ମୂକ ପଂଚ ଶତି 5 – ମଂଦସ୍ମିତ ଶତକମ୍
ବଧ୍ନୀମୋ ଵୟମଂଜଲିଂ ପ୍ରତିଦିନଂ ବଂଧଚ୍ଛିଦେ ଦେହିନାଂ
କଂଦର୍ପାଗମତଂତ୍ରମୂଲଗୁରଵେ କଲ୍ୟାଣକେଲୀଭୁଵେ ।
କାମାକ୍ଷ୍ୟା ଘନସାରପୁଂଜରଜସେ କାମଦ୍ରୁହଶ୍ଚକ୍ଷୁଷାଂ
ମଂଦାରସ୍ତବକପ୍ରଭାମଦମୁଷେ ମଂଦସ୍ମିତଜ୍ୟୋତିଷେ ॥1॥
ସଧ୍ରୀଚେ ନଵମଲ୍ଲିକାସୁମନସାଂ ନାସାଗ୍ରମୁକ୍ତାମଣେ-
ରାଚାର୍ୟାୟ ମୃଣାଲକାଂଡମହସାଂ ନୈସର୍ଗିକାୟ ଦ୍ଵିଷେ ।
ସ୍ଵର୍ଧୁନ୍ୟା ସହ ୟୁଧ୍ଵେନ ହିମରୁଚେରର୍ଧାସନାଧ୍ୟାସିନେ
କାମାକ୍ଷ୍ୟାଃ ସ୍ମିତମଂଜରୀଧଵଲିମାଦ୍ଵୈତାୟ ତସ୍ମୈ ନମଃ ॥2॥
କର୍ପୂରଦ୍ୟୁତିଚାତୁରୀମତିତରାମଲ୍ପୀୟସୀଂ କୁର୍ଵତୀ
ଦୌର୍ଭାଗ୍ୟୋଦୟମେଵ ସଂଵିଦଧତୀ ଦୌଷାକରୀଣାଂ ତ୍ଵିଷାମ୍ ।
କ୍ଷୁଲ୍ଲାନେଵ ମନୋଜ୍ଞମଲ୍ଲିନିକରାନ୍ଫୁଲ୍ଲାନପି ଵ୍ୟଂଜତୀ
କାମାକ୍ଷ୍ୟା ମୃଦୁଲସ୍ମିତାଂଶୁଲହରୀ କାମପ୍ରସୂରସ୍ତୁ ମେ ॥3॥
ୟା ପୀନସ୍ତନମଂଡଲୋପରି ଲସତ୍କର୍ପୂରଲେପାୟତେ
ୟା ନୀଲେକ୍ଷଣରାତ୍ରିକାଂତିତତିଷୁ ଜ୍ୟୋତ୍ସ୍ନାପ୍ରରୋହାୟତେ ।
ୟା ସୌଂଦର୍ୟଧୁନୀତରଂଗତତିଷୁ ଵ୍ୟାଲୋଲହଂସାୟତେ
କାମାକ୍ଷ୍ୟାଃ ଶିଶିରୀକରୋତୁ ହୃଦୟଂ ସା ମେ ସ୍ମିତପ୍ରାଚୁରୀ ॥4॥
ୟେଷାଂ ଗଚ୍ଛତି ପୂର୍ଵପକ୍ଷସରଣିଂ କୌମୁଦ୍ଵତଃ ଶ୍ଵେତିମା
ୟେଷାଂ ସଂତତମାରୁରୁକ୍ଷତି ତୁଲାକକ୍ଷ୍ୟାଂ ଶରଚ୍ଚଂଦ୍ରମାଃ ।
ୟେଷାମିଚ୍ଛତି କଂବୁରପ୍ୟସୁଲଭାମଂତେଵସତ୍ପ୍ରକ୍ରିୟାଂ
କାମାକ୍ଷ୍ୟା ମମତାଂ ହରଂତୁ ମମ ତେ ହାସତ୍ଵିଷାମଂକୁରାଃ ॥5॥
ଆଶାସୀମସୁ ସଂତତଂ ଵିଦଧତୀ ନୈଶାକରୀଂ ଵ୍ୟାକ୍ରିୟାଂ
କାଶାନାମଭିମାନଭଂଗକଲନାକୌଶଲ୍ୟମାବିଭ୍ରତୀ ।
ଈଶାନେନ ଵିଲୋକିତା ସକୁତୁକଂ କାମାକ୍ଷି ତେ କଲ୍ମଷ-
କ୍ଲେଶାପାୟକରୀ ଚକାସ୍ତି ଲହରୀ ମଂଦସ୍ମିତଜ୍ୟୋତିଷାମ୍ ॥6॥
ଆରୂଢସ୍ୟ ସମୁନ୍ନତସ୍ତନତଟୀସାମ୍ରାଜ୍ୟସିଂହାସନଂ
କଂଦର୍ପସ୍ୟ ଵିଭୋର୍ଜଗତ୍ତ୍ରୟପ୍ରାକଟ୍ୟମୁଦ୍ରାନିଧେଃ ।
ୟସ୍ୟାଶ୍ଚାମରଚାତୁରୀଂ କଲୟତେ ରଶ୍ମିଚ୍ଛଟା ଚଂଚଲା
ସା ମଂଦସ୍ମିତମଂଜରୀ ଭଵତୁ ନଃ କାମାୟ କାମାକ୍ଷି ତେ ॥7॥
ଶଂଭୋର୍ୟା ପରିରଂଭସଂଭ୍ରମଵିଧୌ ନୈର୍ମଲ୍ୟସୀମାନିଧିଃ
ଗୈର୍ଵାଣୀଵ ତରଂଗିଣୀ କୃତମୃଦୁସ୍ୟଂଦାଂ କଲିଂଦାତ୍ମଜାମ୍ ।
କଲ୍ମାଷୀକୁରୁତେ କଲଂକସୁଷମାଂ କଂଠସ୍ଥଲୀଚୁଂବିନୀଂ
କାମାକ୍ଷ୍ୟାଃ ସ୍ମିତକଂଦଲୀ ଭଵତୁ ନଃ କଲ୍ୟାଣସଂଦୋହିନୀ ॥8॥
ଜେତୁଂ ହାରଲତାମିଵ ସ୍ତନତଟୀଂ ସଂଜଗ୍ମୁଷୀ ସଂତତଂ
ଗଂତୁଂ ନିର୍ମଲତାମିଵ ଦ୍ଵିଗୁଣିତାଂ ମଗ୍ନା କୃପାସ୍ତ୍ରୋତସି ।
ଲବ୍ଧୁଂ ଵିସ୍ମୟନୀୟତାମିଵ ହରଂ ରାଗାକୁଲଂ କୁର୍ଵତୀ
ମଂଜୁସ୍ତେ ସ୍ମିତମଂଜରୀ ଭଵଭୟଂ ମଥ୍ନାତୁ କାମାକ୍ଷି ମେ ॥9॥
ଶ୍ଵେତାପି ପ୍ରକଟଂ ନିଶାକରରୁଚାଂ ମାଲିନ୍ୟମାତନ୍ଵତୀ
ଶୀତାପି ସ୍ମରପାଵକଂ ପଶୁପତେଃ ସଂଧୁକ୍ଷୟଂତୀ ସଦା ।
ସ୍ଵାଭାଵ୍ୟାଦଧରାଶ୍ରିତାପି ନମତାମୁଚ୍ଚୈର୍ଦିଶଂତୀ ଗତିଂ
କାମାକ୍ଷି ସ୍ଫୁଟମଂତରା ସ୍ଫୁରତୁ ନସ୍ତ୍ଵନ୍ମଂଦହାସପ୍ରଭା ॥10॥
ଵକ୍ତ୍ରଶ୍ରୀସରସୀଜଲେ ତରଲିତଭ୍ରୂଵଲ୍ଲିକଲ୍ଲୋଲିତେ
କାଲିମ୍ନା ଦଧତୀ କଟାକ୍ଷଜନୁଷା ମାଧୁଵ୍ରତୀଂ ଵ୍ୟାପୃତିମ୍ ।
ନିର୍ନିଦ୍ରାମଲପୁଂଡରୀକକୁହନାପାଂଡିତ୍ୟମାବିଭ୍ରତୀ
କାମାକ୍ଷ୍ୟାଃ ସ୍ମିତଚାତୁରୀ ମମ ମନଃ କାତର୍ୟମୁନ୍ମୂଲୟେତ୍ ॥11॥
ନିତ୍ୟଂ ବାଧିତବଂଧୁଜୀଵମଧରଂ ମୈତ୍ରୀଜୁଷଂ ପଲ୍ଲଵୈଃ
ଶୁଦ୍ଧସ୍ୟ ଦ୍ଵିଜମଂଡଲସ୍ୟ ଚ ତିରସ୍କର୍ତାରମପ୍ୟାଶ୍ରିତା ।
ୟା ଵୈମଲ୍ୟଵତୀ ସଦୈଵ ନମତାଂ ଚେତଃ ପୁନୀତେତରାଂ
କାମାକ୍ଷ୍ୟା ହୃଦୟଂ ପ୍ରସାଦୟତୁ ମେ ସା ମଂଦହାସପ୍ରଭା ॥12॥
ଦ୍ରୁହ୍ୟଂତୀ ତମସେ ମୁହୁଃ କୁମୁଦିନୀସାହାୟ୍ୟମାବିଭ୍ରତୀ
ୟାଂତୀ ଚଂଦ୍ରକିଶୋରଶେଖରଵପୁଃସୌଧାଂଗଣେ ପ୍ରେଂଖଣମ୍ ।
ଜ୍ଞାନାଂଭୋନିଧିଵୀଚିକାଂ ସୁମନସାଂ କୂଲଂକଷାଂ କୁର୍ଵତୀ
