ଶ୍ରୀ ରାମ ଭୁଜଂଗ ପ୍ରୟାତ ସ୍ତୋତ୍ରମ୍

ଵିଶୁଦ୍ଧଂ ପରଂ ସଚ୍ଚିଦାନଂଦରୂପଂ
ଗୁଣାଧାରମାଧାରହୀନଂ ଵରେଣ୍ୟମ୍ ।
ମହାଂତଂ ଵିଭାଂତଂ ଗୁହାଂତଂ ଗୁଣାଂତଂ
ସୁଖାଂତଂ ସ୍ଵୟଂ ଧାମ ରାମଂ ପ୍ରପଦ୍ୟେ ॥ 1 ॥

ଶିଵଂ ନିତ୍ୟମେକଂ ଵିଭୁଂ ତାରକାଖ୍ୟଂ
ସୁଖାକାରମାକାରଶୂନ୍ୟଂ ସୁମାନ୍ୟମ୍ ।
ମହେଶଂ କଲେଶଂ ସୁରେଶଂ ପରେଶଂ
ନରେଶଂ ନିରୀଶଂ ମହୀଶଂ ପ୍ରପଦ୍ୟେ ॥ 2 ॥

ୟଦାଵର୍ଣୟତ୍କର୍ଣମୂଲେଽଂତକାଲେ
ଶିଵୋ ରାମ ରାମେତି ରାମେତି କାଶ୍ୟାମ୍ ।
ତଦେକଂ ପରଂ ତାରକବ୍ରହ୍ମରୂପଂ
ଭଜେଽହଂ ଭଜେଽହଂ ଭଜେଽହଂ ଭଜେଽହମ୍ ॥ 3 ॥

ମହାରତ୍ନପୀଠେ ଶୁଭେ କଲ୍ପମୂଲେ
ସୁଖାସୀନମାଦିତ୍ୟକୋଟିପ୍ରକାଶମ୍ ।
ସଦା ଜାନକୀଲକ୍ଷ୍ମଣୋପେତମେକଂ
ସଦା ରାମଚଂଦ୍ରଂ ଭଜେଽହଂ ଭଜେଽହମ୍ ॥ 4 ॥

କ୍ଵଣଦ୍ରତ୍ନମଂଜୀରପାଦାରଵିଂଦଂ
ଲସନ୍ମେଖଲାଚାରୁପୀତାଂବରାଢ୍ୟମ୍ ।
ମହାରତ୍ନହାରୋଲ୍ଲସତ୍କୌସ୍ତୁଭାଂଗଂ
ନଦଚ୍ଚଂଚରୀମଂଜରୀଲୋଲମାଲମ୍ ॥ 5 ॥

ଲସଚ୍ଚଂଦ୍ରିକାସ୍ମେରଶୋଣାଧରାଭଂ
ସମୁଦ୍ୟତ୍ପତଂଗେଂଦୁକୋଟିପ୍ରକାଶମ୍ ।
ନମଦ୍ବ୍ରହ୍ମରୁଦ୍ରାଦିକୋଟୀରରତ୍ନ
ସ୍ଫୁରତ୍କାଂତିନୀରାଜନାରାଧିତାଂଘ୍ରିମ୍ ॥ 6 ॥

ପୁରଃ ପ୍ରାଂଜଲୀନାଂଜନେୟାଦିଭକ୍ତାନ୍
ସ୍ଵଚିନ୍ମୁଦ୍ରୟା ଭଦ୍ରୟା ବୋଧୟଂତମ୍ ।
ଭଜେଽହଂ ଭଜେଽହଂ ସଦା ରାମଚଂଦ୍ରଂ
ତ୍ଵଦନ୍ୟଂ ନ ମନ୍ୟେ ନ ମନ୍ୟେ ନ ମନ୍ୟେ ॥ 7 ॥

