ଦ୍ଵାଦଶ ଆର୍ୟ ସ୍ତୁତି

ଉଦ୍ୟନ୍ନଦ୍ୟଵିଵସ୍ଵାନାରୋହନ୍ନୁତ୍ତରାଂ ଦିଵଂ ଦେଵଃ ।
ହୃଦ୍ରୋଗଂ ମମ ସୂର୍ୟୋ ହରିମାଣଂ ଚାଽଽଶୁ ନାଶୟତୁ ॥ 1 ॥

ନିମିଷାର୍ଧେନୈକେନ ଦ୍ଵେ ଚ ଶତେ ଦ୍ଵେ ସହସ୍ରେ ଦ୍ଵେ ।
କ୍ରମମାଣ ୟୋଜନାନାଂ ନମୋଽସ୍ତୁ ତେ ନଳିନନାଥାୟ ॥ 2 ॥

କର୍ମଜ୍ଞାନଖଦଶକଂ ମନଶ୍ଚ ଜୀଵ ଇତି ଵିଶ୍ଵସର୍ଗାୟ ।
ଦ୍ଵାଦଶଧା ୟୋ ଵିଚରତି ସ ଦ୍ଵାଦଶମୂର୍ତିରସ୍ତୁ ମୋଦାୟ ॥ 3 ॥

ତ୍ଵଂ ହି ୟଜୂଋକ୍ସାମଃ ତ୍ଵମାଗମସ୍ତ୍ଵଂ ଵଷଟ୍କାରଃ ।
ତ୍ଵଂ ଵିଶ୍ଵଂ ତ୍ଵଂ ହଂସଃ ତ୍ଵଂ ଭାନୋ ପରମହଂସଶ୍ଚ ॥ 4 ॥

ଶିଵରୂପାତ୍ ଜ୍ଞାନମହଂ ତ୍ଵତ୍ତୋ ମୁକ୍ତିଂ ଜନାର୍ଦନାକାରାତ୍ ।
ଶିଖିରୂପାଦୈଶ୍ଵର୍ୟଂ ତ୍ଵତ୍ତଶ୍ଚାରୋଗ୍ୟମିଚ୍ଛାମି ॥ 5 ॥

ତ୍ଵଚି ଦୋଷା ଦୃଶି ଦୋଷାଃ ହୃଦି ଦୋଷା ୟେଽଖିଲେଂଦ୍ରିୟଜଦୋଷାଃ ।
ତାନ୍ ପୂଷା ହତଦୋଷଃ କିଂଚିଦ୍ରୋଷାଗ୍ନିନା ଦହତୁ ॥ 6 ॥

ଧର୍ମାର୍ଥକାମମୋକ୍ଷପ୍ରତିରୋଧାନୁଗ୍ରତାପଵେଗକରାନ୍ ।
ବଂଦୀକୃତେଂଦ୍ରିୟଗଣାନ୍ ଗଦାନ୍ ଵିଖଂଡୟତୁ ଚଂଡାଂଶୁଃ ॥ 7 ॥

ୟେନ ଵିନେଦଂ ତିମିରଂ ଜଗଦେତ୍ୟ ଗ୍ରସତି ଚରମଚରମଖିଲମ୍ ।
ଧୃତବୋଧଂ ତଂ ନଳିନୀଭର୍ତାରଂ ହର୍ତାରମାପଦାମୀଡେ ॥ 8 ॥

ୟସ୍ୟ ସହସ୍ରାଭୀଶୋରଭୀଶୁ ଲେଶୋ ହିମାଂଶୁବିଂବଗତଃ ।
ଭାସୟତି ନକ୍ତମଖିଲଂ ଭେଦୟତୁ ଵିପଦ୍ଗଣାନରୁଣଃ ॥ 9 ॥

ତିମିରମିଵ ନେତ୍ରତିମିରଂ ପଟଲମିଵାଽଶେଷରୋଗପଟଲଂ ନଃ ।
କାଶମିଵାଧିନିକାୟଂ କାଲପିତା ରୋଗୟୁକ୍ତତାଂ ହରତାତ୍ ॥ 10 ॥

ଵାତାଶ୍ମରୀଗଦାର୍ଶସ୍ତ୍ଵଗ୍ଦୋଷମହୋଦରପ୍ରମେହାଂଶ୍ଚ ।
ଗ୍ରହଣୀଭଗଂଧରାଖ୍ୟା ମହତୀସ୍ତ୍ଵଂ ମେ ରୁଜୋ ହଂସି ॥ 11 ॥

ତ୍ଵଂ ମାତା ତ୍ଵଂ ଶରଣଂ ତ୍ଵଂ ଧାତା ତ୍ଵଂ ଧନଂ ତ୍ଵମାଚାର୍ୟଃ ।
ତ୍ଵଂ ତ୍ରାତା ତ୍ଵଂ ହର୍ତା ଵିପଦାମର୍କ ପ୍ରସୀଦ ମମ ଭାନୋ ॥ 12 ॥

ଇତ୍ୟାର୍ୟାଦ୍ଵାଦଶକଂ ସାଂବସ୍ୟ ପୁରୋ ନଭଃସ୍ଥଲାତ୍ପତିତମ୍ ।
ପଠତାଂ ଭାଗ୍ୟସମୃଦ୍ଧିଃ ସମସ୍ତରୋଗକ୍ଷୟଶ୍ଚ ସ୍ୟାତ୍ ॥ 13 ॥

ଇତି ଶ୍ରୀସାଂବକୃତଦ୍ଵାଦଶାର୍ୟାସୂର୍ୟସ୍ତୁତିଃ ।