ଚର୍ଚା ସ୍ତଵଃ

ପଂଚସ୍ତଵି – 2 ଚର୍ଚାସ୍ତଵଃ >>

ସୌଂଦର୍ୟଵିଭ୍ରମଭୁଵୋ ଭୁଵନାଧିପତ୍ୟ-
-ସଂକଲ୍ପକଲ୍ପତରଵସ୍ତ୍ରିପୁରେ ଜୟଂତି ।
ଏତେ କଵିତ୍ଵକୁମଦପ୍ରକରାଵବୋଧ-
-ପୂର୍ଣେଂଦଵସ୍ତ୍ଵୟି ଜଗଜ୍ଜନନି ପ୍ରଣାମାଃ ॥ 1 ॥

ଦେଵି ସ୍ତୁତିଵ୍ୟତିକରେ କୃତବୁଦ୍ଧୟସ୍ତେ
ଵାଚସ୍ପତି ପ୍ରଭୃତୟୋଽପି ଜଡୀ ଭଵଂତି ।
ତସ୍ମାନ୍ନିସର୍ଗଜଡିମା କତମୋଽହମତ୍ର
ସ୍ତୋତ୍ରଂ ତଵ ତ୍ରିପୁରତାପନପତ୍ନି କର୍ତୁମ୍ ॥ 2 ॥

ମାତସ୍ତଥାପି ଭଵତୀଂ ଭଵତୀଵ୍ରତାପ-
-ଵିଚ୍ଛିତ୍ତୟେ ସ୍ତୁତିମହାର୍ଣଵ କର୍ଣଧାରଃ ।
ସ୍ତୋତୁଂ ଭଵାନି ସ ଭଵଚ୍ଚରଣାରଵିଂଦ-
-ଭକ୍ତିଗ୍ରହଃ କିମପି ମାଂ ମୁଖରୀ କରୋତି ॥ 3 ॥

ସୂତେ ଜଗଂତି ଭଵତୀ ଭଵତୀ ବିଭର୍ତି
ଜାଗର୍ତି ତତ୍କ୍ଷୟକୃତେ ଭଵତୀ ଭଵାନି ।
ମୋହଂ ଭିନତ୍ତି ଭଵତୀ ଭଵତୀ ରୁଣଦ୍ଧି
ଲୀଲାୟିତଂ ଜୟତି ଚିତ୍ରମିଦଂ ଭଵତ୍ୟାଃ ॥ 4 ॥

ୟସ୍ମିନ୍ମନାଗପି ନଵାଂବୁଜପତ୍ରଗୌରୀଂ
ଗୌରୀଂ ପ୍ରସାଦମଧୁରାଂ ଦୃଶମାଦଧାସି ।
ତସ୍ମିନ୍ନିରଂତରମନଂଗଶରାଵକୀର୍ଣ-
-ସୀମଂତିନୀନୟନସଂତତୟଃ ପତଂତି ॥ 5 ॥

ପୃଥ୍ଵୀଭୁଜୋଽପ୍ୟୁଦୟନପ୍ରଭଵସ୍ୟ ତସ୍ୟ
ଵିଦ୍ୟାଧର ପ୍ରଣତି ଚୁଂବିତ ପାଦପୀଠଃ ।
ତଚ୍ଚକ୍ରଵର୍ତିପଦଵୀପ୍ରଣୟଃ ସ ଏଷଃ
ତ୍ଵତ୍ପାଦପଂକଜରଜଃ କଣଜଃ ପ୍ରସାଦଃ ॥ 6 ॥

ତ୍ଵତ୍ପାଦପଂକଜରଜ ପ୍ରଣିପାତପୂର୍ଵୈଃ
ପୁଣ୍ୟୈରନଲ୍ପମତିଭିଃ କୃତିଭିଃ କଵୀଂଦ୍ରୈଃ ।
କ୍ଷୀରକ୍ଷପାକରଦୁକୂଲହିମାଵଦାତା
କୈରପ୍ୟଵାପି ଭୁଵନତ୍ରିତୟେଽପି କୀର୍ତିଃ ॥ 7 ॥