କାମାକ୍ଷ୍ୟାଃ ସ୍ମିତକୌମୁଦୀ ହରତୁ ମେ ସଂସାରତାପୋଦୟମ୍ ॥13॥
କାଶ୍ମୀରଦ୍ରଵଧାତୁକର୍ଦମରୁଚା କଲ୍ମାଷତାଂ ବିଭ୍ରତୀ
ହଂସୌଧୈରିଵ କୁର୍ଵତୀ ପରିଚିତିଂ ହାରୀକୃତୈର୍ମୌକ୍ତିକୈଃ ।
ଵକ୍ଷୋଜନ୍ମତୁଷାରଶୈଲକଟକେ ସଂଚାରମାତନ୍ଵତୀ
କାମାକ୍ଷ୍ୟା ମୃଦୁଲସ୍ମିତଦ୍ୟୁତିମୟୀ ଭାଗୀରଥୀ ଭାସତେ ॥14॥
କଂବୋର୍ଵଂଶପରଂପରା ଇଵ କୃପାସଂତାନଵଲ୍ଲୀଭୁଵଃ
ସଂଫୁଲ୍ଲସ୍ତବକା ଇଵ ପ୍ରସୃମରା ମୂର୍ତାଃ ପ୍ରସାଦା ଇଵ ।
ଵାକ୍ପୀୟୂଷକଣା ଇଵ ତ୍ରିପଥଗାପର୍ୟାୟଭେଦା ଇଵ
ଭ୍ରାଜଂତେ ତଵ ମଂଦହାସକିରଣାଃ କାଂଚୀପୁରୀନାୟିକେ ॥15॥
ଵକ୍ଷୋଜେ ଘନସାରପତ୍ରରଚନାଭଂଗୀସପତ୍ନାୟିତା
କଂଠେ ମୌକ୍ତିକହାରୟଷ୍ଟିକିରଣଵ୍ୟାପାରମୁଦ୍ରାୟିତା ।
ଓଷ୍ଠଶ୍ରୀନିକୁରୁଂବପଲ୍ଲଵପୁଟେ ପ୍ରେଂଖତ୍ପ୍ରସୂନାୟିତା
କାମାକ୍ଷି ସ୍ଫୁରତାଂ ମଦୀୟହୃଦୟେ ତ୍ଵନ୍ମଂଦହାସପ୍ରଭା ॥16॥
ୟେଷାଂ ବିଂଦୁରିଵୋପରି ପ୍ରଚଲିତୋ ନାସାଗ୍ରମୁକ୍ତାମଣିଃ
ୟେଷାଂ ଦୀନ ଇଵାଧିକଂଠମୟତେ ହାରଃ କରାଲଂବନମ୍ ।
ୟେଷାଂ ବଂଧୁରିଵୋଷ୍ଠୟୋରରୁଣିମା ଧତ୍ତେ ସ୍ଵୟଂ ରଂଜନଂ
କାମାକ୍ଷ୍ୟାଃ ପ୍ରଭଵଂତୁ ତେ ମମ ଶିଵୋଲ୍ଲାସାୟ ହାସାଂକୁରାଃ ॥17॥
ୟା ଜାଡ୍ୟାଂବୁନିଧିଂ କ୍ଷିଣୋତି ଭଜତାଂ ଵୈରାୟତେ କୈରଵୈଃ
ନିତ୍ୟଂ ୟାଂ ନିୟମେନ ୟା ଚ ୟତତେ କର୍ତୁଂ ତ୍ରିଣେତ୍ରୋତ୍ସଵମ୍ ।
ବିଂବଂ ଚାଂଦ୍ରମସଂ ଚ ଵଂଚୟତି ୟା ଗର୍ଵେଣ ସା ତାଦୃଶୀ
କାମାକ୍ଷି ସ୍ମିତମଂଜରୀ ତଵ କଥଂ ଜ୍ୟୋତ୍ସ୍ନେତ୍ୟସୌ କୀର୍ତ୍ୟତେ ॥18॥
ଆରୁଢା ରଭସାତ୍ପୁରଃ ପୁରରିପୋରାଶ୍ଲେଷଣୋପକ୍ରମେ
ୟା ତେ ମାତରୁପୈତି ଦିଵ୍ୟତଟିନୀଶଂକାକରୀ ତତ୍କ୍ଷଣମ୍ ।
ଓଷ୍ଠୌ ଵେପୟତି ଭ୍ରୁଵୌ କୁଟିଲୟତ୍ୟାନମ୍ରୟତ୍ୟାନନଂ
ତାଂ ଵଂଦେ ମୃଦୁହାସପୂରସୁଷମାମେକାମ୍ରନାଥପ୍ରିୟେ ॥19॥
ଵକ୍ତ୍ରେଂଦୋସ୍ତଵ ଚଂଦ୍ରିକା ସ୍ମିତତତିର୍ଵଲ୍ଗୁ ସ୍ଫୁରଂତୀ ସତାଂ
ସ୍ୟାଚ୍ଚେଦ୍ୟୁକ୍ତିମିଦଂ ଚକୋରମନସାଂ କାମାକ୍ଷି କୌତୂହଲମ୍ ।
ଏତଚ୍ଚିତ୍ରମହର୍ନିଶଂ ୟଦଧିକାମେଷା ରୁଚିଂ ଗାହତେ
ବିଂବୋଷ୍ଠଦ୍ୟୁମଣିପ୍ରଭାସ୍ଵପି ଚ ୟଦ୍ବିବ୍ବୋକମାଲଂବତେ ॥20॥
ସାଦୃଶ୍ୟଂ କଲଶାଂବୁଧେର୍ଵହତି ୟତ୍କାମାକ୍ଷି ମଂଦସ୍ମିତଂ
ଶୋଭାମୋଷ୍ଠରୁଚାଂବ ଵିଦ୍ରୁମଭଵାମେତାଦ୍ଭିଦାଂ ବ୍ରୂମହେ ।
ଏକସ୍ମାଦୁଦିତଂ ପୁରା କିଲ ପପୌ ଶର୍ଵଃ ପୁରାଣଃ ପୁମାନ୍
ଏତନ୍ମଧ୍ୟସମୁଦ୍ଭଵଂ ରସୟତେ ମାଧୁର୍ୟରୂପଂ ରସମ୍ ॥21॥
ଉତ୍ତୁଂଗସ୍ତନକୁଂଭଶୈଲକଟକେ ଵିସ୍ତାରିକସ୍ତୂରିକା-
ପତ୍ରଶ୍ରୀଜୁଷି ଚଂଚଲାଃ ସ୍ମିତରୁଚଃ କାମାକ୍ଷି ତେ କୋମଲାଃ ।
ସଂଧ୍ୟାଦୀଧିତିରଂଜିତା ଇଵ ମୁହୁଃ ସାଂଦ୍ରାଧରଜ୍ୟୋତିଷା
ଵ୍ୟାଲୋଲାମଲଶାରଦାଭ୍ରଶକଲଵ୍ୟାପାରମାତନ୍ଵତେ ॥22॥
କ୍ଷୀରଂ ଦୂରତ ଏଵ ତିଷ୍ଠତୁ କଥଂ ଵୈମଲ୍ୟମାତ୍ରାଦିଦଂ
ମାତସ୍ତେ ସହପାଠଵୀଥିମୟତାଂ ମଂଦସ୍ମିତୈର୍ମଂଜୁଲୈଃ ।
କିଂ ଚେୟଂ ତୁ ଭିଦାସ୍ତି ଦୋହନଵଶାଦେକଂ ତୁ ସଂଜାୟତେ
କାମାକ୍ଷି ସ୍ଵୟମର୍ଥିତଂ ପ୍ରଣମତାମନ୍ୟତ୍ତୁ ଦୋଦୁହ୍ୟତେ ॥23॥
କର୍ପୂରୈରମୃତୈର୍ଜଗଜ୍ଜନନି ତେ କାମାକ୍ଷି ଚଂଦ୍ରାତପୈଃ
ମୁକ୍ତାହାରଗୁଣୈର୍ମୃଣାଲଵଲୟୈର୍ମୁଗ୍ଧସ୍ମିତଶ୍ରୀରିୟମ୍ ।
ଶ୍ରୀକାଂଚୀପୁରନାୟିକେ ସମତୟା ସଂସ୍ତୂୟତେ ସଜ୍ଜନୈଃ
ତତ୍ତାଦୃଙ୍ମମ ତାପଶାଂତିଵିଧୟେ କିଂ ଦେଵି ମଂଦାୟତେ ॥24॥
ମଧ୍ୟେଗର୍ଭିତମଂଜୁଵାକ୍ୟଲହରୀମାଧ୍ଵୀଝରୀଶୀତଲା
ମଂଦାରସ୍ତବକାୟତେ ଜନନି ତେ ମଂଦସ୍ମିତାଂଶୁଚ୍ଛଟା ।
ୟସ୍ୟା ଵର୍ଧୟିତୁଂ ମୁହୁର୍ଵିକସନଂ କାମାକ୍ଷି କାମଦ୍ରୁହୋ
ଵଲ୍ଗୁର୍ଵୀକ୍ଷଣଵିଭ୍ରମଵ୍ୟତିକରୋ ଵାସଂତମାସାୟତେ ॥25॥
ବିଂବୋଷ୍ଠଦ୍ୟୁତିପୁଂଜରଂଜିତରୁଚିସ୍ତ୍ଵନ୍ମଂଦହାସଚ୍ଛଟା ।
କଲ୍ୟାଣଂ ଗିରିସାର୍ଵଭୌମତନୟେ କଲ୍ଲୋଲୟତ୍ଵାଶୁ ମେ ।
ଫୁଲ୍ଲନ୍ମଲ୍ଲିପିନଦ୍ଧହଲ୍ଲକମୟୀ ମାଲେଵ ୟା ପେଶଲା
ଶ୍ରୀକାଂଚୀଶ୍ଵରି ମାରମର୍ଦିତୁରୁରୋମଧ୍ୟେ ମୁହୁର୍ଲଂବତେ ॥26॥
