ମୂକ ପଂଚ ଶତି 4 – କଟାକ୍ଷ ଶତକମ୍
ମୋହାଂଧକାରନିଵହଂ ଵିନିହଂତୁମୀଡେ
ମୂକାତ୍ମନାମପି ମହାକଵିତାଵଦାନ୍ୟାନ୍ ।
ଶ୍ରୀକାଂଚିଦେଶଶିଶିରୀକୃତିଜାଗରୂକାନ୍
ଏକାମ୍ରନାଥତରୁଣୀକରୁଣାଵଲୋକାନ୍ ॥1॥
ମାତର୍ଜୟଂତି ମମତାଗ୍ରହମୋକ୍ଷଣାନି
ମାହେଂଦ୍ରନୀଲରୁଚିଶିକ୍ଷଣଦକ୍ଷିଣାନି ।
କାମାକ୍ଷି କଲ୍ପିତଜଗତ୍ତ୍ରୟରକ୍ଷଣାନି
ତ୍ଵଦ୍ଵୀକ୍ଷଣାନି ଵରଦାନଵିଚକ୍ଷଣାନି ॥2॥
ଆନଂଗତଂତ୍ରଵିଧିଦର୍ଶିତକୌଶଲାନାମ୍
ଆନଂଦମଂଦପରିଘୂର୍ଣିତମଂଥରାଣାମ୍ ।
ତାରଲ୍ୟମଂବ ତଵ ତାଡିତକର୍ଣସୀମ୍ନାଂ
କାମାକ୍ଷି ଖେଲତି କଟାକ୍ଷନିରୀକ୍ଷଣାନାମ୍ ॥3॥
କଲ୍ଲୋଲିତେନ କରୁଣାରସଵେଲ୍ଲିତେନ
କଲ୍ମାଷିତେନ କମନୀୟମୃଦୁସ୍ମିତେନ ।
ମାମଂଚିତେନ ତଵ କିଂଚନ କୁଂଚିତେନ
କାମାକ୍ଷି ତେନ ଶିଶିରୀକୁରୁ ଵୀକ୍ଷିତେନ ॥4॥
ସାହାୟ୍ୟକଂ ଗତଵତୀ ମୁହୁରର୍ଜନସ୍ୟ
ମଂଦସ୍ମିତସ୍ୟ ପରିତୋଷିତଭୀମଚେତାଃ ।
କାମାକ୍ଷି ପାଂଡଵଚମୂରିଵ ତାଵକୀନା
କର୍ଣାଂତିକଂ ଚଲତି ହଂତ କଟାକ୍ଷଲକ୍ଷ୍ମୀଃ ॥5॥
ଅସ୍ତଂ କ୍ଷଣାନ୍ନୟତୁ ମେ ପରିତାପସୂର୍ୟମ୍
ଆନଂଦଚଂଦ୍ରମସମାନୟତାଂ ପ୍ରକାଶମ୍ ।
କାଲାଂଧକାରସୁଷୁମାଂ କଲୟଂଦିଗଂତେ
କାମାକ୍ଷି କୋମଲକଟାକ୍ଷନିଶାଗମସ୍ତେ ॥6॥
ତାଟାଂକମୌକ୍ତିକରୁଚାଂକୁରଦଂତକାଂତିଃ
କାରୁଣ୍ୟହସ୍ତିପଶିଖାମଣିନାଧିରୂଢଃ ।
ଉନ୍ମୂଲୟତ୍ଵଶୁଭପାଦପମସ୍ମଦୀୟଂ
କାମାକ୍ଷି ତାଵକକଟାକ୍ଷମତଂଗଜେତଂଦ୍ରଃ ॥7॥
ଛାୟାଭରଣେ ଜଗତାଂ ପରିତାପହାରୀ
ତାଟଂକରତ୍ନମଣିତଲ୍ଲଜପଲ୍ଲଵଶ୍ରୀଃ ।
କାରୁଣ୍ୟନାମ ଵିକିରନ୍ମକରଂଦଜାଲଂ
କାମାକ୍ଷି ରାଜତି କଟାକ୍ଷସୁରଦ୍ରୁମସ୍ତେ ॥8॥
ସୂର୍ୟାଶ୍ରୟପ୍ରଣୟିନୀ ମଣିକୁଂଡଲାଂଶୁ-
ଲୌହିତ୍ୟକୋକନଦକାନନମାନନୀୟା ।
ୟାଂତୀ ତଵ ସ୍ମରହରାନନକାଂତିସିଂଧୁଂ
କାମାକ୍ଷି ରାଜତି କଟାକ୍ଷକଲିଂଦକନ୍ୟା ॥9॥
ପ୍ରାପ୍ନୋତି ୟଂ ସୁକୃତିନଂ ତଵ ପକ୍ଷପାତାତ୍
କାମାକ୍ଷି ଵୀକ୍ଷଣଵିଲାସକଲାପୁରଂଧ୍ରୀ ।
ସଦ୍ୟସ୍ତମେଵ କିଲ ମୁକ୍ତିଵଧୂର୍ଵୃଣୀତେ
ତସ୍ମାନ୍ନିତାଂତମନୟୋରିଦମୈକମତ୍ୟମ୍ ॥10॥
ୟାଂତୀ ସଦୈଵ ମରୁତାମନୁକୂଲଭାଵଂ
ଭ୍ରୂଵଲ୍ଲିଶକ୍ରଧନୁରୁଲ୍ଲସିତା ରସାର୍ଦ୍ରା ।
କାମାକ୍ଷି କୌତୁକତରଂଗିତନୀଲକଂଠା
କାଦଂବିନୀଵ ତଵ ଭାତି କଟାକ୍ଷମାଲା ॥11॥
ଗଂଗାଂଭସି ସ୍ମିତମୟେ ତପନାତ୍ମଜେଵ
ଗଂଗାଧରୋରସି ନଵୋତ୍ପଲମାଲିକେଵ ।
ଵକ୍ତ୍ରପ୍ରଭାସରସି ଶୈଵଲମଂଡଲୀଵ
କାମାକ୍ଷି ରାଜତି କଟାକ୍ଷରୁଚିଚ୍ଛଟା ତେ ॥12॥
ସଂସ୍କାରତଃ କିମପି କଂଦଲିତାନ୍ ରସଜ୍ଞ-
କେଦାରସୀମ୍ନି ସୁଧିୟାମୁପଭୋଗୟୋଗ୍ୟାନ୍ ।
କଲ୍ୟାଣସୂକ୍ତିଲହରୀକଲମାଂକୁରାନ୍ନଃ
କାମାକ୍ଷି ପକ୍ଷ୍ମଲୟତୁ ତ୍ଵଦପାଂଗମେଘଃ ॥13॥
