ନାରାୟଣୀୟଂ ଦଶକ 82 – ବାଣାସୁରୟୁଦ୍ଧଂ ତଥା ନୃଗଶାପମୋକ୍ଷମ୍

ପ୍ରଦ୍ୟୁମ୍ନୋ ରୌକ୍ମିଣେୟଃ ସ ଖଲୁ ତଵ କଲା ଶଂବରେଣାହୃତସ୍ତଂ
ହତ୍ଵା ରତ୍ୟା ସହାପ୍ତୋ ନିଜପୁରମହରଦ୍ରୁକ୍ମିକନ୍ୟାଂ ଚ ଧନ୍ୟାମ୍ ।
ତତ୍ପୁତ୍ରୋଽଥାନିରୁଦ୍ଧୋ ଗୁଣନିଧିରଵହଦ୍ରୋଚନାଂ ରୁକ୍ମିପୌତ୍ରୀଂ
ତତ୍ରୋଦ୍ଵାହେ ଗତସ୍ତ୍ଵଂ ନ୍ୟଵଧି ମୁସଲିନା ରୁକ୍ମ୍ୟପି ଦ୍ୟୂତଵୈରାତ୍ ॥1॥

ବାଣସ୍ୟ ସା ବଲିସୁତସ୍ୟ ସହସ୍ରବାହୋ-
ର୍ମାହେଶ୍ଵରସ୍ୟ ମହିତା ଦୁହିତା କିଲୋଷା ।
ତ୍ଵତ୍ପୌତ୍ରମେନମନିରୁଦ୍ଧମଦୃଷ୍ଟପୂର୍ଵଂ
ସ୍ଵପ୍ନେଽନୁଭୂୟ ଭଗଵନ୍ ଵିରହାତୁରାଽଭୂତ୍ ॥2॥

ୟୋଗିନ୍ୟତୀଵ କୁଶଲା ଖଲୁ ଚିତ୍ରଲେଖା
ତସ୍ୟାଃ ସଖୀ ଵିଲିଖତୀ ତରୁଣାନଶେଷାନ୍ ।
ତତ୍ରାନିରୁଦ୍ଧମୁଷୟା ଵିଦିତଂ ନିଶାୟା-
ମାନେଷ୍ଟ ୟୋଗବଲତୋ ଭଵତୋ ନିକେତାତ୍ ॥3॥

କନ୍ୟାପୁରେ ଦୟିତୟା ସୁଖମାରମଂତଂ
ଚୈନଂ କଥଂଚନ ବବଂଧୁଷି ଶର୍ଵବଂଧୌ ।
ଶ୍ରୀନାରଦୋକ୍ତତଦୁଦଂତଦୁରଂତରୋଷୈ-
ସ୍ତ୍ଵଂ ତସ୍ୟ ଶୋଣିତପୁରଂ ୟଦୁଭିର୍ନ୍ୟରୁଂଧାଃ ॥4॥

ପୁରୀପାଲଶ୍ଶୈଲପ୍ରିୟଦୁହିତୃନାଥୋଽସ୍ୟ ଭଗଵାନ୍
ସମଂ ଭୂତଵ୍ରାତୈର୍ୟଦୁବଲମଶଂକଂ ନିରୁରୁଧେ ।
ମହାପ୍ରାଣୋ ବାଣୋ ଝଟିତି ୟୁୟୁଧାନେନୟୁୟୁଧେ
ଗୁହଃ ପ୍ରଦ୍ୟୁମ୍ନେନ ତ୍ଵମପି ପୁରହଂତ୍ରା ଜଘଟିଷେ ॥5॥

ନିରୁଦ୍ଧାଶେଷାସ୍ତ୍ରେ ମୁମୁହୁଷି ତଵାସ୍ତ୍ରେଣ ଗିରିଶେ
ଦ୍ରୁତା ଭୂତା ଭୀତାଃ ପ୍ରମଥକୁଲଵୀରାଃ ପ୍ରମଥିତାଃ ।
ପରାସ୍କଂଦ୍ତ୍ ସ୍କଂଦଃ କୁସୁମଶରବାଣୈଶ୍ଚ ସଚିଵଃ
ସ କୁଂଭାଂଡୋ ଭାଂଡଂ ନଵମିଵ ବଲେନାଶୁ ବିଭିଦେ ॥6॥

ଚାପାନାଂ ପଂଚଶତ୍ୟା ପ୍ରସଭମୁପଗତେ ଛିନ୍ନଚାପେଽଥ ବାଣେ
ଵ୍ୟର୍ଥେ ୟାତେ ସମେତୋ ଜ୍ଵରପତିରଶନୈରଜ୍ଵରି ତ୍ଵଜ୍ଜ୍ଵରେଣ ।
ଜ୍ଞାନୀ ସ୍ତୁତ୍ଵାଽଥ ଦତ୍ଵା ତଵ ଚରିତଜୁଷାଂ ଵିଜ୍ଵରଂ ସ ଜ୍ଵରୋଽଗାତ୍
ପ୍ରାୟୋଽଂତର୍ଜ୍ଞାନଵଂତୋଽପି ଚ ବହୁତମସା ରୌଦ୍ରଚେଷ୍ଟା ହି ରୌଦ୍ରାଃ ॥7॥

ବାଣଂ ନାନାୟୁଧୋଗ୍ରଂ ପୁନରଭିପତିତଂ ଦର୍ପଦୋଷାଦ୍ଵିତନ୍ଵନ୍
ନିର୍ଲୂନାଶେଷଦୋଷଂ ସପଦି ବୁବୁଧୁଷା ଶଂକରେଣୋପଗୀତଃ ।
ତଦ୍ଵାଚା ଶିଷ୍ଟବାହୁଦ୍ଵିତୟମୁଭୟତୋ ନିର୍ଭୟଂ ତତ୍ପ୍ରିୟଂ ତଂ
ମୁକ୍ତ୍ଵା ତଦ୍ଦତ୍ତମାନୋ ନିଜପୁରମଗମଃ ସାନିରୁଦ୍ଧଃ ସହୋଷଃ ॥8॥

ମୁହୁସ୍ତାଵଚ୍ଛକ୍ରଂ ଵରୁଣମଜୟୋ ନଂଦହରଣେ
ୟମଂ ବାଲାନୀତୌ ଦଵଦହନପାନେଽନିଲସଖମ୍ ।
ଵିଧିଂ ଵତ୍ସସ୍ତେୟେ ଗିରିଶମିହ ବାଣସ୍ୟ ସମରେ
ଵିଭୋ ଵିଶ୍ଵୋତ୍କର୍ଷୀ ତଦୟମଵତାରୋ ଜୟତି ତେ ॥9॥

ଦ୍ଵିଜରୁଷା କୃକଲାସଵପୁର୍ଧରଂ ନୃଗନୃପଂ ତ୍ରିଦିଵାଲୟମାପୟନ୍ ।
ନିଜଜନେ ଦ୍ଵିଜଭକ୍ତିମନୁତ୍ତମାମୁପଦିଶନ୍ ପଵନେଶ୍ଵର୍ ପାହି ମାମ୍ ॥10॥