ମୂକ ପଂଚ ଶତି 3 – ସ୍ତୁତି ଶତକମ୍
ପାଂଡିତ୍ୟଂ ପରମେଶ୍ଵରି ସ୍ତୁତିଵିଧୌ ନୈଵାଶ୍ରୟଂତେ ଗିରାଂ
ଵୈରିଂଚାନ୍ୟପି ଗୁଂଫନାନି ଵିଗଲଦ୍ଗର୍ଵାଣି ଶର୍ଵାଣି ତେ ।
ସ୍ତୋତୁଂ ତ୍ଵାଂ ପରିଫୁଲ୍ଲନୀଲନଲିନଶ୍ୟାମାକ୍ଷି କାମାକ୍ଷି ମାଂ
ଵାଚାଲୀକୁରୁତେ ତଥାପି ନିତରାଂ ତ୍ଵତ୍ପାଦସେଵାଦରଃ ॥1॥
ତାପିଂଛସ୍ତବକତ୍ଵିଷେ ତନୁଭୃତାଂ ଦାରିଦ୍ର୍ୟମୁଦ୍ରାଦ୍ଵିଷେ
ସଂସାରାଖ୍ୟତମୋମୁଷେ ପୁରରିପୋର୍ଵାମାଂକସୀମାଜୁଷେ ।
କଂପାତୀରମୁପେୟୁଷେ କଵୟତାଂ ଜିହ୍ଵାକୁଟୀଂ ଜଗ୍ମୁଷେ
ଵିଶ୍ଵତ୍ରାଣପୁଷେ ନମୋଽସ୍ତୁ ସତତଂ ତସ୍ମୈ ପରଂଜ୍ୟୋତିଷେ ॥2॥
ୟେ ସଂଧ୍ୟାରୁଣୟଂତି ଶଂକରଜଟାକାଂତାରଚନ୍ରାର୍ଭକଂ
ସିଂଦୂରଂତି ଚ ୟେ ପୁରଂଦରଵଧୂସୀମଂତସୀମାଂତରେ ।
ପୁଣ୍ୟ.ଂ ୟେ ପରିପକ୍କୟଂତି ଭଜତାଂ କାଂଚୀପୁରେ ମାମମୀ
ପାୟାସୁଃ ପରମେଶ୍ଵରପ୍ରଣୟିନୀପାଦୋଦ୍ଭଵାଃ ପାଂସଵଃ ॥3॥
କାମାଡଂବରପୂରୟା ଶଶିରୁଚା କମ୍ରସ୍ମିତାନାଂ ତ୍ଵିଷା
କାମାରେରନୁରାଗସିଂଧୁମଧିକଂ କଲ୍ଲୋଲିତଂ ତନ୍ଵତୀ ।
କାମାକ୍ଷୀତି ସମସ୍ତସଜ୍ଜନନୁତା କଲ୍ୟାଣଦାତ୍ରୀ ନୃଣାଂ
କାରୁଣ୍ୟାକୁଲମାନସା ଭଗଵତୀ କଂପାତଟେ ଜୃଂଭତେ ॥4॥
କାମାକ୍ଷୀଣପରାକ୍ରମପ୍ରକଟନଂ ସଂଭାଵୟଂତୀ ଦୃଶା
ଶ୍ୟାମା କ୍ଷୀରସହୋଦରସ୍ମିତରୁଚିପ୍ରକ୍ଷାଲିତାଶାଂତରା ।
କାମାକ୍ଷୀଜନମୌଲିଭୂଷଣମଣିର୍ଵାଚାଂ ପରା ଦେଵତା
କାମାକ୍ଷୀତି ଵିଭାତି କାପି କରୁଣା କଂପାତଟିନ୍ୟାସ୍ତଟେ ॥5॥
ଶ୍ୟାମା କାଚନ ଚଂଦ୍ରିକା ତ୍ରିଭୁଵନେ ପୁଣ୍ୟାତ୍ମନାମାନନେ
ସୀମାଶୂନ୍ୟକଵିତ୍ଵଵର୍ଷଜନନୀ ୟା କାପି କାଦଂବିନୀ ।
ମାରାରାତିମନୋଵିମୋହନଵିଧୌ କାଚିତତ୍ତମଃକଂଦଲୀ
କାମାକ୍ଷ୍ୟାଃ କରୁଣାକଟାକ୍ଷଲହରୀ କାମାୟ ମେ କଲ୍ପତାମ୍ ॥6॥
ପ୍ରୌଢଧ୍ଵାଂତକଦଂବକେ କୁମୁଦିନୀପୁଣ୍ୟାଂକୁରଂ ଦର୍ଶୟନ୍
ଜ୍ୟୋତ୍ସ୍ନାସଂଗମନେଽପି କୋକମିଥୁନଂ ମିଶ୍ରଂ ସମୁଦ୍ଭାଵୟନ୍ ।
କାଲିଂଦୀଲହରୀଦଶାଂ ପ୍ରକଟୟନ୍କମ୍ରାଂ ନଭସ୍ୟଦ୍ଭୁତାଂ
କଶ୍ଚିନ୍ନେତ୍ରମହୋତ୍ସଵୋ ଵିଜୟତେ କାଂଚୀପୁରେ ଶୂଲିନଃ ॥7॥
ତଂଦ୍ରାହୀନତମାଲନୀଲସୁଷମୈସ୍ତାରୁଣ୍ୟଲୀଲାଗୃହୈଃ
ତାରାନାଥକିଶୋରଲାଂଛିତକଚୈସ୍ତାମ୍ରାରଵିଂଦେକ୍ଷଣୈଃ ।
ମାତଃ ସଂଶ୍ରୟତାଂ ମନୋ ମନସିଜପ୍ରାଗଲ୍ଭ୍ୟନାଡିଂଧମୈଃ
କଂପାତୀରଚରୈର୍ଘନସ୍ତନଭରୈଃ ପୁଣ୍ୟାଂକରୈଃ ଶାଂକରୈଃ ॥8॥
ନିତ୍ୟଂ ନିଶ୍ଚଲତାମୁପେତ୍ୟ ମରୁତାଂ ରକ୍ଷାଵିଧିଂ ପୁଷ୍ଣତୀ
ତେଜସ୍ସଂଚୟପାଟଵେନ କିରଣାନୁଷ୍ଣଦ୍ୟୁତେର୍ମୁଷ୍ଣତୀ ।
କାଂଚୀମଧ୍ୟଗତାପି ଦୀପ୍ତିଜନନୀ ଵିଶ୍ଵାଂତରେ ଜୃଂଭତେ
କାଚିଚ୍ଚିତ୍ରମହୋ ସ୍ମୃତାପି ତମସାଂ ନିର୍ଵାପିକା ଦୀପିକା ॥9॥
କାଂତୈଃ କେଶରୁଚାଂ ଚୟୈର୍ଭ୍ରମରିତଂ ମଂଦସ୍ମିତୈଃ ପୁଷ୍ପିତଂ
କାଂତ୍ୟା ପଲ୍ଲଵିତଂ ପଦାଂବୁରୁହୟୋର୍ନେତ୍ରତ୍ଵିଷା ପତ୍ରିତମ୍ ।
କଂପାତୀରଵନାଂତରଂ ଵିଦଧତୀ କଲ୍ୟାଣଜନ୍ମସ୍ଥଲୀ
କାଂଚୀମଧ୍ୟମହାମଣିର୍ଵିଜୟତେ କାଚିତ୍କୃପାକଂଦଲୀ ॥10॥
ରାକାଚଂଦ୍ରସମାନକାଂତିଵଦନା ନାକାଧିରାଜସ୍ତୁତା
ମୂକାନାମପି କୁର୍ଵତୀ ସୁରଧନୀନୀକାଶଵାଗ୍ଵୈଭଵମ୍ ।
ଶ୍ରୀକାଂଚୀନଗରୀଵିହାରରସିକା ଶୋକାପହଂତ୍ରୀ ସତାମ୍
ଏକା ପୁଣ୍ୟପରଂପରା ପଶୁପତେରାକାରିଣୀ ରାଜତେ ॥11॥
ଜାତା ଶୀତଲଶୈଲତଃ ସୁକୃତିନାଂ ଦୃଶ୍ୟା ପରଂ ଦେହିନାଂ
ଲୋକାନାଂ କ୍ଷଣମାତ୍ରସଂସ୍ମରଣତଃ ସଂତାପଵିଚ୍ଛେଦିନୀ ।
