ନାରାୟଣୀୟଂ ଦଶକ 74 – ଭଗଵତଃ ମଥୁରାପୁରୀପ୍ରଵେଶମ୍

ସଂପ୍ରାପ୍ତୋ ମଥୁରାଂ ଦିନାର୍ଧଵିଗମେ ତତ୍ରାଂତରସ୍ମିନ୍ ଵସ-
ନ୍ନାରାମେ ଵିହିତାଶନଃ ସଖିଜନୈର୍ୟାତଃ ପୁରୀମୀକ୍ଷିତୁମ୍ ।
ପ୍ରାପୋ ରାଜପଥଂ ଚିରଶ୍ରୁତିଧୃତଵ୍ୟାଲୋକକୌତୂହଲ-
ସ୍ତ୍ରୀପୁଂସୋଦ୍ୟଦଗଣ୍ୟପୁଣ୍ୟନିଗଲୈରାକୃଷ୍ୟମାଣୋ ନୁ କିମ୍ ॥1॥

ତ୍ଵତ୍ପାଦଦ୍ୟୁତିଵତ୍ ସରାଗସୁଭଗାଃ ତ୍ଵନ୍ମୂର୍ତିଵଦ୍ୟୋଷିତଃ
ସଂପ୍ରାପ୍ତା ଵିଲସତ୍ପୟୋଧରରୁଚୋ ଲୋଲା ଭଵତ୍ ଦୃଷ୍ଟିଵତ୍ ।
ହାରିଣ୍ୟସ୍ତ୍ଵଦୁରଃସ୍ଥଲୀଵଦୟି ତେ ମଂଦସ୍ମିତପ୍ରୌଢିଵ-
ନ୍ନୈର୍ମଲ୍ୟୋଲ୍ଲସିତାଃ କଚୌଘରୁଚିଵଦ୍ରାଜତ୍କଲାପାଶ୍ରିତାଃ ॥2॥

ତାସାମାକଲୟନ୍ନପାଂଗଵଲନୈର୍ମୋଦଂ ପ୍ରହର୍ଷାଦ୍ଭୁତ-
ଵ୍ୟାଲୋଲେଷୁ ଜନେଷୁ ତତ୍ର ରଜକଂ କଂଚିତ୍ ପଟୀଂ ପ୍ରାର୍ଥୟନ୍ ।
କସ୍ତେ ଦାସ୍ୟତି ରାଜକୀୟଵସନଂ ୟାହୀତି ତେନୋଦିତଃ
ସଦ୍ୟସ୍ତସ୍ୟ କରେଣ ଶୀର୍ଷମହୃଥାଃ ସୋଽପ୍ୟାପ ପୁଣ୍ୟାଂ ଗତିମ୍ ॥3॥

ଭୂୟୋ ଵାୟକମେକମାୟତମତିଂ ତୋଷେଣ ଵେଷୋଚିତଂ
ଦାଶ୍ଵାଂସଂ ସ୍ଵପଦଂ ନିନେଥ ସୁକୃତଂ କୋ ଵେଦ ଜୀଵାତ୍ମନାମ୍ ।
ମାଲାଭିଃ ସ୍ତବକୈଃ ସ୍ତଵୈରପି ପୁନର୍ମାଲାକୃତା ମାନିତୋ
ଭକ୍ତିଂ ତେନ ଵୃତାଂ ଦିଦେଶିଥ ପରାଂ ଲକ୍ଷ୍ମୀଂ ଚ ଲକ୍ଷ୍ମୀପତେ ॥4॥

କୁବ୍ଜାମବ୍ଜଵିଲୋଚନାଂ ପଥିପୁନର୍ଦୃଷ୍ଟ୍ଵାଽଂଗରାଗେ ତୟା
ଦତ୍ତେ ସାଧୁ କିଲାଂଗରାଗମଦଦାସ୍ତସ୍ୟା ମହାଂତଂ ହୃଦି ।
ଚିତ୍ତସ୍ଥାମୃଜୁତାମଥ ପ୍ରଥୟିତୁଂ ଗାତ୍ରେଽପି ତସ୍ୟାଃ ସ୍ଫୁଟଂ
ଗୃହ୍ଣନ୍ ମଂଜୁ କରେଣ ତାମୁଦନୟସ୍ତାଵଜ୍ଜଗତ୍ସୁଂଦରୀମ୍ ॥5॥

