ନାରାୟଣୀୟଂ ଦଶକ 27 – କ୍ଷୀରାବ୍ଧିମଥନଂ ତଥା କୂର୍ମାଵତାରମ୍

ଦୂର୍ଵାସାସ୍ସୁରଵନିତାପ୍ତଦିଵ୍ୟମାଲ୍ୟଂ
ଶକ୍ରାୟ ସ୍ଵୟମୁପଦାୟ ତତ୍ର ଭୂୟଃ ।
ନାଗେଂଦ୍ରପ୍ରତିମୃଦିତେ ଶଶାପ ଶକ୍ରଂ
କା କ୍ଷାଂତିସ୍ତ୍ଵଦିତରଦେଵତାଂଶଜାନାମ୍ ॥1॥

ଶାପେନ ପ୍ରଥିତଜରେଽଥ ନିର୍ଜରେଂଦ୍ରେ
ଦେଵେଷ୍ଵପ୍ୟସୁରଜିତେଷୁ ନିଷ୍ପ୍ରଭେଷୁ ।
ଶର୍ଵାଦ୍ୟାଃ କମଲଜମେତ୍ୟ ସର୍ଵଦେଵା
ନିର୍ଵାଣପ୍ରଭଵ ସମଂ ଭଵଂତମାପୁଃ ॥2॥

ବ୍ରହ୍ମାଦ୍ୟୈଃ ସ୍ତୁତମହିମା ଚିରଂ ତଦାନୀଂ
ପ୍ରାଦୁଷ୍ଷନ୍ ଵରଦ ପୁରଃ ପରେଣ ଧାମ୍ନା ।
ହେ ଦେଵା ଦିତିଜକୁଲୈର୍ଵିଧାୟ ସଂଧିଂ
ପୀୟୂଷଂ ପରିମଥତେତି ପର୍ୟଶାସ୍ତ୍ଵମ୍ ॥3॥

ସଂଧାନଂ କୃତଵତି ଦାନଵୈଃ ସୁରୌଘେ
ମଂଥାନଂ ନୟତି ମଦେନ ମଂଦରାଦ୍ରିମ୍ ।
ଭ୍ରଷ୍ଟେଽସ୍ମିନ୍ ବଦରମିଵୋଦ୍ଵହନ୍ ଖଗେଂଦ୍ରେ
ସଦ୍ୟସ୍ତ୍ଵଂ ଵିନିହିତଵାନ୍ ପୟଃପୟୋଧୌ ॥4॥

ଆଧାୟ ଦ୍ରୁତମଥ ଵାସୁକିଂ ଵରତ୍ରାଂ
ପାଥୋଧୌ ଵିନିହିତସର୍ଵବୀଜଜାଲେ ।
ପ୍ରାରବ୍ଧେ ମଥନଵିଧୌ ସୁରାସୁରୈସ୍ତୈ-
ର୍ଵ୍ୟାଜାତ୍ତ୍ଵଂ ଭୁଜଗମୁଖେଽକରୋସ୍ସୁରାରୀନ୍ ॥5॥

କ୍ଷୁବ୍ଧାଦ୍ରୌ କ୍ଷୁଭିତଜଲୋଦରେ ତଦାନୀଂ
ଦୁଗ୍ଧାବ୍ଧୌ ଗୁରୁତରଭାରତୋ ନିମଗ୍ନେ ।
ଦେଵେଷୁ ଵ୍ୟଥିତତମେଷୁ ତତ୍ପ୍ରିୟୈଷୀ
ପ୍ରାଣୈଷୀଃ କମଠତନୁଂ କଠୋରପୃଷ୍ଠାମ୍ ॥6॥

ଵଜ୍ରାତିସ୍ଥିରତରକର୍ପରେଣ ଵିଷ୍ଣୋ
ଵିସ୍ତାରାତ୍ପରିଗତଲକ୍ଷୟୋଜନେନ ।
ଅଂଭୋଧେଃ କୁହରଗତେନ ଵର୍ଷ୍ମଣା ତ୍ଵଂ
ନିର୍ମଗ୍ନଂ କ୍ଷିତିଧରନାଥମୁନ୍ନିନେଥ ॥7॥

ଉନ୍ମଗ୍ନେ ଝଟିତି ତଦା ଧରାଧରେଂଦ୍ରେ
ନିର୍ମେଥୁର୍ଦୃଢମିହ ସମ୍ମଦେନ ସର୍ଵେ ।
ଆଵିଶ୍ୟ ଦ୍ଵିତୟଗଣେଽପି ସର୍ପରାଜେ
ଵୈଵଶ୍ୟଂ ପରିଶମୟନ୍ନଵୀଵୃଧସ୍ତାନ୍ ॥8॥

ଉଦ୍ଦାମଭ୍ରମଣଜଵୋନ୍ନମଦ୍ଗିରୀଂଦ୍ର-
ନ୍ୟସ୍ତୈକସ୍ଥିରତରହସ୍ତପଂକଜଂ ତ୍ଵାମ୍ ।
ଅଭ୍ରାଂତେ ଵିଧିଗିରିଶାଦୟଃ ପ୍ରମୋଦା-
ଦୁଦ୍ଭ୍ରାଂତା ନୁନୁଵୁରୁପାତ୍ତପୁଷ୍ପଵର୍ଷାଃ ॥9॥

ଦୈତ୍ୟୌଘେ ଭୁଜଗମୁଖାନିଲେନ ତପ୍ତେ
ତେନୈଵ ତ୍ରିଦଶକୁଲେଽପି କିଂଚିଦାର୍ତେ ।
କାରୁଣ୍ୟାତ୍ତଵ କିଲ ଦେଵ ଵାରିଵାହାଃ
ପ୍ରାଵର୍ଷନ୍ନମରଗଣାନ୍ନ ଦୈତ୍ୟସଂଘାନ୍ ॥10॥

ଉଦ୍ଭ୍ରାମ୍ୟଦ୍ବହୁତିମିନକ୍ରଚକ୍ରଵାଲେ
ତତ୍ରାବ୍ଧୌ ଚିରମଥିତେଽପି ନିର୍ଵିକାରେ ।
ଏକସ୍ତ୍ଵଂ କରୟୁଗକୃଷ୍ଟସର୍ପରାଜଃ
ସଂରାଜନ୍ ପଵନପୁରେଶ ପାହି ରୋଗାତ୍ ॥11॥