ଶ୍ରୀ ସୁବ୍ରହ୍ମଣ୍ୟ ହୃଦୟ ସ୍ତୋତ୍ରମ୍

ଅସ୍ୟ ଶ୍ରୀସୁବ୍ରହ୍ମଣ୍ୟହୃଦୟସ୍ତୋତ୍ରମହାମଂତ୍ରସ୍ୟ, ଅଗସ୍ତ୍ୟୋ ଭଗଵାନ୍ ଋଷିଃ, ଅନୁଷ୍ଟୁପ୍ଛଂଦଃ, ଶ୍ରୀସୁବ୍ରହ୍ମଣ୍ୟୋ ଦେଵତା, ସୌଂ ବୀଜଂ, ସ୍ଵାହା ଶକ୍ତିଃ, ଶ୍ରୀଂ କୀଲକଂ, ଶ୍ରୀସୁବ୍ରହ୍ମଣ୍ୟ ପ୍ରସାଦସିଦ୍ଧ୍ୟର୍ଥେ ଜପେ ଵିନିୟୋଗଃ ॥

କରନ୍ୟାସଃ –
ସୁବ୍ରହ୍ମଣ୍ୟାୟ ଅଂଗୁଷ୍ଠାଭ୍ୟାଂ ନମଃ ।
ଷଣ୍ମୁଖାୟ ତର୍ଜନୀଭ୍ୟାଂ ନମଃ ।
ଶକ୍ତିଧରାୟ ମଧ୍ୟମାଭ୍ୟାଂ ନମଃ ।
ଷଟ୍କୋଣସଂସ୍ଥିତାୟ ଅନାମିକାଭ୍ୟାଂ ନମଃ ।
ସର୍ଵତୋମୁଖାୟ କନିଷ୍ଠିକାଭ୍ୟାଂ ନମଃ ।
ତାରକାଂତକାୟ କରତଲକରପୃଷ୍ଠାଭ୍ୟାଂ ନମଃ ॥
ହୃଦୟାଦି ନ୍ୟାସଃ –
ସୁବ୍ରହ୍ମଣ୍ୟାୟ ହୃଦୟାୟ ନମଃ ।
ଷଣ୍ମୁଖାୟ ଶିରସେ ସ୍ଵାହା ।
ଶକ୍ତିଧରାୟ ଶିଖାୟୈ ଵଷଟ୍ ।
ଷଟ୍କୋଣସଂସ୍ଥିତାୟ କଵଚାୟ ହୁମ୍ ।
ସର୍ଵତୋମୁଖାୟ ନେତ୍ରତ୍ରୟାୟ ଵୌଷଟ୍ ।
ତାରକାଂତକାୟ ଅସ୍ତ୍ରାୟ ଫଟ୍ ।
ଭୂର୍ଭୁଵସ୍ସୁଵରୋମିତି ଦିଗ୍ବଂଧଃ ॥

ଧ୍ୟାନମ୍ ।
ଷଡ୍ଵକ୍ତ୍ରଂ ଶିଖିଵାହନଂ ତ୍ରିନୟନଂ ଚିତ୍ରାଂବରାଲଂକୃତଂ
ଵଜ୍ରଂ ଶକ୍ତିମସିଂ ତ୍ରିଶୂଲମଭୟଂ ଖେଟଂ ଧନୁଶ୍ଚକ୍ରକମ୍ ।
ପାଶଂ କୁକ୍କୁଟମଂକୁଶଂ ଚ ଵରଦଂ ଦୋର୍ଭିର୍ଦଧାନଂ ସଦା
ଧ୍ୟାୟାମୀପ୍ସିତ ସିଦ୍ଧିଦଂ ଶିଵସୁତଂ ଶ୍ରୀଦ୍ଵାଦଶାକ୍ଷଂ ଗୁହମ୍ ॥

ଲମିତ୍ୟାଦି ପଂଚପୂଜାଂ କୁର୍ୟାତ୍ ।

ପୀଠିକା ।
ସତ୍ୟଲୋକେ ସଦାନଂଦେ ମୁନିଭିଃ ପରିଵେଷ୍ଟିତମ୍ ।
ପପ୍ରଚ୍ଛୁର୍ମୁନୟଃ ସର୍ଵେ ବ୍ରହ୍ମାଣଂ ଜଗତାଂ ଗୁରୁମ୍ ॥ 1 ॥