ଚାଂଚଲ୍ୟମେଵ ନିୟତଂ କଲୟନ୍ପ୍ରକୃତ୍ୟା
ମାଲିନ୍ୟଭୂଃ ଶ୍ରତିପଥାକ୍ରମଜାଗରୂକଃ ।
କୈଵଲ୍ୟମେଵ କିମୁ କଲ୍ପୟତେ ନତାନାଂ
କାମାକ୍ଷି ଚିତ୍ରମପି ତେ କରୁଣାକଟାକ୍ଷଃ ॥14॥
ସଂଜୀଵନେ ଜନନି ଚୂତଶିଲୀମୁଖସ୍ୟ
ସଂମୋହନେ ଶଶିକିଶୋରକଶେଖରସ୍ୟ ।
ସଂସ୍ତଂଭନେ ଚ ମମତାଗ୍ରହଚେଷ୍ଟିତସ୍ୟ
କାମାକ୍ଷି ଵୀକ୍ଷଣକଲା ପରମୌଷଧଂ ତେ ॥15॥
ନୀଲୋଽପି ରାଗମଧିକଂ ଜନୟନ୍ପୁରାରେଃ
ଲୋଲୋଽପି ଭକ୍ତିମଧିକାଂ ଦୃଢୟନ୍ନରାଣାମ୍ ।
ଵକ୍ରୋଽପି ଦେଵି ନମତାଂ ସମତାଂ ଵିତନ୍ଵନ୍
କାମାକ୍ଷି ନୃତ୍ୟତୁ ମୟି ତ୍ଵଦପାଂଗପାତଃ ॥16॥
କାମଦ୍ରୁହୋ ହୃଦୟୟଂତ୍ରଣଜାଗରୂକା
କାମାକ୍ଷି ଚଂଚଲଦୃଗଂଚଲମେଖଲା ତେ ।
ଆଶ୍ଚର୍ୟମଂବ ଭଜତାଂ ଝଟିତି ସ୍ଵକୀୟ-
ସଂପର୍କ ଏଵ ଵିଧୁନୋତି ସମସ୍ତବଂଧାନ୍ ॥17॥
କୁଂଠୀକରୋତୁ ଵିପଦଂ ମମ କୁଂଚିତଭ୍ରୂ-
ଚାପାଂଚିତଃ ଶ୍ରିତଵିଦେହଭଵାନୁରାଗଃ ।
ରକ୍ଷୋପକାରମନିଶଂ ଜନୟଂଜଗତ୍ୟାଂ
କାମାକ୍ଷି ରାମ ଇଵ ତେ କରୁଣାକଟାକ୍ଷଃ ॥18॥
ଶ୍ରୀକାମକୋଟି ଶିଵଲୋଚନଶୋଷିତସ୍ୟ
ଶୃଂଗାରବୀଜଵିଭଵସ୍ୟ ପୁନଃପ୍ରରୋହେ ।
ପ୍ରେମାଂଭସାର୍ଦ୍ରମଚିରାତ୍ପ୍ରଚୁରେଣ ଶଂକେ
କେଦାରମଂବ ତଵ କେଵଲଦୃଷ୍ଟିପାତମ୍ ॥19॥
ମାହାତ୍ମ୍ୟଶେଵଧିରସୌ ତଵ ଦୁର୍ଵିଲଂଘ୍ୟ-
ସଂସାରଵିଂଧ୍ୟଗିରିକୁଂଠନକେଲିଚୁଂଚୁଃ ।
ଧୈର୍ୟାଂବୁଧିଂ ପଶୁପତେଶ୍ଚୁଲକୀକରୋତି
କାମାକ୍ଷି ଵୀକ୍ଷଣଵିଜୃଂଭଣକୁଂଭଜନ୍ମା ॥20॥
ପୀୟୂଷଵର୍ଷଵଶିଶିରା ସ୍ଫୁଟଦୁତ୍ପଲଶ୍ରୀ-
ମୈତ୍ରୀ ନିସର୍ଗମଧୁରା କୃତତାରକାପ୍ତିଃ ।
କାମାକ୍ଷି ସଂଶ୍ରିତଵତୀ ଵପୁରଷ୍ଟମୂର୍ତେଃ
ଜ୍ୟୋତ୍ସ୍ନାୟତେ ଭଗଵତି ତ୍ଵଦପାଂଗମାଲା ॥21॥
ଅଂବ ସ୍ମରପ୍ରତିଭଟସ୍ୟ ଵପୁର୍ମନୋଜ୍ଞମ୍
ଅଂଭୋଜକାନନମିଵାଂଚିତକଂଟକାଭମ୍ ।
ଭୃଂଗୀଵ ଚୁଂବତି ସଦୈଵ ସପକ୍ଷପାତା
କାମାକ୍ଷି କୋମଲରୁଚିସ୍ତ୍ଵଦପାଂଗମାଲା ॥22॥
କେଶପ୍ରଭାପଟଲନୀଲଵିତାନଜାଲେ
କାମାକ୍ଷି କୁଂଡଲମଣିଚ୍ଛଵିଦୀପଶୋଭେ ।
ଶଂକେ କଟାକ୍ଷରୁଚିରଂଗତଲେ କୃପାଖ୍ୟା
ଶୈଲୂଷିକା ନଟତି ଶଂକରଵଲ୍ଲଭେ ତେ ॥23॥
ଅତ୍ୟଂତଶୀତଲମତଂଦ୍ରୟତୁ କ୍ଷଣାର୍ଧମ୍
ଅସ୍ତୋକଵିଭ୍ରମମନଂଗଵିଲାସକଂଦମ୍ ।
ଅଲ୍ପସ୍ମିତାଦୃତମପାରକୃପାପ୍ରଵାହମ୍
ଅକ୍ଷିପ୍ରରୋହମଚିରାନ୍ମୟି କାମକୋଟି ॥24॥
ମଂଦାକ୍ଷରାଗତରଲୀକୃତିପାରତଂତ୍ର୍ୟାତ୍
କାମାକ୍ଷି ମଂଥରତରାଂ ତ୍ଵଦପାଂଗଡୋଲାମ୍ ।
ଆରୁହ୍ୟ ମଂଦମତିକୌତୁକଶାଲି ଚକ୍ଷୁଃ
ଆନଂଦମେତି ମୁହୁରର୍ଧଶଶାଂକମୌଲେଃ ॥25॥
ତ୍ରୈୟଂବକଂ ତ୍ରିପୁରସୁଂଦରି ହର୍ମ୍ୟଭୂମି-
ରଂଗଂ ଵିହାରସରସୀ କରୁଣାପ୍ରଵାହଃ ।
ଦାସାଶ୍ଚ ଵାସଵମୁଖାଃ ପରିପାଲନୀୟଂ
କାମାକ୍ଷି ଵିଶ୍ଵମପି ଵୀକ୍ଷଣଭୂଭୃତସ୍ତେ ॥26॥