ବିଭ୍ରାଣା ଶରଦଭ୍ରଵିଭ୍ରମଦଶାଂ ଵିଦ୍ୟୋତମାନାପ୍ୟସୋ
କାମାକ୍ଷି ସ୍ମିତମଂଜରୀ କିରତି ତେ କାରୁଣ୍ୟଧାରାରସମ୍ ।
ଆଶ୍ଚର୍ୟଂ ଶିଶିରୀକରୋତି ଜଗତୀଶ୍ଚାଲୋକ୍ୟ ଚୈନାମହୋ
କାମଂ ଖେଲତି ନୀଲକଂଠହୃଦୟଂ କୌତୂହଲାଂଦୋଲିତମ୍ ॥27॥
ପ୍ରେଂଖତ୍ପ୍ରୌଢକଟାକ୍ଷକୁଂଜକୁହରେଷ୍ଵତ୍ୟଚ୍ଛଗୁଚ୍ଛାୟିତଂ
ଵକ୍ତ୍ରେଂଦୁଚ୍ଛଵିସିଂଧୁଵୀଚିନିଚୟେ ଫେନପ୍ରତାନାୟିତମ୍ ।
ନୈରଂତର୍ୟଵିଜୃଂଭିତସ୍ତନତଟେ ନୈଚୋଲପଟ୍ଟାୟିତଂ
କାଲୁଷ୍ୟଂ କବଲୀକରୋତୁ ମମ ତେ କାମାକ୍ଷି ମଂଦସ୍ମିତମ୍ ॥28॥
ପୀୟୂଷଂ ତଵ ମଂଥରସ୍ମିତମିତି ଵ୍ୟର୍ଥୈଵ ସାପପ୍ରଥା
କାମାକ୍ଷି ଧ୍ରୁଵମୀଦୃଶଂ ୟଦି ଭଵେଦେତତ୍କଥଂ ଵା ଶିଵେ ।
ମଂଦାରସ୍ୟ କଥାଲଵଂ ନ ସହତେ ମଥ୍ନାତି ମଂଦାକିନୀ-
ମିଂଦୁଂ ନିଂଦତି କୀର୍ତିତେଽପି କଲଶୀପାଥୋଧିମୀର୍ଷ୍ୟାୟତେ ॥29॥
ଵିଶ୍ଵେଷାଂ ନୟନୋତ୍ସଵଂ ଵିତନୁତାଂ ଵିଦ୍ୟୋତତାଂ ଚଂଦ୍ରମା
ଵିଖ୍ୟାତୋ ମଦନାଂତକେନ ମୁକୁଟୀମଧ୍ୟେ ଚ ସଂମାନ୍ୟତାମ୍ ।
ଆଃ କିଂ ଜାତମନେନ ହାସସୁଷମାମାଲୋକ୍ୟ କାମାକ୍ଷି ତେ
କାଲଂକୀମଵଲଂବତେ ଖଲୁ ଦଶାଂ କଲ୍ମାଷହୀନୋଽପ୍ୟସୌ ॥30॥
ଚେତଃ ଶୀତଲୟଂତୁ ନଃ ପଶୁପତେରାନଂଦଜୀଵାତଵୋ
ନମ୍ରାଣାଂ ନୟନାଧ୍ଵସୀମସୁ ଶରଚ୍ଚଂଦ୍ରାତପୋପକ୍ରମାଃ ।
ସଂସାରାଖ୍ୟସରୋରୁହାକରଖଲୀକାରେ ତୁଷାରୋତ୍କରାଃ
କାମାକ୍ଷି ସ୍ମରକୀର୍ତିବୀଜନିକରାସ୍ତ୍ଵନ୍ମଂଦହାସାଂକୁରାଃ ॥31॥
କର୍ମୌଘାଖ୍ୟତମଃକଚାକଚିକରାନ୍କାମାକ୍ଷି ସଂଚିଂତୟେ
ତ୍ଵନ୍ମଂଦସ୍ମିତରୋଚିଷାଂ ତ୍ରିଭୁଵନକ୍ଷେମଂକରାନଂକୁରାନ୍ ।
ୟେ ଵକ୍ତ୍ରଂ ଶିଶିରଶ୍ରିୟୋ ଵିକସିତଂ ଚଂଦ୍ରାତପାଂଭୋରୁହ-
ଦ୍ଵେଷୋଦ୍ଧେଷୋଣଚାତୁରୀମିଵ ତିରସ୍କର୍ତୁଂ ପରିଷ୍କୁର୍ଵତେ ॥32॥
କୁର୍ୟୁର୍ନଃ କୁଲଶୈଲରାଜତନୟେ କୂଲଂକଷଂ ମଂଗଲଂ
କୁଂଦସ୍ପର୍ଧନଚୁଂଚଵସ୍ତଵ ଶିଵେ ମଂଦସ୍ମିତପ୍ରକ୍ରମାଃ ।
ୟେ କାମାକ୍ଷି ସମସ୍ତସାକ୍ଷିନୟନଂ ସଂତୋଷୟଂତୀଶ୍ଵରଂ
କର୍ପୂରପ୍ରକରା ଇଵ ପ୍ରସୃମରାଃ ପୁଂସାମସାଧାରଣାଃ ॥33॥
କମ୍ରେଣ ସ୍ନପୟସ୍ଵ କର୍ମକୁହନାଚୋରେଣ ମାରାଗମ-
ଵ୍ୟାଖ୍ୟାଶିକ୍ଷଣଦୀକ୍ଷିତେନ ଵିଦୁଷାମକ୍ଷୀଣଲକ୍ଷ୍ମୀପୁଷା ।
କାମାକ୍ଷି ସ୍ମିତକଂଦଲେନ କଲୁଷସ୍ଫୋଟକ୍ରିୟାଚୁଂଚୁନା
କାରୁଣ୍ୟାମୃତଵୀଚିକାଵିହରଣପ୍ରାଚୁର୍ୟଧୁର୍ୟେଣ ମାମ୍ ॥34॥
ତ୍ଵନ୍ମଂଦସ୍ମିତକଂଦଲସ୍ୟ ନିୟତଂ କାମାକ୍ଷି ଶଂକାମହେ
ବିଂବଃ କଶ୍ଚନ ନୂତନଃ ପ୍ରଚଲିତୋ ନୈଶାକରଃ ଶୀକରଃ ।
କିଂଚ କ୍ଷୀରପୟୋନିଧିଃ ପ୍ରତିନିଧିଃ ସ୍ଵର୍ଵାହିନୀଵୀଚିକା-
ବିବ୍ଵୋକୋଽପି ଵିଡଂବ ଏଵ କୁହନା ମଲ୍ଲୀମତଲ୍ଲୀରୁଚଃ ॥35॥
ଦୁଷ୍କର୍ମାର୍କନିସର୍ଗକର୍କଶମହସ୍ସଂପର୍କତପତଂ ମିଲ-
ତ୍ପଂକଂ ଶଂକରଵଲ୍ଲଭେ ମମ ମନଃ କାଂଚୀପୁରାଲଂକ୍ରିୟେ ।
ଅଂବ ତ୍ଵନ୍ମୃଦୁଲସ୍ମିତାମୃତରସେ ମଂକ୍ତ୍ଵା ଵିଧୂୟ ଵ୍ୟଥା-
ମାନଂଦୋଦୟସୌଧଶୃଂଗପଦଵୀମାରୋଢୁମାକାଂକ୍ଷତି ॥36॥
ନମ୍ରାଣାଂ ନଗରାଜଶେଖରସୁତେ ନାକାଲୟାନାଂ ପୁରଃ
କାମାକ୍ଷି ତ୍ଵରୟା ଵିପତ୍ପ୍ରଶମେନ କାରୁଣ୍ୟଧାରାଃ କିରନ୍ ।
ଆଗଚ୍ଛଂତମନୁଗ୍ରହଂ ପ୍ରକଟୟନ୍ନାନଂଦବୀଜାନି ତେ
ନାସୀରେ ମୃଦୁହାସ ଏଵ ତନୁତେ ନାଥେ ସୁଧାଶୀତଲଃ ॥37॥
କାମାକ୍ଷି ପ୍ରଥମାନଵିଭ୍ରମନିଧିଃ କଂଦର୍ପଦର୍ପପ୍ରସୂଃ
ମୁଗ୍ଧସ୍ତେ ମୃଦୁହାସ ଏଵ ଗିରିଜେ ମୁଷ୍ଣାତୁ ମେ କିଲ୍ବିଷମ୍ ।
ୟଂ ଦ୍ରଷ୍ଟୁଂ ଵିହିତେ କରଗ୍ରହ ଉମେ ଶଂଭୁସ୍ତ୍ରପାମୀଲିତଂ
ସ୍ଵୈରଂ କାରୟତି ସ୍ମ ତାଂଡଵଵିନୋଦାନଂଦିନା ତଂଡୁନା ॥38॥
କ୍ଷୁଣ୍ଣଂ କେନଚିଦେଵ ଧୀରମନସା କୁତ୍ରାପି ନାନାଜନୈଃ
କର୍ମଗ୍ରଂଥିନିୟଂତ୍ରିତୈରସୁଗମଂ କାମାକ୍ଷି ସାମାନ୍ୟତଃ ।
ମୁଗ୍ଧୈର୍ଦ୍ରୁଷ୍ଟୁମଶକ୍ୟମେଵ ମନସା ମୂଢସୟ ମେ ମୌକ୍ତିକଂ
ମାର୍ଗଂ ଦର୍ଶୟତୁ ପ୍ରଦୀପ ଇଵ ତେ ମଂଦସ୍ମିତଶ୍ରୀରିୟମ୍ ॥39॥
