ମୂକ ପଂଚ ଶତି 1 – ଆର୍ୟ ଶତକମ୍
କାରଣପରଚିଦ୍ରୂପା କାଂଚୀପୁରସୀମ୍ନି କାମପୀଠଗତା ।
କାଚନ ଵିହରତି କରୁଣା କାଶ୍ମୀରସ୍ତବକକୋମଲାଂଗଲତା ॥1॥
କଂଚନ କାଂଚୀନିଲୟଂ କରଧୃତକୋଦଂଡବାଣସୃଣିପାଶମ୍ ।
କଠିନସ୍ତନଭରନମ୍ରଂ କୈଵଲ୍ୟାନଂଦକଂଦମଵଲଂବେ ॥2॥
ଚିଂତିତଫଲପରିପୋଷଣଚିଂତାମଣିରେଵ କାଂଚିନିଲୟା ମେ ।
ଚିରତରସୁଚରିତସୁଲଭା ଚିତ୍ତଂ ଶିଶିରୟତୁ ଚିତ୍ସୁଖାଧାରା ॥3॥
କୁଟିଲକଚଂ କଠିନକୁଚଂ କୁଂଦସ୍ମିତକାଂତି କୁଂକୁମଚ୍ଛାୟମ୍ ।
କୁରୁତେ ଵିହୃତିଂ କାଂଚ୍ୟାଂ କୁଲପର୍ଵତସାର୍ଵଭୌମସର୍ଵସ୍ଵମ୍ ॥4॥
ପଂଚଶରଶାସ୍ତ୍ରବୋଧନପରମାଚାର୍ୟେଣ ଦୃଷ୍ଟିପାତେନ ।
କାଂଚୀସୀମ୍ନି କୁମାରୀ କାଚନ ମୋହୟତି କାମଜେତାରମ୍ ॥5॥
ପରୟା କାଂଚୀପୁରୟା ପର୍ଵତପର୍ୟାୟପୀନକୁଚଭରୟା ।
ପରତଂତ୍ରା ଵୟମନୟା ପଂକଜସବ୍ରହ୍ମଚାରିଲୋଚନୟା ॥6॥
ଐଶ୍ଵର୍ୟମିଂଦୁମୌଲେରୈକତ୍ମ୍ୟପ୍ରକୃତି କାଂଚିମଧ୍ୟଗତମ୍ ।
ଐଂଦଵକିଶୋରଶେଖରମୈଦଂପର୍ୟଂ ଚକାସ୍ତି ନିଗମାନାମ୍ ॥7॥
ଶ୍ରିତକଂପସୀମାନଂ ଶିଥିଲିତପରମଶିଵଧୈର୍ୟମହିମାନମ୍ ।
କଲୟେ ପଟଲିମାନଂ କଂଚନ କଂଚୁକିତଭୁଵନଭୂମାନମ୍ ॥8॥
ଆଦୃତକାଂଚୀନିଲୟମାଦ୍ୟାମାରୂଢୟୌଵନାଟୋପାମ୍ ।
ଆଗମଵତଂସକଲିକାମାନଂଦାଦ୍ଵୈତକଂଦଲୀଂ ଵଂଦେ ॥9॥
ତୁଂଗାଭିରାମକୁଚଭରଶୃଂଗାରିତମାଶ୍ରୟାମି କାଂଚିଗତମ୍ ।
ଗଂଗାଧରପରତଂତ୍ରଂ ଶୃଂଗାରାଦ୍ଵୈତତଂତ୍ରସିଦ୍ଧାଂତମ୍ ॥10॥
କାଂଚୀରତ୍ନଵିଭୂଷାଂ କାମପି କଂଦର୍ପସୂତିକାପାଂଗୀମ୍ ।
ପରମାଂ କଲାମୁପାସେ ପରଶିଵଵାମାଂକପୀଠିକାସୀନାମ୍ ॥11॥
କଂପାତୀଚରାଣାଂ କରୁଣାକୋରକିତଦୃଷ୍ଟିପାତାନାମ୍ ।
କେଲୀଵନଂ ମନୋ ମେ କେଷାଂଚିଦ୍ଭଵତୁ ଚିଦ୍ଵିଲାସାନାମ୍ ॥12॥
ଆମ୍ରତରୁମୂଲଵସତେରାଦିମପୁରୁଷସ୍ୟ ନୟନପୀୟୂଷମ୍ ।
ଆରବ୍ଧୟୌଵନୋତ୍ସଵମାମ୍ନାୟରହସ୍ୟମଂତରଵଲଂବେ ॥13॥
ଅଧିକାଂଚି ପରମୟୋଗିଭିରାଦିମପରପୀଠସୀମ୍ନି ଦୃଶ୍ୟେନ ।