ଆଶ୍ଚର୍ୟଂ ବହୁ ଖେଲନଂ ଵିତନୁତେ ନୈଶ୍ଚଲ୍ୟମାବିଭ୍ରତୀ
କଂପାୟାସ୍ତଟସୀମ୍ନି କାପି ତଟିନୀ କାରୁଣ୍ୟପାଥୋମୟୀ ॥12॥
ଐକ୍ୟଂ ୟେନ ଵିରଚ୍ୟତେ ହରତନୌ ଦଂଭାଵପୁଂଭାଵୁକେ
ରେଖା ୟତ୍କଚସୀମ୍ନି ଶେଖରଦଶାଂ ନୈଶାକରୀ ଗାହତେ ।
ଔନ୍ନତ୍ୟଂ ମୁହୁରେତି ୟେନ ସ ମହାନ୍ମେନାସଖଃ ସାନୁମାନ୍
କଂପାତୀରଵିହାରିଣା ସଶରଣାସ୍ତେନୈଵ ଧାମ୍ନା ଵୟମ୍ ॥13॥
ଅକ୍ଷ୍ଣୋଶ୍ଚ ସ୍ତନୟୋଃ ଶ୍ରିୟା ଶ୍ରଵଣୟୋର୍ବାହ୍ଵୋଶ୍ଚ ମୂଲଂ ସ୍ପୃଶନ୍
ଉତ୍ତଂସେନ ମୁଖେନ ଚ ପ୍ରତିଦିନଂ ଦ୍ରୁହ୍ୟନ୍ପୟୋଜନ୍ମନେ ।
ମାଧୁର୍ୟେଣ ଗିରାଂ ଗତେନ ମୃଦୁନା ହଂସାଂଗନାଂ ହ୍ରେପୟନ୍
କାଂଚୀସୀମ୍ନି ଚକାସ୍ତି କୋଽପି କଵିତାସଂତାନବୀଜାଂକୁରଃ ॥14॥
ଖଂଡଂ ଚାଂଦ୍ରମସଂ ଵତଂସମନିଶଂ କାଂଚୀପୁରେ ଖେଲନଂ
କାଲାୟଶ୍ଛଵିତସ୍କରୀଂ ତନୁରୁଚିଂ କର୍ଣଜପେ ଲୋଚନେ ।
ତାରୁଣ୍ୟୋଷ୍ମନଖଂପଚଂ ସ୍ତନଭରଂ ଜଂଘାସ୍ପୃଶଂ କୁଂତଲଂ
ଭାଗ୍ୟଂ ଦେଶିକସଂଚିତଂ ମମ କଦା ସଂପାଦୟେଦଂବିକେ ॥15॥
ତନ୍ଵାନଂ ନିଜକେଲିସୌଧସରଣିଂ ନୈସର୍ଗିକୀଣାଂ ଗିରାଂ
କେଦାରଂ କଵିମଲ୍ଲସୂକ୍ତିଲହରୀସସ୍ୟଶ୍ରିୟାଂ ଶାଶ୍ଵତମ୍ ।
ଅଂହୋଵଂଚନଚୁଂଚୁ କିଂଚନ ଭଜେ କାଂଚୀପୁରୀମଂଡନଂ
ପର୍ୟାୟଚ୍ଛଵି ପାକଶାସନମଣେଃ ପୌଷ୍ପେଷଵଂ ପୌରୁଷମ୍ ॥16॥
ଆଲୋକେ ମୁଖପଂକଜେ ଚ ଦଧତୀ ସୌଧାକରୀଂ ଚାତୁରୀଂ
ଚୂଡାଲଂକ୍ରିୟମାଣପଂକଜଵନୀଵୈରାଗମପ୍ରକ୍ରିୟା ।
ମୁଗ୍ଧସ୍ମେରମୁଖୀ ଘନ୍ସତନତଟୀମୂର୍ଚ୍ଛାଲମଧ୍ୟାଂଚିତା
କାଂଚୀସୀମନି କାମିନୀ ଵିଜୟତେ କାଚିଜ୍ଜଗନ୍ମୋହିନୀ ॥17॥
ୟସ୍ମିନ୍ନଂବ ଭଵତ୍କଟାକ୍ଷରଜନୀ ମଂଦେଽପି ମଂଦସ୍ମିତ-
ଜ୍ୟୋତ୍ସ୍ନାସଂସ୍ନପିତା ଭଵତ୍ୟଭିମୁଖୀ ତଂ ପ୍ରତ୍ୟହୋ ଦେହିନମ୍ ।
ଦ୍ରକ୍ଷାମାକ୍ଷିକମାଧୁରୀମଦଭରଵ୍ରୀଡାକରୀ ଵୈଖରୀ
କାମାକ୍ଷି ସ୍ଵୟମାତନୋତ୍ୟଭିସୃତିଂ ଵାମେକ୍ଷଣେଵ କ୍ଷଣମ୍ ॥18॥
କାଲିଂଦୀଜଲକାଂତୟଃ ସ୍ମିତରୁଚିସ୍ଵର୍ଵାହିନୀପାଥସି
ପ୍ରୌଢଧ୍ଵାଂତରୁଚଃ ସ୍ଫୁଟାଧରମହୋଲୌହିତ୍ୟସଂଧ୍ୟୋଦୟେ ।
ମଣିକ୍ୟୋପଲକୁଂଡଲାଂଶୁଶିଖିନି ଵ୍ୟାମିଶ୍ରଧୂମଶ୍ରିୟଃ
କଲ୍ୟାଣୈକଭୁଵଃ କଟାକ୍ଷସୁଷମାଃ କାମାକ୍ଷି ରାଜଂତି ତେ ॥19॥
କଲକଲରଣତ୍କାଂଚୀ କାଂଚୀଵିଭୂଷଣମାଲିକା
କଚଭରଲସଚ୍ଚଂଦ୍ରା ଚଂଦ୍ରାଵତଂସସଧର୍ମିଣୀ ।
କଵିକୁଲଗିରଃ ଶ୍ରାଵଂଶ୍ରାଵଂ ମିଲତ୍ପୁଲକାଂକୁରା
ଵିରଚିତଶିରଃକଂପା କଂପାତଟେ ପରିଶୋଭତେ ॥20॥
ସରସଵଚସାଂ ଵୀଚୀ ନୀଚୀଭଵନ୍ମଧୁମାଧୁରୀ
ଭରିତଭୁଵନା କୀର୍ତିର୍ମୂର୍ତିର୍ମନୋଭଵଜିତ୍ଵରୀ ।
ଜନନି ମନସୋ ୟୋଗ୍ୟଂ ଭୋଗ୍ୟଂ ନୃଣାଂ ତଵ ଜାୟତେ
କଥମିଵ ଵିନା କାଂଚୀଭୂଷେ କଟାକ୍ଷତରଂଗିତମ୍ ॥21॥
ଭ୍ରମରିତସରିତ୍କୂଲୋ ନୀଲୋତ୍ପଲପ୍ରଭୟାଽଽଭୟା
ନତଜନତମଃଖଂଡୀ ତୁଂଡୀରସୀମ୍ନି ଵିଜୃଂଭତେ ।
ଅଚଲତପସାମେକଃ ପାକଃ ପ୍ରସୂନଶରାସନ-
ପ୍ରତିଭଟମନୋହାରୀ ନାରୀକୁଲୈକଶିଖାମଣିଃ ॥22॥
ମଧୁରଵଚସୋ ମଂଦସ୍ମେରା ମତଂଗଜଗାମିନଃ
ତରୁଣିମଜୁଷସ୍ତାପିଚ୍ଛାଭାସ୍ତମଃପରିପଂଥିନଃ ।
କୁଚଭରନତାଃ କୁର୍ୟୁର୍ଭଦ୍ରଂ କୁରଂଗଵିଲୋଚନାଃ
କଲିତକରୁଣାଃ କାଂଚୀଭାଜଃ କପାଲିମହୋତ୍ସଵାଃ ॥23॥
କମଲସୁଷମାକ୍ଷ୍ୟାରୋହେ ଵିଚକ୍ଷଣଵୀକ୍ଷଣାଃ
କୁମୁଦସୁକୃତକ୍ରୀଡାଚୂଡାଲକୁଂତଲବଂଧୁରାଃ ।
ରୁଚିରରୁଚିଭିସ୍ତାପିଚ୍ଛଶ୍ରୀପ୍ରପଂଚନଚୁଂଚଵଃ