ଜ୍ୟୋତ୍ସ୍ନାକାଂତିଭିରେଵ ନିର୍ମଲତରଂ ନୈଶାକରଂ ମଂଡଲଂ
ହଂସୈରେଵ ଶରଦ୍ଵିଲାସସମୟେ ଵ୍ୟାକୋଚମଂଭୋରୁହମ୍ ।
ସ୍ଵଚ୍ଛୈରେଵ ଵିକସ୍ଵରୈରୁଡୁଗୁଣୈଃ କାମାକ୍ଷି ବିଂବଂ ଦିଵଃ
ପୁଣ୍ୟୈରେଵ ମୃଦୁସ୍ମିତୈସ୍ତଵ ମୁଖଂ ପୁଷ୍ଣାତି ଶୋଭାଭରମ୍ ॥40॥
ମାନଗ୍ରଂଥିଵିଧୁଂତୁଦେନ ରଭସାଦାସ୍ଵାଦ୍ୟମାନେ ନଵ-
ପ୍ରେମାଡଂବରପୂର୍ଣିମାହିମକରେ କାମାକ୍ଷି ତେ ତତ୍କ୍ଷଣମ୍ ।
ଆଲୋକ୍ୟ ସ୍ମିତଚଂଦ୍ରିକାଂ ପୁନରିମାମୁନ୍ମୀଲନଂ ଜଗ୍ମୁଷୀଂ
ଚେତଃ ଶୀଲୟତେ ଚକୋରଚରିତଂ ଚଂଦ୍ରାର୍ଧଚୂଡାମଣେଃ ॥41॥
କାମାକ୍ଷି ସ୍ମିତମଂଜରୀଂ ତଵ ଭଜେ ୟସ୍ୟାସ୍ତ୍ଵିଷାମଂକୁରା-
ନାପୀନସ୍ତନପାନଲାଲସତୟା ନିଶ୍ଶଂକମଂକେଶୟଃ ।
ଊର୍ଧ୍ଵଂ ଵୀକ୍ଷ୍ୟ ଵିକର୍ଷତି ପ୍ରସୃମରାନୁଦ୍ଦାମୟା ଶୁଂଡୟା
ସୂନୁସୁତେ ବିସଶଂକୟାଶୁ କୁହନାଦଂତାଵଲଗ୍ରାମଣୀଃ ॥42॥
ଗାଢାଶ୍ଲେଷଵିମର୍ଦସଂଭ୍ରମଵଶାଦୁଦ୍ଦାମମୁକ୍ତାଗୁଣ-
ପ୍ରାଲଂବେ କୁଚକୁଂଭୟୋର୍ଵିଗଲିତେ ଦକ୍ଷଦ୍ଵିଷୋ ଵକ୍ଷସି ।
ୟା ସଖ୍ୟେନ ପିନହ୍ୟତି ପ୍ରଚୁରୟା ଭାସା ତଦୀୟାଂ ଦଶାଂ
ସା ମେ ଖେଲତୁ କାମକୋଟି ହୃଦୟେ ସାଂଦ୍ରସ୍ମିତାଂଶୁଚ୍ଛଟା ॥43॥
ମଂଦାରେ ତଵ ମଂଥରସ୍ମିତରୁଚାଂ ମାତ୍ସର୍ୟମାଲୋକ୍ୟତେ
କାମାକ୍ଷି ସ୍ମରଶାସନେ ଚ ନିୟତୋ ରାଗୋଦୟୋ ଲକ୍ଷ୍ୟତେ ।
ଚାଂଦ୍ରୀଷୁ ଦ୍ୟୁତିମଂଜରୀଷୁ ଚ ମହାଂଦ୍ଵେଷାଂକୁରୋ ଦୃଶ୍ୟତେ
ଶୁଦ୍ଧାନାଂ କଥମୀଦୃଶୀ ଗିରିସୁତେଽତିଶୁଦ୍ଧା ଦଶା କଥ୍ୟତାମ୍ ॥44॥
ପୀୟୂଷଂ ଖଲୁ ପୀୟତେ ସୁରଜନୈର୍ଦୁଗ୍ଧାଂବୁଧିର୍ମଥ୍ୟତେ
ମାହେଶୈଶ୍ଚ ଜଟାକଲାପନିଗଡୈର୍ମଂଦାକିନୀ ନହ୍ୟତେ ।
ଶୀତାଂଶୁଃ ପରିଭୂୟତେ ଚ ତମସା ତସ୍ମାଦନେତାଦୃଶୀ
କାମାକ୍ଷି ସ୍ମିତମଂଜରୀ ତଵ ଵଚୋଵୈଦଗ୍ଧ୍ୟମୁଲ୍ଲଂଘତେ ॥45॥
ଆଶଂକେ ତଵ ମଂଦହାସଲହରୀମନ୍ୟାଦୃଶୀଂ ଚଂଦ୍ରିକା-
ମେକାମ୍ରେଶକୁଟୁଂବିନି ପ୍ରତିପଦଂ ୟସ୍ୟାଃ ପ୍ରଭାସଂଗମେ ।
ଵକ୍ଷୋଜାଂବୁରୁହେ ନ ତେ ରଚୟତଃ କାଂଚିଦ୍ଦଶାଂ କୌଙ୍ମଲୀ-
ମାସ୍ୟାଂଭୋରୁହମଂବ କିଂଚ ଶନକୈରାଲଂବତେ ଫୁଲ୍ଲତାମ୍ ॥46॥
ଆସ୍ତୀର୍ଣାଧରକାଂତିପଲ୍ଲଵଚୟେ ପାତଂ ମୁହୁର୍ଜଗ୍ମୁଷୀ
ମାରଦ୍ରୋହିଣି କଂଦଲତ୍ସ୍ମରଶରଜ୍ଵାଲାଵଲୀର୍ଵ୍ୟଂଜତୀ ।
ନିଂଦଂତୀ ଘନସାରହାରଵଲୟଜ୍ୟୋତ୍ସ୍ନାମୃଣାଲାନି ତେ
କାମାକ୍ଷି ସ୍ମିତଚାତୁରୀ ଵିରହିଣୀରୀତିଂ ଜଗାହେତରାମ୍ ॥47॥
ସୂର୍ୟାଲୋକଵିଧୌ ଵିକାସମଧିକଂ ୟାଂତୀ ହରଂତୀ ତମ-
ସ୍ସଂଦୋହଂ ନମତାଂ ନିଜସ୍ମରଣତୋ ଦୋଷାକରଦ୍ଵେଷିଣୀ ।
ନିର୍ୟାଂତୀ ଵଦନାରଵିଂଦକୁହରାନ୍ନିର୍ଧୂତଜାଡ୍ୟା ନୃଣାଂ
ଶ୍ରୀକାମାକ୍ଷି ତଵ ସ୍ମିତଦ୍ୟୁତିମୟୀ ଚିତ୍ରୀୟତେ ଚଂଦ୍ରିକା ॥48॥
କୁଂଠୀକୁର୍ୟୁରମୀ କୁବୋଧଘଟନାମସ୍ମନ୍ମନୋମାଥିନୀଂ
ଶ୍ରୀକାମାକ୍ଷି ଶିଵଂକରାସ୍ତଵ ଶିଵେ ଶ୍ରୀମଂଦହାସାଂକୁରାଃ ।
ୟେ ତନ୍ଵଂତି ନିରଂତରଂ ତରୁଣିମସ୍ତଂବେରମଗ୍ରାମଣୀ-
କୁଂଭଦ୍ଵଂଦ୍ଵଵିଡଂବିନି ସ୍ତନତଟେ ମୁକ୍ତାକୁଥାଡଂବରମ୍ ॥49॥
ପ୍ରେଂଖଂତଃ ଶରଦଂବୁଦା ଇଵ ଶନୈଃ ପ୍ରେମାନିଲୈଃ ପ୍ରେରିତା
ମଜ୍ଜଂତୋ ମଂଦନାରିକଂଠସୁଷମାସିଂଧୌ ମୁହୁର୍ମଂଥରମ୍ ।
ଶ୍ରୀକାମାକ୍ଷି ତଵ ସ୍ମିତାଂଶୁନିକରାଃ ଶ୍ୟାମାୟମାନଶ୍ରିୟୋ
ନୀଲାଂଭୋଧରନୈପୁଣୀଂ ତତ ଇତୋ ନିର୍ନିଦ୍ରୟଂତ୍ୟଂଜସା ॥50॥
ଵ୍ୟାପାରଂ ଚତୁରାନନୈକଵିହୃତୌ ଵ୍ୟାକୁର୍ଵତୀ କୁର୍ଵତୀ
ରୁଦ୍ରାକ୍ଷଗ୍ରହଣଂ ମହେଶି ସତତଂ ଵାଗୂର୍ମିକଲ୍ଲୋଲିତା ।
ଉତ୍ଫୁଲ୍ଲଂ ଧଵଲାରଵିଂଦମଧରୀକୃତ୍ୟ ସ୍ଫୁରଂତୀ ସଦା
ଶ୍ରୀକାମାକ୍ଷି ସରସ୍ଵତୀ ଵିଜୟତେ ତ୍ଵନ୍ମଂଦହାସପ୍ରଭା ॥51॥
କର୍ପୂରଦ୍ୟୁତିତସ୍କରେଣ ମହସା କଲ୍ମାଷୟତ୍ୟାନନଂ
ଶ୍ରୀକାଂଚୀପୁରନାୟିକେ ପତିରିଵ ଶ୍ରୀମଂଦହାସୋଽପି ତେ ।
ଆଲିଂଗତ୍ୟତିପୀଵରାଂ ସ୍ତନତଟୀଂ ବିଂବାଧରଂ ଚୁଂବତି
ପ୍ରୌଢଂ ରାଗଭରଂ ଵ୍ୟନକ୍ତି ମନସୋ ଧୈର୍ୟଂ ଧୁନୀତେତରାମ୍ ॥52॥