ଅନୁବଦ୍ଧଂ ମମ ମାନସମରୁଣିମସର୍ଵସ୍ଵସଂପ୍ରଦାୟେନ ॥14॥
ଅଂକିତଶଂକରଦେହାମଂକୁରିତୋରୋଜକଂକଣାଶ୍ଲେଷୈଃ ।
ଅଧିକାଂଚି ନିତ୍ୟତରୁଣୀମଦ୍ରାକ୍ଷଂ କାଂଚିଦଦ୍ଭୁତାଂ ବାଲାମ୍ ॥15॥
ମଧୁରଧନୁଷା ମହୀଧରଜନୁଷା ନଂଦାମି ସୁରଭିବାଣଜୁଷା ।
ଚିଦ୍ଵପୁଷା କାଂଚିପୁରେ କେଲିଜୁଷା ବଂଧୁଜୀଵକାଂତିମୁଷା ॥16॥
ମଧୁରସ୍ମିତେନ ରମତେ ମାଂସଲକୁଚଭାରମଂଦଗମନେନ ।
ମଧ୍ୟେକାଂଚି ମନୋ ମେ ମନସିଜସାମ୍ରାଜ୍ୟଗର୍ଵବୀଜେନ ॥17॥
ଧରଣିମୟୀଂ ତରଣିମୟୀଂ ପଵନମୟୀଂ ଗଗନଦହନହୋତୃମୟୀମ୍ ।
ଅଂବୁମୟୀମିଂଦୁମୟୀମଂବାମନୁକଂପମାଦିମାମୀକ୍ଷେ ॥18॥
ଲୀନସ୍ଥିତି ମୁନିହୃଦୟେ ଧ୍ୟାନସ୍ତିମିତଂ ତପସ୍ୟଦୁପକଂପମ୍ ।
ପୀନସ୍ତନଭରମୀଡେ ମୀନଧ୍ଵଜତଂତ୍ରପରମତାତ୍ପର୍ୟମ୍ ॥19॥
ଶ୍ଵେତା ମଂଥରହସିତେ ଶାତା ମଧ୍ୟେ ଚ ଵାଡ୍ଭନୋଽତୀତା ।
ଶୀତା ଲୋଚନପାତେ ସ୍ଫୀତା କୁଚସୀମ୍ନି ଶାଶ୍ଵତୀ ମାତା ॥20॥
ପୁରତଃ କଦା ନ କରଵୈ ପୁରଵୈରିଵିମର୍ଦପୁଲକିତାଂଗଲତାମ୍ ।
ପୁନତୀଂ କାଂଚୀଦେଶଂ ପୁଷ୍ପାୟୁଧଵୀର୍ୟସରସପରିପାଟୀମ୍ ॥21॥
ପୁଣ୍ୟା କାଽପି ପୁରଂଧ୍ରୀ ପୁଂଖିତକଂଦର୍ପସଂପଦା ଵପୁଷା ।
ପୁଲିନଚରୀ କଂପାୟାଃ ପୁରମଥନଂ ପୁଲକନିଚୁଲିତଂ କୁରୁତେ ॥22॥
ତନିମାଦ୍ଵୈତଵଲଗ୍ନଂ ତରୁଣାରୁଣସଂପ୍ରଦାୟତନୁଲେଖମ୍ ।
ତଟସୀମନି କଂପାୟାସ୍ତରୁଣିମସର୍ଵସ୍ଵମାଦ୍ୟମଦ୍ରାକ୍ଷମ୍ ॥23॥
ପୌଷ୍ଟିକକର୍ମଵିପାକଂ ପୌଷ୍ପଶରଂ ସଵିଧସୀମ୍ନି କଂପାୟାଃ ।
ଅଦ୍ରାକ୍ଷମାତ୍ତୟୌଵନମଭ୍ୟୁଦୟଂ କଂଚିଦର୍ଧଶଶିମୌଲୈଃ ॥24॥
ସଂଶ୍ରିତକାଂଚୀଦେଶେ ସରସିଜଦୌର୍ଭାଗ୍ୟଜାଗ୍ରଦୁତ୍ତଂସେ ।
ସଂଵିନ୍ମୟେ ଵିଲୀୟେ ସାରସ୍ଵତପୁରୁଷକାରସାମ୍ରାଜ୍ୟେ ॥25॥
ମୋଦିତମଧୁକରଵିଶିଖଂ ସ୍ଵାଦିମସମୁଦାୟସାରକୋଦଂଡମ୍ ।
ଆଦୃତକାଂଚୀଖେଲନମାଦିମମାରୁଣ୍ୟଭେଦମାକଲୟେ ॥26॥
ଉରରୀକୃତକାଂଚିପୁରୀମୁପନିଷଦରଵିଂଦକୁହରମଧୁଧାରାମ୍ ।
ଉନ୍ନମ୍ରସ୍ତନକଲଶୀମୁତ୍ସଵଲହରୀମୁପାସ୍ମହେ ଶଂଭୋଃ ॥27॥
