନ ତତ୍କୁର୍ୟାଦ୍ୟେନ ପ୍ରେତ୍ୟ ସୁଖଂ ଵସେତ୍ ॥ 58॥
ଜୀର୍ଣମନ୍ନଂ ପ୍ରଶଂସଂତି ଭାର୍ୟଂ ଚ ଗତୟୌଵନାମ୍ ।
ଶୂରଂ ଵିଗତସଂଗ୍ରାମଂ ଗତପାରଂ ତପସ୍ଵିନମ୍ ॥ 59॥
ଧନେନାଧର୍ମଲବ୍ଧେନ ୟଚ୍ଛିଦ୍ରମପିଧୀୟତେ ।
ଅସଂଵୃତଂ ତଦ୍ଭଵତି ତତୋଽନ୍ୟଦଵଦୀର୍ୟତେ ॥ 60॥
ଗୁରୁରାତ୍ମଵତାଂ ଶାସ୍ତା ଶାସା ରାଜା ଦୁରାତ୍ମନାମ୍ ।
ଅଥ ପ୍ରଚ୍ଛନ୍ନପାପାନାଂ ଶାସ୍ତା ଵୈଵସ୍ଵତୋ ୟମଃ ॥ 61॥
ଋଷୀଣାଂ ଚ ନଦୀନାଂ ଚ କୁଲାନାଂ ଚ ମହାମନାମ୍ ।
ପ୍ରଭଵୋ ନାଧିଗଂତଵ୍ୟଃ ସ୍ତ୍ରୀଣାଂ ଦୁଶ୍ଚରିତସ୍ୟ ଚ ॥ 62॥
ଦ୍ଵିଜାତିପୂଜାଭିରତୋ ଦାତା ଜ୍ଞାତିଷୁ ଚାର୍ଜଵୀ ।
କ୍ଷତ୍ରିୟଃ ସ୍ଵର୍ଗଭାଗ୍ରାଜଂଶ୍ଚିରଂ ପାଲୟତେ ମହୀମ୍ ॥ 63॥
ସୁଵର୍ଣପୁଷ୍ପାଂ ପୃଥିଵୀଂ ଚିନ୍ଵଂତି ପୁରୁଷାସ୍ତ୍ରୟଃ ।
ଶୂରଶ୍ଚ କୃତଵିଦ୍ୟଶ୍ଚ ୟଶ୍ଚ ଜାନାତି ସେଵିତୁମ୍ ॥ 64॥
ବୁଦ୍ଧିଶ୍ରେଷ୍ଠାନି କର୍ମାଣି ବାହୁମଧ୍ୟାନି ଭାରତ ।
ତାନି ଜଂଘା ଜଘନ୍ୟାନି ଭାରପ୍ରତ୍ୟଵରାଣି ଚ ॥ 65॥
ଦୁର୍ୟୋଧନେ ଚ ଶକୁନୌ ମୂଢେ ଦୁଃଶାସନେ ତଥା ।
କର୍ଣେ ଚୈଶ୍ଵର୍ୟମାଧାୟ କଥଂ ତ୍ଵଂ ଭୂତିମିଚ୍ଛସି ॥ 66॥
ସର୍ଵୈର୍ଗୁଣୈରୁପେତାଶ୍ଚ ପାଂଡଵା ଭରତର୍ଷଭ ।
ପିତୃଵତ୍ତ୍ଵୟି ଵର୍ତଂତେ ତେଷୁ ଵର୍ତସ୍ଵ ପୁତ୍ରଵତ୍ ॥ 67॥
॥ ଇତି ଶ୍ରୀମହାଭାରତେ ଉଦ୍ୟୋଗପର୍ଵଣି ପ୍ରଜାଗରପର୍ଵଣି
ଵିଦୁରହିତଵାକ୍ୟେ ପଂଚତ୍ରିଂଶୋଽଧ୍ୟାୟଃ ॥ 35॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ଵିଦୁର ନୀତି - ଉଦ୍ୟୋଗ ପର୍ଵମ୍, ଅଧ୍ୟାୟଃ 35?
ଵିଦୁର ନୀତି - ଉଦ୍ୟୋଗ ପର୍ଵମ୍, ଅଧ୍ୟାୟଃ 35 is a devotional text available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ଵିଦୁର ନୀତି - ଉଦ୍ୟୋଗ ପର୍ଵମ୍, ଅଧ୍ୟାୟଃ 35 online?
Yes. The imported text is available directly on this page for online reading and recitation.
Can I download ଵିଦୁର ନୀତି - ଉଦ୍ୟୋଗ ପର୍ଵମ୍, ଅଧ୍ୟାୟଃ 35 as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.