ଵୈଶଦ୍ୟେନ ଚ ଵିଶ୍ଵତାପହରଣକ୍ରୀଡାପଟୀୟସ୍ତୟା
ପାଂଡିତ୍ୟେନ ପଚେଲିମେନ ଜଗତାଂ ନେତ୍ରୋତ୍ସଵୋତ୍ପାଦେନ ।
କାମାକ୍ଷି ସ୍ମିତକଂଦଲୈସ୍ତଵ ତୁଲାମାରୋଢୁମୁଦ୍ୟୋଗିନୀ
ଜ୍ୟୋତ୍ସ୍ନାସୌ ଜଲରାଶିପୋଷଣତୟା ଦୂଷ୍ୟାଂ ପ୍ରପନ୍ନା ଦଶାମ୍ ॥53॥
ଲାଵଣ୍ୟାଂବୁଜିନୀମୃଣାଲଵଲୟୈଃ ଶୃଂଗାରଗଂଧଦ୍ଵିପ-
ଗ୍ରାମଣ୍ୟଃ ଶ୍ରୁତିଚାମରୈସ୍ତରୁଣିମସ୍ଵାରାଜ୍ୟତେଜୋଂକୁରୈଃ ।
ଆନଂଦାମୃତସିଂଧୁଵୀଚିପୃଷତୈରାସ୍ୟାବ୍ଜହଂସୈସ୍ତଵ
ଶ୍ରୀକାମାକ୍ଷି ମଥାନ ମଂଦହସିତୈର୍ମତ୍କଂ ମନଃକଲ୍ମଷମ୍ ॥54॥
ଉତ୍ତୁଂଗସ୍ତନମଂଡଲୀପରିଚଲନ୍ମାଣିକ୍ୟହାରଚ୍ଛଟା-
ଚଂଚଚ୍ଛୋଣିମପୁଂଜମଧ୍ୟସରଣିଂ ମାତଃ ପରିଷ୍କୁର୍ଵତୀ ।
ୟା ଵୈଦଗ୍ଧ୍ୟମୁପୈତି ଶଂକରଜଟାକାଂତାରଵାଟୀପତ-
ତ୍ସ୍ଵର୍ଵାପୀପୟସଃ ସ୍ମିତଦ୍ୟୁତିରସୌ କାମାକ୍ଷି ତେ ମଂଜୁଲା ॥55॥
ସନ୍ନାମୈକଜୁଷା ଜନେନ ସୁଲଭଂ ସଂସୂଚୟଂତୀ ଶନୈ-
ରୁତ୍ତୁଂଗସ୍ୟ ଚିରାଦନୁଗ୍ରହତରୋରୁତ୍ପତ୍ସ୍ୟମାନଂ ଫଲମ୍ ।
ପ୍ରାଥମ୍ୟେନ ଵିକସ୍ଵରା କୁସୁମଵତ୍ପ୍ରାଗଲ୍ଭ୍ୟମଭ୍ୟେୟୁଷୀ
କାମାକ୍ଷି ସ୍ମିତଚାତୁରୀ ତଵ ମମ କ୍ଷେମଂକରୀ କଲ୍ପତାମ୍ ॥56॥
ଧାନୁଷ୍କାଗ୍ରସରସ୍ୟ ଲୋଲକୁଟିଲଭ୍ରୂଲେଖୟା ବିଭ୍ରତୋ
ଲୀଲାଲୋକଶିଲୀମୁଖଂ ନଵଵୟସ୍ସାମ୍ରାଜ୍ୟଲକ୍ଷ୍ମୀପୁଷଃ ।
ଜେତୁଂ ମନ୍ମଥମର୍ଦିନଂ ଜନନି ତେ କାମାକ୍ଷି ହାସଃ ସ୍ଵୟଂ
ଵଲ୍ଗୁର୍ଵିଭ୍ରମଭୂଭୃତୋ ଵିତନୁତେ ସେନାପତିପ୍ରକ୍ରିୟାମ୍ ॥57॥
ୟନ୍ନାକଂପତ କାଲକୂଟକବଲୀକାରେ ଚୁଚୁଂବେ ନ ୟଦ୍-
ଗ୍ଲାନ୍ୟା ଚକ୍ଷୁଷି ରୂଷିତାନଲଶିଖେ ରୁଦ୍ରସ୍ୟ ତତ୍ତାଦୃଶମ୍ ।
ଚେତୋ ୟତ୍ପ୍ରସଭଂ ସ୍ମରଜ୍ଵରଶିଖିଜ୍ଵାଲେନ ଲେଲିହ୍ୟତେ
ତତ୍କାମାକ୍ଷି ତଵ ସ୍ମିତାଂଶୁକଲିକାହେଲାଭଵଂ ପ୍ରାଭଵମ୍ ॥58॥
ସଂଭିନ୍ନେଵ ସୁପର୍ଵଲୋକତଟିନୀ ଵୀଚୀଚୟୈର୍ୟାମୁନୈଃ
ସଂମିଶ୍ରେଵ ଶଶାଂକଦୀପ୍ତିଲହରୀ ନୀଲୈର୍ମହାନୀରଦୈଃ ।
କାମାକ୍ଷି ସ୍ଫୁରିତା ତଵ ସ୍ମିତରୁଚିଃ କାଲାଂଜନସ୍ପର୍ଧିନା
କାଲିମ୍ନା କଚରୋଚିଷାଂ ଵ୍ୟତିକରେ କାଂଚିଦ୍ଦଶାମଶ୍ନୁତେ ॥59॥
ଜାନୀମୋ ଜଗଦୀଶ୍ଵରପ୍ରଣୟିନି ତ୍ଵନ୍ମଂଦହାସପ୍ରଭାଂ
ଶ୍ରୀକାମାକ୍ଷି ସରୋଜିନୀମଭିନଵାମେଷା ୟତଃ ସର୍ଵଦା ।
ଆସ୍ୟେଂଦୋରଵଲୋକେନ ପଶୁପତେରଭ୍ୟେତି ସଂଫୁଲ୍ଲତାଂ
ତଂଦ୍ରାଲୁସ୍ତଦଭାଵ ଏଵ ତନୁତେ ତଦ୍ଵୈପରୀତ୍ୟକ୍ରମମ୍ ॥60॥
ୟାଂତୀ ଲୋହିତିମାନମଭ୍ରତଟିନୀ ଧାତୁଚ୍ଛଟାକର୍ଦମୈଃ
ଭାଂତୀ ବାଲଗଭସ୍ତିମାଲିକିରଣୈର୍ମେଘାଵଲୀ ଶାରଦୀ ।
ବିଂବୋଷ୍ଠଦ୍ୟୁତିପୁଂଜଚୁଂବନକଲାଶୋଣାୟମାନେନ ତେ
କାମାକ୍ଷି ସ୍ମିତରୋଚିଷା ସମଦଶାମାରୋଢୁମାକାଂକ୍ଷତେ ॥61॥
ଶ୍ରୀକାମାକ୍ଷି ମୁଖେଂଦୁଭୂଷଣମିଦଂ ମଂଦସ୍ମିତଂ ତାଵକଂ
ନେତ୍ରାନଂଦକରଂ ତଥା ହିମକରୋ ଗଚ୍ଛେଦ୍ୟଥା ତିଗ୍ମତାମ୍ ।
ଶୀତଂ ଦେଵି ତଥା ୟଥା ହିମଜଲଂ ସଂତାପମୁଦ୍ରାସ୍ପଦଂ
ଶ୍ଵେତଂ କିଂଚ ତଥା ୟଥା ମଲିନତାଂ ଧତ୍ତେ ଚ ମୁକ୍ତାମଣିଃ ॥62॥
ତ୍ଵନ୍ମଂଦସ୍ମିତମଂଜରୀଂ ପ୍ରସୃମରାଂ କାମାକ୍ଷି ଚଂଦ୍ରାତପଂ
ସଂତଃ ସଂତତମାମନଂତ୍ୟମଲତା ତଲ୍ଲକ୍ଷଣଂ ଲକ୍ଷ୍ୟତେ ।
ଅସ୍ମାକଂ ନ ଧୁନୋତି ତାପକମଧିକଂ ଧୂନୋତି ନାଭ୍ୟଂତରଂ
ଧ୍ଵାଂତଂ ତତ୍ଖଲୁ ଦୁଃଖିନୋ ଵୟମିଦଂ କେନୋତି ନୋ ଵିଦ୍ମହେ ॥63॥
ନମ୍ରସ୍ୟ ପ୍ରଣୟପ୍ରରୂଢକଲହଚ୍ଛେଦାୟ ପାଦାବ୍ଜୟୋଃ
ମଂଦଂ ଚଂଦ୍ରକିଶୋରଶେଖରମଣେଃ କାମାକ୍ଷି ରାଗେଣ ତେ ।
ବଂଧୂକପ୍ରସଵଶ୍ରିୟଂ ଜିତଵତୋ ବଂହୀୟସୀଂ ତାଦୃଶୀଂ
ବିଂବୋଷ୍ଠସ୍ୟ ରୁଚିଂ ନିରସ୍ୟ ହସିତଜ୍ୟୋତ୍ସ୍ନା ଵୟସ୍ୟାୟତେ ॥64॥
ମୁକ୍ତାନାଂ ପରିମୋଚନଂ ଵିଦଧତସ୍ତତ୍ପ୍ରୀତିନିଷ୍ପାଦିନୀ
ଭୂୟୋ ଦୂରତ ଏଵ ଧୂତମରୁତସ୍ତତ୍ପାଲନଂ ତନ୍ଵତୀ ।
ଉଦ୍ଭୂତସ୍ୟ ଜଲାଂତରାଦଵିରତଂ ତଦ୍ଦୂରତାଂ ଜଗ୍ମୁଷୀ
କାମାକ୍ଷି ସ୍ମିତମଂଜରୀ ତଵ କଥଂ କଂବୋସ୍ତୁଲାମଶ୍ନୁତେ ॥65॥