ଏଣଶିଶୁଦୀର୍ଘଲୋଚନମେନଃପରିପଂଥି ସଂତତଂ ଭଜତାମ୍ ।
ଏକାମ୍ରନାଥଜୀଵିତମେଵଂପଦଦୂରମେକମଵଲଂବେ ॥28॥
ସ୍ମୟମାନମୁଖଂ କାଂଚୀଭୟମାନଂ କମପି ଦେଵତାଭେଦମ୍ ।
ଦୟମାନଂ ଵୀକ୍ଷ୍ୟ ମୁହୁର୍ଵୟମାନଂଦାମୃତାଂବୁଧୌ ମଗ୍ନାଃ ॥29॥
କୁତୁକଜୁଷି କାଂଚିଦେଶେ କୁମୁଦତପୋରାଶିପାକଶେଖରିତେ ।
କୁରୁତେ ମନୋଵିହାରଂ କୁଲଗିରିପରିବୃଢକୁଲୈକମଣିଦୀପେ ॥30॥
ଵୀକ୍ଷେମହି କାଂଚିପୁରେ ଵିପୁଲସ୍ତନକଲଶଗରିମପରଵଶିତମ୍ ।
ଵିଦ୍ରୁମସହଚରଦେହଂ ଵିଭ୍ରମସମଵାୟସାରସନ୍ନାହମ୍ ॥31॥
କୁରୁଵିଂଦଗୋତ୍ରଗାତ୍ରଂ କୂଲଚରଂ କମପି ନୌମି କଂପାୟାଃ ।
କୂଲଂକଷକୁଚକୁଂଭଂ କୁସୁମାୟୁଧଵୀର୍ୟସାରସଂରଂଭମ୍ ॥32॥
କୁଡୂମଲିତକୁଚକିଶୋରୈଃ କୁର୍ଵାଣୈଃ କାଂଚିଦେଶସୌହାର୍ଦମ୍ ।
କୁଂକୁମଶୋଣୈର୍ନିଚିତଂ କୁଶଲପଥଂ ଶଂଭୁସୁକୃତସଂଭାରୈଃ ॥33॥
ଅଂକିତକଚେନ କେନଚିଦଂଧଂକରଣୌଷଧେନ କମଲାନାମ୍ ।
ଅଂତଃପୁରେଣ ଶଂଭୋରଲଂକ୍ରିୟା କାଽପି କଲ୍ପ୍ୟତେ କାଂଚ୍ୟାମ୍ ॥34॥
ଊରୀକରୋମି ସଂତତମୂଷ୍ମଲଫାଲେନ ଲଲିତଂ ପୁଂସା ।
ଉପକଂପମୁଚିତଖେଲନମୁର୍ଵୀଧରଵଂଶସଂପଦୁନ୍ମେଷମ୍ ॥35॥
ଅଂକୁରିତସ୍ତନକୋରକମଂକାଲଂକାରମେକଚୂତପତେଃ ।
ଆଲୋକେମହି କୋମଲମାଗମସଂଲାପସାରୟାଥାର୍ଥ୍ୟମ୍ ॥36॥
ପୁଂଜିତକରୁଣମୁଦଂଚିତଶିଂଜିତମଣିକାଂଚି କିମପି କାଂଚିପୁରେ ।
ମଂଜରିତମୃଦୁଲହାସଂ ପିଂଜରତନୁରୁଚି ପିନାକିମୂଲଧନମ୍ ॥37॥
ଲୋଲହୃଦୟୋଽସ୍ତି ଶଂଭୋର୍ଲୋଚନୟୁଗଲେନ ଲେହ୍ୟମାନାୟାମ୍ ।
ଲଲିତପରମଶିଵାୟାଂ ଲାଵଣ୍ୟାମୃତତରଂଗମାଲାୟାମ୍ ॥38॥
ମଧୁକରସହଚରଚିକୁରୈର୍ମଦନାଗମସମୟଦୀକ୍ଷିତକଟାକ୍ଷୈଃ ।
ମଂଡିତକଂପାତୀରୈର୍ମଂଗଲକଂଦୈର୍ମମାସ୍ତୁ ସାରୂପ୍ୟମ୍ ॥39॥
ଵଦନାରଵିଂଦଵକ୍ଷୋଵାମାଂକତଟୀଵଶଂଵଦୀଭୂତା ।
ପୂରୁଷତ୍ରିତୟେ ତ୍ରେଧା ପୁରଂଧ୍ରିରୂପା ତ୍ଵମେଵ କାମାକ୍ଷି ॥40॥
ବାଧାକରୀଂ ଭଵାବ୍ଧେରାଧାରାଦ୍ୟଂବୁଜେଷୁ ଵିଚରଂତୀମ୍ ।
