ନାରାୟଣୀୟଂ ଦଶକ 43 – ତୃଣାଵର୍ତଵଧମ୍

ତ୍ଵାମେକଦା ଗୁରୁମରୁତ୍ପୁରନାଥ ଵୋଢୁଂ
ଗାଢାଧିରୂଢଗରିମାଣମପାରୟଂତୀ ।
ମାତା ନିଧାୟ ଶୟନେ କିମିଦଂ ବତେତି
ଧ୍ୟାୟଂତ୍ୟଚେଷ୍ଟତ ଗୃହେଷୁ ନିଵିଷ୍ଟଶଂକା ॥1॥

ତାଵଦ୍ଵିଦୂରମୁପକର୍ଣିତଘୋରଘୋଷ-
ଵ୍ୟାଜୃଂଭିପାଂସୁପଟଲୀପରିପୂରିତାଶଃ ।
ଵାତ୍ୟାଵପୁସ୍ସ କିଲ ଦୈତ୍ୟଵରସ୍ତୃଣାଵ-
ର୍ତାଖ୍ୟୋ ଜହାର ଜନମାନସହାରିଣଂ ତ୍ଵାମ୍ ॥2॥

ଉଦ୍ଦାମପାଂସୁତିମିରାହତଦୃଷ୍ଟିପାତେ
ଦ୍ରଷ୍ଟୁଂ କିମପ୍ୟକୁଶଲେ ପଶୁପାଲଲୋକେ ।
ହା ବାଲକସ୍ୟ କିମିତି ତ୍ଵଦୁପାଂତମାପ୍ତା
ମାତା ଭଵଂତମଵିଲୋକ୍ୟ ଭୃଶଂ ରୁରୋଦ ॥3॥

ତାଵତ୍ ସ ଦାନଵଵରୋଽପି ଚ ଦୀନମୂର୍ତି-
ର୍ଭାଵତ୍କଭାରପରିଧାରଣଲୂନଵେଗଃ ।
ସଂକୋଚମାପ ତଦନୁ କ୍ଷତପାଂସୁଘୋଷେ
ଘୋଷେ ଵ୍ୟତାୟତ ଭଵଜ୍ଜନନୀନିନାଦଃ ॥4॥

ରୋଦୋପକର୍ଣନଵଶାଦୁପଗମ୍ୟ ଗେହଂ
କ୍ରଂଦତ୍ସୁ ନଂଦମୁଖଗୋପକୁଲେଷୁ ଦୀନଃ ।
ତ୍ଵାଂ ଦାନଵସ୍ତ୍ଵଖିଲମୁକ୍ତିକରଂ ମୁମୁକ୍ଷୁ-
ସ୍ତ୍ଵୟ୍ୟପ୍ରମୁଂଚତି ପପାତ ଵିୟତ୍ପ୍ରଦେଶାତ୍ ॥5॥

ରୋଦାକୁଲାସ୍ତଦନୁ ଗୋପଗଣା ବହିଷ୍ଠ-
ପାଷାଣପୃଷ୍ଠଭୁଵି ଦେହମତିସ୍ଥଵିଷ୍ଠମ୍ ।
ପ୍ରୈକ୍ଷଂତ ହଂତ ନିପତଂତମମୁଷ୍ୟ ଵକ୍ଷ-
ସ୍ୟକ୍ଷୀଣମେଵ ଚ ଭଵଂତମଲଂ ହସଂତମ୍ ॥6॥

ଗ୍ରାଵପ୍ରପାତପରିପିଷ୍ଟଗରିଷ୍ଠଦେହ-
ଭ୍ରଷ୍ଟାସୁଦୁଷ୍ଟଦନୁଜୋପରି ଧୃଷ୍ଟହାସମ୍ ।
ଆଘ୍ନାନମଂବୁଜକରେଣ ଭଵଂତମେତ୍ୟ
ଗୋପା ଦଧୁର୍ଗିରିଵରାଦିଵ ନୀଲରତ୍ନମ୍ ॥7॥

ଏକୈକମାଶୁ ପରିଗୃହ୍ୟ ନିକାମନଂଦ-
ନ୍ନଂଦାଦିଗୋପପରିରବ୍ଧଵିଚୁଂବିତାଂଗମ୍ ।
ଆଦାତୁକାମପରିଶଂକିତଗୋପନାରୀ-
ହସ୍ତାଂବୁଜପ୍ରପତିତଂ ପ୍ରଣୁମୋ ଭଵଂତମ୍ ॥8॥

ଭୂୟୋଽପି କିନ୍ନୁ କୃଣୁମଃ ପ୍ରଣତାର୍ତିହାରୀ
ଗୋଵିଂଦ ଏଵ ପରିପାଲୟତାତ୍ ସୁତଂ ନଃ ।
ଇତ୍ୟାଦି ମାତରପିତୃପ୍ରମୁଖୈସ୍ତଦାନୀଂ
ସଂପ୍ରାର୍ଥିତସ୍ତ୍ଵଦଵନାୟ ଵିଭୋ ତ୍ଵମେଵ ॥9॥

ଵାତାତ୍ମକଂ ଦନୁଜମେଵମୟି ପ୍ରଧୂନ୍ଵନ୍
ଵାତୋଦ୍ଭଵାନ୍ ମମ ଗଦାନ୍ କିମୁ ନୋ ଧୁନୋଷି ।
କିଂ ଵା କରୋମି ପୁନରପ୍ୟନିଲାଲୟେଶ
ନିଶ୍ଶେଷରୋଗଶମନଂ ମୁହୁରର୍ଥୟେ ତ୍ଵାମ୍ ॥10॥