ଶ୍ରୀକାମାକ୍ଷି ତଵ ସ୍ମିତଦ୍ୟୁତିଝରୀଵୈଦଗ୍ଧ୍ୟଲୀଲାୟିତଂ
ପଶ୍ୟଂତୋଽପି ନିରଂତରଂ ସୁଵିମଲଂମନ୍ୟା ଜଗନ୍ମଂଡଲେ ।
ଲୋକଂ ହାସୟିତୁଂ କିମର୍ଥମନିଶଂ ପ୍ରାକାଶ୍ୟମାତନ୍ଵତେ
ମଂଦାକ୍ଷଂ ଵିରହୟ୍ୟ ମଂଗଲତରଂ ମଂଦାରଚଂଦ୍ରାଦୟଃ ॥66॥
କ୍ଷୀରାବ୍ଧେରପି ଶୈଲରାଜତନୟେ ତ୍ଵନ୍ମଂଦହାସସ୍ୟ ଚ
ଶ୍ରୀକାମାକ୍ଷି ଵଲକ୍ଷିମୋଦୟନିଧେଃ କିଂଚିଦ୍ଭିଦାଂ ବ୍ରୂମହେ ।
ଏକସ୍ମୈ ପୁରୁଷାୟ ଦେଵି ସ ଦଦୌ ଲକ୍ଷ୍ମୀଂ କଦାଚିତ୍ପୁରା
ସର୍ଵେଭ୍ୟୋଽପି ଦଦାତ୍ୟସୌ ତୁ ସତତଂ ଲକ୍ଷ୍ମୀଂ ଚ ଵାଗୀଶ୍ଵରୀମ୍ ॥67॥
ଶ୍ରୀକାଂଚୀପୁରରତ୍ନଦୀପକଲିକେ ତାନ୍ୟେଵ ମେନାତ୍ମଜେ
ଚାକୋରାଣି କୁଲାନି ଦେଵି ସୁତରାଂ ଧନ୍ୟାନି ମନ୍ୟାମହେ ।
କଂପାତୀରକୁଟୁଂବଚଂକ୍ରମକଲାଚୁଂଚୂନି ଚଂଚୂପୁଟୈଃ
ନିତ୍ୟଂ ୟାନି ତଵ ସ୍ମିତେଂଦୁମହସାମାସ୍ଵାଦମାତନ୍ଵତେ ॥68॥
ଶୈତ୍ୟପ୍ରକ୍ରମମାଶ୍ରିତୋଽପି ନମତାଂ ଜାଡ୍ୟପ୍ରଥାଂ ଧୂନୟନ୍
ନୈର୍ମଲ୍ୟଂ ପରମଂ ଗତୋଽପି ଗିରିଶଂ ରାଗାକୁଲଂ ଚାରୟନ୍ ।
ଲୀଲାଲାପପୁରସ୍ସରୋଽପି ସତତଂ ଵାଚଂୟମାନ୍ପ୍ରୀଣୟନ୍
କାମାକ୍ଷି ସ୍ମିତରୋଚିଷାଂ ତଵ ସମୁଲ୍ଲାସଃ କଥଂ ଵର୍ଣ୍ୟତେ ॥69॥
ଶ୍ରୋଣୀଚଂଚଲମେଖଲାମୁଖରିତଂ ଲୀଲାଗତଂ ମଂଥରଂ
ଭ୍ରୂଵଲ୍ଲୀଚଲନଂ କଟାକ୍ଷଵଲନଂ ମଂଦାକ୍ଷଵୀକ୍ଷାଚଣମ୍ ।
ୟଦ୍ଵୈଦଗ୍ଧ୍ୟମୁଖେନ ମନ୍ମଥରିପୁଂ ସଂମୋହୟଂତ୍ୟଂଜସା
ଶ୍ରୀକାମାକ୍ଷି ତଵ ସ୍ମିତାୟ ସତତଂ ତସ୍ମୈ ନମ୍ସକୁର୍ମହେ ॥70॥
ଶ୍ରୀକାମାକ୍ଷି ମନୋଜ୍ଞମଂଦହସିତଜ୍ୟୋତିଷ୍ପ୍ରରୋହେ ତଵ
ସ୍ଫୀତଶ୍ଵେତିମସାର୍ଵଭୌମସରଣିପ୍ରାଗଲ୍ଭ୍ୟମଭ୍ୟେୟୁଷି ।
ଚଂଦ୍ରୋଽୟଂ ୟୁଵରାଜତାଂ କଲୟତେ ଚେଟୀଧୁରଂ ଚଂଦ୍ରିକା
ଶୁଦ୍ଧା ସା ଚ ସୁଧାଝରୀ ସହଚରୀସାଧର୍ମ୍ୟମାଲଂବତେ ॥71॥
ଜ୍ୟୋତ୍ସ୍ନା କିଂ ତନୁତେ ଫଲଂ ତନୁମତାମୌଷ୍ଣ୍ୟପ୍ରଶାଂତିଂ ଵିନା
ତ୍ଵନ୍ମଂଦସ୍ମିତରୋଚିଷା ତନୁମତାଂ କାମାକ୍ଷି ରୋଚିଷ୍ଣୁନା ।
ସଂତାପୋ ଵିନିଵାର୍ୟତେ ନଵଵୟଃପ୍ରାଚୁର୍ୟମଂକୂର୍ୟତେ
ସୌଂଦର୍ୟଂ ପରିପୂର୍ୟତେ ଜଗତି ସା କୀର୍ତିଶ୍ଚ ସଂଚାର୍ୟତେ ॥72॥
ଵୈମଲ୍ୟଂ କୁମୁଦଶ୍ରିୟାଂ ହିମରୁଚଃ କାଂତ୍ୟୈଵ ସଂଧୁକ୍ଷ୍ୟତେ
ଜ୍ୟୋତ୍ସ୍ନାରୋଚିରପି ପ୍ରଦୋଷସମୟଂ ପ୍ରାପ୍ୟୈଵ ସଂପଦ୍ୟତେ ।
ସ୍ଵଚ୍ଛତ୍ଵଂ ନଵମୌକ୍ତିକସ୍ୟ ପରମଂ ସଂସ୍କାରତୋ ଦୃଶ୍ୟତେ
କାମାକ୍ଷ୍ୟାଃ ସ୍ମିତଦୀଧିତେର୍ଵିଶଦିମା ନୈସର୍ଗିକୋ ଭାସତେ ॥73॥
ପ୍ରାକାଶ୍ୟଂ ପରମେଶ୍ଵରପ୍ରଣୟିନି ତ୍ଵନ୍ମଂଦହାସଶ୍ରିୟଃ
ଶ୍ରୀକାମାକ୍ଷି ମମ କ୍ଷିଣୋତୁ ମମତାଵୈଚକ୍ଷଣୀମକ୍ଷୟାମ୍ ।
ୟଦ୍ଭୀତ୍ୟେଵ ନିଲୀୟତେ ହିମକରୋ ମେଘୋଦରେ ଶୁକ୍ତିକା-
ଗର୍ଭେ ମୌକ୍ତିକମଂଡଲୀ ଚ ସରସୀମଧ୍ୟେ ମୃଣାଲୀ ଚ ସା ॥74॥
ହେରଂବେ ଚ ଗୁହେ ହର୍ଷଭରିତଂ ଵାତ୍ସଲ୍ୟମଂକୂରୟତ୍
ମାରଦ୍ରୋହିଣି ପୂରୁଷେ ସହଭୁଵଂ ପ୍ରେମାଂକୁରଂ ଵ୍ୟଂଜୟତ୍ ।
ଆନମ୍ରେଷୁ ଜନେଷୁ ପୂର୍ଣକରୁଣାଵୈଦଗ୍ଧ୍ୟମୁତ୍ତାଲୟତ୍
କାମାକ୍ଷି ସ୍ମିତମଂଜସା ତଵ କଥଂକାରଂ ମୟା କଥ୍ୟତେ ॥75॥
ସଂକ୍ରୁଦ୍ଧଦ୍ଵିଜରାଜକୋଽପ୍ୟଵିରତଂ କୁର୍ଵଂଦ୍ଵିଜୈଃ ସଂଗମଂ
ଵାଣୀପଦ୍ଧତିଦୂରଗୋଽପି ସତତଂ ତତ୍ସାହଚର୍ୟଂ ଵହନ୍ ।
ଅଶ୍ରାଂତଂ ପଶୁଦୁର୍ଲଭୋଽପି କଲୟନ୍ପତ୍ୟୌ ପଶୂନାଂ ରତିଂ
ଶ୍ରୀକାମାକ୍ଷି ତଵ ସ୍ମିତାମୃତରସସ୍ୟଂଦୋ ମୟି ସ୍ପଂଦତାମ୍ ॥76॥
ଶ୍ରୀକାମାକ୍ଷି ମହେଶ୍ଵରେ ନିରୁପମପ୍ରେମାଂକୁରପ୍ରକ୍ରମମଂ
ନିତ୍ୟଂ ୟଃ ପ୍ରକଟୀକରୋତି ସହଜାମୁନ୍ନିଦ୍ରୟନ୍ମାଧୁରୀମ୍ ।
ତତ୍ତାଦୃକ୍ତଵ ମଂଦହାସମହିମା ମାତଃ କଥଂ ମାନିତାଂ
ତନ୍ମୂର୍ଧ୍ନା ସୁରନିମ୍ନଗାଂ ଚ କଲିକାମିଂଦୋଶ୍ଚ ତାଂ ନିଂଦତି ॥77॥
ୟେ ମାଧୁର୍ୟଵିହାରମଂଟପଭୁଵୋ ୟେ ଶୈତ୍ୟମୁଦ୍ରାକରା
ୟେ ଵୈଶଦ୍ୟଦଶାଵିଶେଷସୁଭଗାସ୍ତେ ମଂଦହାସାଂକୁରାଃ ।
କାମାକ୍ଷ୍ୟାଃ ସହଜଂ ଗୁଣତ୍ରୟମିଦଂ ପର୍ୟାୟତଃ କୁର୍ଵତାଂ