ଵାଗୀଶ୍ଵରୀ ସହଚରୀ ନିୟମେନ ଲକ୍ଷ୍ମୀଃ
ଭ୍ରୂଵଲ୍ଲରୀଵଶକରୀ ଭୁଵନାନି ଗେହମ୍ ।
ରୂପଂ ତ୍ରିଲୋକନୟନାମୃତମଂବ ତେଷାଂ
କାମାକ୍ଷି ୟେଷୁ ତଵ ଵୀକ୍ଷଣପାରତଂତ୍ରୀ ॥27॥
ମାହେଶ୍ଵରଂ ଝଟିତି ମାନସମୀନମଂବ
କାମାକ୍ଷି ଧୈର୍ୟଜଲଧୌ ନିତରାଂ ନିମଗ୍ନମ୍ ।
ଜାଲେନ ଶୃଂଖଲୟତି ତ୍ଵଦପାଂଗନାମ୍ନା
ଵିସ୍ତାରିତେନ ଵିଷମାୟୁଧଦାଶକୋଽସୌ ॥28॥
ଉନ୍ମଥ୍ୟ ବୋଧକମଲାକାରମଂବ ଜାଡ୍ୟ-
ସ୍ତଂବେରମଂ ମମ ମନୋଵିପିନେ ଭ୍ରମଂତମ୍ ।
କୁଂଠୀକୁରୁଷ୍ଵ ତରସା କୁଟିଲାଗ୍ରସୀମ୍ନା
କାମାକ୍ଷି ତାଵକକଟାକ୍ଷମହାଂକୁଶେନ ॥29॥
ଉଦ୍ଵେଲ୍ଲିତସ୍ତବକିତୈର୍ଲଲିତୈର୍ଵିଲାସୈଃ
ଉତ୍ଥାୟ ଦେଵି ତଵ ଗାଢକଟାକ୍ଷକୁଂଜାତ୍ ।
ଦୂରଂ ପଲାୟୟତୁ ମୋହମୃଗୀକୁଲଂ ମେ
କାମାକ୍ଷି ସ୍ତଵରମନୁଗ୍ରହକେସରୀଂଦ୍ରଃ ॥30॥
ସ୍ନେହାଦୃତାଂ ଵିଦଲିତୋତ୍ପଲକଂତିଚୋରାଂ
ଜେତାରମେଵ ଜଗଦୀଶ୍ଵରି ଜେତୁକାମଃ ।
ମାନୋଦ୍ଧତୋ ମକରକେତୁରସୌ ଧୁନୀତେ
କାମାକ୍ଷି ତାଵକକଟାକ୍ଷକୃପାଣଵଲ୍ଲୀମ୍ ॥31॥
ଶ୍ରୌତୀଂ ଵ୍ରଜନ୍ନପି ସଦା ସରଣିଂ ମୁନୀନାଂ
କାମାକ୍ଷି ସଂତତମପି ସ୍ମୃତିମାର୍ଗଗାମୀ ।
କୌଟିଲ୍ୟମଂବ କଥମସ୍ଥିରତାଂ ଚ ଧତ୍ତେ
ଚୌର୍ୟଂ ଚ ପଂକଜରୁଚାଂ ତ୍ଵଦପାଂଗପାତଃ ॥32॥
ନିତ୍ୟଂ ଶ୍ରେତୁଃ ପରିଚିତୌ ୟତମାନମେଵ
ନୀଲୋତ୍ପଲଂ ନିଜସମୀପନିଵାସଲୋଲମ୍ ।
ପ୍ରୀତ୍ୟୈଵ ପାଠୟତି ଵୀକ୍ଷଣଦେଶିକେଂଦ୍ରଃ
କାମାକ୍ଷୀ କିଂତୁ ତଵ କାଲିମସଂପ୍ରଦାୟମ୍ ॥33॥
ଭ୍ରାଂତ୍ଵା ମୁହୁଃ ସ୍ତବକିତସ୍ମିତଫେନରାଶୌ
କାମାକ୍ଷି ଵକ୍ତ୍ରରୁଚିସଂଚୟଵାରିରାଶୌ ।
ଆନଂଦତି ତ୍ରିପୁରମର୍ଦନନେତ୍ରଲକ୍ଷ୍ମୀଃ
ଆଲଂବ୍ୟ ଦେଵି ତଵ ମଂଦମପାଂଗସେତୁମ୍ ॥34॥
ଶ୍ୟାମା ତଵ ତ୍ରିପୁରସୁଂଦରି ଲୋଚନଶ୍ରୀଃ
କାମାକ୍ଷି କଂଦଲିତମେଦୁରତାରକାଂତିଃ ।
ଜ୍ୟୋତ୍ସ୍ନାଵତୀ ସ୍ମିତରୁଚାପି କଥଂ ତନୋତି
ସ୍ପର୍ଧାମହୋ କୁଵଲୟୈଶ୍ଚ ତଥା ଚକୋରୈଃ ॥35॥
କାଲାଂଜନଂ ଚ ତଵ ଦେଵି ନିରୀକ୍ଷଣଂ ଚ
କାମାକ୍ଷି ସାମ୍ୟସରଣିଂ ସମୁପୈତି କାଂତ୍ୟା ।
ନିଶ୍ଶେଷନେତ୍ରସୁଲଭଂ ଜଗତୀଷୁ ପୂର୍ଵ-
ମନ୍ୟତ୍ତ୍ରିନେତ୍ରସୁଲଭଂ ତୁହିନାଦ୍ରିକନ୍ୟେ ॥36॥
ଧୂମାଂକୁରୋ ମକରକେତନପାଵକସ୍ୟ
କାମାକ୍ଷି ନେତ୍ରରୁଚିନୀଲିମଚାତୁରୀ ତେ ।
ଅତ୍ୟଂତମଦ୍ଭୁତମିଦଂ ନୟନତ୍ରୟସ୍ୟ
ହର୍ଷୋଦୟଂ ଜନୟତେ ହରୁଣାଂକମୌଲେଃ ॥37॥
ଆରଭ୍ଭଲେଶସମୟେ ତଵ ଵୀକ୍ଷଣସ୍ସ
କାମାକ୍ଷି ମୂକମପି ଵୀକ୍ଷଣମାତ୍ରନମ୍ରମ୍ ।
ସର୍ଵଜ୍ଞତା ସକଲଲୋକସମକ୍ଷମେଵ
କୀର୍ତିସ୍ଵୟଂଵରଣମାଲ୍ୟଵତୀ ଵୃଣୀତେ ॥38॥
କାଲାଂବୁଵାହ ଉଵ ତେ ପରିତାପହାରୀ
କାମାକ୍ଷି ପୁଷ୍କରମଧଃକୁରୁତେ କଟାଖ୍କ୍ଷ୍ଷଃ ।
ପୂର୍ଵଃ ପରଂ କ୍ଷଣରୁଚା ସମୁପୈତି ମୈତ୍ରୀ-