ଆଧାରୀକୃତକାଂଚୀ ବୋଧାମୃତଵୀଚିମେଵ ଵିମୃଶାମଃ ॥41॥
କଲୟାମ୍ୟଂତଃ ଶଶଧରକଲୟାଽଂକିତମୌଲିମମଲଚିଦ୍ଵଲୟାମ୍ ।
ଅଲୟାମାଗମପୀଠୀନିଲୟାଂ ଵଲୟାଂକସୁଂଦରୀମଂବାମ୍ ॥42॥
ଶର୍ଵାଦିପରମସାଧକଗୁର୍ଵାନୀତାୟ କାମପୀଠଜୁଷେ ।
ସର୍ଵାକୃତୟେ ଶୋଣିମଗର୍ଵାୟାସ୍ମୈ ସମର୍ପ୍ୟତେ ହୃଦୟମ୍ ॥43॥
ସମୟା ସାଂଧ୍ୟମୟୂଖୈଃ ସମୟା ବୁଦ୍ଧୟା ସଦୈଵ ଶୀଲିତୟା ।
ଉମୟା କାଂଚୀରତୟା ନ ମୟା ଲଭ୍ୟତେ କିଂ ନୁ ତାଦାତ୍ମ୍ୟମ୍ ॥44॥
ଜଂତୋସ୍ତଵ ପଦପୂଜନସଂତୋଷତରଂଗିତସ୍ୟ କାମାକ୍ଷି ।
ଵଂଧୋ ୟଦି ଭଵତି ପୁନଃ ସିଂଧୋରଂଭସ୍ସୁ ବଂଭ୍ରମୀତି ଶିଲା ॥45॥
କୁଂଡଲି କୁମାରି କୁଟିଲେ ଚଂଡି ଚରାଚରସଵିତ୍ରି ଚାମୁଂଡେ ।
ଗୁଣିନି ଗୁହାରିଣି ଗୁହ୍ୟେ ଗୁରୁମୂର୍ତେ ତ୍ଵାଂ ନମାମି କାମାକ୍ଷି ॥46॥
ଅଭିଦାକୃତିର୍ଭିଦାକୃତିରଚିଦାକୃତିରପି ଚିଦାକୃତିର୍ମାତଃ ।
ଅନହଂତା ତ୍ଵମହଂତା ଭ୍ରମୟସି କାମାକ୍ଷି ଶାଶ୍ଵତୀ ଵିଶ୍ଵମ୍ ॥47॥
ଶିଵ ଶିଵ ପଶ୍ୟଂତି ସମଂ ଶ୍ରୀକାମାକ୍ଷୀକଟାକ୍ଷିତାଃ ପୁରୁଷାଃ ।
ଵିପିନଂ ଭଵନମମିତ୍ରଂ ମିତ୍ରଂ ଲୋଷ୍ଟଂ ଚ ୟୁଵତିବିଂବୋଷ୍ଠମ୍ ॥48॥
କାମପରିପଂଥିକାମିନି କାମେଶ୍ଵରି କାମପୀଠମଧ୍ୟଗତେ ।
କାମଦୁଘା ଭଵ କମଲେ କାମକଲେ କାମକୋଟି କାମାକ୍ଷି ॥49॥
ମଧ୍ୟେହୃଦୟଂ ମଧ୍ୟେନିଟିଲଂ ମଧ୍ୟେଶିରୋଽପି ଵାସ୍ତଵ୍ୟାମ୍ ।
ଚଂଡକରଶକ୍ରକାର୍ମୁକଚଂଦ୍ରସମାଭାଂ ନମାମି କାମାକ୍ଷୀମ୍ ॥50॥
ଅଧିକାଂଚି କେଲିଲୋଲୈରଖିଲାଗମୟଂତ୍ରତଂତ୍ରମୟୈଃ ।
ଅତିଶୀତଂ ମମ ମାନସମସମଶରଦ୍ରୋହିଜୀଵନୋପାୟୈଃ ॥51॥
ନଂଦତି ମମ ହୃଦି କାଚନ ମଂଦିରୟଂତୀ ନିରଂତରଂ କାଂଚୀମ୍ ।
ଇଂଦୁରଵିମଂଡଲକୁଚା ବିଂଦୁଵିୟନ୍ନାଦପରିଣତା ତରୁଣୀ ॥52॥
ଶଂପାଲତାସଵର୍ଣଂ ସଂପାଦୟିତୁଂ ଭଵଜ୍ଵରଚିକିତ୍ସାମ୍ ।
ଲିଂପାମି ମନସି କିଂଚନ କଂପାତଟରୋହି ସିଦ୍ଧଭୈଷଜ୍ୟମ୍ ॥53॥
ଅନୁମିତକୁଚକାଠିନ୍ୟାମଧିଵକ୍ଷଃପୀଠମଂଗଜନ୍ମରିପୋଃ ।