ଭଗଵନ୍ ସର୍ଵଲୋକେଶ ସର୍ଵଜ୍ଞ କମଲାସନ ।
ସଦାନଂଦ ଜ୍ଞାନମୂର୍ତେ ସର୍ଵଭୂତହିତେ ରତ ॥ 2 ॥

ବହୁଧା ପ୍ରୋକ୍ତମେତସ୍ୟ ଗୁହସ୍ୟ ଚରିତଂ ମହତ୍ ।
ହୃଦୟଂ ଶ୍ରୋତୁମିଚ୍ଛାମଃ ତସ୍ୟୈଵ କ୍ରୌଂଚଭେଦିନଃ ॥ 3 ॥

ବ୍ରହ୍ମୋଵାଚ ।
ଶୃଣ୍ଵଂତୁ ମୁନୟଃ ସର୍ଵେ ଗୁହ୍ୟାଦ୍ଗୁହ୍ୟତରଂ ମହତ୍ ।
ସୁବ୍ରହ୍ମଣ୍ୟସ୍ୟ ହୃଦୟଂ ସର୍ଵଭୂତହିତୋଦୟମ୍ ॥ 4 ॥

ସର୍ଵାର୍ଥସିଦ୍ଧିଦଂ ପୁଣ୍ୟଂ ସର୍ଵକାର୍ୟୈକ ସାଧନମ୍ ।
ଧର୍ମାର୍ଥକାମଦଂ ଗୁହ୍ୟଂ ଧନଧାନ୍ୟପ୍ରଵର୍ଧନମ୍ ॥ 5 ॥

ରହସ୍ୟମେତଦ୍ଦେଵାନାଂ ଅଦେୟଂ ୟସ୍ୟ କସ୍ୟଚିତ୍ ।
ସର୍ଵମିତ୍ରକରଂ ଗୋପ୍ୟଂ ତେଜୋବଲସମନ୍ଵିତମ୍ ॥ 6 ॥

ପ୍ରଵକ୍ଷ୍ୟାମି ହିତାର୍ଥଂ ଵଃ ପରିତୁଷ୍ଟେନ ଚେତସା ।
ହୃତ୍ପଦ୍ମକର୍ଣିକାମଧ୍ୟେ ଧ୍ୟାୟେତ୍ସର୍ଵମନୋହରମ୍ ॥ 7 ॥

ଅଥ ହୃଦୟମ୍ ।
ସୁଵର୍ଣମଂଡପଂ ଦିଵ୍ୟଂ ରତ୍ନତୋରଣରାଜିତମ୍ ।
ରତ୍ନସ୍ତଂଭସହସ୍ରୈଶ୍ଚ ଶୋଭିତଂ ପରମାଦ୍ଭୁତମ୍ ॥ 8 ॥

ପରମାନଂଦନିଲୟଂ ଭାସ୍ଵତ୍ସୂର୍ୟସମପ୍ରଭମ୍ ।
ଦେଵଦାନଵଗଂଧର୍ଵଗରୁଡୈର୍ୟକ୍ଷକିନ୍ନରୈଃ । ॥ 9 ॥

ସେଵାର୍ଥମାଗତୈଃ ସିଦ୍ଧୈଃ ସାଧ୍ୟୈରଧ୍ୟୁଷିତଂ ସଦା ।
ମହାୟୋଗୀଂଦ୍ରସଂସେଵ୍ୟଂ ମଂଦାରତରୁମଂଡିତମ୍ ॥ 10 ॥

ମଣିଵିଦ୍ରୁମଵେଦୀଭିର୍ମହତୀଭିରୁଦଂଚିତମ୍ ।
ତନ୍ମଧ୍ୟେଽନଂତରତ୍ନ ଶ୍ରୀଚ୍ଛଟାମଂଡଲଶୋଭିତମ୍ ॥ 11 ॥

ରତ୍ନସିଂହାସନଂ ଦିଵ୍ୟଂ ରଵିକୋଟିସମପ୍ରଭମ୍ ।
ସର୍ଵାଶ୍ଚର୍ୟମୟଂ ପୁଣ୍ୟଂ ସର୍ଵତଃ ସୁପରିଷ୍କୃତମ୍ ॥ 12 ॥

ତନ୍ମଧ୍ୟେଽଷ୍ଟଦଲଂ ପଦ୍ମଂ ଉଦ୍ୟଦର୍କପ୍ରଭୋଦୟମ୍ ।
ନିଗମାଗମରୋଲଂବଲଂବିତଂ ଚିନ୍ମୟୋଦୟମ୍ ॥ 13 ॥

ଦିଵ୍ୟଂ ତେଜୋମୟଂ ଦିଵ୍ୟଂ ଦେଵତାଭିର୍ନମସ୍କୃତମ୍ ।
ଦେଦୀପ୍ୟମାନଂ ରୁଚିଭିର୍ଵିଶାଲଂ ସୁମନୋହରମ୍ ॥ 14 ॥