ମନ୍ୟସ୍ତୁ ସ.ତତରୁଚିଂ ପ୍ରକଟୀକରୋତି ॥39॥
ସୂକ୍ଷ୍ମେଽପି ଦୁର୍ଗମତରେଽପି ଗୁରୁପ୍ରସାଦ-
ସାହାୟ୍ୟକେନ ଵିଚରନ୍ନପଵର୍ଗମାର୍ଗେ ।
ସଂସାରପଂକନିଚୟେ ନ ପତତ୍ୟମୂଂ ତେ
କାମାକ୍ଷି ଗାଢମଵଲଂବ୍ୟ କଟାକ୍ଷୟଷ୍ଟିମ୍ ॥40॥
କାମାକ୍ଷି ସଂତତମସୌ ହରିନୀଲରତ୍ନ-
ସ୍ତଂଭେ କଟାକ୍ଷରୁଚିପୁଂଜମୟେ ଭଵତ୍ୟାଃ ।
ବଦ୍ଧୋଽପି ଭକ୍ତିନିଗଲୈର୍ମମ ଚିତ୍ତହସ୍ତୀ
ସ୍ତଂଭଂ ଚ ବଂଧମପି ମୁଂଚତି ହଂତ ଚିତ୍ରମ୍ ॥41॥
କାମାକ୍ଷି କାଷ୍ଣର୍ୟମପି ସଂତତମଂଜନଂ ଚ
ବିଭ୍ରନ୍ନିସର୍ଗତରଲୋଽପି ଭଵତ୍କଟାକ୍ଷଃ ।
ଵୈମଲ୍ୟମନ୍ଵହମନଂଜନତା ଚ ଭୂୟଃ
ସ୍ଥୈର୍ୟଂ ଚ ଭକ୍ତହୃଦୟାୟ କଥଂ ଦଦାତି ॥42॥
ମଂଦସ୍ମିତସ୍ତବକିତଂ ମଣିକୁଂଡଲାଂଶୁ-
ସ୍ତୋମପ୍ରଵାଲରୁଚିରଂ ଶିଶିରୀକୃତାଶମ୍ ।
କାମାକ୍ଷି ରାଜତି କଟାକ୍ଷରୁଚେଃ କଦଂବମ୍
ଉଦ୍ୟାନମଂବ କରୁଣାହରିଣେକ୍ଷଣାୟାଃ ॥43॥
କାମାକ୍ଷି ତାଵକକଟାକ୍ଷମହେଂଦ୍ରନୀଲ-
ସିଂହାସନଂ ଶ୍ରିତଵତୋ ମକରଧ୍ଵଜସ୍ୟ ।
ସାମ୍ରାଜ୍ୟମଂଗଲଵିଧୌ ମୁଣିକୁଂଡଲଶ୍ରୀଃ
ନୀରାଜନୋତ୍ସଵତରଂଗିତଦୀପମାଲା ॥44॥
ମାତଃ କ୍ଷଣଂ ସ୍ନପୟ ମାଂ ତଵ ଵୀକ୍ଷିତେନ
ମଂଦାକ୍ଷିତେନ ସୁଜନୈରପରୋକ୍ଷିତେନ ।
କାମାକ୍ଷି କର୍ମତିମିରୋତ୍କରଭାସ୍କରେଣ
ଶ୍ରେୟସ୍କରେଣ ମଧୁପଦ୍ୟୁତିତସ୍କରେଣ ॥45॥
ପ୍ରେମାପଗାପୟସି ମଜ୍ଜନମାରଚୟ୍ୟ
ୟୁକ୍ତଃ ସ୍ମିତାଂଶୁକୃତଭସ୍ମଵିଲେପନେନ ।
କାମାକ୍ଷି କୁଂଡଲମଣିଦ୍ୟୁତିଭିର୍ଜଟାଲଃ
ଶ୍ରୀକଂଠମେଵ ଭଜତେ ତଵ ଦୃଷ୍ଟିପାତଃ ॥46॥
କୈଵଲ୍ୟଦାୟ କରୁଣାରସକିଂକରାୟ
କାମାକ୍ଷି କଂଦଲିତଵିଭ୍ରମଶଂକରାୟ ।
ଆଲୋକନାୟ ତଵ ଭକ୍ତଶିଵଂକରାୟ
ମାତର୍ନମୋଽସ୍ତୁ ପରତଂତ୍ରିତଶଂକରାୟ ॥47॥
ସାମ୍ରାଜ୍ୟମଂଗଲଵିଧୌ ମକରଧ୍ଵଜସ୍ୟ
ଲୋଲାଲକାଲିକୃତତୋରଣମାଲ୍ୟଶୋଭେ ।
କାମେଶ୍ଵରି ପ୍ରଚଲଦୁତ୍ପଲଵୈଜୟଂତୀ-
ଚାତୁର୍ୟମେତି ତଵ ଚଂଚଲଦୃଷ୍ଟିପାତଃ ॥48॥
ମାର୍ଗେଣ ମଂଜୁକଚକାଂତିତମୋଵୃତେନ
ମଂଦାୟମାନଗମନା ମଦନାତୁରାସୌ ।
କାମାକ୍ଷି ଦୃଷ୍ଟିରୟତେ ତଵ ଶଂକରାୟ
ସଂକେତଭୂମିମଚିରାଦଭିସାରିକେଵ ॥49॥
ଵ୍ରୀଡନୁଵୃତ୍ତିରମଣୀକୃତସାହଚର୍ୟା
ଶୈଵାଲିତାଂ ଗଲରୁଚା ଶଶିଶେଖରସ୍ୟ ।
କାମାକ୍ଷି କାଂତିସରସୀଂ ତ୍ଵଦପାଂଗଲକ୍ଷ୍ମୀଃ
ମଂଦଂ ସମାଶ୍ରୟତି ମଜ୍ଜନଖେଲନାୟ ॥50॥
କାଷାୟମଂଶୁକମିଵ ପ୍ରକଟଂ ଦଧାନୋ
ମାଣିକ୍ୟକୁଂଡଲରୁଚିଂ ମମତାଵିରୋଧୀ ।
ଶ୍ରୁତ୍ୟଂତସୀମନି ରତଃ ସୁତରାଂ ଚକାସ୍ତି
କାମାକ୍ଷି ତାଵକକଟାକ୍ଷୟତୀଶ୍ଵରୋଽସୌ ॥51॥
ପାଷାଣ ଏଵ ହରିନୀଲମଣିର୍ଦିନେଷୁ
ପ୍ରମ୍ଲନତାଂ କୁଵଲୟଂ ପ୍ରକଟୀକରୋତି ।
ନୌମିତ୍ତିକୋ ଜଲଦମେଚକିମା ତତସ୍ତେ
କାମାକ୍ଷି ଶୂନ୍ୟମୁପମନମପାଂଗଲକ୍ଷ୍ମ୍ୟାଃ ॥52॥