ପୁରଵିଜୟିନଃ କଂପାତୀରେ ସ୍ଫୁରଂତି ମନୋରଥାଃ ॥24॥
କଲିତରତୟଃ କାଂଚୀଲୀଲାଵିଧୌ କଵିମଂଡଲୀ-
ଵଚନଲହରୀଵାସଂତୀନାଂ ଵସଂତଵିଭୂତୟଃ ।
କୁଶଲଵିଧୟେ ଭୂୟାସୁର୍ମେ କୁରଂଗଵିଲୋଚନାଃ
କୁସୁମଵିଶିଖାରାତେରକ୍ଷ୍ଣାଂ କୁତୂହଲଵିଭ୍ରମାଃ ॥25॥
କବଲିତତମସ୍କାଂଡାସ୍ତୁଂଡୀରମଂଡଲମଂଡନାଃ
ସରସିଜଵନୀସଂତାନାନାମରୁଂତୁଦଶେଖରାଃ ।
ନୟନସରଣେର୍ନେଦୀୟଂସଃ କଦା ନୁ ଭଵଂତି ମେ
ତରୁଣଜଲଦଶ୍ୟାମାଃ ଶଂଭୋସ୍ତପଃଫଲଵିଭ୍ରମାଃ ॥26॥
ଅଚରମମିଷୁଂ ଦୀନଂ ମୀନଧ୍ଵଜସ୍ୟ ମୁଖଶ୍ରିୟା
ସରସିଜଭୁଵୋ ୟାନଂ ମ୍ଲାନଂ ଗତେନ ଚ ମଂଜୁନା ।
ତ୍ରିଦଶସଦସାମନ୍ନଂ ଖିନ୍ନଂ ଗିରା ଚ ଵିତନ୍ଵତୀ
ତିଲକୟତି ସା କଂପାତୀରଂ ତ୍ରିଲୋଚନସୁଂଦରୀ ॥27॥
ଜନନି ଭୁଵନେ ଚଂକ୍ରମ୍ୟେଽହଂ କିୟଂତମନେହସଂ
କୁପୁରୁଷକରଭ୍ରଷ୍ଟୈର୍ଦୁଷ୍ଟୈର୍ଧନୈରୁଦରଂଭରିଃ ।
ତରୁଣକରୁଣେ ତଂଦ୍ରାଶୂନ୍ୟେ ତରଂଗୟ ଲୋଚନେ
ନମତି ମୟି ତେ କିଂଚିତ୍କାଂଚୀପୁରୀମଣିଦୀପିକେ ॥28॥
ମୁନିଜନମନଃପେଟୀରତ୍ନଂ ସ୍ଫୁରତ୍କରୁଣାନଟୀ-
ଵିହରଣକଲାଗେହଂ କାଂଚୀପୁରୀମଣିଭୂଷଣମ୍ ।
ଜଗତି ମହତୋ ମୋହଵ୍ୟାଧେର୍ନୃଣାଂ ପରମୌଷଧଂ
ପୁରହରଦୃଶାଂ ସାଫଲ୍ୟଂ ମେ ପୁରଃ ପରିଜୃଂଭତାମ୍ ॥29॥
ମୁନିଜନମୋଧାମ୍ନେ ଧାମ୍ନେ ଵଚୋମୟଜାହ୍ନଵୀ-
ହିମଗିରିତଟପ୍ରାଗ୍ଭାରାୟାକ୍ଷରାୟ ପରାତ୍ମନେ ।
ଵିହରଣଜୁଷେ କାଂଚୀଦେଶେ ମହେଶ୍ଵରଲୋଚନ-
ତ୍ରିତୟସରସକ୍ରୀଡାସୌଧାଂଗଣାୟ ନମୋ ନମଃ ॥30॥
ମରକତରୁଚାଂ ପ୍ରତ୍ୟାଦେଶଂ ମହେଶ୍ଵରଚକ୍ଷୁଷାମ୍
ଅମୃତଲହରୀପୂରଂ ପାରଂ ଭଵାଖ୍ୟପୟୋନିଧେଃ ।
ସୁଚରିତଫଲଂ କାଂଚୀଭାଜୋ ଜନସ୍ୟ ପଚେଲିମଂ
ହିମଶିଖରିଣୋ ଵଂଶସ୍ୟୈକଂ ଵତଂସମୁପାସ୍ମହେ ॥31॥
ପ୍ରଣମନଦିନାରଂଭେ କଂପାନଦୀସଖି ତାଵକେ
ସରସକଵିତୋନ୍ମେଷଃ ପୂଷା ସତାଂ ସମୁଦଂଚିତଃ ।
ପ୍ରତିଭଟମହାପ୍ରୌଢପ୍ରୋଦ୍ୟତ୍କଵିତ୍ଵକୁମୁଦ୍ଵତୀଂ
ନୟତି ତରସା ନିଦ୍ରାମୁଦ୍ରାଂ ନଗେଶ୍ଵରକନ୍ୟକେ ॥32॥
ଶମିତଜଡିମାରଂଭା କଂପାତଟୀନିକଟେଚରୀ
ନିହତଦୁରିତସ୍ତୋମା ସୋମାର୍ଧମୁଦ୍ରିତକୁଂତଲା ।
ଫଲିତସୁମନୋଵାଂଛା ପାଂଚାୟୁଧୀ ପରଦେଵତା
ସଫଲୟତୁ ମେ ନେତ୍ରେ ଗୋତ୍ରେଶ୍ଵରପ୍ରିୟନଂଦିନୀ ॥33॥
ମମ ତୁ ଧିଷଣା ପୀଡ୍ୟା ଜାଡ୍ୟାତିରେକ କଥଂ ତ୍ଵୟା
କୁମୁଦସୁଷମାମୈତ୍ରୀପାତ୍ରୀଵତଂସିତକୁଂତଲାମ୍ ।
ଜଗତି ଶମିତସ୍ତଂଭାଂ କଂପାନଦୀନିଲୟାମସୌ
ଶ୍ରିୟତି ହି ଗଲତ୍ତଂଦ୍ରା ଚଂଦ୍ରାଵତଂସସଧର୍ମିଣୀମ୍ ॥34॥
ପରିମଲପରୀପାକୋଦ୍ରେକଂ ପୟୋମୁଚି କାଂଚନେ
ଶିଖରିଣି ପୁନର୍ଦ୍ବୈଧୀଭାଵଂ ଶଶିନ୍ୟରୁଣାତପମ୍ ।
ଅପି ଚ ଜନୟନ୍କଂବୋର୍ଲକ୍ଷ୍ମୀମନଂବୁନି କୋଽପ୍ୟସୌ
କୁସୁମଧନୁଷଃ କାଂଚୀଦେଶେ ଚକାସ୍ତି ପରାକ୍ରମଃ ॥35॥
ପୁରଦମୟିତୁର୍ଵାମୋତ୍ସଂଗସ୍ଥଲେନ ରସଜ୍ଞୟା
ସରସକଵିତାଭାଜା କାଂଚୀପୁରୋଦରସୀମୟା ।
ତଟପରିସରୈର୍ନୀହାରାଦ୍ରେର୍ଵଚୋଭିରକୃତ୍ରିମୈଃ
କିମିଵ ନ ତୁଲାମସ୍ମଚ୍ଚେତୋ ମହେଶ୍ଵରି ଗାହତେ ॥36॥
ନୟନୟୁଗଲୀମାସ୍ମାକୀନାଂ କଦା ନୁ ଫଲେଗ୍ରହୀଂ
ଵିଦଧତି ଗତୌ ଵ୍ୟାକୁର୍ଵାଣା ଗଜେଂଦ୍ରଚମତ୍କ୍ରିୟାମ୍ ।
ମରତକରୁଚୋ ମାହେଶାନା ଘନସ୍ତନନମ୍ରିତାଃ
ସୁକୃତଵିଭଵାଃ ପ୍ରାଂଚଃ କାଂଚୀଵତଂସଧୁରଂଧରାଃ ॥37॥
ମନସିଜୟଶଃପାରଂପର୍ୟଂ ମରଂଦଝରୀସୁଵାଂ
କଵିକୁଲଗିରାଂ କଂଦଂ କଂପାନଦୀତଟମଂଡନମ୍ ।
ମଧୁରଲଲିତଂ ମତ୍କଂ ଚକ୍ଷୁର୍ମନୀଷିମନୋହରଂ
