ନାରାୟଣୀୟଂ ଦଶକ 77 – ଜରାସଂଧାଦିଭିଃ ସହ ୟୁଦ୍ଧମ୍

ସୈରଂଧ୍ର୍ୟାସ୍ତଦନୁ ଚିରଂ ସ୍ମରାତୁରାୟା
ୟାତୋଽଭୂଃ ସୁଲଲିତମୁଦ୍ଧଵେନ ସାର୍ଧମ୍ ।
ଆଵାସଂ ତ୍ଵଦୁପଗମୋତ୍ସଵଂ ସଦୈଵ
ଧ୍ୟାୟଂତ୍ୟାଃ ପ୍ରତିଦିନଵାସସଜ୍ଜିକାୟାଃ ॥1॥

ଉପଗତେ ତ୍ଵୟି ପୂର୍ଣମନୋରଥାଂ ପ୍ରମଦସଂଭ୍ରମକଂପ୍ରପୟୋଧରାମ୍ ।
ଵିଵିଧମାନନମାଦଧତୀଂ ମୁଦା ରହସି ତାଂ ରମୟାଂଚକୃଷେ ସୁଖମ୍ ॥2॥

ପୃଷ୍ଟା ଵରଂ ପୁନରସାଵଵୃଣୋଦ୍ଵରାକୀ
ଭୂୟସ୍ତ୍ଵୟା ସୁରତମେଵ ନିଶାଂତରେଷୁ ।
ସାୟୁଜ୍ୟମସ୍ତ୍ଵିତି ଵଦେତ୍ ବୁଧ ଏଵ କାମଂ
ସାମୀପ୍ୟମସ୍ତ୍ଵନିଶମିତ୍ୟପି ନାବ୍ରଵୀତ୍ କିମ୍ ॥3॥

ତତୋ ଭଵାନ୍ ଦେଵ ନିଶାସୁ କାସୁଚିନ୍ମୃଗୀଦୃଶଂ ତାଂ ନିଭୃତଂ ଵିନୋଦୟନ୍ ।
ଅଦାଦୁପଶ୍ଲୋକ ଇତି ଶ୍ରୁତଂ ସୁତଂ ସ ନାରଦାତ୍ ସାତ୍ତ୍ଵତତଂତ୍ରଵିଦ୍ବବଭୌ ॥4॥

ଅକ୍ରୂରମଂଦିରମିତୋଽଥ ବଲୋଦ୍ଧଵାଭ୍ୟା-
ମଭ୍ୟର୍ଚିତୋ ବହୁ ନୁତୋ ମୁଦିତେନ ତେନ ।
ଏନଂ ଵିସୃଜ୍ୟ ଵିପିନାଗତପାଂଡଵେୟ-
ଵୃତ୍ତଂ ଵିଵେଦିଥ ତଥା ଧୃତରାଷ୍ଟ୍ର୍ଚେଷ୍ଟାମ୍ ॥5॥

ଵିଘାତାଜ୍ଜାମାତୁଃ ପରମସୁହୃଦୋ ଭୋଜନୃପତେ-
ର୍ଜରାସଂଧେ ରୁଂଧତ୍ୟନଵଧିରୁଷାଂଧେଽଥ ମଥୁରାମ୍ ।
ରଥାଦ୍ୟୈର୍ଦ୍ୟୋର୍ଲବ୍ଧୈଃ କତିପୟବଲସ୍ତ୍ଵଂ ବଲୟୁତ-
ସ୍ତ୍ରୟୋଵିଂଶତ୍ୟକ୍ଷୌହିଣି ତଦୁପନୀତଂ ସମହୃଥାଃ ॥6॥

ବଦ୍ଧଂ ବଲାଦଥ ବଲେନ ବଲୋତ୍ତରଂ ତ୍ଵଂ
ଭୂୟୋ ବଲୋଦ୍ୟମରସେନ ମୁମୋଚିଥୈନମ୍ ।
ନିଶ୍ଶେଷଦିଗ୍ଜୟସମାହୃତଵିଶ୍ଵସୈନ୍ୟାତ୍
କୋଽନ୍ୟସ୍ତତୋ ହି ବଲପୌରୁଷଵାଂସ୍ତଦାନୀମ୍ ॥7॥