ଶୃଂଗାରଵିଭ୍ରମଵତୀ ସୁତରାଂ ସଲଜ୍ଜା
ନାସାଗ୍ରମୌକ୍ତିକରୁଚା କୃତମଂଦହାସା ।
ଶ୍ୟାମା କଟାକ୍ଷସୁଷମା ତଵ ୟୁକ୍ତମେତତ୍
କାମାକ୍ଷି ଚୁଂବତି ଦିଗଂବରଵକ୍ତ୍ରବିଂବମ୍ ॥53॥
ନୀଲୋତ୍ପଲେନ ମଧୁପେନ ଚ ଦୃଷ୍ଟିପାତଃ
କାମାକ୍ଷି ତୁଲ୍ୟ ଇତି ତେ କଥମାମନଂତି ।
ଶୈତ୍ୟେନ ନିଂଦୟତି ୟଦନ୍ଵହମିଂଦୁପାଦାନ୍
ପାଥୋରୁହେଣ ୟଦସୌ କଲହାୟତେ ଚ ॥54॥
ଓଷ୍ଠପ୍ରଭାପଟଲଵିଦ୍ରୁମମୁଦ୍ରିତେ ତେ
ଭ୍ରୂଵଲ୍ଲିଵୀଚିସୁଭଗେ ମୁଖକାଂତିସିଂଧୌ ।
କାମାକ୍ଷି ଵାରିଭରପୂରଣଲଂବମାନ-
କାଲାଂବୁଵାହସରଣିଂ ଲଭତେ କଟାକ୍ଷଃ ॥55॥
ମଂଦସ୍ମିତୈର୍ଧଵଲିତା ମଣିକୁଂଡଲାଂଶୁ-
ସଂପର୍କଲୋହିତରୁଚିସ୍ତ୍ଵଦପାଂଗଧାରା ।
କାମାକ୍ଷି ମଲ୍ଲିକୁସୁମୈର୍ନଵପଲ୍ଲଵୈଶ୍ଚ
ନୀଲୋତ୍ପଲୈଶ୍ଚ ରଚିତେଵ ଵିଭାତି ମାଲା ॥56॥
କାମାକ୍ଷି ଶୀତଲକୃପାରସନିର୍ଝରାଂଭଃ-
ସଂପର୍କପକ୍ଷ୍ମଲରୁଚିସ୍ତ୍ଵଦପାଂଗମାଲା ।
ଗୋଭିଃ ସଦା ପୁରରିପୋରଭିଲଷ୍ୟମାଣା
ଦୂର୍ଵାକଦଂବକଵିଡଂବନମାତନୋତି ॥57॥
ହୃତ୍ପଂକଜଂ ମମ ଵିକାସୟତୁ ପ୍ରମୁଷ୍ଣ-
ନ୍ନୁଲ୍ଲାସମୁତ୍ପଲରୁଚେସ୍ତମସାଂ ନିରୋଦ୍ଧା ।
ଦୋଷାନୁଷଂଗଜଡତାଂ ଜଗତାଂ ଧୁନାନଃ
କାମାକ୍ଷି ଵୀକ୍ଷଣଵିଲାସଦିନୋଦୟସ୍ତେ ॥58॥
ଚକ୍ଷୁର୍ଵିମୋହୟତି ଚଂଦ୍ରଵିଭୂଷଣସ୍ୟ
କାମାକ୍ଷି ତାଵକକଟାକ୍ଷତମଃପ୍ରରୋହଃ ।
ପ୍ରତ୍ୟଙ୍ମୁଖଂ ତୁ ନୟନଂ ସ୍ତିମିତଂ ମୁନୀନାଂ
ପ୍ରାକାଶ୍ୟମେଵ ନୟତୀତି ପରଂ ଵିଚିତ୍ରମ୍ ॥59॥
କାମାକ୍ଷି ଵୀକ୍ଷଣରୁଚା ୟୁଧି ନିର୍ଜିତଂ ତେ
ନୀଲୋତ୍ପଲଂ ନିରଵଶେଷଗତାଭିମାନମ୍ ।
ଆଗତ୍ୟ ତତ୍ପରିସରଂ ଶ୍ରଵଣଵତଂସ-
ଵ୍ୟୋଜେନ ନୂନମଭୟାର୍ଥନମାତନୋତି ॥60॥
ଆଶ୍ଚର୍ୟମଂବ ମଦାନାଭ୍ୟୁଦୟାଵଲଂବଃ
କାମାକ୍ଷି ଚଂଚଲନିରୀକ୍ଷଣଵିଭ୍ରମସ୍ତେ ।
ଧୈର୍ୟଂ ଵିଧୂୟ ତନୁତେ ହୃଦି ରାଗବଂଧଂ
ଶଂଭୋସ୍ତଦେଵ ଵିପରୀତତୟା ମୁନୀନାମ୍ ॥61॥
ଜଂତୋଃ ସକୃତ୍ପ୍ରଣମତୋ ଜଗଦୀଡ୍ୟତାଂ ଚ
ତେଜାସ୍ଵିତାଂ ଚ ନିଶିତାଂ ଚ ମତିଂ ସଭାୟାମ୍ ।
କାମାକ୍ଷି ମାକ୍ଷିକଝରୀମିଵ ଵୈଖରୀଂ ଚ
ଲକ୍ଷ୍ମୀଂ ଚ ପକ୍ଷ୍ମଲୟତି କ୍ଷଣଵୀକ୍ଷଣଂ ତେ ॥62॥
କାଦଂବିନୀ କିମୟତେ ନ ଜଲାନୁଷଂଗଂ
ଭୃଂଗାଵଲୀ କିମୁରରୀକୁରୁତେ ନ ପଦ୍ମମ୍ ।
କିଂ ଵା କଲିଂଦତନୟା ସହତେ ନ ଭଂଗଂ
କାମାକ୍ଷି ନିଶ୍ଚୟପଦଂ ନ ତଵାକ୍ଷିଲକ୍ଷ୍ମୀଃ ॥63॥
କାକୋଲପାଵକତୃଣୀକରଣେଽପି ଦକ୍ଷଃ
କାମାକ୍ଷି ବାଲକସୁଧାକରଶେଖରସ୍ୟ ।
ଅତ୍ୟଂତଶୀତଲତମୋଽପ୍ୟନୁପାରତଂ ତେ
ଚିତ୍ତଂ ଵିମୋହୟତି ଚିତ୍ରମୟଂ କଟାକ୍ଷଃ ॥64॥
କାର୍ପଣ୍ୟପୂରପରିଵର୍ଧିତମଂବ ମୋହ-
କଂଦୋଦ୍ଗତଂ ଭଵମୟଂ ଵିଷପାଦପଂ ମେ ।
ତୁଂଗଂ ଛିନତ୍ତୁ ତୁହିନାଦ୍ରିସୁତେ ଭଵତ୍ୟାଃ
କାଂଚୀପୁରେଶ୍ଵରି କଟାକ୍ଷକୁଠାରଧାରା ॥65॥