ପୁରଵିଜୟିନଃ ସର୍ଵସ୍ଵଂ ତତ୍ପୁରସ୍କୁରୁତେ କଦା ॥38॥
ଶିଥିଲିତତମୋଲୀଲାଂ ନୀଲାରଵିଂଦଵିଲୋଚନାଂ
ଦହନଵିଲସତ୍ଫାଲାଂ ଶ୍ରୀକାମକୋଟିମୁପାସ୍ମହେ ।
କରଧୃତସଚ୍ଛୂଲାଂ କାଲାରିଚିତ୍ତହରାଂ ପରାଂ
ମନସିଜକୃପାଲୀଲାଂ ଲୋଲାଲକାମଲିକେକ୍ଷଣାମ୍ ॥39॥
କଲାଲୀଲାଶାଲା କଵିକୁଲଵଚଃକୈରଵଵନୀ-
ଶରଜ୍ଜ୍ୟୋତ୍ସ୍ନାଧାରା ଶଶଧରଶିଶୁଶ୍ଲାଘ୍ୟମୁକୁଟୀ ।
ପୁନୀତେ ନଃ କଂପାପୁଲିନତଟସୌହାର୍ଦତରଲା
କଦା ଚକ୍ଷୁର୍ମାର୍ଗଂ କନକଗିରିଧାନୁଷ୍କମହିଷୀ ॥40॥
ନମଃ ସ୍ତାନ୍ନମ୍ରେଭ୍ୟଃ ସ୍ତନଗରିମଗର୍ଵେଣ ଗୁରୁଣା
ଦଧାନେଭ୍ୟଶ୍ଚୂଡାଭରଣମମୃତସ୍ୟଂଦି ଶିଶିରମ୍ ।
ସଦା ଵାସ୍ତଵେଭ୍ୟଃ ସୁଵିଧଭୁଵି କଂପାଖ୍ୟସରିତେ
ୟଶୋଵ୍ୟାପାରେଭ୍ୟଃ ସୁକୃତଵିଭଵେଭ୍ୟୋ ରତିପତେଃ ॥41॥
ଅସୂୟଂତୀ କାଚିନ୍ମରକତରୁଚୋ ନାକିମୁକୁଟୀ-
କଦଂବଂ ଚୁଂବଂତୀ ଚରଣନଖଚଂଦ୍ରାଂଶୁପଟଲୈଃ ।
ତମୋମୁଦ୍ରାଂ ଵିଦ୍ରାଵୟତୁ ମମ କାଂଚୀର୍ନିଲୟନା
ହରୋତ୍ସଂଗଶ୍ରୀମନ୍ମଣିଗୃହମହାଦୀପକଲିକା ॥42॥
ଅନାଦ୍ୟଂତା କାଚିତ୍ସୁଜନନୟନାନଂଦଜନନୀ
ନିରୁଂଧାନା କାଂତିଂ ନିଜରୁଚିଵିଲାସୈର୍ଜଲମୁଚାମ୍ ।
ସ୍ମରାରେସ୍ତାରଲ୍ୟଂ ମନସି ଜନୟଂତୀ ସ୍ଵୟମହୋ
ଗଲତ୍କଂପା ଶଂପା ପରିଲସତି କଂପାପରିସରେ ॥43॥
ସୁଧାଡିଂଡୀରଶ୍ରୀଃ ସ୍ମିତରୁଚିଷୁ ତୁଂଡୀରଵିଷୟଂ
ପରିଷ୍କୁର୍ଵାଣାସୌ ପରିହସିତନୀଲୋତ୍ପଲରୁଚିଃ ।
ସ୍ତନାଭ୍ୟାମାନମ୍ରା ସ୍ତବକୟତୁ ମେ କାଂକ୍ଷିତତରୁଂ
ଦୃଶାମୈଶାନୀନାଂ ସୁକୃତଫଲପାଂଡିତ୍ୟଗରିମା ॥44॥
କୃପାଧାରାଦ୍ରୋଣୀ କୃପଣଧିଷଣାନାଂ ପ୍ରଣମତାଂ
ନିହଂତ୍ରୀ ସଂତାପଂ ନିଗମମୁକୁଟୋତ୍ତଂସକଲିକା ।
ପରା କାଂଚୀଲୀଲାପରିଚୟଵତୀ ପର୍ଵତସୁତା
ଗିରାଂ ନୀଵୀ ଦେଵୀ ଗିରିଶପରତଂତ୍ରା ଵିଜୟତେ ॥45॥
କଵିତ୍ଵଶ୍ରୀକଂଦଃ ସୁକୃତପରିପାଟୀ ହିମଗିରେଃ
ଵିଧାତ୍ରୀ ଵିଶ୍ଵେଷାଂ ଵିଷମଶରଵୀରଧ୍ଵଜପଟୀ ।
ସଖୀ କଂପାନଦ୍ୟାଃ ପଦହସିତପାଥୋଜୟୁଗଲୀ
ପୁରାଣୋ ପାୟାନ୍ନଃ ପୁରମଥନସାମ୍ରାଜ୍ୟପଦଵୀ ॥46॥
ଦରିଦ୍ରାଣା ମଧ୍ୟେ ଦରଦଲିତତାପିଚ୍ଛସୁଷମାଃ
ସ୍ତନାଭୋଗକ୍କାଂତାସ୍ତରୁଣହରିଣାଂକାଂକିତକଚାଃ ।
ହରାଧୀନା ନାନାଵିବୁଧମୁକୁଟୀଚୁଂବିତପଦାଃ
କଦା କଂପାତୀରେ କଥୟ ଵିହରାମୋ ଗିରିସୁତେ ॥47॥
ଵରୀଵର୍ତୁ ସ୍ଥେମା ତ୍ଵୟି ମମ ଗିରାଂ ଦେଵି ମନସୋ
ନରୀନର୍ତୁ ପ୍ରୌଢା ଵଦନକମଲେ ଵାକ୍ୟଲହରୀ ।
ଚରୀଚର୍ତୁ ପ୍ରଜ୍ଞାଜନନି ଜଡିମାନଃ ପରଜନେ
ସରୀସର୍ତୁ ସ୍ଵୈରଂ ଜନନି ମୟି କାମାକ୍ଷି କରୁଣା ॥48॥
କ୍ଷଣାତ୍ତେ କାମାକ୍ଷି ଭ୍ରମରସୁଷମାଶିକ୍ଷଣଗୁରୁଃ
କଟାକ୍ଷଵ୍ୟାକ୍ଷେପୋ ମମ ଭଵତୁ ମୋକ୍ଷାୟ ଵିପଦାମ୍ ।
ନରୀନର୍ତୁ ସ୍ଵୈରଂ ଵଚନଲହରୀ ନିର୍ଜରପୁରୀ-
ସରିଦ୍ଵୀଚୀନୀଚୀକରଣପଟୁରାସ୍ୟେ ମମ ସଦା ॥49॥
ପୁରସ୍ତାନ୍ମେ ଭୂୟଃପ୍ରଶମନପରଃ ସ୍ତାନ୍ମମ ରୁଜାଂ
ପ୍ରଚାରସ୍ତେ କଂପାତଟଵିହୃତିସଂପାଦିନି ଦୃଶୋଃ ।
ଇମାଂ ୟାଚ୍ଞାମୂରୀକୁରୁ ସପଦି ଦୂରୀକୁରୁ ତମଃ-
ପରୀପାକଂ ମତ୍କଂ ସପଦି ବୁଧଲୋକଂ ଚ ନୟ ମାମ୍ ॥50॥
ଉଦଂଚଂତୀ କାଂଚୀନଗରନିଲୟେ ତ୍ଵତ୍କରୁଣୟା
ସମୃଦ୍ଧା ଵାଗ୍ଧାଟୀ ପରିହସିତମାଧ୍ଵୀ କଵୟତାମ୍ ।
ଉପାଦତ୍ତେ ମାରପ୍ରତିଭଟଜଟାଜୂଟମୁକୁଟୀ-
କୁଟୀରୋଲ୍ଲାସିନ୍ୟାଃ ଶତମଖତଟିନ୍ୟା ଜୟପଟୀମ୍ ॥51॥
ଶ୍ରିୟଂ ଵିଦ୍ୟାଂ ଦଦ୍ୟାଜ୍ଜନନି ନମତାଂ କୀର୍ତିମମିତାଂ