ଆନଂଦଦାଂ ଭଜେ ତାମାନଂଗବ୍ରହ୍ମତତ୍ଵବୋଧସିରାମ୍ ॥54॥
ଐକ୍ଷିଷି ପାଶାଂକୁଶଧରହସ୍ତାଂତଂ ଵିସ୍ମୟାର୍ହଵୃତ୍ତାଂତମ୍ ।
ଅଧିକାଂଚି ନିଗମଵାଚାଂ ସିଦ୍ଧାଂତଂ ଶୂଲପାଣିଶୁଦ୍ଧାଂତମ୍ ॥55॥
ଆହିତଵିଲାସଭଂଗୀମାବ୍ରହ୍ମସ୍ତଂବଶିଲ୍ପକଲ୍ପନୟା ।
ଆଶ୍ରିତକାଂଚୀମତୁଲାମାଦ୍ୟାଂ ଵିସ୍ଫୂର୍ତିମାଦ୍ରିୟେ ଵିଦ୍ୟାମ୍ ॥56॥
ମୂକୋଽପି ଜଟିଲଦୁର୍ଗତିଶୋକୋଽପି ସ୍ମରତି ୟଃ କ୍ଷଣଂ ଭଵତୀମ୍ ।
ଏକୋ ଭଵତି ସ ଜଂତୁର୍ଲୋକୋତ୍ତରକୀର୍ତିରେଵ କାମାକ୍ଷି ॥57॥
ପଂଚଦଶଵର୍ଣରୂପଂ କଂଚନ କାଂଚୀଵିହାରଧୌରେୟମ୍ ।
ପଂଚଶରୀୟଂ ଶଂଭୋର୍ଵଂଚନଵୈଦଗ୍ଧ୍ୟମୂଲମଵଲଂବେ ॥58॥
ପରିଣତିମତୀଂ ଚତୁର୍ଧା ପଦଵୀଂ ସୁଧିୟାଂ ସମେତ୍ୟ ସୌଷୁମ୍ନୀମ୍ ।
ପଂଚାଶଦର୍ଣକଲ୍ପିତମଦଶିଲ୍ପାଂ ତ୍ଵାଂ ନମାମି କାମାକ୍ଷି ॥59॥
ଆଦିକ୍ଷନ୍ମମ ଗୁରୁରାଡାଦିକ୍ଷାଂତାକ୍ଷରାତ୍ମିକାଂ ଵିଦ୍ୟାମ୍ ।
ସ୍ଵାଦିଷ୍ଠଚାପଦଂଡାଂ ନେଦିଷ୍ଠାମେଵ କାମପୀଠଗତାମ୍ ॥60॥
ତୁଷ୍ୟାମି ହର୍ଷିତସ୍ମରଶାସନୟା କାଂଚିପୁରକୃତାସନୟା ।
ସ୍ଵାସନୟା ସକଲଜଗଦ୍ଭାସନୟା କଲିତଶଂବରାସନୟା ॥61॥
ପ୍ରେମଵତୀ କଂପାୟାଂ ସ୍ଥେମଵତୀ ୟତିମନସ୍ସୁ ଭୂମଵତୀ ।
ସାମଵତୀ ନିତ୍ୟଗିରା ସୋମଵତୀ ଶିରସି ଭାତି ହୈମଵତୀ ॥62॥
କୌତୁକିନା କଂପାୟାଂ କୌସୁମଚାପେନ କୀଲିତେନାଂତଃ ।
କୁଲଦୈଵତେନ ମହତା କୁଡ୍ମଲମୁଦ୍ରାଂ ଧୁନୋତୁ ନଃପ୍ରତିଭା ॥63॥
ୟୂନା କେନାପି ମିଲଦ୍ଦେହା ସ୍ଵାହାସହାୟତିଲକେନ ।
ସହକାରମୂଲଦେଶେ ସଂଵିଦ୍ରୂପା କୁଟୁଂବିନୀ ରମତେ ॥64॥
କୁସୁମଶରଗର୍ଵସଂପତ୍କୋଶଗୃହଂ ଭାତି କାଂଚିଦେଶଗତମ୍ ।
ସ୍ଥାପିତମସ୍ମିନ୍କଥମପି ଗୋପିତମଂତର୍ମୟା ମନୋରତ୍ନମ୍ ॥65॥
ଦଗ୍ଧଷଡଧ୍ଵାରଣ୍ୟଂ ଦରଦଲିତକୁସୁଂଭସଂଭୃତାରୁଣ୍ୟମ୍ ।
କଲୟେ ନଵତାରୁଣ୍ୟଂ କଂପାତଟସୀମ୍ନି କିମପି କାରୁଣ୍ୟମ୍ ॥66॥
ଅଧିକାଂଚି ଵର୍ଧମାନାମତୁଲାଂ କରଵାଣି ପାରଣାମକ୍ଷ୍ଣୋଃ ।
