ନାରାୟଣୀୟଂ ଦଶକ 37 – ଶ୍ରୀକୃଷ୍ଣାଵତାରୋପକ୍ରମମ୍

ସାଂଦ୍ରାନଂଦତନୋ ହରେ ନନୁ ପୁରା ଦୈଵାସୁରେ ସଂଗରେ
ତ୍ଵତ୍କୃତ୍ତା ଅପି କର୍ମଶେଷଵଶତୋ ୟେ ତେ ନ ୟାତା ଗତିମ୍ ।
ତେଷାଂ ଭୂତଲଜନ୍ମନାଂ ଦିତିଭୁଵାଂ ଭାରେଣ ଦୂରାର୍ଦିତା
ଭୂମିଃ ପ୍ରାପ ଵିରିଂଚମାଶ୍ରିତପଦଂ ଦେଵୈଃ ପୁରୈଵାଗତୈଃ ॥1॥

ହା ହା ଦୁର୍ଜନଭୂରିଭାରମଥିତାଂ ପାଥୋନିଧୌ ପାତୁକା-
ମେତାଂ ପାଲୟ ହଂତ ମେ ଵିଵଶତାଂ ସଂପୃଚ୍ଛ ଦେଵାନିମାନ୍ ।
ଇତ୍ୟାଦିପ୍ରଚୁରପ୍ରଲାପଵିଵଶାମାଲୋକ୍ୟ ଧାତା ମହୀଂ
ଦେଵାନାଂ ଵଦନାନି ଵୀକ୍ଷ୍ୟ ପରିତୋ ଦଧ୍ୟୌ ଭଵଂତଂ ହରେ ॥2॥

ଊଚେ ଚାଂବୁଜଭୂରମୂନୟି ସୁରାଃ ସତ୍ୟଂ ଧରିତ୍ର୍ୟା ଵଚୋ
ନନ୍ଵସ୍ୟା ଭଵତାଂ ଚ ରକ୍ଷଣଵିଧୌ ଦକ୍ଷୋ ହି ଲକ୍ଷ୍ମୀପତିଃ ।
ସର୍ଵେ ଶର୍ଵପୁରସ୍ସରା ଵୟମିତୋ ଗତ୍ଵା ପୟୋଵାରିଧିଂ
ନତ୍ଵା ତଂ ସ୍ତୁମହେ ଜଵାଦିତି ୟୟୁଃ ସାକଂ ତଵାକେତନମ୍ ॥3॥

ତେ ମୁଗ୍ଧାନିଲଶାଲିଦୁଗ୍ଧଜଲଧେସ୍ତୀରଂ ଗତାଃ ସଂଗତା
ୟାଵତ୍ତ୍ଵତ୍ପଦଚିଂତନୈକମନସସ୍ତାଵତ୍ ସ ପାଥୋଜଭୂଃ ।
ତ୍ଵଦ୍ଵାଚଂ ହୃଦୟେ ନିଶମ୍ୟ ସକଲାନାନଂଦୟନ୍ନୂଚିଵା-
ନାଖ୍ୟାତଃ ପରମାତ୍ମନା ସ୍ଵୟମହଂ ଵାକ୍ୟଂ ତଦାକର୍ଣ୍ୟତାମ୍ ॥4॥

ଜାନେ ଦୀନଦଶାମହଂ ଦିଵିଷଦାଂ ଭୂମେଶ୍ଚ ଭୀମୈର୍ନୃପୈ-
ସ୍ତତ୍କ୍ଷେପାୟ ଭଵାମି ୟାଦଵକୁଲେ ସୋଽହଂ ସମଗ୍ରାତ୍ମନା ।
ଦେଵା ଵୃଷ୍ଣିକୁଲେ ଭଵଂତୁ କଲୟା ଦେଵାଂଗନାଶ୍ଚାଵନୌ
ମତ୍ସେଵାର୍ଥମିତି ତ୍ଵଦୀୟଵଚନଂ ପାଥୋଜଭୂରୂଚିଵାନ୍ ॥5॥