ସୁପୁତ୍ରାନ୍ ପ୍ରାଦତ୍ତେ ତଵ ଝଟିତି କାମାକ୍ଷି କରୁଣା ।
ତ୍ରିଲୋକ୍ୟାମାଧିକ୍ୟଂ ତ୍ରିପୁରପରିପଂଥିପ୍ରଣୟିନି
ପ୍ରଣାମସ୍ତ୍ଵତ୍ପାଦେ ଶମିତଦୁରିତେ କିଂ ନ କୁରୁତେ ॥52॥
ମନଃସ୍ତଂଭଂ ସ୍ତଂଭଂ ଗମୟଦୁପକଂପଂ ପ୍ରଣମତାଂ
ସଦା ଲୋଲଂ ନୀଲଂ ଚିକୁରଜିତଲୋଲଂବନିକରମ୍ ।
ଗିରାଂ ଦୂରଂ ସ୍ମେରଂ ଧୃତଶଶିକିଶୋରଂ ପଶୁପତେଃ
ଦୃଶାଂ ୟୋଗ୍ୟଂ ଭୋଗ୍ୟଂ ତୁହିନଗିରିଭାଗ୍ୟଂ ଵିଜୟତେ ॥53॥
ଘନଶ୍ୟାମାନ୍କାମାଂତକମହିଷି କାମାକ୍ଷି ମଧୁରାନ୍
ଦୃଶାଂ ପାତାନେତାନମୃତଜଲଶୀତାନନୁପମାନ୍ ।
ଭଵୋତ୍ପାତେ ଭୀତେ ମୟି ଵିତର ନାଥେ ଦୃଢଭଵ-
ନ୍ମନଶ୍ଶୋକେ ମୂକେ ହିମଗିରିପତାକେ କରୁଣୟା ॥54॥
ନତାନାଂ ମଂଦାନାଂ ଭଵନିଗଲବଂଧାକୁଲଧିୟାଂ
ମହାଂଧ୍ୟାଂ ରୁଂଧାନାମଭିଲଷିତସଂତାନଲତିକାମ୍ ।
ଚରଂତୀଂ କଂପାୟାସ୍ତଟଭୁଵି ସଵିତ୍ରୀଂ ତ୍ରିଜଗତାଂ
ସ୍ମରାମସ୍ତାଂ ନିତ୍ୟଂ ସ୍ମରମଥନଜୀଵାତୁକଲିକାମ୍ ॥55॥
ପରା ଵିଦ୍ୟା ହୃଦ୍ୟାଶ୍ରିତମଦନଵିଦ୍ୟା ମରକତ-
ପ୍ରଭାନୀଲା ଲୀଲାପରଵଶିତଶୂଲାୟୁଧମନାଃ ।
ତମଃପୂରଂ ଦୂରଂ ଚରଣନତପୌରଂଦରପୁରୀ-
ମୃଗାକ୍ଷୀ କାମାକ୍ଷୀ କମଲତରଲାକ୍ଷୀ ନୟତୁ ମେ ॥56॥
ଅହଂତାଖ୍ୟା ମତ୍କଂ କବଲୟତି ହା ହଂତ ହରିଣୀ
ହଠାତ୍ସଂଵିଦ୍ରୂପଂ ହରମହିଷି ସସ୍ୟାଂକୁରମସୌ ।
କଟାକ୍ଷଵ୍ୟାକ୍ଷେପପ୍ରକଟହରିପାଷାଣପଟଲୈଃ
ଇମାମୁଚ୍ଚୈରୁଚ୍ଚାଟୟ ଝଟିତି କାମାକ୍ଷି କୃପୟା ॥57॥
ବୁଧେ ଵା ମୂକେ ଵା ତଵ ପତତି ୟସ୍ମିନ୍କ୍ଷଣମସୌ
କଟାକ୍ଷଃ କାମାକ୍ଷି ପ୍ରକଟଜଡିମକ୍ଷୋଦପଟିମା ।
କଥଂକାରଂ ନାସ୍ମୈ କରମୁକୁଲଚୂଡାଲମୁକୁଟା
ନମୋଵାକଂ ବ୍ରୂୟୁର୍ନମୁଚିପରିପଂଥିପ୍ରଭୃତୟଃ ॥58॥
ପ୍ରତୀଚୀଂ ପଶ୍ୟାମଃ ପ୍ରକଟରୁଚିନୀଵାରକମଣି-
ପ୍ରଭାସଧ୍ରୀଚୀନାଂ ପ୍ରଦଲିତଷଡାଧାରକମଲାମ୍ ।
ଚରଂତୀଂ ସୌଷୁମ୍ନେ ପଥି ପରପଦେଂଦୁପ୍ରଵିଗଲ-
ତ୍ସୁଧାର୍ଦ୍ରାଂ କାମାକ୍ଷୀଂ ପରିଣତପରଂଜ୍ୟୋତିରୁଦୟାମ୍ ॥59॥
ଜଂଭାରାତିପ୍ରଭୃତିମୁକୁଟୀଃ ପାଦୟୋଃ ପୀଠୟଂତୀ
ଗୁଂଫାନ୍ଵାଚାଂ କଵିଜନକୃତାନ୍ସ୍ଵୈରମାରାମୟଂତୀ ।
ଶଂପାଲକ୍ଷ୍ମୀଂ ମଣିଗଣରୁଚାପାଟଲୈଃ ପ୍ରାପୟଂତୀ
କଂପାତୀରେ କଵିପରିଷଦାଂ ଜୃଂଭତେ ଭାଗ୍ୟସୀମା ॥60॥
ଚଂଦ୍ରାପୀଡାଂ ଚତୁରଵଦନାଂ ଚଂଚଲାପାଂଗଲୀଲାଂ
କୁଂଦସ୍ମେରାଂ କୁଚଭରନତାଂ କୁଂତଲୋଦ୍ଧୂତଭୃଂଗାମ୍ ।
ମାରାରାତେର୍ମଦନଶିଖିନଂ ମାଂସଲଂ ଦୀପୟଂତୀଂ
କାମାକ୍ଷୀଂ ତାଂ କଵିକୁଲଗିରାଂ କଲ୍ପଵଲ୍ଲୀମୁପାସେ ॥61॥
କାଲାଂଭୋଦପ୍ରକରସୁଷମାଂ କାଂତିଭିସ୍ତିର୍ଜୟଂତୀ
କଲ୍ୟାଣାନାମୁଦୟସରଣିଃ କଲ୍ପଵଲ୍ଲୀ କଵୀନାମ୍ ।
କଂଦର୍ପାରେଃ ପ୍ରିୟସହଚରୀ କଲ୍ମଷାଣାଂ ନିହଂତ୍ରୀ
କାଂଚୀଦେଶଂ ତିଲକୟତି ସା କାପି କାରୁଣ୍ୟସୀମା ॥62॥
ଊରୀକୁର୍ଵନ୍ନୁରସିଜତଟେ ଚାତୁରୀଂ ଭୂଧରାଣାଂ
ପାଥୋଜାନାଂ ନୟନୟୁଗଲେ ପରିପଂଥ୍ୟଂ ଵିତନ୍ଵନ୍ ।
କଂପାତୀରେ ଵିହରତି ରୁଚା ମୋଘୟନ୍ମେଘଶୈଲୀଂ
କୋକଦ୍ଵେଷଂ ଶିରସି କଲୟନ୍କୋଽପି ଵିଦ୍ୟାଵିଶେଷଃ ॥63॥
କାଂଚୀଲୀଲାପରିଚୟଵତୀ କାପି ତାପିଚ୍ଛଲକ୍ଷ୍ମୀଃ
ଜାଡ୍ୟାରଣ୍ୟେ ହୁତଵହଶିଖା ଜନ୍ମଭୂମିଃ କୃପାୟାଃ ।
ମାକଂଦଶ୍ରୀର୍ମଧୁରକଵିତାଚାତୁରୀ କୋକିଲାନାଂ
ମାର୍ଗେ ଭୂୟାନ୍ମମ ନୟନୟୋର୍ମାନ୍ମଥୀ କାପି ଵିଦ୍ୟା ॥64॥
ସେତୁର୍ମାତର୍ମରତକମୟୋ ଭକ୍ତିଭାଜାଂ ଭଵାବ୍ଧୌ