ଵାଣୀଗୁଂଫନଡଂବରେ ଚ ହୃଦୟେ କୀର୍ତିପ୍ରରୋହେ ଚ ମେ ॥78॥
କାମାକ୍ଷ୍ୟା ମୃଦୁଲସ୍ମିତାଂଶୁନିକରା ଦକ୍ଷାଂତକେ ଵୀକ୍ଷଣେ
ମଂଦାକ୍ଷଗ୍ରହିଲା ହିମଦ୍ୟୁତିମୟୂଖାକ୍ଷେପଦୀକ୍ଷାଂକୁରାଃ ।
ଦାକ୍ଷ୍ୟଂ ପକ୍ଷ୍ମଲୟଂତୁ ମାକ୍ଷିକଗୁଡଦ୍ରାକ୍ଷାଭଵଂ ଵାକ୍ଷୁ ମେ
ସୂକ୍ଷ୍ମଂ ମୋକ୍ଷପଥଂ ନିରୀକ୍ଷିତୁମପି ପ୍ରକ୍ଷାଲୟେୟୁର୍ମନଃ ॥79॥
ଜାତ୍ୟା ଶୀତଶୀତଲାନି ମଧୁରାଣ୍ୟେତାନି ପୂତାନି ତେ
ଗାଂଗାନୀଵ ପୟାଂସି ଦେଵି ପଟଲାନ୍ୟଲ୍ପସ୍ମିତଜ୍ୟୋତିଷାମ୍ ।
ଏନଃପଂକପରଂପରାମଲିନିତାମେକାମ୍ରନାଥପ୍ରିୟେ
ପ୍ରଜ୍ଞାନାତ୍ସୁତରାଂ ମଦୀୟଧିଷଣାଂ ପ୍ରକ୍ଷାଲୟଂତୁ କ୍ଷଣାତ୍ ॥80॥
ଅଶ୍ରାଂତଂ ପରତଂତ୍ରିତଃ ପଶୁପତିସ୍ତ୍ଵନ୍ମଂଦହାସାଂକୁରୈଃ
ଶ୍ରୀକାମାକ୍ଷି ତଦୀୟଵର୍ଣସମତାସଂଗେନ ଶଂକାମହେ ।
ଇଂଦୁଂ ନାକଧୁନୀଂ ଚ ଶେଖରୟତେ ମାଲାଂ ଚ ଧତ୍ତେ ନଵୈଃ
ଵୈକୁଂଠୈରଵକୁଂଠନଂ ଚ କୁରୁତେ ଧୂଲୀଚୟୈର୍ଭାସ୍ମନୈଃ ॥81॥
ଶ୍ରୀକାଂଚୀପୁରଦେଵତେ ମୃଦୁଵଚସ୍ସୌରଭ୍ୟମୁଦ୍ରାସ୍ପଦଂ
ପ୍ରୌଢପ୍ରେମଲତାନଵୀନକୁସୁମଂ ମଂଦସ୍ମିତଂ ତାଵକମ୍ ।
ମଂଦଂ କଂଦଲତି ପ୍ରିୟସ୍ୟ ଵଦନାଲୋକେ ସମାଭାଷଣେ
ଶ୍ଲକ୍ଷ୍ଣେ କୁଙ୍ମଲତି ପ୍ରରୂଢପୁଲକେ ଚାଶ୍ଲୋଷଣେ ଫୁଲ୍ଲତି ॥82॥
କିଂ ତ୍ରୈସ୍ରୋତସମଂବିକେ ପରିଣତଂ ସ୍ରୋତଶ୍ଚତୁର୍ଥଂ ନଵଂ
ପୀୟୂଷସ୍ୟ ସମସ୍ତତାପହରଣଂ କିଂଵା ଦ୍ଵିତୀୟଂ ଵପୁଃ ।
କିଂସ୍ଵିତ୍ତ୍ଵନ୍ନିକଟଂ ଗତଂ ମଧୁରିମାଭ୍ୟାସାୟ ଗଵ୍ୟଂ ପୟଃ
ଶ୍ରୀକାଂଚୀପୁରନାୟକପ୍ରିୟତମେ ମଂଦସ୍ମିତଂ ତାଵକମ୍ ॥83॥
ଭୂଷା ଵକ୍ତ୍ରସରୋରୁହସ୍ୟ ସହଜା ଵାଚାଂ ସଖୀ ଶାଶ୍ଵତୀ
ନୀଵୀ ଵିଭ୍ରମସଂତତେଃ ପଶୁପତେଃ ସୌଧୀ ଦୃଶାଂ ପାରଣା ।
ଜୀଵାତୁର୍ମଦନଶ୍ରିୟଃ ଶଶିରୁଚେରୁଚ୍ଚାଟନୀ ଦେଵତା
ଶ୍ରୀକାମାକ୍ଷି ଗିରାମଭୂମିମୟତେ ହାସପ୍ରଭାମଂଜରୀ ॥84॥
ସୂତିଃ ଶ୍ଵେତିମକଂଦଲସ୍ୟ ଵସତିଃ ଶୃଂଗାରସାରଶ୍ରିୟଃ
ପୂର୍ତିଃ ସୂକ୍ତିଝରୀରସସ୍ୟ ଲହରୀ କାରୁଣ୍ୟପାଥୋନିଧେଃ ।
ଵାଟୀ କାଚନ କୌସୁମୀ ମଧୁରିମସ୍ଵାରାଜ୍ୟଲକ୍ଷ୍ମ୍ୟାସ୍ତଵ
ଶ୍ରୀକାମାକ୍ଷି ମମାସ୍ତୁ ମଂଗଲକରୀ ହାସପ୍ରଭାଚାତୁରୀ ॥85॥
ଜଂତୂନାଂ ଜନିଦୁଃଖମୃତ୍ୟୁଲହରୀସଂତାପନଂ କୃଂତତଃ
ପ୍ରୌଢାନୁଗ୍ରହପୂର୍ଣଶୀତଲରୁଚୋ ନିତ୍ୟୋଦୟଂ ବିଭ୍ରତଃ ।
ଶ୍ରୀକାମାକ୍ଷି ଵିସୃତ୍ଵରା ଇଵ କରା ହାସାଂକୁରାସ୍ତେ ହଠା-
ଦାଲୋକେନ ନିହନ୍ୟୁରଂଧତମସସ୍ତୋମସ୍ୟ ମେ ସଂତତିମ୍ ॥86॥
ଉତ୍ତୁଂଗସ୍ତନମଂଡଲସ୍ୟ ଵିଲସଲ୍ଲାଵଣ୍ୟଲୀଲାନଟୀ-
ରଂଗସ୍ୟ ସ୍ଫୁଟମୂର୍ଧ୍ଵସୀମନି ମୁହୁଃ ପ୍ରାକାଶ୍ୟମଭ୍ୟେୟୁଷୀ ।
ଶ୍ରୀକାମାକ୍ଷି ତଵ ସ୍ମିତଦ୍ୟୁତିତତିର୍ବିଂବୋଷ୍ଠକାଂତ୍ୟଂକୁରୈଃ
ଚିତ୍ରାଂ ଵିଦ୍ରୁମମୁଦ୍ରିତାଂ ଵିତନୁତେ ମୌକ୍ତୀଂ ଵିତାନଶ୍ରିୟମ୍ ॥87॥
ସ୍ଵାଭାଵ୍ୟାତ୍ତଵ ଵକ୍ତ୍ରମେଵ ଲଲିତଂ ସଂତୋଷସଂପାଦନଂ
ଶଂଭୋଃ କିଂ ପୁନରଂଚିତସ୍ମିତରୁଚଃ ପାଂଡିତ୍ୟପାତ୍ରୀକୃତମ୍ ।
ଅଂଭୋଜଂ ସ୍ଵତ ଏଵ ସର୍ଵଜଗତାଂ ଚକ୍ଷୁଃପ୍ରିୟଂଭାଵୁକଂ
କାମାକ୍ଷି ସ୍ଫୁରିତେ ଶରଦ୍ଵିକସିତେ କୀଦୃଗ୍ଵିଧଂ ଭ୍ରାଜତେ ॥88॥
ପୁଂଭିର୍ନିର୍ମଲମାନସୌର୍ଵିଦଧତେ ମୈତ୍ରୀଂ ଦୃଢଂ ନିର୍ମଲାଂ
ଲବ୍ଧ୍ଵା କର୍ମଲୟଂ ଚ ନିର୍ମଲତରାଂ କୀର୍ତିଂ ଲଭଂତେତରାମ୍ ।
ସୂକ୍ତିଂ ପକ୍ଷ୍ମଲୟଂତି ନିର୍ମଲତମାଂ ୟତ୍ତାଵକାଃ ସେଵକାଃ
ତତ୍କାମାକ୍ଷି ତଵ ସ୍ମିତସ୍ୟ କଲୟା ନୈର୍ମଲ୍ୟସୀମାନିଧେଃ ॥89॥
ଆକର୍ଷନ୍ନୟନାନି ନାକିସଦସାଂ ଶୈତ୍ୟେନ ସଂସ୍ତଂଭୟ-
ନ୍ନିଂଦୁଂ କିଂଚ ଵିମୋହୟନ୍ପଶୁପତିଂ ଵିଶ୍ଵାର୍ତିମୁଚ୍ଚାଟୟନ୍ ।
ହିଂସତ୍ସଂସୃତିଡଂବରଂ ତଵ ଶିଵେ ହାସାହ୍ଵୟୋ ମାଂତ୍ରିକଃ
ଶ୍ରୀକାମାକ୍ଷି ମଦୀୟମାନସତମୋଵିଦ୍ଵେଷଣେ ଚେଷ୍ଟତାମ୍ ॥90॥
କ୍ଷେପୀୟଃ କ୍ଷପୟଂତୁ କଲ୍ମଷଭୟାନ୍ୟସ୍ମାକମଲ୍ପସ୍ମିତ-
ଜ୍ୟୋତିର୍ମଂଡଲଚଂକ୍ରମାସ୍ତଵ ଶିଵେ କାମାକ୍ଷି ରୋଚିଷ୍ଣଵଃ ।