ଆନଂଦପାକଭେଦାମରୁଣିମପରିଣାମଗର୍ଵପଲ୍ଲଵିତାମ୍ ॥67॥
ବାଣସୃଣିପାଶକାର୍ମୁକପାଣିମମୁଂ କମପି କାମପୀଠଗତମ୍ ।
ଏଣଧରକୋଣଚୂଡଂ ଶୋଣିମପରିପାକଭେଦମାକଲୟେ ॥68॥
କିଂ ଵା ଫଲତି ମମାନ୍ୟୌର୍ବିଂବାଧରଚୁଂବିମଂଦହାସମୁଖୀ ।
ସଂବାଧକରୀ ତମସାମଂବା ଜାଗର୍ତି ମନସି କାମାକ୍ଷୀ ॥69॥
ମଂଚେ ସଦାଶିଵମୟେ ପରିଶିଵମୟଲଲିତପୌଷ୍ପପର୍ୟଂକେ ।
ଅଧିଚକ୍ରମଧ୍ୟମାସ୍ତେ କାମାକ୍ଷୀ ନାମ କିମପି ମମ ଭାଗ୍ୟମ୍ ॥70॥
ରକ୍ଷ୍ୟୋଽସ୍ମି କାମପୀଠୀଲାସିକୟା ଘନକୃପାଂବୁରାଶିକୟା ।
ଶ୍ରୁତିୟୁଵତିକୁଂତଲୀମଣିମାଲିକୟା ତୁହିନଶୈଲବାଲିକୟା ॥71॥
ଲୀୟେ ପୁରହରଜାୟେ ମାୟେ ତଵ ତରୁଣପଲ୍ଲଵଚ୍ଛାୟେ ।
ଚରଣେ ଚଂଦ୍ରାଭରଣେ କାଂଚୀଶରଣେ ନତାର୍ତିସଂହରଣେ ॥72॥
ମୂର୍ତିମତି ମୁକ୍ତିବୀଜେ ମୂର୍ଧ୍ନି ସ୍ତବକିତଚକୋରସାମ୍ରାଜ୍ୟେ ।
ମୋଦିତକଂପାକୂଲେ ମୁହୁର୍ମୁହୁର୍ମନସି ମୁମୁଦିଷାଽସ୍ମାକମ୍ ॥73॥
ଵେଦମୟୀଂ ନାଦମୟୀଂ ବିଂଦୁମୟୀଂ ପରପଦୋଦ୍ୟଦିଂଦୁମୟୀମ୍ ।
ମଂତ୍ରମୟୀଂ ତଂତ୍ରମୟୀଂ ପ୍ରକୃତିମୟୀଂ ନୌମି ଵିଶ୍ଵଵିକୃତିମୟୀମ୍ ॥74॥
ପୁରମଥନପୁଣ୍ୟକୋଟୀ ପୁଂଜିତକଵିଲୋକସୂକ୍ତିରସଧାଟୀ ।
ମନସି ମମ କାମକୋଟୀ ଵିହରତୁ କରୁଣାଵିପାକପରିପାଟୀ ॥75॥
କୁଟିଲଂ ଚଟୁଲଂ ପୃଥୁଲଂ ମୃଦୁଲଂ କଚନୟନଜଘନଚରଣେଷୁ ।
ଅଵଲୋକିତମଵଲଂବିତମଧିକଂପାତଟମମେୟମସ୍ମାଭିଃ ॥76॥
ପ୍ରତ୍ୟଙ୍ମୁଖ୍ୟା ଦୃଷ୍ଟୟା ପ୍ରସାଦଦୀପାଂକୁରେଣ କାମାକ୍ଷ୍ୟାଃ ।
ପଶ୍ୟାମି ନିସ୍ତୁଲମହୋ ପଚେଲିମଂ କମପି ପରଶିଵୋଲ୍ଲାସମ୍ ॥77॥
ଵିଦ୍ୟେ ଵିଧାତୃଵିଷୟେ କାତ୍ୟାୟନି କାଲି କାମକୋଟିକଲେ ।
ଭାରତି ଭୈରଵି ଭଦ୍ରେ ଶାକିନି ଶାଂଭଵି ଶିଵେ ସ୍ତୁଵେ ଭଵତୀମ୍ ॥78॥
ମାଲିନି ମହେଶଚାଲିନି କାଂଚୀଖେଲିନି ଵିପକ୍ଷକାଲିନି ତେ ।
ଶୂଲିନି ଵିଦ୍ରୁମଶାଲିନି ସୁରଜନପାଲିନି କପାଲିନି ନମୋଽସ୍ତୁ ॥79॥
ଦେଶିକ ଇତି କିଂ ଶଂକେ ତତ୍ତାଦୃକ୍ତଵ ନୁ ତରୁଣିମୋନ୍ମେଷଃ ।
କାମାକ୍ଷି ଶୂଲପାଣେଃ କାମାଗମସମୟଦୀକ୍ଷାୟାମ୍ ॥80॥
ଵେତଂଡକୁଂଭଡଂବରଵୈତଂଡିକକୁଚଭରାର୍ତମଧ୍ୟାୟ ।
କୁଂକୁମରୁଚେ ନମସ୍ୟାଂ ଶଂକରନୟନାମୃତାୟ ରଚୟାମଃ ॥81॥
ଅଧିକାଂଚିତମଣିକାଂଚନକାଂଚୀମଧିକାଂଚି କାଂଚିଦଦ୍ରାକ୍ଷମ୍ ।
ଅଵନତଜନାନୁକଂପାମନୁକଂପାକୂଲମସ୍ମଦନୁକୂଲାମ୍ ॥82॥
ପରିଚିତକଂପାତୀରଂ ପର୍ଵତରାଜନ୍ୟସୁକୃତସନ୍ନାହମ୍ ।
ପରଗୁରୁକୃପୟା ଵୀକ୍ଷେ ପରମଶିଵୋତ୍ସଂଗମଂଗଲାଭରଣମ୍ ॥83॥
ଦଗ୍ଧମଦନସ୍ୟ ଶଂଭୋଃ ପ୍ରଥୀୟସୀଂ ବ୍ରହ୍ମଚର୍ୟଵୈଦଗ୍ଧୀମ୍ ।
ତଵ ଦେଵି ତରୁଣିମଶ୍ରୀଚତୁରିମପାକୋ ନ ଚକ୍ଷମେ ମାତଃ ॥84॥
ମଦଜଲତମାଲପତ୍ରା ଵସନିତପତ୍ରା କରାଦୃତଖାନିତ୍ରା ।
ଵିହରତି ପୁଲିଂଦୟୋଷା ଗୁଂଜାଭୂଷା ଫଣୀଂଦ୍ରକୃତଵେଷା ॥85॥
ଅଂକେ ଶୁକିନୀ ଗୀତେ କୌତୁକିନୀ ପରିସରେ ଚ ଗାୟକିନୀ ।
ଜୟସି ସଵିଧେଽଂବ ଭୈରଵମଂଡଲିନୀ ଶ୍ରଵସି ଶଂଖକୁନ୍ଡଲିନୀ ॥86॥
ପ୍ରଣତଜନତାପଵର୍ଗା କୃତବହୁସର୍ଗା ସସିଂହସଂସର୍ଗା ।
କାମାକ୍ଷି ମୁଦିତଭର୍ଗା ହତରିପୁଵର୍ଗା ତ୍ଵମେଵ ସା ଦୁର୍ଗା ॥87॥
ଶ୍ରଵଣଚଲଦ୍ଵେତଂଡା ସମରୋଦ୍ଦଂଡା ଧୁତାସୁରଶିଖଂଡା ।
ଦେଵି କଲିତାଂତ୍ରଷଂଡା ଧୃତନରମୁଂଡା ତ୍ଵମେଵ ଚାମୁଂଡା ॥88॥
ଉର୍ଵୀଧରେଂଦ୍ରକନ୍ୟେ ଦର୍ଵୀଭରିତେନ ଭକ୍ତପୂରେଣ ।
ଗୁର୍ଵୀମକିଂଚନାର୍ତି ଖର୍ଵୀକୁରୁଷେ ତ୍ଵମେଵ କାମାକ୍ଷି ॥89॥
ତାଡିତରିପୁପରିପୀଡନଭୟହରଣ ନିପୁଣହଲମୁସଲା ।
କ୍ରୋଡପତିଭୀଷଣମୁଖୀ କ୍ରୀଡସି ଜଗତି ତ୍ଵମେଵ କାମାକ୍ଷି ॥90॥
ସ୍ମରମଥନଵରଣଲୋଲା ମନ୍ମଥହେଲାଵିଲାସମଣିଶାଲା ।
କନକରୁଚିଚୌର୍ୟଶୀଲା ତ୍ଵମଂବ ବାଲା କରାବ୍ଜଧୃତମାଲା ॥91॥
ଵିମଲପଟୀ କମଲକୁଟୀ ପୁସ୍ତକରୁଦ୍ରାକ୍ଷଶସ୍ତହସ୍ତପୁଟୀ ।
କାମାକ୍ଷି ପକ୍ଷ୍ମଲାକ୍ଷୀ କଲିତଵିପଂଚୀ ଵିଭାସି ଵୈରିଂଚୀ ॥92॥
କୁଂକୁମରୁଚିପିଂଗମସୃକ୍ପଂକିଲମୁଂଡାଲିମଂଡିତଂ ମାତଃ ।
ଶ୍ରୀକାମାକ୍ଷି ତଦୀୟସଂଗମକଲାମଂଦୀଭଵତ୍କୌତୁକଃ
