ନାରାୟଣୀୟଂ ଦଶକ 58 – ଦାଵାଗ୍ନିସଂରକ୍ଷଣଂ ତଥା ଋତୁଵର୍ଣନମ୍

ତ୍ଵୟି ଵିହରଣଲୋଲେ ବାଲଜାଲୈଃ ପ୍ରଲଂବ-
ପ୍ରମଥନସଵିଲଂବେ ଧେନଵଃ ସ୍ଵୈରଚାରାଃ ।
ତୃଣକୁତୁକନିଵିଷ୍ଟା ଦୂରଦୂରଂ ଚରଂତ୍ୟଃ
କିମପି ଵିପିନମୈଷୀକାଖ୍ୟମୀଷାଂବଭୂଵୁଃ ॥1॥

ଅନଧିଗତନିଦାଘକ୍ରୌର୍ୟଵୃଂଦାଵନାଂତାତ୍
ବହିରିଦମୁପୟାତାଃ କାନନଂ ଧେନଵସ୍ତାଃ ।
ତଵ ଵିରହଵିଷଣ୍ଣା ଊଷ୍ମଲଗ୍ରୀଷ୍ମତାପ-
ପ୍ରସରଵିସରଦଂଭସ୍ୟାକୁଲାଃ ସ୍ତଂଭମାପୁଃ ॥2॥

ତଦନୁ ସହ ସହାୟୈର୍ଦୂରମନ୍ଵିଷ୍ୟ ଶୌରେ
ଗଲିତସରଣିମୁଂଜାରଣ୍ୟସଂଜାତଖେଦମ୍ ।
ପଶୁକୁଲମଭିଵୀକ୍ଷ୍ୟ କ୍ଷିପ୍ରମାନେତୁମାରା-
ତ୍ତ୍ଵୟି ଗତଵତି ହୀ ହୀ ସର୍ଵତୋଽଗ୍ନିର୍ଜଜୃଂଭେ ॥3॥

ସକଲହରିତି ଦୀପ୍ତେ ଘୋରଭାଂକାରଭୀମେ
ଶିଖିନି ଵିହତମାର୍ଗା ଅର୍ଧଦଗ୍ଧା ଇଵାର୍ତାଃ ।
ଅହହ ଭୁଵନବଂଧୋ ପାହି ପାହୀତି ସର୍ଵେ
ଶରଣମୁପଗତାସ୍ତ୍ଵାଂ ତାପହର୍ତାରମେକମ୍ ॥4॥

ଅଲମଲମତିଭୀତ୍ୟା ସର୍ଵତୋ ମୀଲୟଧ୍ଵଂ
ଦୃଶମିତି ତଵ ଵାଚା ମୀଲିତାକ୍ଷେଷୁ ତେଷୁ ।
କ୍ଵ ନୁ ଦଵଦହନୋଽସୌ କୁତ୍ର ମୁଂଜାଟଵୀ ସା
ସପଦି ଵଵୃତିରେ ତେ ହଂତ ଭାଂଡୀରଦେଶେ ॥5॥

ଜୟ ଜୟ ତଵ ମାୟା କେୟମୀଶେତି ତେଷାଂ
ନୁତିଭିରୁଦିତହାସୋ ବଦ୍ଧନାନାଵିଲାସଃ ।
ପୁନରପି ଵିପିନାଂତେ ପ୍ରାଚରଃ ପାଟଲାଦି-
ପ୍ରସଵନିକରମାତ୍ରଗ୍ରାହ୍ୟଘର୍ମାନୁଭାଵେ ॥6॥

ତ୍ଵୟି ଵିମୁଖମିଵୋଚ୍ଚୈସ୍ତାପଭାରଂ ଵହଂତଂ
ତଵ ଭଜନଵଦଂତଃ ପଂକମୁଚ୍ଛୋଷୟଂତମ୍ ।
ତଵ ଭୁଜଵଦୁଦଂଚଦ୍ଭୂରିତେଜଃପ୍ରଵାହଂ
ତପସମୟମନୈଷୀର୍ୟାମୁନେଷୁ ସ୍ଥଲେଷୁ ॥7॥

ତଦନୁ ଜଲଦଜାଲୈସ୍ତ୍ଵଦ୍ଵପୁସ୍ତୁଲ୍ୟଭାଭି-
ର୍ଵିକସଦମଲଵିଦ୍ୟୁତ୍ପୀତଵାସୋଵିଲାସୈଃ ।
ସକଲଭୁଵନଭାଜାଂ ହର୍ଷଦାଂ ଵର୍ଷଵେଲାଂ
କ୍ଷିତିଧରକୁହରେଷୁ ସ୍ଵୈରଵାସୀ ଵ୍ୟନୈଷୀଃ ॥8॥

କୁହରତଲନିଵିଷ୍ଟଂ ତ୍ଵାଂ ଗରିଷ୍ଠଂ ଗିରୀଂଦ୍ରଃ
ଶିଖିକୁଲନଵକେକାକାକୁଭିଃ ସ୍ତୋତ୍ରକାରୀ ।
ସ୍ଫୁଟକୁଟଜକଦଂବସ୍ତୋମପୁଷ୍ପାଂଜଲିଂ ଚ
ପ୍ରଵିଦଧଦନୁଭେଜେ ଦେଵ ଗୋଵର୍ଧନୋଽସୌ ॥9॥

ଅଥ ଶରଦମୁପେତାଂ ତାଂ ଭଵଦ୍ଭକ୍ତଚେତୋ-
ଵିମଲସଲିଲପୂରାଂ ମାନୟନ୍ କାନନେଷୁ ।
ତୃଣମମଲଵନାଂତେ ଚାରୁ ସଂଚାରୟନ୍ ଗାଃ
ପଵନପୁରପତେ ତ୍ଵଂ ଦେହି ମେ ଦେହସୌଖ୍ୟମ୍ ॥10॥