ପୀଡାକର୍ମଠକର୍ମଘର୍ମସମୟଵ୍ୟାପାରତାପାନଲ-
ଶ୍ରୀପାତା ନଵହର୍ଷଵର୍ଷଣସୁଧାସ୍ରୋତସ୍ଵିନୀଶୀକରାଃ ॥91॥
ଶ୍ରୀକାମାକ୍ଷି ତଵ ସ୍ମିତୈଂଦଵମହଃପୂରେ ପରିଂଫୂର୍ଜତି
ପ୍ରୌଢାଂ ଵାରିଧିଚାତୁରୀଂ କଲୟତେ ଭକ୍ତାତ୍ମନାଂ ପ୍ରାତିଭମ୍ ।
ଦୌର୍ଗତ୍ୟପ୍ରସରାସ୍ତମଃପଟଲିକାସାଧର୍ମ୍ୟମାବିଭ୍ରତେ
ସର୍ଵଂ କୈରଵସାହଚର୍ୟପଦଵୀରୀତିଂ ଵିଧତ୍ତେ ପରମ୍ ॥92॥
ମଂଦାରାଦିଷୁ ମନ୍ମଥାରିମହିଷି ପ୍ରାକାଶ୍ୟରୀତିଂ ନିଜାଂ
କାଦାଚିତ୍କତୟା ଵିଶଂକ୍ୟ ବହୁଶୋ ଵୈଶଦ୍ୟମୁଦ୍ରାଗୁଣଃ ।
ସାତତ୍ୟେନ ତଵ ସ୍ମିତେ ଵିତନୁତେ ସ୍ଵୈରାସନାଵାସନାମ୍ ॥93॥
ଇଂଧାନେ ଭଵଵୀତିହୋତ୍ରନିଵହେ କର୍ମୌଘଚଂଡାନିଲ-
ପ୍ରୌଢିମ୍ନା ବହୁଲୀକୃତେ ନିପତିତଂ ସଂତାପଚିଂତାକୁଲମ୍ ।
ମାତର୍ମାଂ ପରିଷିଂଚ କିଂଚିଦମଲୈଃ ପୀୟୂଷଵର୍ଷୈରିଵ
ଶ୍ରୀକାମାକ୍ଷି ତଵ ସ୍ମିତଦ୍ୟୁତିକଣୈଃ ଶୈଶିର୍ୟଲୀଲାକରୈଃ ॥94॥
ଭାଷାୟା ରସନାଗ୍ରଖେଲନଜୁଷଃ ଶୃଂଗାରମୁଦ୍ରାସଖୀ-
ଲୀଲାଜାତରତେଃ ସୁଖେନ ନିୟମସ୍ନାନାୟ ମେନାତ୍ମଜେ ।
ଶ୍ରୀକାମାକ୍ଷି ସୁଧାମୟୀଵ ଶିଶିରା ସ୍ରୋତସ୍ଵିନୀ ତାଵକୀ
ଗାଢାନଂଦତରଂଗିତା ଵିଜୟତେ ହାସପ୍ରଭାଚାତୁରୀ ॥95॥
ସଂତାପଂ ଵିରଲୀକରୋତୁ ସକଲଂ କାମାକ୍ଷି ମଚ୍ଚେତନା
ମଜ୍ଜଂତୀ ମଧୁରସ୍ମିତାମରଧୁନୀକଲ୍ଲୋଲଜାଲେଷୁ ତେ ।
ନୈରଂତର୍ୟମୁପେତ୍ୟ ମନ୍ମଥମରୁଲ୍ଲୋଲେଷୁ ୟେଷୁ ସ୍ଫୁଟଂ
ପ୍ରେମେଂଦୁଃ ପ୍ରତିବିଂବିତୋ ଵିତନୁତେ କୌତୂହଲଂ ଧୂର୍ଜଟେଃ ॥96॥
ଚେତଃକ୍ଷୀରପୟୋଧିମଂଥରଚଲଦ୍ରାଗାଖ୍ୟମଂଥାଚଲ-
କ୍ଷୋଭଵ୍ୟାପୃତିସଂଭଵାଂ ଜନନି ତେ ମଂଦସ୍ମିତଶ୍ରୀସୁଧାମ୍ ।
ସ୍ଵାଦଂସ୍ଵାଦମୁଦୀତକୌତୁକରସା ନେତ୍ରତ୍ରୟୀ ଶାଂକରୀ
ଶ୍ରୀକାମାକ୍ଷି ନିରଂତରଂ ପରିଣମତ୍ୟାନଂଦଵୀଚୀମୟୀ ॥97॥
ଆଲୋକେ ତଵ ପଂଚସାୟକରିପୋରୁଦ୍ଦାମକୌତୂହଲ-
ପ୍ରେଂଖନ୍ମାରୁତଘଟ୍ଟନପ୍ରଚଲିତାଦାନଂଦଦୁଗ୍ଧାଂବୁଧେଃ ।
କାଚିଦ୍ଵୀଚିରୁଦଂଚତି ପ୍ରତିନଵା ସଂଵିତ୍ପ୍ରରୋହାତ୍ମିକା
ତାଂ କାମାକ୍ଷି କଵୀଶ୍ଵରାଃ ସ୍ମିତମିତି ଵ୍ୟାକୁର୍ଵତେ ସର୍ଵଦା ॥98॥
ସୂକ୍ତିଃ ଶୀଲୟତେ କିମଦ୍ରିତନୟେ ମଂଦସ୍ମିତାତ୍ତେ ମୁହୁଃ
ମାଧୁର୍ୟାଗମସଂପ୍ରଦାୟମଥଵା ସୂକ୍ତେର୍ନୁ ମଂଦସ୍ମିତମ୍ ।
ଇତ୍ଥଂ କାମପି ଗାହତେ ମମ ମନଃ ସଂଦେହମାର୍ଗଭ୍ରମିଂ
ଶ୍ରୀକାମାକ୍ଷି ନ ପାରମାର୍ଥ୍ୟସରଣିସ୍ଫୂର୍ତୌ ନିଧତ୍ତେ ପଦମ୍ ॥99॥
କ୍ରୀଡାଲୋଲକୃପାସରୋରୁହମୁଖୀସୌଧାଂଗଣେଭ୍ୟଃ କଵି-
ଶ୍ରେଣୀଵାକ୍ପରିପାଟିକାମୃତଝରୀସୂତୀଗୃହେଭ୍ୟଃ ଶିଵେ ।
ନିର୍ଵାଣାଂକୁରସାର୍ଵଭୌମପଦଵୀସିଂହାସନେଭ୍ୟସ୍ତଵ
ଶ୍ରୀକାମାକ୍ଷି ମନୋଜ୍ଞମଂଦହସିତଜ୍ୟୋତିଷ୍କଣେଭ୍ୟୋ ନମଃ ॥100॥
ଆର୍ୟାମେଵ ଵିଭାଵୟନ୍ମନସି ୟଃ ପାଦାରଵିଂଦଂ ପୁରଃ
ପଶ୍ୟନ୍ନାରଭତେ ସ୍ତୁତିଂ ସ ନିୟତଂ ଲବ୍ଧ୍ଵା କଟାକ୍ଷଚ୍ଛଵିମ୍ ।
କାମାକ୍ଷ୍ୟା ମୃଦୁଲସ୍ମିତାଂଶୁଲହରୀଜ୍ୟୋତ୍ସ୍ନାଵୟସ୍ୟାନ୍ଵିତାମ୍
ଆରୋହତ୍ୟପଵର୍ଗସୌଧଵଲଭୀମାନଂଦଵୀଚୀମୟୀମ୍ ॥101॥
॥ ଇତି ମଂଦସ୍ମିତଶତକଂ ସଂପୂର୍ଣମ୍ ॥
॥ ଇତି ଶ୍ରୀ ମୂକପଂଚଶତୀ ସଂପୂର୍ଣା ॥
॥ଔଂ ତତ୍ ସତ୍ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ମୂକ ପଂଚ ଶତି 5 - ମଂଦସ୍ମିତ ଶତକମ୍?
ମୂକ ପଂଚ ଶତି 5 - ମଂଦସ୍ମିତ ଶତକମ୍ is a devotional text available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ମୂକ ପଂଚ ଶତି 5 - ମଂଦସ୍ମିତ ଶତକମ୍ online?
Yes. The imported text is available directly on this page for online reading and recitation.
Can I download ମୂକ ପଂଚ ଶତି 5 - ମଂଦସ୍ମିତ ଶତକମ୍ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.