ନାରାୟଣୀୟଂ ଦଶକ 70 – ସୁଦର୍ଶନଶାପମୋକ୍ଷଂ ତଥା ଶଂଖଚୂଡ-ଅରିଷ୍ଟଵଧମ୍

ଇତି ତ୍ଵୟି ରସାକୁଲଂ ରମିତଵଲ୍ଲଭେ ଵଲ୍ଲଵାଃ
କଦାପି ପୁରମଂବିକାମିତୁରଂବିକାକାନନେ ।
ସମେତ୍ୟ ଭଵତା ସମଂ ନିଶି ନିଷେଵ୍ୟ ଦିଵ୍ୟୋତ୍ସଵଂ
ସୁଖଂ ସୁଷୁପୁରଗ୍ରସୀଦ୍ଵ୍ରଜପମୁଗ୍ରନାଗସ୍ତଦା ॥1॥

ସମୁନ୍ମୁଖମଥୋଲ୍ମୁକୈରଭିହତେଽପି ତସ୍ମିନ୍ ବଲା-
ଦମୁଂଚତି ଭଵତ୍ପଦେ ନ୍ୟପତି ପାହି ପାହୀତି ତୈଃ ।
ତଦା ଖଲୁ ପଦା ଭଵାନ୍ ସମୁପଗମ୍ୟ ପସ୍ପର୍ଶ ତଂ
ବଭୌ ସ ଚ ନିଜାଂ ତନୁଂ ସମୁପସାଦ୍ୟ ଵୈଦ୍ୟଧରୀମ୍ ॥2॥

ସୁଦର୍ଶନଧର ପ୍ରଭୋ ନନୁ ସୁଦର୍ଶନାଖ୍ୟୋଽସ୍ମ୍ୟହଂ
ମୁନୀନ୍ କ୍ଵଚିଦପାହସଂ ତ ଇହ ମାଂ ଵ୍ୟଧୁର୍ଵାହସମ୍ ।
ଭଵତ୍ପଦସମର୍ପଣାଦମଲତାଂ ଗତୋଽସ୍ମୀତ୍ୟସୌ
ସ୍ତୁଵନ୍ ନିଜପଦଂ ୟୟୌ ଵ୍ରଜପଦଂ ଚ ଗୋପା ମୁଦା ॥3॥

କଦାପି ଖଲୁ ସୀରିଣା ଵିହରତି ତ୍ଵୟି ସ୍ତ୍ରୀଜନୈ-
ର୍ଜହାର ଧନଦାନୁଗଃ ସ କିଲ ଶଂଖଚୂଡୋଽବଲାଃ ।
ଅତିଦ୍ରୁତମନୁଦ୍ରୁତସ୍ତମଥ ମୁକ୍ତନାରୀଜନଂ
ରୁରୋଜିଥ ଶିରୋମଣିଂ ହଲଭୃତେ ଚ ତସ୍ୟାଦଦାଃ ॥4॥

ଦିନେଷୁ ଚ ସୁହୃଜ୍ଜନୈସ୍ସହ ଵନେଷୁ ଲୀଲାପରଂ
ମନୋଭଵମନୋହରଂ ରସିତଵେଣୁନାଦାମୃତମ୍ ।
ଭଵଂତମମରୀଦୃଶାମମୃତପାରଣାଦାୟିନଂ
ଵିଚିଂତ୍ୟ କିମୁ ନାଲପନ୍ ଵିରହତାପିତା ଗୋପିକାଃ ॥5॥

ଭୋଜରାଜଭୃତକସ୍ତ୍ଵଥ କଶ୍ଚିତ୍ କଷ୍ଟଦୁଷ୍ଟପଥଦୃଷ୍ଟିରରିଷ୍ଟଃ ।
ନିଷ୍ଠୁରାକୃତିରପଷ୍ଠୁନିନାଦସ୍ତିଷ୍ଠତେ ସ୍ମ ଭଵତେ ଵୃଷରୂପୀ ॥6॥

ଶାକ୍ଵରୋଽଥ ଜଗତୀଧୃତିହାରୀ ମୂର୍ତିମେଷ ବୃହତୀଂ ପ୍ରଦଧାନଃ ।
ପଂକ୍ତିମାଶୁ ପରିଘୂର୍ଣ୍ୟ ପଶୂନାଂ ଛଂଦସାଂ ନିଧିମଵାପ ଭଵଂତମ୍ ॥7॥

ତୁଂଗଶୃଂଗମୁଖମାଶ୍ଵଭିୟଂତଂ ସଂଗୃହୟ୍ୟ ରଭସାଦଭିୟଂ ତମ୍ ।
ଭଦ୍ରରୂପମପି ଦୈତ୍ୟମଭଦ୍ରଂ ମର୍ଦୟନ୍ନମଦୟଃ ସୁରଲୋକମ୍ ॥8॥

ଚିତ୍ରମଦ୍ୟ ଭଗଵନ୍ ଵୃଷଘାତାତ୍ ସୁସ୍ଥିରାଽଜନି ଵୃଷସ୍ଥିତିରୁର୍ଵ୍ୟାମ୍ ।
ଵର୍ଧତେ ଚ ଵୃଷଚେତସି ଭୂୟାନ୍ ମୋଦ ଇତ୍ୟଭିନୁତୋଽସି ସୁରୈସ୍ତ୍ଵମ୍ ॥9॥

ଔକ୍ଷକାଣି ପରିଧାଵତ ଦୂରଂ ଵୀକ୍ଷ୍ୟତାମୟମିହୋକ୍ଷଵିଭେଦୀ ।
ଇତ୍ଥମାତ୍ତହସିତୈଃ ସହ ଗୋପୈର୍ଗେହଗସ୍ତ୍ଵମଵ ଵାତପୁରେଶ ॥10॥