ଲୀଲାଲୋଲା କୁଵଲୟମୟୀ ମାନ୍ମଥୀ ଵୈଜୟଂତୀ ।
କାଂଚୀଭୂଷା ପଶୁପତିଦୃଶାଂ କାପି କାଲାଂଜନାଲୀ
ମତ୍କଂ ଦୁଃଖଂ ଶିଥିଲୟତୁ ତେ ମଂଜୁଲାପାଂଗମାଲା ॥65॥
ଵ୍ୟାଵୃଣ୍ଵାନାଃ କୁଵଲୟଦଲପ୍ରକ୍ରିୟାଵୈରମୁଦ୍ରାଂ
ଵ୍ୟାକୁର୍ଵାଣା ମନସିଜମହାରାଜସାମ୍ରାଜ୍ୟଲକ୍ଷ୍ମୀମ୍ ।
କାଂଚୀଲୀଲାଵିହୃତିରସିକେ କାଂକ୍ଷିତଂ ନଃ କ୍ରିୟାସୁଃ
ବଂଧଚ୍ଛେଦେ ତଵ ନିୟମିନାଂ ବଦ୍ଧଦୀକ୍ଷାଃ କଟାକ୍ଷାଃ ॥66॥
କାଲାଂଭୋଦେ ଶଶିରୁଚି ଦଲଂ କୈତକଂ ଦର୍ଶୟଂତୀ
ମଧ୍ୟେସୌଦାମିନି ମଧୁଲିହାଂ ମାଲିକାଂ ରାଜୟଂତୀ ।
ହଂସାରାଵଂ ଵିକଚକମଲେ ମଂଜୁମୁଲ୍ଲାସୟଂତୀ
କଂପାତୀରେ ଵିଲସତି ନଵା କାପି କାରୁଣ୍ୟଲକ୍ଷ୍ମୀଃ ॥67॥
ଚିତ୍ରଂ ଚିତ୍ରଂ ନିଜମୃଦୁତୟା ଭର୍ତ୍ସୟନ୍ପଲ୍ଲଵାଲୀଂ
ପୁଂସାଂ କାମାନ୍ଭୁଵି ଚ ନିୟତଂ ପୂରୟନ୍ପୁଣ୍ୟଭାଜାମ୍ ।
ଜାତଃ ଶୈଲାନ୍ନ ତୁ ଜଲନିଧେଃ ସ୍ଵୈରସଂଚାରଶୀଲଃ
କାଂଚୀଭୂଷା କଲୟତୁ ଶିଵଂ କୋଽପି ଚିଂତାମଣିର୍ମେ ॥68॥
ତାମ୍ରାଂଭୋଜଂ ଜଲଦନିକଟେ ତତ୍ର ବଂଧୂକପୁଷ୍ପଂ
ତସ୍ମିନ୍ମଲ୍ଲୀକୁସୁମସୁଷମାଂ ତତ୍ର ଵୀଣାନିନାଦମ୍ ।
ଵ୍ୟାଵୃନ୍ଵାନା ସୁକୃତଲହରୀ କାପି କାଂଚିନଗର୍ୟାମ୍
ଐଶାନୀ ସା କଲୟତିତରାମୈଂଦ୍ରଜାଲଂ ଵିଲାସମ୍ ॥69॥
ଆହାରାଂଶଂ ତ୍ରିଦଶସଦସାମାଶ୍ରୟେ ଚାତକାନାମ୍
ଆକାଶୋପର୍ୟପି ଚ କଲୟନ୍ନାଲୟଂ ତୁଂଗମେଷାମ୍ ।
କଂପାତୀରେ ଵିହରତିତରାଂ କାମଧେନୁଃ କଵୀନାଂ
ମଂଦସ୍ମେରୋ ମଦନନିଗମପ୍ରକ୍ରିୟାସଂପ୍ରଦାୟଃ ॥70॥
ଆର୍ଦ୍ରୀଭୂତୈରଵିରଲକୃପୈରାତ୍ତଲୀଲାଵିଲାସୈଃ
ଆସ୍ଥାପୂର୍ଣୈରଧିକଚପଲୈରଂଚିତାଂଭୋଜଶିଲ୍ପୈଃ ।
କାଂତୈର୍ଲକ୍ଷ୍ମୀଲଲିତଭଵନୈଃ କାଂତିକୈଵଲ୍ୟସାରୈଃ
କାଶ୍ମଲ୍ୟଂ ନଃ କବଲୟତୁ ସା କାମକୋଟୀ କଟାକ୍ଷୈଃ ॥71॥
ଆଧୂନ୍ଵଂତ୍ୟୈ ତରଲନୟନୈରାଂଗଜୀଂ ଵୈଜୟଂତୀମ୍
ଆନଂଦିନ୍ୟୈ ନିଜପଦଜୁଷାମାତ୍ତକାଂଚୀପୁରାୟୈ ।
ଆସ୍ମାକୀନଂ ହୃଦୟମଖିଲୈରାଗମାନାଂ ପ୍ରପଂଚୈଃ
ଆରାଧ୍ୟାୟୈ ସ୍ପୃହୟତିତରାମଦିମାୟୈ ଜନନ୍ୟୈ ॥72॥
ଦୂରଂ ଵାଚାଂ ତ୍ରିଦଶସଦସାଂ ଦୁଃଖସିଂଧୋସ୍ତରିତ୍ରଂ
ମୋହକ୍ଷ୍ଵେଲକ୍ଷିତିରୁହଵନେ କ୍ରୂରଧାରଂ କୁଠାରମ୍ ।
କଂପାତୀରପ୍ରଣୟି କଵିଭିର୍ଵର୍ଣିତୋଦ୍ୟଚ୍ଚରିତ୍ରଂ
ଶାଂତ୍ୟୈ ସେଵେ ସକଲଵିପଦାଂ ଶାଂକରଂ ତତ୍କଲତ୍ରମ୍ ॥73॥
ଖଂଡୀକୃତ୍ୟ ପ୍ରକୃତିକୁଟିଲଂ କଲ୍ମଷଂ ପ୍ରାତିଭଶ୍ରୀ-
ଶୁଂଡୀରତ୍ଵଂ ନିଜପଦଜୁଷାଂ ଶୂନ୍ୟତଂଦ୍ରଂ ଦିଶଂତୀ ।
ତୁଂଡୀରାଖ୍ୟୈ ମହତି ଵିଷୟେ ସ୍ଵର୍ଣଵୃଷ୍ଟିପ୍ରଦାତ୍ରୀ
ଚଂଡୀ ଦେଵୀ କଲୟତି ରତିଂ ଚଂଦ୍ରଚୂଡାଲଚୂଡେ ॥74॥
ୟେନ ଖ୍ୟାତୋ ଭଵତି ସ ଗୃହୀ ପୂରୁଷୋ ମେରୁଧନ୍ଵା
ୟଦ୍ଦୃକ୍କୋଣେ ମଦନନିଗମପ୍ରାଭଵଂ ବୋଭଵୀତି ।
ୟତ୍ପ୍ରୀତ୍ୟୈଵ ତ୍ରିଜଗଦଧିପୋ ଜୃଂଭତେ କିଂପଚାନଃ
କଂପାତୀରେ ସ ଜୟତି ମହାନ୍କଶ୍ଚିଦୋଜୋଵିଶେଷଃ ॥75॥
ଧନ୍ୟା ଧନ୍ୟା ଗତିରିହ ଗିରାଂ ଦେଵି କାମାକ୍ଷି ୟନ୍ମେ
ନିଂଦ୍ୟାଂ ଭିଂଦ୍ୟାତ୍ସପଦି ଜଡତାଂ କଲ୍ମଷାଦୁନ୍ମିଷଂତୀମ୍ ।
ସାଧ୍ଵୀ ମାଧ୍ଵୀରସମଧୁରତାଭଂଜିନୀ ମଂଜୁରୀତିଃ
ଵାଣୀଵେଣୀ ଝଟିତି ଵୃଣୁତାତ୍ସ୍ଵର୍ଧୁନୀସ୍ପର୍ଧିନୀ ମାମ୍ ॥76॥
ୟସ୍ୟା ଵାଟୀ ହୃଦୟକମଲଂ କୌସୁମୀ ୟୋଗଭାଜାଂ
ୟସ୍ୟାଃ ପୀଠୀ ସତତଶିଶିରା ଶୀକରୈର୍ମାକରଂଦୈଃ ।
ୟସ୍ୟାଃ ପେଟୀ ଶ୍ରୁତିପରିଚଲନ୍ମୌଲିରତ୍ନସ୍ୟ କାଂଚୀ