ୟଦା ମତ୍ସମୀପଂ କୃତାଂତଃ ସମେତ୍ୟ
ପ୍ରଚଂଡପ୍ରକୋପୈର୍ଭଟୈର୍ଭୀଷୟେନ୍ମାମ୍ ।
ତଦାଵିଷ୍କରୋଷି ତ୍ଵଦୀୟଂ ସ୍ଵରୂପଂ
ସଦାପତ୍ପ୍ରଣାଶଂ ସକୋଦଂଡବାଣମ୍ ॥ 8 ॥

ନିଜେ ମାନସେ ମଂଦିରେ ସନ୍ନିଧେହି
ପ୍ରସୀଦ ପ୍ରସୀଦ ପ୍ରଭୋ ରାମଚଂଦ୍ର ।
ସସୌମିତ୍ରିଣା କୈକୟୀନଂଦନେନ
ସ୍ଵଶକ୍ତ୍ୟାନୁଭକ୍ତ୍ୟା ଚ ସଂସେଵ୍ୟମାନ ॥ 9 ॥

ସ୍ଵଭକ୍ତାଗ୍ରଗଣ୍ୟୈଃ କପୀଶୈର୍ମହୀଶୈ-
-ରନୀକୈରନେକୈଶ୍ଚ ରାମ ପ୍ରସୀଦ ।
ନମସ୍ତେ ନମୋଽସ୍ତ୍ଵୀଶ ରାମ ପ୍ରସୀଦ
ପ୍ରଶାଧି ପ୍ରଶାଧି ପ୍ରକାଶଂ ପ୍ରଭୋ ମାମ୍ ॥ 10 ॥

ତ୍ଵମେଵାସି ଦୈଵଂ ପରଂ ମେ ୟଦେକଂ
ସୁଚୈତନ୍ୟମେତତ୍ତ୍ଵଦନ୍ୟଂ ନ ମନ୍ୟେ ।
ୟତୋଽଭୂଦମେୟଂ ଵିୟଦ୍ଵାୟୁତେଜୋ
ଜଲୋର୍ଵ୍ୟାଦିକାର୍ୟଂ ଚରଂ ଚାଚରଂ ଚ ॥ 11 ॥

ନମଃ ସଚ୍ଚିଦାନଂଦରୂପାୟ ତସ୍ମୈ
ନମୋ ଦେଵଦେଵାୟ ରାମାୟ ତୁଭ୍ୟମ୍ ।
ନମୋ ଜାନକୀଜୀଵିତେଶାୟ ତୁଭ୍ୟଂ
ନମଃ ପୁଂଡରୀକାୟତାକ୍ଷାୟ ତୁଭ୍ୟମ୍ ॥ 12 ॥

ନମୋ ଭକ୍ତିୟୁକ୍ତାନୁରକ୍ତାୟ ତୁଭ୍ୟଂ
ନମଃ ପୁଣ୍ୟପୁଂଜୈକଲଭ୍ୟାୟ ତୁଭ୍ୟମ୍ ।
ନମୋ ଵେଦଵେଦ୍ୟାୟ ଚାଦ୍ୟାୟ ପୁଂସେ
ନମଃ ସୁଂଦରାୟେଂଦିରାଵଲ୍ଲଭାୟ ॥ 13 ॥

ନମୋ ଵିଶ୍ଵକର୍ତ୍ରେ ନମୋ ଵିଶ୍ଵହର୍ତ୍ରେ
ନମୋ ଵିଶ୍ଵଭୋକ୍ତ୍ରେ ନମୋ ଵିଶ୍ଵମାତ୍ରେ ।
ନମୋ ଵିଶ୍ଵନେତ୍ରେ ନମୋ ଵିଶ୍ଵଜେତ୍ରେ
ନମୋ ଵିଶ୍ଵପିତ୍ରେ ନମୋ ଵିଶ୍ଵମାତ୍ରେ ॥ 14 ॥