କଲ୍ପଦ୍ରୁମପ୍ରସଵକଲ୍ପିତଚିତ୍ରପୂଜାଂ
ଉଦ୍ଦୀପିତ ପ୍ରିୟତମାମଦରକ୍ତଗୀତିମ୍ ।
ନିତ୍ୟଂ ଭଵାନି ଭଵତୀମୁପଵୀଣୟଂତି
ଵିଦ୍ୟାଧରାଃ କନକଶୈଲଗୁହାଗୃହେଷୁ ॥ 8 ॥

ଲକ୍ଷ୍ମୀଵଶୀକରଣକର୍ମଣି କାମିନୀନାଂ
ଆକର୍ଷଣଵ୍ୟତିକରେଷୁ ଚ ସିଦ୍ଧମଂତ୍ରଃ ।
ନୀରଂଧ୍ରମୋହତିମିରଚ୍ଛିଦୁରପ୍ରଦୀପୋ
ଦେଵି ତ୍ଵଦଂଘ୍ରିଜନିତୋ ଜୟତି ପ୍ରସାଦଃ ॥ 9 ॥

ଦେଵି ତ୍ଵଦଂଘ୍ରିନଖରତ୍ନଭୁଵୋ ମୟୂଖାଃ
ପ୍ରତ୍ୟଗ୍ରମୌକ୍ତିକରୁଚୋ ମୁଦମୁଦ୍ଵହଂତି ।
ସେଵାନତିଵ୍ୟତିକରେ ସୁରସୁଂଦରୀଣାଂ
ସୀମଂତସୀମ୍ନି କୁସୁମସ୍ତବକାୟିତଂ ୟୈଃ ॥ 10 ॥

ମୂର୍ଧ୍ନି ସ୍ଫୁରତ୍ତୁହିନଦୀଧିତିଦୀପ୍ତିଦୀପ୍ତଂ
ମଧ୍ୟେ ଲଲାଟମମରାୟୁଧରଶ୍ମିଚିତ୍ରମ୍ ।
ହୃଚ୍ଚକ୍ରଚୁଂବି ହୁତଭୁକ୍କଣିକାନୁକାରି
ଜ୍ୟୋତିର୍ୟଦେତଦିଦମଂବ ତଵ ସ୍ଵରୂପମ୍ ॥ 11 ॥

ରୂପଂ ତଵ ସ୍ଫୁରିତଚଂଦ୍ରମରୀଚିଗୌରଂ
ଆଲୋକତେ ଶିରସି ଵାଗଧିଦୈଵତଂ ୟଃ ।
ନିଃସୀମସୂକ୍ତିରଚନାମୃତନିର୍ଝରସ୍ୟ
ତସ୍ୟ ପ୍ରସାଦମଧୁରାଃ ପ୍ରସରଂତି ଵାଚଃ ॥ 12 ॥

ସିଂଦୂରପାଂସୁପଟଲଚ୍ଛୁରିତାମିଵ ଦ୍ୟାଂ
ତ୍ଵତ୍ତେଜସା ଜତୁରସସ୍ନପିତାମିଵୋର୍ଵୀମ୍ ।
ୟଃ ପଶ୍ୟତି କ୍ଷଣମପି ତ୍ରିପୁରେ ଵିହାୟ
ଵ୍ରୀଡାଂ ମୃଡାନି ସୁଦୃଶସ୍ତମନୁଦ୍ରଵଂତି ॥ 13 ॥

ମାତର୍ମୁହୂର୍ତମପି ୟଃ ସ୍ମରତି ସ୍ଵରୂପଂ
ଲାକ୍ଷାରସପ୍ରସରତଂତୁନିଭଂ ଭଵତ୍ୟାଃ ।
ଧ୍ୟାୟଂତ୍ୟନନ୍ୟମନସସ୍ତମନଂଗତପ୍ତାଃ
ପ୍ରଦ୍ୟୁମ୍ନସୀମ୍ନି ସୁଭଗତ୍ଵଗୁଣଂ ତରୁଣ୍ୟଃ ॥ 14 ॥

ୟୋଽୟଂ ଚକାସ୍ତି ଗଗନାର୍ଣଵରତ୍ନମିଂଦୁଃ
ୟୋଽୟଂ ସୁରାସୁରଗୁରୁଃ ପୁରୁଷଃ ପୁରାଣଃ ।
ୟଦ୍ଵାମମର୍ଧମିଦମଂଧକସୂଦନସ୍ୟ
ଦେଵି ତ୍ଵମେଵ ତଦିତି ପ୍ରତିପାଦୟଂତି ॥ 15 ॥