ସା ମେ ସୋମାଭରଣମହିଷୀ ସାଧୟେତ୍କାଂକ୍ଷିତାନି ॥77॥
ଏକା ମାତା ସକଲଜଗତାମୀୟୁଷୀ ଧ୍ୟାନମୁଦ୍ରାମ୍
ଏକାମ୍ରାଧୀଶ୍ଵରଚରଣୟୋରେକତାନାଂ ସମିଂଧେ ।
ତାଟଂକୋଦ୍ୟନ୍ମଣିଗଣରୁଚା ତାମ୍ରକର୍ଣପ୍ରଦେଶା
ତାରୁଣ୍ୟଶ୍ରୀସ୍ତବକିତତନୁସ୍ତାପସୀ କାପି ବାଲା ॥78॥
ଦଂତାଦଂତିପ୍ରକଟନକରୀ ଦଂତିଭିର୍ମଂଦୟାନୈଃ
ମଂଦାରାଣାଂ ମଦପରିଣତିଂ ମଥ୍ନତୀ ମଂଦହାସୈଃ ।
ଅଂକୂରାଭ୍ୟାଂ ମନସିଜତରୋରଂକିତୋରାଃ କୁଚାଭ୍ୟା-
ମଂତଃକାଂଚି ସ୍ଫୁରତି ଜଗତାମାଦିମା କାପି ମାତା ॥79॥
ତ୍ରିୟଂବକକୁଟୁଂବିନୀଂ ତ୍ରିପୁରସୁଂଦରୀମିଂଦିରାଂ
ପୁଲିଂଦପତିସୁଂଦରୀଂ ତ୍ରିପୁରଭୈରଵୀଂ ଭାରତୀମ୍ ।
ମତଂଗକୁଲନାୟିକାଂ ମହିଷମର୍ଦନୀଂ ମାତୃକାଂ
ଭଣଂତି ଵିବୁଧୋତ୍ତମା ଵିହୃତିମେଵ କାମାକ୍ଷି ତେ ॥80॥
ମହାମୁନିମନୋନଟୀ ମହିତରମ୍ୟକଂପାତଟୀ-
କୁଟୀରକଵିହାରିଣୀ କୁଟିଲବୋଧସଂହାରିଣୀ ।
ସଦା ଭଵତୁ କାମିନୀ ସକଲଦେହିନାଂ ସ୍ଵାମିନୀ
କୃପାତିଶୟକିଂକରୀ ମମ ଵିଭୂତୟେ ଶାଂକରୀ ॥81॥
ଜଡାଃ ପ୍ରକୃତିନିର୍ଧନା ଜନଵିଲୋଚନାରୁଂତୁଦା
ନରା ଜନନି ଵୀକ୍ଷଣଂ କ୍ଷଣମଵାପ୍ୟ କାମାକ୍ଷି ତେ ।
ଵଚସ୍ସୁ ମଧୁମାଧୁରୀଂ ପ୍ରକଟୟଂତି ପୌରଂଦରୀ-
ଵିଭୂତିଷୁ ଵିଡଂବନାଂ ଵପୁଷି ମାନ୍ମଥୀଂ ପ୍ରକ୍ରିୟାମ୍ ॥82॥
ଘନ୍ସତନତଟସ୍ଫୁଟସ୍ଫୁରିତକଂଚୁଲୀଚଂଚଲୀ-
କୃତତ୍ରିପୁରଶାସନା ସୁଜନଶୀଲିତୋପାସନା ।
ଦୃଶୋଃ ସରଣିମଶ୍ନୁତେ ମମ କଦା ନୁ କାଂଚୀପୁରେ
ପରା ପରମୟୋଗିନାଂ ମନସି ଚିତ୍କୁଲା ପୁଷ୍କଲା ॥83॥
କଵୀଂଦ୍ରହୃଦୟେଚରୀ ପରିଗୃହୀତକାଂଚୀପୁରୀ
ନିରୂଢକରୁଣାଝରୀ ନିଖିଲଲୋକରକ୍ଷାକରୀ ।
ମନଃପଥଦଵୀୟସୀ ମଦନଶାସନପ୍ରେୟସୀ
ମହାଗୁଣଗରୀୟସୀ ମମ ଦୃଶୋଽସ୍ତୁ ନେଦୀୟସୀ ॥84॥
ଧନେନ ନ ରମାମହେ ଖଲଜନାନ୍ନ ସେଵାମହେ
ନ ଚାପଲମୟାମହେ ଭଵଭୟାନ୍ନ ଦୂୟାମହେ ।
ସ୍ଥିରାଂ ତନୁମହେତରାଂ ମନସି କିଂ ଚ କାଂଚୀରତ-
ସ୍ମରାଂତକକୁଟୁଂବିନୀଚରଣପଲ୍ଲଵୋପାସନାମ୍ ॥85॥
ସୁରାଃ ପରିଜନା ଵପୁର୍ମନସିଜାୟ ଵୈରାୟତେ
ତ୍ରିଵିଷ୍ଟପନିତଂବିନୀକୁଚତଟୀ ଚ କେଲୀଗିରିଃ ।
ଗିରଃ ସୁରଭୟୋ ଵୟସ୍ତରୁଣିମା ଦରିଦ୍ରସ୍ୟ ଵା
କଟାକ୍ଷସରଣୌ କ୍ଷଣଂ ନିପତିତସ୍ୟ କାମାକ୍ଷି ତେ ॥86॥
ପଵିତ୍ରୟ ଜଗତ୍ତ୍ରୟୀଵିବୁଧବୋଧଜୀଵାତୁଭିଃ
ପୁରତ୍ରୟଵିମର୍ଦିନଃ ପୁଲକକଂଚୁଲୀଦାୟିଭିଃ ।
ଭଵକ୍ଷୟଵିଚକ୍ଷଣୈର୍ଵ୍ୟସନମୋକ୍ଷଣୈର୍ଵୀକ୍ଷଣୈଃ
ନିରକ୍ଷରଶିରୋମଣିଂ କରୁଣୟୈଵ କାମାକ୍ଷି ମାମ୍ ॥87॥
କଦା କଲିତଖେଲନାଃ କରୁଣୟୈଵ କାଂଚୀପୁରେ
କଲାୟମୁକୁଲତ୍ଵିଷଃ ଶୁଭକଦଂବପୂର୍ଣାଂକୁରାଃ ।
ପୟୋଧରଭରାଲସାଃ କଵିଜନେଷୁ ତେ ବଂଧୁରାଃ
ପଚେଲିମକୃପାରସା ପରିପତଂତି ମାର୍ଗେ ଦୃଶୋଃ ॥88॥
ଅଶୋଧ୍ୟମଚଲୋଦ୍ଭଵଂ ହୃଦୟନଂଦନଂ ଦେହିନାମ୍
ଅନର୍ଘମଧିକାଂଚି ତତ୍କିମପି ରତ୍ନମୁଦ୍ଦ୍ୟୋତତେ ।
ଅନେନ ସମଲଂକୃତା ଜୟତି ଶଂକରାଂକସ୍ଥଲୀ
କଦାସ୍ୟ ମମ ମାନସଂ ଵ୍ରଜତି ପେଟିକାଵିଭ୍ରମମ୍ ॥89॥
ପରାମୃତଝରୀପ୍ଲୁତା ଜୟତି ନିତ୍ୟମଂତଶ୍ଚରୀ
ଭୁଵାମପି ବହିଶ୍ଚରୀ ପରମସଂଵିଦେକାତ୍ମିକା ।
ମହଦ୍ଭିରପରୋକ୍ଷିତା ସତତମେଵ କାଂଚୀପୁରେ
ମମାନ୍ଵହମହଂମତିର୍ମନସି ଭାତୁ ମାହେଶ୍ଵରୀ ॥90॥
ତମୋଵିପିନଧାଵିନଂ ସତତମେଵ କାଂଚୀପୁରେ
ଵିହାରରସିକା ପରା ପରମସଂଵିଦୁର୍ଵୀରୁହେ ।
କଟାକ୍ଷନିଗଲୈର୍ଦୃଢଂ ହୃଦୟଦୁଷ୍ଟଦଂତାଵଲଂ