କାମାକ୍ଷି ଘୋରଭଵରୋଗଚିକିତ୍ସନାର୍ଥ-
ମଭ୍ୟର୍ଥ୍ୟ ଦେଶିକକଟାକ୍ଷଭିଷକ୍ପ୍ରସାଦାତ୍ ।
ତତ୍ରାପି ଦେଵି ଲଭତେ ସୁକୃତୀ କଦାଚି-
ଦନ୍ୟସ୍ୟ ଦୁର୍ଲଭମପାଂଗମହୌଷଧଂ ତେ ॥66॥
କାମାକ୍ଷି ଦେଶିକକୃପାଂକୁରମାଶ୍ରୟଂତୋ
ନାନାତପୋନିୟମନାଶିତପାଶବଂଧାଃ ।
ଵାସାଲୟଂ ତଵ କଟାକ୍ଷମମୁଂ ମହାଂତୋ
ଲବ୍ଧ୍ଵା ସୁଖଂ ସମାଧିୟୋ ଵିଚରଂତି ଲୋକେ ॥67॥
ସାକୂତସଂଲପିତସଂଭୃତମୁଗ୍ଧହାସଂ
ଵ୍ରୀଡାନୁରାଗସହଚାରି ଵିଲୋକନଂ ତେ ।
କାମାକ୍ଷି କାମପରିପଂଥିନି ମାରଵୀର-
ସାମ୍ରାଜ୍ୟଵିଭ୍ରମଦଶାଂ ସଫଲୀକରୋତି ॥68॥
କାମାକ୍ଷି ଵିଭ୍ରମବଲୈକନିଧିର୍ଵିଧାୟ
ଭ୍ରୂଵଲ୍ଲିଚାପକୁଟିଲୀକୃତିମେଵ ଚିତ୍ରମ୍ ।
ସ୍ଵାଧୀନତାଂ ତଵ ନିନାୟ ଶଶାଂକମୌଲେ-
ରଂଗାର୍ଧରାଜ୍ୟସୁଖଲାଭମପାଂଗଵୀରଃ ॥69॥
କାମାଂକୁରୈକନିଲୟସ୍ତଵ ଦୃଷ୍ଟିପାତଃ
କାମାକ୍ଷି ଭକ୍ତମନସାଂ ପ୍ରଦଦାତୁ କାମାନ୍ ।
ରାଗାନ୍ଵିତଃ ସ୍ଵୟମପି ପ୍ରକଟୀକରୋତି
ଵୈରାଗ୍ୟମେଵ କଥମେଷ ମହାମୁନୀନାମ୍ ॥70॥
କାଲାଂବୁଵାହନିଵହୈଃ କଲହାୟତେ ତେ
କାମାକ୍ଷି କାଲିମମଦେନ ସଦା କଟାକ୍ଷଃ ।
ଚିତ୍ରଂ ତଥାପି ନିତରାମମୁମେଵ ଦୃଷ୍ଟ୍ଵା
ସୋତ୍କଂଠ ଏଵ ରମତେ କିଲ ନୀଲକଂଠଃ ॥71॥
କାମାକ୍ଷି ମନ୍ମଥରିପୁଂ ପ୍ରତି ମାରତାପ-
ମୋହାଂଧକାରଜଲଦାଗମନେନ ନୃତ୍ୟନ୍ ।
ଦୁଷ୍କର୍ମକଂଚୁକିକୁଲଂ କବଲୀକରୋତୁ
ଵ୍ୟାମିଶ୍ରମେଚକରୁଚିସ୍ତ୍ଵଦପାଂଗକେକୀ ॥72॥
କାମାକ୍ଷି ମନ୍ମଥରିପୋରଵଲୋକନେଷୁ
କାଂତଂ ପୟୋଜମିଵ ତାଵକମକ୍ଷିପାତମ୍ ।
ପ୍ରେମାଗମୋ ଦିଵସଵଦ୍ଵିକଚୀକରୋତି
ଲଜ୍ଜାଭରୋ ରଜନିଵନ୍ମୁକୁଲୀକରୋତି ॥73॥
ମୂକୋ ଵିରିଂଚତି ପରଂ ପୁରୁଷଃ କୁରୂପଃ
କଂଦର୍ପତି ତ୍ରିଦଶରାଜତି କିଂପଚାନଃ ।
କାମାକ୍ଷି କେଵଲମୁପକ୍ରମକାଲ ଏଵ
ଲୀଲାତରଂଗିତକଟାକ୍ଷରୁଚଃ କ୍ଷଣଂ ତେ ॥74॥
ନୀଲାଲକା ମଧୁକରଂତି ମନୋଜ୍ଞନାସା-
ମୁକ୍ତାରୁଚଃ ପ୍ରକଟକଂଦବିସାଂକୁରଂତି ।
କାରୁଣ୍ୟମଂବ ମକରଂଦତି କାମକୋଟି
ମନ୍ୟେ ତତଃ କମଲମେଵ ଵିଲୋଚନଂ ତେ ॥75॥
ଆକାଂକ୍ଷ୍ୟମାଣଫଲଦାନଵିଚକ୍ଷଣାୟାଃ ।
କାମାକ୍ଷି ତାଵକକଟାକ୍ଷକକାମଧେନୋଃ ।
ସଂପର୍କ ଏଵ କଥମଂବ ଵିମୁକ୍ତପାଶ-
ବଂଧାଃ ସ୍ଫୁଟଂ ତନୁଭୃତଃ ପଶୁତାଂ ତ୍ୟଜଂତି ॥76॥
ସଂସାରଘର୍ମପରିତାପଜୁଷାଂ ନରାଣାଂ
କାମାକ୍ଷି ଶୀତଲତରାଣି ତଵେକ୍ଷିତାନି ।
ଚଂଦ୍ରାତପଂତି ଘନଚଂଦନକର୍ଦମଂତି
ମୁକ୍ତାଗୁଣଂତି ହିମଵାରିନିଷେଚନଂତି ॥77॥
ପ୍ରେମାଂବୁରାଶିସତତସ୍ନପିତାନି ଚିତ୍ରଂ
କାମାକ୍ଷି ତାଵକକଟାକ୍ଷନିରୀକ୍ଷଣାନି ।
ସଂଧୁକ୍ଷୟଂତି ମୁହୁରିଂଧନରାଶିରୀତ୍ୟା
ମାରଦ୍ରୁହୋ ମନସି ମନ୍ମଥଚିତ୍ରଭାନୁମ୍ ॥78॥
କାଲାଂଜନପ୍ରତିଭଟଂ କମନୀୟକାଂତ୍ୟା