ତାଵନ୍ନିଶ୍ଚିତଵୈଭଵାସ୍ତଵ ଵିଭୋ ନାତ୍ୟଂତପାପା ଜନା
ୟତ୍କିଂଚିଦ୍ଦଦତେ ସ୍ମ ଶକ୍ତ୍ୟନୁଗୁଣଂ ତାଂବୂଲମାଲ୍ୟାଦିକମ୍ ।
ଗୃହ୍ଣାନଃ କୁସୁମାଦି କିଂଚନ ତଦା ମାର୍ଗେ ନିବଦ୍ଧାଂଜଲି-
ର୍ନାତିଷ୍ଠଂ ବତ ହା ୟତୋଽଦ୍ୟ ଵିପୁଲାମାର୍ତିଂ ଵ୍ରଜାମି ପ୍ରଭୋ ॥6॥

ଏଷ୍ୟାମୀତି ଵିମୁକ୍ତୟାଽପି ଭଗଵନ୍ନାଲେପଦାତ୍ର୍ୟା ତୟା
ଦୂରାତ୍ କାତରୟା ନିରୀକ୍ଷିତଗତିସ୍ତ୍ଵଂ ପ୍ରାଵିଶୋ ଗୋପୁରମ୍ ।
ଆଘୋଷାନୁମିତତ୍ଵଦାଗମମହାହର୍ଷୋଲ୍ଲଲଦ୍ଦେଵକୀ-
ଵକ୍ଷୋଜପ୍ରଗଲତ୍ପୟୋରସମିଷାତ୍ତ୍ଵତ୍କୀର୍ତିରଂତର୍ଗତା ॥7॥

ଆଵିଷ୍ଟୋ ନଗରୀଂ ମହୋତ୍ସଵଵତୀଂ କୋଦଂଡଶାଲାଂ ଵ୍ରଜନ୍
ମାଧୁର୍ୟେଣ ନୁ ତେଜସା ନୁ ପୁରୁଷୈର୍ଦୂରେଣ ଦତ୍ତାଂତରଃ ।
ସ୍ରଗ୍ଭିର୍ଭୂଷିତମର୍ଚିତଂ ଵରଧନୁର୍ମା ମେତି ଵାଦାତ୍ ପୁରଃ
ପ୍ରାଗୃହ୍ଣାଃ ସମରୋପୟଃ କିଲ ସମାକ୍ରାକ୍ଷୀରଭାଂକ୍ଷୀରପି ॥8॥

ଶ୍ଵଃ କଂସକ୍ଷପଣୋତ୍ସଵସ୍ୟ ପୁରତଃ ପ୍ରାରଂଭତୂର୍ୟୋପମ-
ଶ୍ଚାପଧ୍ଵଂସମହାଧ୍ଵନିସ୍ତଵ ଵିଭୋ ଦେଵାନରୋମାଂଚୟତ୍ ।
କଂସସ୍ୟାପି ଚ ଵେପଥୁସ୍ତଦୁଦିତଃ କୋଦଂଡଖଂଡଦ୍ଵୟୀ-
ଚଂଡାଭ୍ୟାହତରକ୍ଷିପୂରୁଷରଵୈରୁତ୍କୂଲିତୋଽଭୂତ୍ ତ୍ଵୟା ॥9॥

ଶିଷ୍ଟୈର୍ଦୁଷ୍ଟଜନୈଶ୍ଚ ଦୃଷ୍ଟମହିମା ପ୍ରୀତ୍ୟା ଚ ଭୀତ୍ୟା ତତଃ
ସଂପଶ୍ୟନ୍ ପୁରସଂପଦଂ ପ୍ରଵିଚରନ୍ ସାୟଂ ଗତୋ ଵାଟିକାମ୍ ।
ଶ୍ରୀଦାମ୍ନା ସହ ରାଧିକାଵିରହଜଂ ଖେଦଂ ଵଦନ୍ ପ୍ରସ୍ଵପ-
ନ୍ନାନଂଦନ୍ନଵତାରକାର୍ୟଘଟନାଦ୍ଵାତେଶ ସଂରକ୍ଷ ମାମ୍ ॥10॥