ନମସ୍ତେ ନମସ୍ତେ ସମସ୍ତପ୍ରପଂଚ-
-ପ୍ରଭୋଗପ୍ରୟୋଗପ୍ରମାଣପ୍ରଵୀଣ ।
ମଦୀୟଂ ମନସ୍ତ୍ଵତ୍ପଦଦ୍ଵଂଦ୍ଵସେଵାଂ
ଵିଧାତୁଂ ପ୍ରଵୃତ୍ତଂ ସୁଚୈତନ୍ୟସିଦ୍ଧ୍ୟୈ ॥ 15 ॥

ଶିଲାପି ତ୍ଵଦଂଘ୍ରିକ୍ଷମାସଂଗିରେଣୁ
ପ୍ରସାଦାଦ୍ଧି ଚୈତନ୍ୟମାଧତ୍ତ ରାମ ।
ନରସ୍ତ୍ଵତ୍ପଦଦ୍ଵଂଦ୍ଵସେଵାଵିଧାନା-
-ତ୍ସୁଚୈତନ୍ୟମେତୀତି କିଂ ଚିତ୍ରମତ୍ର ॥ 16 ॥

ପଵିତ୍ରଂ ଚରିତ୍ରଂ ଵିଚିତ୍ରଂ ତ୍ଵଦୀୟଂ
ନରା ୟେ ସ୍ମରଂତ୍ୟନ୍ଵହଂ ରାମଚଂଦ୍ର ।
ଭଵଂତଂ ଭଵାଂତଂ ଭରଂତଂ ଭଜଂତୋ
ଲଭଂତେ କୃତାଂତଂ ନ ପଶ୍ୟଂତ୍ୟତୋଽଂତେ ॥ 17 ॥

ସ ପୁଣ୍ୟଃ ସ ଗଣ୍ୟଃ ଶରଣ୍ୟୋ ମମାୟଂ
ନରୋ ଵେଦ ୟୋ ଦେଵଚୂଡାମଣିଂ ତ୍ଵାମ୍ ।
ସଦାକାରମେକଂ ଚିଦାନଂଦରୂପଂ
ମନୋଵାଗଗମ୍ୟଂ ପରଂ ଧାମ ରାମ ॥ 18 ॥

ପ୍ରଚଂଡପ୍ରତାପପ୍ରଭାଵାଭିଭୂତ-
-ପ୍ରଭୂତାରିଵୀର ପ୍ରଭୋ ରାମଚଂଦ୍ର ।
ବଲଂ ତେ କଥଂ ଵର୍ଣ୍ୟତେଽତୀଵ ବାଲ୍ୟେ
ୟତୋଽଖଂଡି ଚଂଡୀଶକୋଦଂଡଦଂଡମ୍ ॥ 19 ॥

ଦଶଗ୍ରୀଵମୁଗ୍ରଂ ସପୁତ୍ରଂ ସମିତ୍ରଂ
ସରିଦ୍ଦୁର୍ଗମଧ୍ୟସ୍ଥରକ୍ଷୋଗଣେଶମ୍ ।
ଭଵଂତଂ ଵିନା ରାମ ଵୀରୋ ନରୋ ଵା
ସୁରୋ ଵାଽମରୋ ଵା ଜୟେତ୍କସ୍ତ୍ରିଲୋକ୍ୟାମ୍ ॥ 20 ॥

ସଦା ରାମ ରାମେତି ରାମାମୃତଂ ତେ
ସଦାରାମମାନଂଦନିଷ୍ୟଂଦକଂଦମ୍ ।
ପିବଂତଂ ନମଂତଂ ସୁଦଂତଂ ହସଂତଂ
ହନୂମଂତମଂତର୍ଭଜେ ତଂ ନିତାଂତମ୍ ॥ 21 ॥

ସଦା ରାମ ରାମେତି ରାମାମୃତଂ ତେ
ସଦାରାମମାନଂଦନିଷ୍ୟଂଦକଂଦମ୍ ।
ପିବନ୍ନନ୍ଵହଂ ନନ୍ଵହଂ ନୈଵ ମୃତ୍ୟୋ-
-ର୍ବିଭେମି ପ୍ରସାଦାଦସାଦାତ୍ତଵୈଵ ॥ 22 ॥

