ନାରାୟଣୀୟଂ ଦଶକ 84 – ସମଂତପଂଚକତୀର୍ଥୟାତ୍ରା – ବଂଧୁମିତ୍ରାଦି ସମାଗମମ୍

କ୍ଵଚିଦଥ ତପନୋପରାଗକାଲେ ପୁରି ନିଦଧତ୍ କୃତଵର୍ମକାମସୂନୂ ।
ୟଦୁକୁଲମହିଲାଵୃତଃ ସୁତୀର୍ଥଂ ସମୁପଗତୋଽସି ସମଂତପଂଚକାଖ୍ୟମ୍ ॥1॥

ବହୁତରଜନତାହିତାୟ ତତ୍ର ତ୍ଵମପି ପୁନନ୍ ଵିନିମଜ୍ୟ ତୀର୍ଥତୋୟମ୍ ।
ଦ୍ଵିଜଗଣପରିମୁକ୍ତଵିତ୍ତରାଶିଃ ସମମିଲଥାଃ କୁରୁପାଂଡଵାଦିମିତ୍ରୈଃ ॥2॥

ତଵ ଖଲୁ ଦୟିତାଜନୈଃ ସମେତା ଦ୍ରୁପଦସୁତା ତ୍ଵୟି ଗାଢଭକ୍ତିଭାରା ।
ତଦୁଦିତଭଵଦାହୃତିପ୍ରକାରୈଃ ଅତିମୁମୁଦେ ସମମନ୍ୟଭାମିନୀଭିଃ ॥3॥

ତଦନୁ ଚ ଭଗଵନ୍ ନିରୀକ୍ଷ୍ୟ ଗୋପାନତିକୁତୁକାଦୁପଗମ୍ୟ ମାନୟିତ୍ଵା।
ଚିରତରଵିରହାତୁରାଂଗରେଖାଃ ପଶୁପଵଧୂଃ ସରସଂ ତ୍ଵମନ୍ଵୟାସୀଃ ॥4॥

ସପଦି ଚ ଭଵଦୀକ୍ଷଣୋତ୍ସଵେନ ପ୍ରମୁଷିତମାନହୃଦାଂ ନିତଂବିନୀନାମ୍ ।
ଅତିରସପରିମୁକ୍ତକଂଚୁଲୀକେ ପରିଚୟହୃଦ୍ୟତରେ କୁଚେ ନ୍ୟଲୈଷୀଃ ॥5॥

ରିପୁଜନକଲହୈଃ ପୁନଃ ପୁନର୍ମେ ସମୁପଗତୈରିୟତୀ ଵିଲଂବନାଽଭୂତ୍ ।
ଇତି କୃତପରିରଂଭଣେତ୍ଵୟି ଦ୍ରାକ୍ ଅତିଵିଵଶା ଖଲୁ ରାଧିକା ନିଲିଲ୍ୟେ ॥6॥

ଅପଗତଵିରହଵ୍ୟଥାସ୍ତଦା ତା ରହସି ଵିଧାୟ ଦଦାଥ ତତ୍ତ୍ଵବୋଧମ୍ ।
ପରମସୁଖଚିଦାତ୍ମକୋଽହମାତ୍ମେତ୍ୟୁଦୟତୁ ଵଃ ସ୍ଫୁଟମେଵ ଚେତସୀତି ॥7॥

ସୁଖରସପରିମିଶ୍ରିତୋ ଵିୟୋଗଃ କିମପି ପୁରାଽଭଵଦୁଦ୍ଧଵୋପଦେଶୈଃ ।
ସମଭଵଦମୁତଃ ପରଂ ତୁ ତାସାଂ ପରମସୁଖୈକ୍ୟମୟୀ ଭଵଦ୍ଵିଚିଂତା ॥8॥

ମୁନିଵରନିଵହୈସ୍ତଵାଥ ପିତ୍ରା ଦୁରିତଶମାୟ ଶୁଭାନି ପୃଚ୍ଛ୍ୟମାନୈଃ ।
ତ୍ଵୟି ସତି କିମିଦଂ ଶୁଭାଂତରୈଃ ରିତ୍ୟୁରୁହସିତୈରପି ୟାଜିତସ୍ତଦାଽସୌ ॥9॥

ସୁମହତି ୟଜନେ ଵିତାୟମାନେ ପ୍ରମୁଦିତମିତ୍ରଜନେ ସହୈଵ ଗୋପାଃ ।
ୟଦୁଜନମହିତାସ୍ତ୍ରିମାସମାତ୍ରଂ ଭଵଦନୁଷଂଗରସଂ ପୁରେଵ ଭେଜୁ ଃ ॥10॥

ଵ୍ୟପଗମସମୟେ ସମେତ୍ୟ ରାଧାଂ ଦୃଢମୁପଗୂହ୍ୟ ନିରୀକ୍ଷ୍ୟ ଵୀତଖେଦାମ୍ ।
ପ୍ରମୁଦିତହୃଦୟଃ ପୁରଂ ପ୍ରୟାତଃ ପଵନପୁରେଶ୍ଵର ପାହି ମାଂ ଗଦେଭ୍ୟଃ ॥11॥