ନାରାୟଣୀୟଂ ଦଶକ 4 – ୟୋଗାଭ୍ୟାସଃ ତଥା ୟୋଗସିଦ୍ଧିଃ

କଲ୍ୟତାଂ ମମ କୁରୁଷ୍ଵ ତାଵତୀଂ କଲ୍ୟତେ ଭଵଦୁପାସନଂ ୟୟା ।
ସ୍ପଷ୍ଟମଷ୍ଟଵିଧୟୋଗଚର୍ୟୟା ପୁଷ୍ଟୟାଶୁ ତଵ ତୁଷ୍ଟିମାପ୍ନୁୟାମ୍ ॥1॥

ବ୍ରହ୍ମଚର୍ୟଦୃଢତାଦିଭିର୍ୟମୈରାପ୍ଲଵାଦିନିୟମୈଶ୍ଚ ପାଵିତାଃ ।
କୁର୍ମହେ ଦୃଢମମୀ ସୁଖାସନଂ ପଂକଜାଦ୍ୟମପି ଵା ଭଵତ୍ପରାଃ ॥2॥

ତାରମଂତରନୁଚିଂତ୍ୟ ସଂତତଂ ପ୍ରାଣଵାୟୁମଭିୟମ୍ୟ ନିର୍ମଲାଃ ।
ଇଂଦ୍ରିୟାଣି ଵିଷୟାଦଥାପହୃତ୍ୟାସ୍ମହେ ଭଵଦୁପାସନୋନ୍ମୁଖାଃ ॥3॥

ଅସ୍ଫୁଟେ ଵପୁଷି ତେ ପ୍ରୟତ୍ନତୋ ଧାରୟେମ ଧିଷଣାଂ ମୁହୁର୍ମୁହୁଃ ।
ତେନ ଭକ୍ତିରସମଂତରାର୍ଦ୍ରତାମୁଦ୍ଵହେମ ଭଵଦଂଘ୍ରିଚିଂତକା ॥4॥

ଵିସ୍ଫୁଟାଵୟଵଭେଦସୁଂଦରଂ ତ୍ଵଦ୍ଵପୁଃ ସୁଚିରଶୀଲନାଵଶାତ୍ ।
ଅଶ୍ରମଂ ମନସି ଚିଂତୟାମହେ ଧ୍ୟାନୟୋଗନିରତାସ୍ତ୍ଵଦାଶ୍ରୟାଃ ॥5॥

ଧ୍ୟାୟତାଂ ସକଲମୂର୍ତିମୀଦୃଶୀମୁନ୍ମିଷନ୍ମଧୁରତାହୃତାତ୍ମନାମ୍ ।
ସାଂଦ୍ରମୋଦରସରୂପମାଂତରଂ ବ୍ରହ୍ମ ରୂପମୟି ତେଽଵଭାସତେ ॥6॥

ତତ୍ସମାସ୍ଵଦନରୂପିଣୀଂ ସ୍ଥିତିଂ ତ୍ଵତ୍ସମାଧିମୟି ଵିଶ୍ଵନାୟକ ।
ଆଶ୍ରିତାଃ ପୁନରତଃ ପରିଚ୍ୟୁତାଵାରଭେମହି ଚ ଧାରଣାଦିକମ୍ ॥7॥

ଇତ୍ଥମଭ୍ୟସନନିର୍ଭରୋଲ୍ଲସତ୍ତ୍ଵତ୍ପରାତ୍ମସୁଖକଲ୍ପିତୋତ୍ସଵାଃ ।
ମୁକ୍ତଭକ୍ତକୁଲମୌଲିତାଂ ଗତାଃ ସଂଚରେମ ଶୁକନାରଦାଦିଵତ୍ ॥8॥

ତ୍ଵତ୍ସମାଧିଵିଜୟେ ତୁ ୟଃ ପୁନର୍ମଂକ୍ଷୁ ମୋକ୍ଷରସିକଃ କ୍ରମେଣ ଵା ।
ୟୋଗଵଶ୍ୟମନିଲଂ ଷଡାଶ୍ରୟୈରୁନ୍ନୟତ୍ୟଜ ସୁଷୁମ୍ନୟା ଶନୈଃ ॥9॥

ଲିଂଗଦେହମପି ସଂତ୍ୟଜନ୍ନଥୋ ଲୀୟତେ ତ୍ଵୟି ପରେ ନିରାଗ୍ରହଃ ।
ଊର୍ଧ୍ଵଲୋକକୁତୁକୀ ତୁ ମୂର୍ଧତଃ ସାର୍ଧମେଵ କରଣୈର୍ନିରୀୟତେ ॥10॥

ଅଗ୍ନିଵାସରଵଲର୍କ୍ଷପକ୍ଷଗୈରୁତ୍ତରାୟଣଜୁଷା ଚ ଦୈଵତୈଃ ।
ପ୍ରାପିତୋ ରଵିପଦଂ ଭଵତ୍ପରୋ ମୋଦଵାନ୍ ଧ୍ରୁଵପଦାଂତମୀୟତେ ॥11॥

ଆସ୍ଥିତୋଽଥ ମହରାଲୟେ ୟଦା ଶେଷଵକ୍ତ୍ରଦହନୋଷ୍ମଣାର୍ଦ୍ୟତେ ।
ଈୟତେ ଭଵଦୁପାଶ୍ରୟସ୍ତଦା ଵେଧସଃ ପଦମତଃ ପୁରୈଵ ଵା ॥12॥

ତତ୍ର ଵା ତଵ ପଦେଽଥଵା ଵସନ୍ ପ୍ରାକୃତପ୍ରଲୟ ଏତି ମୁକ୍ତତାମ୍ ।
ସ୍ଵେଚ୍ଛୟା ଖଲୁ ପୁରା ଵିମୁଚ୍ୟତେ ସଂଵିଭିଦ୍ୟ ଜଗଦଂଡମୋଜସା ॥13॥

ତସ୍ୟ ଚ କ୍ଷିତିପୟୋମହୋଽନିଲଦ୍ୟୋମହତ୍ପ୍ରକୃତିସପ୍ତକାଵୃତୀଃ ।
ତତ୍ତଦାତ୍ମକତୟା ଵିଶନ୍ ସୁଖୀ ୟାତି ତେ ପଦମନାଵୃତଂ ଵିଭୋ ॥14॥

ଅର୍ଚିରାଦିଗତିମୀଦୃଶୀଂ ଵ୍ରଜନ୍ ଵିଚ୍ୟୁତିଂ ନ ଭଜତେ ଜଗତ୍ପତେ ।
ସଚ୍ଚିଦାତ୍ମକ ଭଵତ୍ ଗୁଣୋଦୟାନୁଚ୍ଚରଂତମନିଲେଶ ପାହି ମାମ୍ ॥15॥