ଭଗ୍ନଃ ସ ଲଗ୍ନହୃଦୟୋଽପି ନୃପୈଃ ପ୍ରଣୁନ୍ନୋ
ୟୁଦ୍ଧଂ ତ୍ଵୟା ଵ୍ୟଧିତ ଷୋଡଶକୃତ୍ଵ ଏଵମ୍ ।
ଅକ୍ଷୌହିଣୀଃ ଶିଵ ଶିଵାସ୍ୟ ଜଘଂଥ ଵିଷ୍ଣୋ
ସଂଭୂୟ ସୈକନଵତିତ୍ରିଶତଂ ତଦାନୀମ୍ ॥8॥

ଅଷ୍ଟାଦଶେଽସ୍ୟ ସମରେ ସମୁପେୟୁଷି ତ୍ଵଂ
ଦୃଷ୍ଟ୍ଵା ପୁରୋଽଥ ୟଵନଂ ୟଵନତ୍ରିକୋଟ୍ୟା ।
ତ୍ଵଷ୍ଟ୍ରା ଵିଧାପ୍ୟ ପୁରମାଶୁ ପୟୋଧିମଧ୍ୟେ
ତତ୍ରାଽଥ ୟୋଗବଲତଃ ସ୍ଵଜନାନନୈଷୀଃ ॥9॥

ପଦଭ୍ୟାଂ ତ୍ଵାଂ ପଦ୍ମମାଲୀ ଚକିତ ଇଵ ପୁରାନ୍ନିର୍ଗତୋ ଧାଵମାନୋ
ମ୍ଲେଚ୍ଛେଶେନାନୁୟାତୋ ଵଧସୁକୃତଵିହୀନେନ ଶୈଲେ ନ୍ୟଲୈଷୀଃ ।
ସୁପ୍ତେନାଂଘ୍ର୍ୟାହତେନ ଦ୍ରୁତମଥ ମୁଚୁକୁଂଦେନ ଭସ୍ମୀକୃତେଽସ୍ମିନ୍
ଭୂପାୟାସ୍ମୈ ଗୁହାଂତେ ସୁଲଲିତଵପୁଷା ତସ୍ଥିଷେ ଭକ୍ତିଭାଜେ ॥10॥

ଐକ୍ଷ୍ଵାକୋଽହଂ ଵିରକ୍ତୋଽସ୍ମ୍ୟଖିଲନୃପସୁଖେ ତ୍ଵତ୍ପ୍ରସାଦୈକକାଂକ୍ଷୀ
ହା ଦେଵେତି ସ୍ତୁଵଂତଂ ଵରଵିତତିଷୁ ତଂ ନିସ୍ପୃହଂ ଵୀକ୍ଷ୍ୟ ହୃଷ୍ୟନ୍ ।
ମୁକ୍ତେସ୍ତୁଲ୍ୟାଂ ଚ ଭକ୍ତିଂ ଧୁତସକଲମଲାଂ ମୋକ୍ଷମପ୍ୟାଶୁ ଦତ୍ଵା
କାର୍ୟଂ ହିଂସାଵିଶୁଦ୍ଧ୍ୟୈ ତପ ଇତି ଚ ତଦା ପ୍ରାତ୍ଥ ଲୋକପ୍ରତୀତ୍ୟୈ ॥11॥

ତଦନୁ ମଥୁରାଂ ଗତ୍ଵା ହତ୍ଵା ଚମୂଂ ୟଵନାହୃତାଂ
ମଗଧପତିନା ମାର୍ଗେ ସୈନ୍ୟୈଃ ପୁରେଵ ନିଵାରିତଃ ।
ଚରମଵିଜୟଂ ଦର୍ପାୟାସ୍ମୈ ପ୍ରଦାୟ ପଲାୟିତୋ
ଜଲଧିନଗରୀଂ ୟାତୋ ଵାତାଲୟେଶ୍ଵର ପାହି ମାମ୍ ॥12॥