ଜୟତି ତଵ ରୂପଧେୟଂ ଜପପଟପୁସ୍ତକଵରାଭୟକରାବ୍ଜମ୍ ॥93॥
କନକମଣିକଲିତଭୂଷାଂ କାଲାୟସକଲହଶୀଲକାଂତିକଲାମ୍ ।
କାମାକ୍ଷି ଶୀଲୟେ ତ୍ଵାଂ କପାଲଶୂଲାଭିରାମକରକମଲାମ୍ ॥94॥
ଲୋହିତିମପୁଂଜମଧ୍ୟେ ମୋହିତଭୁଵନେ ମୁଦା ନିରୀକ୍ଷଂତେ ।
ଵଦନଂ ତଵ କୁଵୟୁଗଲଂ କାଂଚୀସୀମାଂ ଚ କେଽପି କାମାକ୍ଷି ॥95॥
ଜଲଧିଦ୍ଵିଗୁଣିତହୁତବହଦିଶାଦିନେଶ୍ଵରକଲାଶ୍ଵିନେୟଦଲୈଃ ।
ନଲିନୈର୍ମହେଶି ଗଚ୍ଛସି ସର୍ଵୋତ୍ତରକରକମଲଦଲମମଲମ୍ ॥96॥
ସତ୍କୃତଦେଶିକଚରଣାଃ ସବୀଜନିର୍ବୀଜୟୋଗନିଶ୍ରେଣ୍ୟା ।
ଅପଵର୍ଗସୌଧଵଲଭୀମାରୋହଂତ୍ୟଂବ କେଽପି ତଵ କୃପୟା ॥97॥
ଅଂତରପି ବହିରପି ତ୍ଵଂ ଜଂତୁତତେରଂତକାଂତକୃଦହଂତେ ।
ଚିଂତିତସଂତାନଵତାଂ ସଂତତମପି ତଂତନୀଷି ମହିମାନମ୍ ॥98॥
କଲମଂଜୁଲଵାଗନୁମିତଗଲପଂଜରଗତଶୁକଗ୍ରହୌତ୍କଂଠ୍ୟାତ୍ ।
ଅଂବ ରଦନାଂବରଂ ତେ ବିଂବଫଲଂ ଶଂବରାରିଣା ନ୍ୟସ୍ତମ୍ ॥99॥
ଜୟ ଜୟ ଜଗଦଂବ ଶିଵେ ଜୟ ଜୟ କାମାକ୍ଷି ଜୟ ଜୟାଦ୍ରିସୁତେ ।
ଜୟ ଜୟ ମହେଶଦୟିତେ ଜୟ ଜୟ ଚିଦ୍ଗଗନକୌମୁଦୀଧାରେ ॥100॥
ଆର୍ୟାଶତକଂ ଭକ୍ତ୍ୟା ପଠତାମାର୍ୟାକଟାକ୍ଷେଣ ।
ନିସ୍ସରତି ଵଦନକମଲାଦ୍ଵାଣୀ ପୀୟୂଷଧୋରଣୀ ଦିଵ୍ୟା ॥101॥
॥ ଇତି ଆର୍ୟାଶତକଂ ସଂପୂର୍ଣମ୍ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ମୂକ ପଂଚ ଶତି 1 - ଆର୍ୟ ଶତକମ୍?
ମୂକ ପଂଚ ଶତି 1 - ଆର୍ୟ ଶତକମ୍ is a devotional text available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ମୂକ ପଂଚ ଶତି 1 - ଆର୍ୟ ଶତକମ୍ online?
Yes. The imported text is available directly on this page for online reading and recitation.
Can I download ମୂକ ପଂଚ ଶତି 1 - ଆର୍ୟ ଶତକମ୍ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.