ଶ୍ରୀ ମହିଷାସୁର ମର୍ଦିନୀ ସ୍ତୋତ୍ରମ୍ (ଅୟିଗିରି ନଂଦିନି)

ଅୟି ଗିରିନଂଦିନି ନଂଦିତମେଦିନି ଵିଶ୍ଵଵିନୋଦିନି ନଂଦିନୁତେ
ଗିରିଵରଵିଂଧ୍ୟଶିରୋଧିନିଵାସିନି ଵିଷ୍ଣୁଵିଲାସିନି ଜିଷ୍ଣୁନୁତେ ।
ଭଗଵତି ହେ ଶିତିକଂଠକୁଟୁଂବିନି ଭୂରିକୁଟୁଂବିନି ଭୂରିକୃତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 1 ॥

ସୁରଵରଵର୍ଷିଣି ଦୁର୍ଧରଧର୍ଷିଣି ଦୁର୍ମୁଖମର୍ଷିଣି ହର୍ଷରତେ
ତ୍ରିଭୁଵନପୋଷିଣି ଶଂକରତୋଷିଣି କଲ୍ମଷମୋଷିଣି ଘୋରରତେ । [କିଲ୍ବିଷ-, ଘୋଷ-]
ଦନୁଜନିରୋଷିଣି ଦିତିସୁତରୋଷିଣି ଦୁର୍ମଦଶୋଷିଣି ସିଂଧୁସୁତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 2 ॥

ଅୟି ଜଗଦଂବ ମଦଂବ କଦଂବଵନପ୍ରିୟଵାସିନି ହାସରତେ
ଶିଖରି ଶିରୋମଣି ତୁଂଗହିମାଲୟ ଶୃଂଗନିଜାଲୟ ମଧ୍ୟଗତେ ।
ମଧୁମଧୁରେ ମଧୁକୈଟଭଗଂଜିନି କୈଟଭଭଂଜିନି ରାସରତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 3 ॥

ଅୟି ଶତଖଂଡ ଵିଖଂଡିତରୁଂଡ ଵିତୁଂଡିତଶୁଂଡ ଗଜାଧିପତେ
ରିପୁଗଜଗଂଡ ଵିଦାରଣଚଂଡ ପରାକ୍ରମଶୁଂଡ ମୃଗାଧିପତେ ।
ନିଜଭୁଜଦଂଡ ନିପାତିତଖଂଡ ଵିପାତିତମୁଂଡ ଭଟାଧିପତେ [-ଚଂଡ]
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 4 ॥

ଅୟି ରଣଦୁର୍ମଦ ଶତ୍ରୁଵଧୋଦିତ ଦୁର୍ଧରନିର୍ଜର ଶକ୍ତିଭୃତେ
ଚତୁରଵିଚାରଧୁରୀଣ ମହାଶିଵ ଦୂତକୃତ ପ୍ରମଥାଧିପତେ ।
ଦୁରିତଦୁରୀହ ଦୁରାଶୟ ଦୁର୍ମତି ଦାନଵଦୂତ କୃତାଂତମତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 5 ॥

ଅୟି ଶରଣାଗତ ଵୈରିଵଧୂଵର ଵୀରଵରାଭୟଦାୟକରେ
ତ୍ରିଭୁଵନ ମସ୍ତକ ଶୂଲଵିରୋଧି ଶିରୋଧିକୃତାମଲ ଶୂଲକରେ ।
ଦୁମିଦୁମିତାମର ଦୁଂଦୁଭିନାଦ ମହୋ ମୁଖରୀକୃତ ତିଗ୍ମକରେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 6 ॥

ଅୟି ନିଜହୁଂକୃତିମାତ୍ର ନିରାକୃତ ଧୂମ୍ରଵିଲୋଚନ ଧୂମ୍ରଶତେ
ସମରଵିଶୋଷିତ ଶୋଣିତବୀଜ ସମୁଦ୍ଭଵଶୋଣିତ ବୀଜଲତେ ।
ଶିଵ ଶିଵ ଶୁଂଭ ନିଶୁଂଭ ମହାହଵ ତର୍ପିତ ଭୂତ ପିଶାଚରତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 7 ॥