ଚିରଂ ନୟତୁ ମାମକଂ ତ୍ରିପୁରଵୈରିସୀମଂତିନୀ ॥91॥
ତ୍ଵମେଵ ସତି ଚଂଡିକା ତ୍ଵମସି ଦେଵି ଚାମୁଂଡିକା
ତ୍ଵମେଵ ପରମାତୃକା ତ୍ଵମପି ୟୋଗିନୀରୂପିଣୀ ।
ତ୍ଵମେଵ କିଲ ଶାଂଭଵୀ ତ୍ଵମସି କାମକୋଟୀ ଜୟା
ତ୍ଵମେଵ ଵିଜୟା ତ୍ଵୟି ତ୍ରିଜଗଦଂବ କିଂ ବ୍ରୂମହେ ॥92॥
ପରେ ଜନନି ପାର୍ଵତି ପ୍ରଣତପାଲିନି ପ୍ରାତିଭ-
ପ୍ରଦାତ୍ରି ପରମେଶ୍ଵରି ତ୍ରିଜଗଦାଶ୍ରିତେ ଶାଶ୍ଵତେ ।
ତ୍ରିୟଂବକକୁଟୁଂବିନି ତ୍ରିପଦସଂଗିନି ତ୍ରୀକ୍ଷଣେ
ତ୍ରିଶକ୍ତିମୟି ଵୀକ୍ଷଣଂ ମୟି ନିଧେହି କାମାକ୍ଷି ତେ ॥93॥
ମନୋମଧୁକରୋତ୍ସଵଂ ଵିଦଧତୀ ମନୀଷାଜୁଷାଂ
ସ୍ଵୟଂପ୍ରଭଵଵୈଖରୀଵିପିନଵୀଥିକାଲଂବିନୀ ।
ଅହୋ ଶିଶିରିତା କୃପାମଧୁରସେନ କଂପାତଟେ
ଚରାଚରଵିଧାୟିନୀ ଚଲତି କାପି ଚିନ୍ମଂଜରୀ ॥94॥
କଲାଵତି କଲାଭୃତୋ ମୁକୁଟସୀମ୍ନି ଲୀଲାଵତି
ସ୍ପୃହାଵତି ମହେଶ୍ଵରେ ଭୁଵନମୋହନେ ଭାସ୍ଵତି ।
ପ୍ରଭାଵତି ରମେ ସଦା ମହିତରୂପଶୋଭାଵତି
ତ୍ଵରାଵତି ପରେ ସତାଂ ଗୁରୁକୃପାଂବୁଧାରାଵତି ॥95॥
ତ୍ଵୟୈଵ ଜଗଦଂବୟା ଭୁଵନମଂଡଲଂ ସୂୟତେ
ତ୍ଵୟୈଵ କରୁଣାର୍ଦ୍ରୟା ତଦପି ରକ୍ଷଣଂ ନୀୟତେ ।
ତ୍ଵୟୈଵ ଖରକୋପୟା ନୟନପାଵକେ ହୂୟତେ
ତ୍ଵୟୈଵ କିଲ ନିତ୍ୟୟା ଜଗତି ସଂତତଂ ସ୍ଥୀୟତେ ॥96॥
ଚରାଚରଜଗନ୍ମୟୀଂ ସକଲହୃନ୍ମୟୀଂ ଚିନ୍ମୟୀଂ
ଗୁଣତ୍ରୟମୟୀଂ ଜଗତ୍ତ୍ରୟମୟୀଂ ତ୍ରିଧାମାମୟୀମ୍ ।
ପରାପରମୟୀଂ ସଦା ଦଶଦିଶାଂ ନିଶାହର୍ମୟୀଂ
ପରାଂ ସତତସନ୍ମୟୀଂ ମନସି ଚିନ୍ମୟୀଂ ଶୀଲୟେ ॥97॥
ଜୟ ଜଗଦଂବିକେ ହରକୁଟୁଂବିନି ଵକ୍ତ୍ରରୁଚା
ଜିତଶରଦଂବୁଜେ ଘନଵିଡଂବିନି କେଶରୁଚା ।
ପରମଵଲଂବନଂ କୁରୁ ସଦା ପରରୂପଧରେ
ମମ ଗତସଂଵିଦୋ ଜଡିମଡଂବରତାଂଡଵିନଃ ॥98॥
ଭୁଵନଜନନି ଭୂଷାଭୂତଚଂଦ୍ରେ ନମସ୍ତେ
କଲୁଷଶମନି କଂପାତୀରଗେହେ ନମସ୍ତେ ।
ନିଖିଲନିଗମଵେଦ୍ୟେ ନିତ୍ୟରୂପେ ନମସ୍ତେ
ପରଶିଵମୟି ପାଶଚ୍ଛେଦହସ୍ତେ ନମସ୍ତେ ॥99॥
କ୍ଵଣତ୍କାଂଚୀ କାଂଚୀପୁରମଣିଵିପଂଚୀଲୟଝରୀ-
ଶିରଃକଂପା କଂପାଵସତିରନୁକଂପାଜଲନିଧିଃ ।
ଘନଶ୍ୟାମା ଶ୍ୟାମା କଠିନକୁଚସୀମା ମନସି ମେ
ମୃଗାକ୍ଷୀ କାମାକ୍ଷୀ ହରନଟନସାକ୍ଷୀ ଵିହରତାତ୍ ॥100॥
ସମରଵିଜୟକୋଟୀ ସାଧକାନଂଦଧାଟୀ
ମୃଦୁଗୁଣପରିପେଟୀ ମୁଖ୍ୟକାଦଂବଵାଟୀ ।
ମୁନିନୁତପରିପାଟୀ ମୋହିତାଜାଂଡକୋଟୀ
ପରମଶିଵଵଧୂଟୀ ପାତୁ ମାଂ କାମକୋଟୀ ॥101॥
ଇମଂ ପରଵରପ୍ରଦଂ ପ୍ରକୃତିପେଶଲଂ ପାଵନଂ
ପରାପରଚିଦାକୃତିପ୍ରକଟନପ୍ରଦୀପାୟିତମ୍ ।
ସ୍ତଵଂ ପଠତି ନିତ୍ୟଦା ମନସି ଭାଵୟନ୍ନଂବିକାଂ
ଜପୈରଲମଲଂ ମଖୈରଧିକଦେହସଂଶୋଷଣୈଃ ॥102॥
॥ ଇତି ସ୍ତୁତିଶତକଂ ସଂପୂର୍ଣମ୍ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ମୂକ ପଂଚ ଶତି 3 - ସ୍ତୁତି ଶତକମ୍?
ମୂକ ପଂଚ ଶତି 3 - ସ୍ତୁତି ଶତକମ୍ is a devotional text available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ମୂକ ପଂଚ ଶତି 3 - ସ୍ତୁତି ଶତକମ୍ online?
Yes. The imported text is available directly on this page for online reading and recitation.
Can I download ମୂକ ପଂଚ ଶତି 3 - ସ୍ତୁତି ଶତକମ୍ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.