କଂଦର୍ପତଂତ୍ରକଲୟା କଲିତାନୁଭାଵମ୍ ।
କାଂଚୀଵିହାରରସିକେ କଲୁଷାର୍ତିଚୋରଂ
କଲ୍ଲୋଲୟସ୍ଵ ମୟି ତେ କରୁଣାକଟାକ୍ଷମ୍ ॥79॥
କ୍ରାଂତେନ ମନ୍ମଥଦେନ ଵିମୋହ୍ୟମାନ-
ସ୍ଵାଂତେନ ଚୂତତରୁମୂଲଗତସ୍ୟ ପୁଂସଃ ।
କାଂତେନ କିଂଚିଦଵଲୋକୟ ଲୋଚନସ୍ୟ
ପ୍ରାଂତେନ ମାଂ ଜନନି କାଂଚିପୁରୀଵିଭୂଷେ ॥80॥
କାମାକ୍ଷି କୋଽପି ସୁଜନାସ୍ତ୍ଵଦପାଂଗସଂଗେ
କଂଠେନ କଂଦଲିତକାଲିମସଂପ୍ରଦାୟାଃ ।
ଉତ୍ତଂସକଲ୍ପିତଚକୋରକୁଟୁଂବପୋଷା
ନକ୍ତଂଦିଵସପ୍ରସଵଭୂନୟନା ଭଵଂତି ॥81॥
ନୀଲୋତ୍ପଲପ୍ରସଵକାଂତିନିର୍ଦଶନେନ
କାରୁଣ୍ୟଵିଭ୍ରମଜୁଷା ତଵ ଵୀକ୍ଷଣେନ ।
କାମାକ୍ଷି କର୍ମଜଲଧେଃ କଲଶୀସୁତେନ
ପାଶତ୍ରୟାଦ୍ଵୟମମୀ ପରିମୋଚନୀୟାଃ ॥82॥
ଅତ୍ୟଂତଚଂଚଲମକୃତ୍ରିମମଂଜନଂ କିଂ
ଝଂକାରଭଂଗିରହିତା କିମୁ ଭୃଂଗମାଲା ।
ଧୂମାଂକୁରଃ କିମୁ ହୁତାଶନସଂଗହୀନଃ
କାମାକ୍ଷି ନେତ୍ରରୁଚିନୀଲିମକଂଦଲୀ ତେ ॥83॥
କାମାକ୍ଷି ନିତ୍ୟମୟମଂଜଲିରସ୍ତୁ ମୁକ୍ତି-
ବୀଜାୟ ଵିଭ୍ରମମଦୋଦୟଘୂର୍ଣିତାୟ ।
କଂଦର୍ପଦର୍ପପୁନରୁଦ୍ଭଵସିଦ୍ଧିଦାୟ
କଲ୍ୟାଣଦାୟ ତଵ ଦେଵି ଦୃଗଂଚଲାୟ ॥84॥
ଦର୍ପାଂକୁରୋ ମକରକେତନଵିଭ୍ରମାଣାଂ
ନିଂଦାଂକୁରୋ ଵିଦଲିତୋତ୍ପଲଚାତୁରୀଣାମ୍ ।
ଦୀପାଂକୁରୋ ଭଵତମିସ୍ରକଦଂବକାନାଂ
କାମାକ୍ଷି ପାଲୟତୁ ମାଂ ତ୍ଵଦପାଂଗପାତଃ ॥85॥
କୈଵଲ୍ୟଦିଵ୍ୟମଣିରୋହଣପର୍ଵତେଭ୍ୟଃ
କାରୁଣ୍ୟନିର୍ଝରପୟଃକୃତମଂଜନେଭ୍ୟଃ ।
କାମାକ୍ଷି କିଂକରିତଶଂକରମାନସେଭ୍ୟ-
ସ୍ତେଭ୍ୟୋ ନମୋଽସ୍ତୁ ତଵ ଵୀକ୍ଷଣଵିଭ୍ରମେଭ୍ୟଃ ॥86॥
ଅଲ୍ପୀୟ ଏଵ ନଵମୁତ୍ପଲମଂବ ହୀନା
ମୀନସ୍ୟ ଵା ସରଣିରଂବୁରୁହାଂ ଚ କିଂ ଵା ।
ଦୂରେ ମୃଗୀଦୃଗସମଂଜସମଂଜନଂ ଚ
କାମାକ୍ଷି ଵୀକ୍ଷଣରୁଚୌ ତଵ ତର୍କୟାମଃ ॥87॥
ମିଶ୍ରୀଭଵଦ୍ଗରଲପଂକିଲଶଂକରୋରସ୍-
ସୀମାଂଗଣେ କିମପି ରିଂଖଣମାଦଧାନଃ ।
ହେଲାଵଧୂତଲଲିତଶ୍ରଵଣୋତ୍ପଲୋଽସୌ
କାମାକ୍ଷି ବାଲ ଇଵ ରାଜତି ତେ କଟାକ୍ଷଃ ॥88॥
ପ୍ରୌଢିକରୋତି ଵିଦୁଷାଂ ନଵସୂକ୍ତିଧାଟୀ-
ଚୂତାଟଵୀଷୁ ବୁଧକୋକିଲଲାଲ୍ୟମାନମ୍ ।
ମାଧ୍ଵୀରସଂ ପରିମଲଂ ଚ ନିରର୍ଗଲଂ ତେ
କାମାକ୍ଷି ଵୀକ୍ଷଣଵିଲାସଵସଂତଲକ୍ଷ୍ମୀଃ ॥89॥
କୂଲଂକଷଂ ଵିତନୁତେ କରୁଣାଂବୁଵର୍ଷୀ
ସାରସ୍ଵତଂ ସୁକୃତିନଃ ସୁଲଭଂ ପ୍ରଵାହମ୍ ।
ତୁଚ୍ଛୀକରୋତି ୟମୁନାଂବୁତରଂଗଭଂଗୀଂ
କାମାକ୍ଷି କିଂ ତଵ କଟାକ୍ଷମହାଂବୁଵାହଃ ॥90॥
ଜଗର୍ତି ଦେଵି କରୁଣାଶୁକସୁଂଦରୀ ତେ
ତାଟଂକରତ୍ନରୁଚିଦାଡିମଖଂଡଶୋଣେ ।
କାମାକ୍ଷି ନିର୍ଭରକଟାକ୍ଷମରୀଚିପୁଂଜ-
ମାହେଂଦ୍ରନୀଲମଣିପଂଜରମଧ୍ୟଭାଗେ ॥91॥
କାମାକ୍ଷି ସତ୍କୁଵଲୟସ୍ୟ ସଗୋତ୍ରଭାଵା-
ଦାକ୍ରାମତି ଶ୍ରୁତିମସୌ ତଵ ଦୃଷ୍ଟିପାତଃ ।