ଧନୁରନୁସଂଗ ରଣକ୍ଷଣସଂଗ ପରିସ୍ଫୁରଦଂଗ ନଟତ୍କଟକେ
କନକ ପିଶଂଗ ପୃଷତ୍କନିଷଂଗରସଦ୍ଭଟ ଶୃଂଗ ହତାଵଟୁକେ ।
କୃତଚତୁରଂଗ ବଲକ୍ଷିତିରଂଗ ଘଟଦ୍ବହୁରଂଗ ରଟଦ୍ବଟୁକେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 8 ॥

ସୁରଲଲନା ତତଥେୟି ତଥେୟି କୃତାଭିନୟୋଦର ନୃତ୍ୟରତେ
କୃତ କୁକୁଥଃ କୁକୁଥୋ ଗଡଦାଦିକତାଲ କୁତୂହଲ ଗାନରତେ ।
ଧୁଧୁକୁଟ ଧୁକ୍କୁଟ ଧିଂଧିମିତ ଧ୍ଵନି ଧୀର ମୃଦଂଗ ନିନାଦରତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 9 ॥

ଜୟ ଜୟ ଜପ୍ୟ ଜୟେ ଜୟ ଶବ୍ଦପରସ୍ତୁତି ତତ୍ପର ଵିଶ୍ଵନୁତେ
ଭଣ ଭଣ ଭିଂଜିମି ଭିଂକୃତନୂପୁର ସିଂଜିତମୋହିତ ଭୂତପତେ । [ଝ-, ଝିଂ-]
ନଟିତନଟାର୍ଧ ନଟୀନଟନାୟକ ନାଟିତନାଟ୍ୟ ସୁଗାନରତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 10 ॥

ଅୟି ସୁମନଃ ସୁମନଃ ସୁମନଃ ସୁମନଃ ସୁମନୋହର କାଂତିୟୁତେ
ଶ୍ରିତ ରଜନୀ ରଜନୀ ରଜନୀ ରଜନୀ ରଜନୀକର ଵକ୍ତ୍ରଵୃତେ ।
ସୁନୟନ ଵିଭ୍ରମର ଭ୍ରମର ଭ୍ରମର ଭ୍ରମର ଭ୍ରମରାଧିପତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 11 ॥

ସହିତ ମହାହଵ ମଲ୍ଲମ ତଲ୍ଲିକ ମଲ୍ଲିତ ରଲ୍ଲକ ମଲ୍ଲରତେ
ଵିରଚିତ ଵଲ୍ଲିକ ପଲ୍ଲିକ ମଲ୍ଲିକ ଭିଲ୍ଲିକ ଭିଲ୍ଲିକ ଵର୍ଗ ଵୃତେ । [ଝିଲ୍ଲିକ ଭିଲ୍ଲିକ]
ସିତକୃତ ଫୁଲ୍ଲସମୁଲ୍ଲସିତାରୁଣ ତଲ୍ଲଜ ପଲ୍ଲଵ ସଲ୍ଲଲିତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 12 ॥

ଅଵିରଲଗଂଡଗଲନ୍ମଦମେଦୁର ମତ୍ତମତଂଗଜ ରାଜପତେ
ତ୍ରିଭୁଵନଭୂଷଣ ଭୂତକଲାନିଧି ରୂପପୟୋନିଧି ରାଜସୁତେ ।
ଅୟି ସୁଦତୀଜନ ଲାଲସମାନସ ମୋହନମନ୍ମଥ ରାଜସୁତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 13 ॥

କମଲଦଲାମଲ କୋମଲକାଂତି କଲାକଲିତାମଲ ଭାଲଲତେ
ସକଲଵିଲାସ କଳାନିଲୟ କ୍ରମକେଲିଚଲତ୍କଲହଂସକୁଲେ ।
ଅଲିକୁଲ ସଂକୁଲ କୁଵଲୟ ମଂଡଲ ମୌଲିମିଲଦ୍ବକୁଲାଲି କୁଲେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 14 ॥