ଶ୍ରୁତ୍ଵା କର୍ଣରସାୟନଂ ତଵ ଵଚଃ ସର୍ଵେଷୁ ନିର୍ଵାପିତ-
ସ୍ଵାଂତେଷ୍ଵୀଶ ଗତେଷୁ ତାଵକକୃପାପୀୟୂଷତୃପ୍ତାତ୍ମସୁ ।
ଵିଖ୍ୟାତେ ମଧୁରାପୁରେ କିଲ ଭଵତ୍ସାନ୍ନିଧ୍ୟପୁଣ୍ୟୋତ୍ତରେ
ଧନ୍ୟାଂ ଦେଵକନଂଦନାମୁଦଵହଦ୍ରାଜା ସ ଶୂରାତ୍ମଜଃ ॥6॥

ଉଦ୍ଵାହାଵସିତୌ ତଦୀୟସହଜଃ କଂସୋଽଥ ସମ୍ମାନୟ-
ନ୍ନେତୌ ସୂତତୟା ଗତଃ ପଥି ରଥେ ଵ୍ୟୋମୋତ୍ଥୟା ତ୍ଵଦ୍ଗିରା ।
ଅସ୍ୟାସ୍ତ୍ଵାମତିଦୁଷ୍ଟମଷ୍ଟମସୁତୋ ହଂତେତି ହଂତେରିତଃ
ସଂତ୍ରାସାତ୍ ସ ତୁ ହଂତୁମଂତିକଗତାଂ ତନ୍ଵୀଂ କୃପାଣୀମଧାତ୍ ॥7॥

ଗୃହ୍ଣାନଶ୍ଚିକୁରେଷୁ ତାଂ ଖଲମତିଃ ଶୌରେଶ୍ଚିରଂ ସାଂତ୍ଵନୈ-
ର୍ନୋ ମୁଂଚନ୍ ପୁନରାତ୍ମଜାର୍ପଣଗିରା ପ୍ରୀତୋଽଥ ୟାତୋ ଗୃହାନ୍ ।
ଆଦ୍ୟଂ ତ୍ଵତ୍ସହଜଂ ତଥାଽର୍ପିତମପି ସ୍ନେହେନ ନାହନ୍ନସୌ
ଦୁଷ୍ଟାନାମପି ଦେଵ ପୁଷ୍ଟକରୁଣା ଦୃଷ୍ଟା ହି ଧୀରେକଦା ॥8॥

ତାଵତ୍ତ୍ଵନ୍ମନସୈଵ ନାରଦମୁନିଃ ପ୍ରୋଚେ ସ ଭୋଜେଶ୍ଵରଂ
ୟୂୟଂ ନନ୍ଵସୁରାଃ ସୁରାଶ୍ଚ ୟଦଵୋ ଜାନାସି କିଂ ନ ପ୍ରଭୋ ।
ମାୟାଵୀ ସ ହରିର୍ଭଵଦ୍ଵଧକୃତେ ଭାଵୀ ସୁରପ୍ରାର୍ଥନା-
ଦିତ୍ୟାକର୍ଣ୍ୟ ୟଦୂନଦୂଧୁନଦସୌ ଶୌରେଶ୍ଚ ସୂନୂନହନ୍ ॥9॥

ପ୍ରାପ୍ତେ ସପ୍ତମଗର୍ଭତାମହିପତୌ ତ୍ଵତ୍ପ୍ରେରଣାନ୍ମାୟୟା
ନୀତେ ମାଧଵ ରୋହିଣୀଂ ତ୍ଵମପି ଭୋଃସଚ୍ଚିତ୍ସୁଖୈକାତ୍ମକଃ ।
ଦେଵକ୍ୟା ଜଠରଂ ଵିଵେଶିଥ ଵିଭୋ ସଂସ୍ତୂୟମାନଃ ସୁରୈଃ
ସ ତ୍ଵଂ କୃଷ୍ଣ ଵିଧୂୟ ରୋଗପଟଲୀଂ ଭକ୍ତିଂ ପରାଂ ଦେହି ମେ ॥10॥