କିଂଚ ସ୍ଫୁଟଂ କୁଟିଲତାଂ ପ୍ରକଟୀକରୋତି
ଭ୍ରୂଵଲ୍ଲରୀପରିଚିତସ୍ୟ ଫଲଂ କିମେତତ୍ ॥92॥
ଏଷା ତଵାକ୍ଷିସୁଷମା ଵିଷମାୟୁଧସ୍ୟ
ନାରାଚଵର୍ଷଲହରୀ ନଗରାଜକନ୍ୟେ ।
ଶଂକେ କରୋତି ଶତଧା ହୃଦି ଧୈର୍ୟମୁଦ୍ରାଂ
ଶ୍ରୀକାମକୋଟି ୟଦସୌ ଶିଶିରାଂଶୁମୌଲେଃ ॥93॥
ବାଣେନ ପୁଷ୍ପଧନୁଷଃ ପରିକଲ୍ପ୍ୟମାନ-
ତ୍ରାଣେନ ଭକ୍ତମନସାଂ କରୁଣାକରେଣ ।
କୋଣେନ କୋମଲଦୃଶସ୍ତଵ କାମକୋଟି
ଶୋଣେନ ଶୋଷୟ ଶିଵେ ମମ ଶୋକସିଂଧୁମ୍ ॥94॥
ମାରଦ୍ରୁହା ମୁକୁଟସୀମନି ଲାଲ୍ୟମାନେ
ମଂଦାକିନୀପୟସି ତେ କୁଟିଲଂ ଚରିଷ୍ଣୁଃ ।
କାମାକ୍ଷି କୋପରଭସାଦ୍ଵଲମାନମୀନ-
ସଂଦେହମଂକୁରୟତି କ୍ଷଣମକ୍ଷିପାତଃ ॥95॥
କାମାକ୍ଷି ସଂଵଲିତମୌକ୍ତିକକୁଂଡଲାଂଶୁ-
ଚଂଚତ୍ସିତଶ୍ରଵଣଚାମରଚାତୁରୀକଃ ।
ସ୍ତଂଭେ ନିରଂତରମପାଂଗମୟେ ଭଵତ୍ୟା
ବଦ୍ଧଶ୍ଚକାସ୍ତି ମକରଧ୍ଵଜମତ୍ତହସ୍ତୀ ॥96॥
ୟାଵତ୍କଟାକ୍ଷରଜନୀସମୟାଗମସ୍ତେ
କାମାକ୍ଷି ତାଵଦଚିରାନ୍ନମତାଂ ନରାଣାମ୍ ।
ଆଵିର୍ଭଵତ୍ୟମୃତଦୀଧିତିବିଂବମଂବ
ସଂଵିନ୍ମୟଂ ହୃଦୟପୂର୍ଵଗିରୀଂଦ୍ରଶୃଂଗେ ॥97॥
କାମାକ୍ଷି କଲ୍ପଵିଟପୀଵ ଭଵତ୍କଟାକ୍ଷୋ
ଦିତ୍ସୁଃ ସମସ୍ତଵିଭଵଂ ନମତାଂ ନରାଣାମ୍ ।
ଭୃଂଗସ୍ୟ ନୀଲନଲିନସ୍ୟ ଚ କାଂତିସଂପ-
ତ୍ସର୍ଵସ୍ଵମେଵ ହରତୀତି ପରଂ ଵିଚିତ୍ରମ୍ ॥98॥
ଅତ୍ୟଂତଶୀତଲମନର୍ଗଲକର୍ମପାକ-
କାକୋଲହାରି ସୁଲଭଂ ସୁମନୋଭିରେତତ୍ ।
ପୀୟୂଷମେଵ ତଵ ଵୀକ୍ଷଣମଂବ କିଂତୁ
କାମାକ୍ଷି ନୀଲମିଦମିତ୍ୟୟମେଵ ଭେଦଃ ॥99॥
ଅଜ୍ଞାତଭକ୍ତିରସମପ୍ରସରଦ୍ଵିଵେକ-
ମତ୍ୟଂତଗର୍ଵମନଧୀତସମସ୍ତଶାସ୍ତ୍ରମ୍ ।
ଅପ୍ରାପ୍ତସତ୍ୟମସମୀପଗତଂ ଚ ମୁକ୍ତେଃ
କାମାକ୍ଷି ନୈଵ ତଵ ସ୍ପୃହୟତି ଦୃଷ୍ଟିପାତଃ ॥100॥
(କାମାକ୍ଷି ମାମଵତୁ ତେ କରୁଣାକଟାକ୍ଷଃ)
ପାତେନ ଲୋଚନରୁଚେସ୍ତଵ କାମକୋଟି
ପୋତେନ ପତକପୟୋଧିଭୟାତୁରାଣାମ୍ ।
ପୂତେନ ତେନ ନଵକାଂଚନକୁଂଡଲାଂଶୁ-
ଵୀତେନ ଶୀତଲୟ ଭୂଧରକନ୍ୟକେ ମାମ୍ ॥101॥
॥ ଇତି କଟାକ୍ଷଶତକଂ ସଂପୂର୍ଣମ୍ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ମୂକ ପଂଚ ଶତି 4 - କଟାକ୍ଷ ଶତକମ୍?
ମୂକ ପଂଚ ଶତି 4 - କଟାକ୍ଷ ଶତକମ୍ is a devotional text available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ମୂକ ପଂଚ ଶତି 4 - କଟାକ୍ଷ ଶତକମ୍ online?
Yes. The imported text is available directly on this page for online reading and recitation.
Can I download ମୂକ ପଂଚ ଶତି 4 - କଟାକ୍ଷ ଶତକମ୍ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.