ନାରାୟଣୀୟଂ ଦଶକ 79 – ରୁକ୍ମିଣୀହରଣଂ ଵିଵାହଂ ଚ

ବଲସମେତବଲାନୁଗତୋ ଭଵାନ୍ ପୁରମଗାହତ ଭୀଷ୍ମକମାନିତଃ ।
ଦ୍ଵିଜସୁତଂ ତ୍ଵଦୁପାଗମଵାଦିନଂ ଧୃତରସା ତରସା ପ୍ରଣନାମ ସା ॥1॥

ଭୁଵନକାଂତମଵେକ୍ଷ୍ୟ ଭଵଦ୍ଵପୁର୍ନୃପସୁତସ୍ୟ ନିଶମ୍ୟ ଚ ଚେଷ୍ଟିତମ୍ ।
ଵିପୁଲଖେଦଜୁଷାଂ ପୁରଵାସିନାଂ ସରୁଦିତୈରୁଦିତୈରଗମନ୍ନିଶା ॥2॥

ତଦନୁ ଵଂଦିତୁମିଂଦୁମୁଖୀ ଶିଵାଂ ଵିହିତମଂଗଲଭୂଷଣଭାସୁରା ।
ନିରଗମତ୍ ଭଵଦର୍ପିତଜୀଵିତା ସ୍ଵପୁରତଃ ପୁରତଃ ସୁଭଟାଵୃତା ॥3॥

କୁଲଵଧୂଭିରୁପେତ୍ୟ କୁମାରିକା ଗିରିସୁତାଂ ପରିପୂଜ୍ୟ ଚ ସାଦରମ୍ ।
ମୁହୁରୟାଚତ ତତ୍ପଦପଂକଜେ ନିପତିତା ପତିତାଂ ତଵ କେଵଲମ୍ ॥4॥

ସମଵଲୋକକୁତୂହଲସଂକୁଲେ ନୃପକୁଲେ ନିଭୃତଂ ତ୍ଵୟି ଚ ସ୍ଥିତେ ।
ନୃପସୁତା ନିରଗାଦ୍ଗିରିଜାଲୟାତ୍ ସୁରୁଚିରଂ ରୁଚିରଂଜିତଦିଙ୍ମୁଖା ॥5॥

ଭୁଵନମୋହନରୂପରୁଚା ତଦା ଵିଵଶିତାଖିଲରାଜକଦଂବୟା ।
ତ୍ଵମପି ଦେଵ କଟାକ୍ଷଵିମୋକ୍ଷଣୈଃ ପ୍ରମଦୟା ମଦୟାଂଚକୃଷେ ମନାକ୍ ॥6॥

କ୍ଵନୁ ଗମିଷ୍ୟସି ଚଂଦ୍ରମୁଖୀତି ତାଂ ସରସମେତ୍ୟ କରେଣ ହରନ୍ କ୍ଷଣାତ୍ ।
ସମଧିରୋପ୍ୟ ରଥଂ ତ୍ଵମପାହୃଥା ଭୁଵି ତତୋ ଵିତତୋ ନିନଦୋ ଦ୍ଵିଷାମ୍ ॥7॥

କ୍ଵ ନୁ ଗତଃ ପଶୁପାଲ ଇତି କ୍ରୁଧା କୃତରଣା ୟଦୁଭିଶ୍ଚ ଜିତା ନୃପାଃ ।
ନ ତୁ ଭଵାନୁଦଚାଲ୍ୟତ ତୈରହୋ ପିଶୁନକୈଃ ଶୁନକୈରିଵ କେସରୀ ॥8॥

ତଦନୁ ରୁକ୍ମିଣମାଗତମାହଵେ ଵଧମୁପେକ୍ଷ୍ୟ ନିବଧ୍ୟ ଵିରୂପୟନ୍ ।
ହୃତମଦଂ ପରିମୁଚ୍ୟ ବଲୋକ୍ତିଭିଃ ପୁରମୟା ରମୟା ସହ କାଂତୟା ॥9॥

ନଵସମାଗମଲଜ୍ଜିତମାନସାଂ ପ୍ରଣୟକୌତୁକଜୃଂଭିତମନ୍ମଥାମ୍ ।
ଅରମୟଃ ଖଲୁ ନାଥ ୟଥାସୁଖଂ ରହସି ତାଂ ହସିତାଂଶୁଲସନ୍ମୁଖୀମ୍ ॥10॥

ଵିଵିଧନର୍ମଭିରେଵମହର୍ନିଶଂ ପ୍ରମଦମାକଲୟନ୍ ପୁନରେକଦା ।
ଋଜୁମତେଃ କିଲ ଵକ୍ରଗିରା ଭଵାନ୍ ଵରତନୋରତନୋଦତିଲୋଲତାମ୍ ॥11॥

ତଦଧିକୈରଥ ଲାଲନକୌଶଲୈଃ ପ୍ରଣୟିନୀମଧିକଂ ସୁଖୟନ୍ନିମାମ୍ ।
ଅୟି ମୁକୁଂଦ ଭଵଚ୍ଚରିତାନି ନଃ ପ୍ରଗଦତାଂ ଗଦତାଂତିମପାକୁରୁ ॥12॥