କରମୁରଳୀରଵ ଵୀଜିତ କୂଜିତ ଲଜ୍ଜିତକୋକିଲ ମଂଜୁମତେ
ମିଲିତ ପୁଲିଂଦ ମନୋହର ଗୁଂଜିତ ରଂଜିତଶୈଲ ନିକୁଂଜଗତେ ।
ନିଜଗୁଣଭୂତ ମହାଶବରୀଗଣ ସଦ୍ଗୁଣସଂଭୃତ କେଳିତଲେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 15 ॥

କଟିତଟପୀତ ଦୁକୂଲଵିଚିତ୍ର ମୟୂଖତିରସ୍କୃତ ଚଂଦ୍ରରୁଚେ
ପ୍ରଣତସୁରାସୁର ମୌଳିମଣିସ୍ଫୁର ଦଂଶୁଲସନ୍ନଖ ଚଂଦ୍ରରୁଚେ ।
ଜିତକନକାଚଲ ମୌଳିପଦୋର୍ଜିତ ନିର୍ଭରକୁଂଜର କୁଂଭକୁଚେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 16 ॥

ଵିଜିତ ସହସ୍ରକରୈକ ସହସ୍ରକରୈକ ସହସ୍ରକରୈକନୁତେ
କୃତ ସୁରତାରକ ସଂଗରତାରକ ସଂଗରତାରକ ସୂନୁସୁତେ ।
ସୁରଥସମାଧି ସମାନସମାଧି ସମାଧି ସମାଧି ସୁଜାତରତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 17 ॥

ପଦକମଲଂ କରୁଣାନିଲୟେ ଵରିଵସ୍ୟତି ୟୋଽନୁଦିନଂ ସ ଶିଵେ
ଅୟି କମଲେ କମଲାନିଲୟେ କମଲାନିଲୟଃ ସ କଥଂ ନ ଭଵେତ୍ ।
ତଵ ପଦମେଵ ପରଂପଦମିତ୍ୟନୁଶୀଲୟତୋ ମମ କିଂ ନ ଶିଵେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 18 ॥

କନକଲସତ୍କଲ ସିଂଧୁଜଲୈରନୁସିଂଚିନୁତେ ଗୁଣରଂଗଭୁଵଂ
ଭଜତି ସ କିଂ ନ ଶଚୀକୁଚକୁଂଭ ତଟୀପରିରଂଭ ସୁଖାନୁଭଵମ୍ ।
ତଵ ଚରଣଂ ଶରଣଂ କରଵାଣି ନତାମରଵାଣି ନିଵାସି ଶିଵଂ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 19 ॥

ତଵ ଵିମଲେଂଦୁକୁଲଂ ଵଦନେଂଦୁମଲଂ ସକଲଂ ନନୁ କୂଲୟତେ
କିମୁ ପୁରୁହୂତ ପୁରୀଂଦୁମୁଖୀ ସୁମୁଖୀଭିରସୌ ଵିମୁଖୀକ୍ରିୟତେ ।
ମମ ତୁ ମତଂ ଶିଵନାମଧନେ ଭଵତୀ କୃପୟା କିମୁତ କ୍ରିୟତେ
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 20 ॥

ଅୟି ମୟି ଦୀନଦୟାଲୁତୟା କୃପୟୈଵ ତ୍ଵୟା ଭଵିତଵ୍ୟମୁମେ
ଅୟି ଜଗତୋ ଜନନୀ କୃପୟାସି ୟଥାସି ତଥାଽନୁମିତାସିରତେ ।
ୟଦୁଚିତମତ୍ର ଭଵତ୍ୟୁରରୀ କୁରୁତାଦୁରୁତାପମପାକୁରୁ ତେ [ମେ]
ଜୟ ଜୟ ହେ ମହିଷାସୁରମର୍ଦିନି ରମ୍ୟକପର୍ଦିନି ଶୈଲସୁତେ ॥ 21 ॥

ଇତି ଶ୍ରୀ ମହିଷାସୁରମର୍ଦିନି ସ୍ତୋତ୍ରମ୍ ॥