ତନ୍ମଧ୍ୟେ ସର୍ଵଲୋକେଶଂ ଧ୍ୟାୟେତ୍ସର୍ଵାଂଗସୁଂଦରମ୍ ।
ଅନଂତାଦିତ୍ୟସଂକାଶଂ ଆଶ୍ରିତାଭୀଷ୍ଟଦାୟକମ୍ ॥ 15 ॥

ଅଚିଂତ୍ୟଜ୍ଞାନଵିଜ୍ଞାନତେଜୋବଲସମନ୍ଵିତମ୍ ।
ସର୍ଵାୟୁଧଧରଂ ଦିଵ୍ୟଂ ସର୍ଵାଶ୍ଚର୍ୟମୟଂ ଗୁହମ୍ ॥ 16 ॥

ମହାର୍ହ ରତ୍ନଖଚିତ ଷଟ୍କିରୀଟଵିରାଜିତମ୍ ।
ଶଶାଂକାର୍ଧକଲାରମ୍ୟ ସମୁଦ୍ୟନ୍ମୌଳିଭୂଷଣମ୍ ॥ 17 ॥

ମଦନୋଜ୍ଜ୍ଵଲକୋଦଂଡମଂଗଳଭ୍ରୂଵିରାଜିତମ୍ ।
ଵିସ୍ତୀର୍ଣାରୁଣପଦ୍ମଶ୍ରୀ ଵିଲସଦ୍ଦ୍ଵାଦଶେକ୍ଷଣମ୍ ॥ 18 ॥

ଚାରୁଶ୍ରୀଵର୍ଣସଂପୂର୍ଣମୁଖଶୋଭାଵିଭାସୁରମ୍ ।
ମଣିପ୍ରଭାସମଗ୍ରଶ୍ରୀସ୍ଫୁରନ୍ମକରକୁଂଡଲମ୍ ॥ 19 ॥

ଲସଦ୍ଦର୍ପଣଦର୍ପାଢ୍ୟ ଗଂଡସ୍ଥଲଵିରାଜିତମ୍ ।
ଦିଵ୍ୟକାଂଚନପୁଷ୍ପଶ୍ରୀନାସାପୁଟଵିରାଜିତମ୍ ॥ 20 ॥

ମଂଦହାସପ୍ରଭାଜାଲମଧୁରାଧର ଶୋଭିତମ୍ ।
ସର୍ଵଲକ୍ଷଣଲକ୍ଷ୍ମୀଭୃତ୍କଂବୁକଂଧର ସୁଂଦରମ୍ ॥ 21 ॥

ମହାନର୍ଘମହାରତ୍ନଦିଵ୍ୟହାରଵିରାଜିତମ୍ ।
ସମଗ୍ରନାଗକେୟୂରସନ୍ନଦ୍ଧଭୁଜମଂଡଲମ୍ ॥ 22 ॥

ରତ୍ନକଂକଣସଂଭାସ୍ଵତ୍କରାଗ୍ର ଶ୍ରୀମହୋଜ୍ଜ୍ଵଲମ୍ ।
ମହାମଣିକଵାଟାଭଵକ୍ଷଃସ୍ଥଲଵିରାଜିତମ୍ ॥ 23 ॥

ଅତିଗାଂଭୀର୍ୟସଂଭାଵ୍ୟନାଭୀନଵସରୋରୁହମ୍ ।
ରତ୍ନଶ୍ରୀକଲିତାବଦ୍ଧଲସନ୍ମଧ୍ୟପ୍ରଦେଶକମ୍ ॥ 24 ॥

ସ୍ଫୁରତ୍କନକସଂଵୀତପୀତାଂବରସମାଵୃତମ୍ ।
ଶୃଂଗାରରସସଂପୂର୍ଣ ରତ୍ନସ୍ତଂଭୋପମୋରୁକମ୍ ॥ 25 ॥

ସ୍ଵର୍ଣକାହଲରୋଚିଷ୍ଣୁ ଜଂଘାୟୁଗଳମଂଡଲମ୍ ।
ରତ୍ନମଂଜୀରସନ୍ନଦ୍ଧ ରମଣୀୟ ପଦାଂବୁଜମ୍ ॥ 26 ॥

ଭକ୍ତାଭୀଷ୍ଟପ୍ରଦଂ ଦେଵଂ ବ୍ରହ୍ମଵିଷ୍ଣ୍ଵାଦିସଂସ୍ତୁତମ୍ ।
କଟାକ୍ଷୈଃ କରୁଣାଦକ୍ଷୈସ୍ତୋଷୟଂତଂ ଜଗତ୍ପତିମ୍ ॥ 27 ॥

ଚିଦାନଂଦଜ୍ଞାନମୂର୍ତିଂ ସର୍ଵଲୋକପ୍ରିୟଂକରମ୍ ।
ଶଂକରସ୍ୟାତ୍ମଜଂ ଦେଵଂ ଧ୍ୟାୟେଚ୍ଛରଵଣୋଦ୍ଭଵମ୍ ॥ 28 ॥

ଅନଂତାଦିତ୍ୟଚଂଦ୍ରାଗ୍ନି ତେଜଃ ସଂପୂର୍ଣଵିଗ୍ରହମ୍ ।
ସର୍ଵଲୋକୈକଵରଦଂ ସର୍ଵଵିଦ୍ୟାର୍ଥତତ୍ତ୍ଵକମ୍ ॥ 29 ॥

ସର୍ଵେଶ୍ଵରଂ ସର୍ଵଵିଭୁଂ ସର୍ଵଭୂତହିତେ ରତମ୍ ।
ଏଵଂ ଧ୍ୟାତ୍ଵା ତୁ ହୃଦୟଂ ଷଣ୍ମୁଖସ୍ୟ ମହାତ୍ମନଃ ॥ 30 ॥

ସର୍ଵାନ୍କାମାନଵାପ୍ନୋତି ସମ୍ୟକ୍ ଜ୍ଞାନଂ ଚ ଵିଂଦତି ।
ଶୁଚୌ ଦେଶେ ସମାସୀନଃ ଶୁଦ୍ଧାତ୍ମା ଚରିତାହ୍ନିକଃ ॥ 31 ॥

ପ୍ରାଙ୍ମୁଖୋ ୟତଚିତ୍ତଶ୍ଚ ଜପେଦ୍ଧୃଦୟମୁତ୍ତମମ୍ ।
ସକୃଦେଵ ମନୁଂ ଜପ୍ତ୍ଵା ସଂପ୍ରାପ୍ନୋତ୍ୟଖିଲଂ ଶୁଭମ୍ ॥ 32 ॥

ଇଦଂ ସର୍ଵାଘହରଣଂ ମୃତ୍ୟୁଦାରିଦ୍ର୍ୟନାଶନମ୍ ।
ସର୍ଵସଂପତ୍କରଂ ପୁଣ୍ୟଂ ସର୍ଵରୋଗନିଵାରଣମ୍ ॥ 33 ॥

ସର୍ଵକାମକରଂ ଦିଵ୍ୟଂ ସର୍ଵାଭୀଷ୍ଟପ୍ରଦାୟକମ୍ ।
ପ୍ରଜାକରଂ ରାଜ୍ୟକରଂ ଭାଗ୍ୟଦଂ ବହୁପୁଣ୍ୟଦମ୍ ॥ 34 ॥

ଗୁହ୍ୟାଦ୍ଗୁହ୍ୟତରଂ ଭୂୟୋ ଦେଵାନାମପି ଦୁର୍ଲଭମ୍ ।
ଇଦଂ ତୁ ନାତପସ୍କାୟ ନାଭକ୍ତାୟ କଦାଚନ ॥ 35 ॥

ନ ଚାଶୁଶ୍ରୂଷଵେ ଦେୟଂ ନ ମଦାଂଧାୟ କର୍ହିଚିତ୍ ।
ସଚ୍ଛିଷ୍ୟାୟ କୁଲୀନାୟ ସ୍କଂଦଭକ୍ତିରତାୟ ଚ ॥ 36 ॥

ସତାମଭିମତାୟେଦଂ ଦାତଵ୍ୟଂ ଧର୍ମଵର୍ଧନମ୍ ।
ୟ ଇଦଂ ପରମଂ ପୁଣ୍ୟଂ ନିତ୍ୟଂ ଜପତି ମାନଵଃ ।
ତସ୍ୟ ଶ୍ରୀ ଭଗଵାନ୍ ସ୍କଂଦଃ ପ୍ରସନ୍ନୋ ଭଵତି ଧ୍ରୁଵମ୍ ॥ 37 ॥

ଇତି ଶ୍ରୀସ୍କାଂଦପୁରାଣେ ସୁବ୍ରହ୍ମଣ୍ୟହୃଦୟସ୍ତୋତ୍ରମ୍ ॥