ଅସୀତାସମେତୈରକୋଦଂଡଭୂଷୈ-
-ରସୌମିତ୍ରିଵଂଦ୍ୟୈରଚଂଡପ୍ରତାପୈଃ ।
ଅଲଂକେଶକାଲୈରସୁଗ୍ରୀଵମିତ୍ରୈ-
-ରରାମାଭିଧେୟୈରଲଂ ଦୈଵତୈର୍ନଃ ॥ 23 ॥

ଅଵୀରାସନସ୍ଥୈରଚିନ୍ମୁଦ୍ରିକାଢ୍ୟୈ-
-ରଭକ୍ତାଂଜନେୟାଦିତତ୍ତ୍ଵପ୍ରକାଶୈଃ ।
ଅମଂଦାରମୂଲୈରମଂଦାରମାଲୈ-
-ରରାମାଭିଧେୟୈରଲଂ ଦୈଵତୈର୍ନଃ ॥ 24 ॥

ଅସିଂଧୁପ୍ରକୋପୈରଵଂଦ୍ୟପ୍ରତାପୈ-
-ରବଂଧୁପ୍ରୟାଣୈରମଂଦସ୍ମିତାଢ୍ୟୈଃ ।
ଅଦଂଡପ୍ରଵାସୈରଖଂଡପ୍ରବୋଧୈ-
-ରରାମାଭିଧେୟୈରଲଂ ଦୈଵତୈର୍ନଃ ॥ 25 ॥

ହରେ ରାମ ସୀତାପତେ ରାଵଣାରେ
ଖରାରେ ମୁରାରେଽସୁରାରେ ପରେତି ।
ଲପଂତଂ ନୟଂତଂ ସଦାକାଲମେଵଂ
ସମାଲୋକୟାଲୋକୟାଶେଷବଂଧୋ ॥ 26 ॥

ନମସ୍ତେ ସୁମିତ୍ରାସୁପୁତ୍ରାଭିଵଂଦ୍ୟ
ନମସ୍ତେ ସଦା କୈକୟୀନଂଦନେଡ୍ୟ ।
ନମସ୍ତେ ସଦା ଵାନରାଧୀଶଵଂଦ୍ୟ
ନମସ୍ତେ ନମସ୍ତେ ସଦା ରାମଚଂଦ୍ର ॥ 27 ॥

ପ୍ରସୀଦ ପ୍ରସୀଦ ପ୍ରଚଂଡପ୍ରତାପ
ପ୍ରସୀଦ ପ୍ରସୀଦ ପ୍ରଚଂଡାରିକାଲ ।
ପ୍ରସୀଦ ପ୍ରସୀଦ ପ୍ରପନ୍ନାନୁକଂପିନ୍
ପ୍ରସୀଦ ପ୍ରସୀଦ ପ୍ରଭୋ ରାମଚଂଦ୍ର ॥ 28 ॥

ଭୁଜଂଗପ୍ରୟାତଂ ପରଂ ଵେଦସାରଂ
ମୁଦା ରାମଚଂଦ୍ରସ୍ୟ ଭକ୍ତ୍ୟା ଚ ନିତ୍ୟମ୍ ।
ପଠନ୍ସଂତତଂ ଚିଂତୟନ୍ସ୍ଵାଂତରଂଗେ
ସ ଏଵ ସ୍ଵୟଂ ରାମଚଂଦ୍ରଃ ସ ଧନ୍ୟଃ ॥ 29 ॥

ଇତି ଶ୍ରୀମଚ୍ଛଂକରାଚାର୍ୟ କୃତଂ ଶ୍ରୀ ରାମ ଭୁଜଂଗପ୍ରୟାତ ସ୍ତୋତ୍ରମ୍ ।