ନାରାୟଣୀୟଂ ଦଶକ 16 – ନରନାରାୟଣାଵତାରଂ ତଥା ଦକ୍ଷୟାଗଃ

ଦକ୍ଷୋ ଵିରିଂଚତନୟୋଽଥ ମନୋସ୍ତନୂଜାଂ
ଲବ୍ଧ୍ଵା ପ୍ରସୂତିମିହ ଷୋଡଶ ଚାପ କନ୍ୟାଃ ।
ଧର୍ମେ ତ୍ରୟୋଦଶ ଦଦୌ ପିତୃଷୁ ସ୍ଵଧାଂ ଚ
ସ୍ଵାହାଂ ହଵିର୍ଭୁଜି ସତୀଂ ଗିରିଶେ ତ୍ଵଦଂଶେ ॥1॥

ମୂର୍ତିର୍ହି ଧର୍ମଗୃହିଣୀ ସୁଷୁଵେ ଭଵଂତଂ
ନାରାୟଣଂ ନରସଖଂ ମହିତାନୁଭାଵମ୍ ।
ୟଜ୍ଜନ୍ମନି ପ୍ରମୁଦିତାଃ କୃତତୂର୍ୟଘୋଷାଃ
ପୁଷ୍ପୋତ୍କରାନ୍ ପ୍ରଵଵୃଷୁର୍ନୁନୁଵୁଃ ସୁରୌଘାଃ ॥2॥

ଦୈତ୍ୟଂ ସହସ୍ରକଵଚଂ କଵଚୈଃ ପରୀତଂ
ସାହସ୍ରଵତ୍ସରତପସ୍ସମରାଭିଲଵ୍ୟୈଃ ।
ପର୍ୟାୟନିର୍ମିତତପସ୍ସମରୌ ଭଵଂତୌ
ଶିଷ୍ଟୈକକଂକଟମମୁଂ ନ୍ୟହତାଂ ସଲୀଲମ୍ ॥3॥

ଅନ୍ଵାଚରନ୍ନୁପଦିଶନ୍ନପି ମୋକ୍ଷଧର୍ମଂ
ତ୍ଵଂ ଭ୍ରାତୃମାନ୍ ବଦରିକାଶ୍ରମମଧ୍ୟଵାତ୍ସୀଃ ।
ଶକ୍ରୋଽଥ ତେ ଶମତପୋବଲନିସ୍ସହାତ୍ମା
ଦିଵ୍ୟାଂଗନାପରିଵୃତଂ ପ୍ରଜିଘାୟ ମାରମ୍ ॥4॥

କାମୋ ଵସଂତମଲୟାନିଲବଂଧୁଶାଲୀ
କାଂତାକଟାକ୍ଷଵିଶିଖୈର୍ଵିକସଦ୍ଵିଲାସୈଃ ।
ଵିଧ୍ୟନ୍ମୁହୁର୍ମୁହୁରକଂପମୁଦୀକ୍ଷ୍ୟ ଚ ତ୍ଵାଂ
ଭୀରୁସ୍ତ୍ଵୟାଽଥ ଜଗଦେ ମୃଦୁହାସଭାଜା ॥5॥

ଭୀତ୍ୟାଽଲମଂଗଜ ଵସଂତ ସୁରାଂଗନା ଵୋ
ମନ୍ମାନସଂ ତ୍ଵିହ ଜୁଷଧ୍ଵମିତି ବ୍ରୁଵାଣଃ ।
ତ୍ଵଂ ଵିସ୍ମୟେନ ପରିତଃ ସ୍ତୁଵତାମଥୈଷାଂ
ପ୍ରାଦର୍ଶୟଃ ସ୍ଵପରିଚାରକକାତରାକ୍ଷୀଃ ॥6॥

ସମ୍ମୋହନାୟ ମିଲିତା ମଦନାଦୟସ୍ତେ
ତ୍ଵଦ୍ଦାସିକାପରିମଲୈଃ କିଲ ମୋହମାପୁଃ ।
ଦତ୍ତାଂ ତ୍ଵୟା ଚ ଜଗୃହୁସ୍ତ୍ରପୟୈଵ ସର୍ଵ-
ସ୍ଵର୍ଵାସିଗର୍ଵଶମନୀଂ ପୁନରୁର୍ଵଶୀଂ ତାମ୍ ॥7॥

ଦୃଷ୍ଟ୍ଵୋର୍ଵଶୀଂ ତଵ କଥାଂ ଚ ନିଶମ୍ୟ ଶକ୍ରଃ
ପର୍ୟାକୁଲୋଽଜନି ଭଵନ୍ମହିମାଵମର୍ଶାତ୍ ।
ଏଵଂ ପ୍ରଶାଂତରମଣୀୟତରାଵତାରା-
ତ୍ତ୍ଵତ୍ତୋଽଧିକୋ ଵରଦ କୃଷ୍ଣତନୁସ୍ତ୍ଵମେଵ ॥8॥

ଦକ୍ଷସ୍ତୁ ଧାତୁରତିଲାଲନୟା ରଜୋଽଂଧୋ
ନାତ୍ୟାଦୃତସ୍ତ୍ଵୟି ଚ କଷ୍ଟମଶାଂତିରାସୀତ୍ ।
ୟେନ ଵ୍ୟରୁଂଧ ସ ଭଵତ୍ତନୁମେଵ ଶର୍ଵଂ
ୟଜ୍ଞେ ଚ ଵୈରପିଶୁନେ ସ୍ଵସୁତାଂ ଵ୍ୟମାନୀତ୍ ॥9॥

କ୍ରୁଦ୍ଧେଶମର୍ଦିତମଖଃ ସ ତୁ କୃତ୍ତଶୀର୍ଷୋ
ଦେଵପ୍ରସାଦିତହରାଦଥ ଲବ୍ଧଜୀଵଃ ।
ତ୍ଵତ୍ପୂରିତକ୍ରତୁଵରଃ ପୁନରାପ ଶାଂତିଂ
ସ ତ୍ଵଂ ପ୍ରଶାଂତିକର ପାହି ମରୁତ୍ପୁରେଶ ॥10॥