ଇଚ୍ଛାନୁରୂପମନୁରୂପଗୁଣପ୍ରକର୍ଷ
ସଂକର୍ଷିଣି ତ୍ଵମଭିମୃଶ୍ୟ ୟଦା ବିଭର୍ଷି ।
ଜାୟେତ ସ ତ୍ରିଭୁଵନୈକ ଗୁରୁସ୍ତଦାନୀଂ
ଦେଵଃ ଶିଵୋଽପି ଭୁଵନତ୍ରୟସୂତ୍ରଧାରଃ ॥ 16 ॥

ଧ୍ୟାତାସି ହୈମଵତି ୟେନ ହିମାଂଶୁରଶ୍ମି-
-ମାଲାମଲଦ୍ୟୁତିରକଲ୍ମଷମାନସେନ ।
ତସ୍ୟାଵିଲଂବମନଵଦ୍ୟମନଂତକଲ୍ପଂ
ଅଲ୍ପୈର୍ଦିନୈଃ ସୃଜସି ସୁଂଦରି ଵାଗ୍ଵିଲାସମ୍ ॥ 17 ॥

ଆଧାରମାରୁତନିରୋଧଵଶେନ ୟେଷାଂ
ସିଂଦୂରରଂଜିତସରୋଜଗୁଣାନୁକାରି ।
ଦୀପ୍ତଂ ହୃଦି ସ୍ଫୁରତି ଦେଵି ଵପୁସ୍ତ୍ଵଦୀୟଂ
ଧ୍ୟାୟଂତି ତାନିହ ସମୀହିତସିଦ୍ଧିସାର୍ଥାଃ ॥ 18 ॥

ୟେ ଚିଂତୟଂତ୍ୟରୁଣମଂଡଲମଧ୍ୟଵର୍ତି
ରୂପଂ ତଵାଂବ ନଵୟାଵକପଂକପିଂଗମ୍ ।
ତେଷାଂ ସଦୈଵ କୁସୁମାୟୁଧବାଣଭିନ୍ନ-
-ଵକ୍ଷଃସ୍ଥଲା ମୃଗଦୃଶୋ ଵଶଗା ଭଵଂତି ॥ 19 ॥

ତ୍ଵାମୈଂଦଵୀମିଵ କଲାମନୁଫାଲଦେଶଂ
ଉଦ୍ଭାସିତାଂବରତଲାମଵଲୋକୟଂତଃ ।
ସଦ୍ୟୋ ଭଵାନି ସୁଧିୟଃ କଵୟୋ ଭଵଂତି
ତ୍ଵଂ ଭାଵନାହିତଧିୟାଂ କୁଲକାମଧେନୁଃ ॥ 20 ॥

ଶର୍ଵାଣି ସର୍ଵଜନଵଂଦିତପାଦପଦ୍ମେ
ପଦ୍ମଚ୍ଛଦଦ୍ୟୁତିଵିଡଂବିତନେତ୍ରଲକ୍ଷ୍ମି ।
ନିଷ୍ପାପମୂର୍ତିଜନମାନସରାଜହଂସି
ହଂସି ତ୍ଵମାପଦମନେକଵିଧାଂ ଜନସ୍ୟ ॥ 21 ॥

ଉତ୍ତପ୍ତହେମରୁଚିରେ ତ୍ରିପୁରେ ପୁନୀହି
ଚେତଶ୍ଚିରଂତନମଘୌଘଵନଂ ଲୁନୀହି ।
କାରାଗୃହେ ନିଗଲବଂଧନୟଂତ୍ରିତସ୍ୟ
ତ୍ଵତ୍ସଂସ୍ମୃତୌ ଝଟିତି ମେ ନିଗଲାସ୍ତ୍ରୁଟଂତି ॥ 22 ॥

ତ୍ଵାଂ ଵ୍ୟାପିନୀତି ସୁମନା ଇତି କୁଂଡଲୀତି
ତ୍ଵାଂ କାମିନୀତି କମଲେତି କଲାଵତୀତି ।
ତ୍ଵାଂ ମାଲିନୀତି ଲଲିତେତ୍ୟପରାଜିତେତି
ଦେଵି ସ୍ତୁଵଂତି ଵିଜୟେତି ଜୟେତ୍ୟୁମେତି ॥ 23 ॥

ଉଦ୍ଦାମକାମପରମାର୍ଥସରