ନାରାୟଣୀୟଂ ଦଶକ 51 – ଅଘାସୁରଵଧମ୍

କଦାଚନ ଵ୍ରଜଶିଶୁଭିଃ ସମଂ ଭଵାନ୍
ଵନାଶନେ ଵିହିତମତିଃ ପ୍ରଗେତରାମ୍ ।
ସମାଵୃତୋ ବହୁତରଵତ୍ସମଂଡଲୈଃ
ସତେମନୈର୍ନିରଗମଦୀଶ ଜେମନୈଃ ॥1॥

ଵିନିର୍ୟତସ୍ତଵ ଚରଣାଂବୁଜଦ୍ଵୟା-
ଦୁଦଂଚିତଂ ତ୍ରିଭୁଵନପାଵନଂ ରଜଃ ।
ମହର୍ଷୟଃ ପୁଲକଧରୈଃ କଲେବରୈ-
ରୁଦୂହିରେ ଧୃତଭଵଦୀକ୍ଷଣୋତ୍ସଵାଃ ॥2॥

ପ୍ରଚାରୟତ୍ୟଵିରଲଶାଦ୍ଵଲେ ତଲେ
ପଶୂନ୍ ଵିଭୋ ଭଵତି ସମଂ କୁମାରକୈଃ ।
ଅଘାସୁରୋ ନ୍ୟରୁଣଦଘାୟ ଵର୍ତନୀ
ଭୟାନକଃ ସପଦି ଶୟାନକାକୃତିଃ ॥3॥

ମହାଚଲପ୍ରତିମତନୋର୍ଗୁହାନିଭ-
ପ୍ରସାରିତପ୍ରଥିତମୁଖସ୍ୟ କାନନେ ।
ମୁଖୋଦରଂ ଵିହରଣକୌତୁକାଦ୍ଗତାଃ
କୁମାରକାଃ କିମପି ଵିଦୂରଗେ ତ୍ଵୟି ॥4॥

ପ୍ରମାଦତଃ ପ୍ରଵିଶତି ପନ୍ନଗୋଦରଂ
କ୍ଵଥତ୍ତନୌ ପଶୁପକୁଲେ ସଵାତ୍ସକେ ।
ଵିଦନ୍ନିଦଂ ତ୍ଵମପି ଵିଵେଶିଥ ପ୍ରଭୋ
ସୁହୃଜ୍ଜନଂ ଵିଶରଣମାଶୁ ରକ୍ଷିତୁମ୍ ॥5॥

ଗଲୋଦରେ ଵିପୁଲିତଵର୍ଷ୍ମଣା ତ୍ଵୟା
ମହୋରଗେ ଲୁଠତି ନିରୁଦ୍ଧମାରୁତେ ।
ଦ୍ରୁତଂ ଭଵାନ୍ ଵିଦଲିତକଂଠମଂଡଲୋ
ଵିମୋଚୟନ୍ ପଶୁପପଶୂନ୍ ଵିନିର୍ୟୟୌ ॥6॥

କ୍ଷଣଂ ଦିଵି ତ୍ଵଦୁପଗମାର୍ଥମାସ୍ଥିତଂ
ମହାସୁରପ୍ରଭଵମହୋ ମହୋ ମହତ୍ ।
ଵିନିର୍ଗତେ ତ୍ଵୟି ତୁ ନିଲୀନମଂଜସା
ନଭଃସ୍ଥଲେ ନନୃତୁରଥୋ ଜଗୁଃ ସୁରାଃ ॥7॥

ସଵିସ୍ମୟୈଃ କମଲଭଵାଦିଭିଃ ସୁରୈ-
ରନୁଦ୍ରୁତସ୍ତଦନୁ ଗତଃ କୁମାରକୈଃ ।
ଦିନେ ପୁନସ୍ତରୁଣଦଶାମୁପେୟୁଷି
ସ୍ଵକୈର୍ଭଵାନତନୁତ ଭୋଜନୋତ୍ସଵମ୍ ॥8॥

ଵିଷାଣିକାମପି ମୁରଲୀଂ ନିତଂବକେ
ନିଵେଶୟନ୍ କବଲଧରଃ କରାଂବୁଜେ ।
ପ୍ରହାସୟନ୍ କଲଵଚନୈଃ କୁମାରକାନ୍
ବୁଭୋଜିଥ ତ୍ରିଦଶଗଣୈର୍ମୁଦା ନୁତଃ ॥9॥

ସୁଖାଶନଂ ତ୍ଵିହ ତଵ ଗୋପମଂଡଲେ
ମଖାଶନାତ୍ ପ୍ରିୟମିଵ ଦେଵମଂଡଲେ ।
ଇତି ସ୍ତୁତସ୍ତ୍ରିଦଶଵରୈର୍ଜଗତ୍ପତେ
ମରୁତ୍ପୁରୀନିଲୟ ଗଦାତ୍ ପ୍ରପାହି ମାମ୍ ॥10॥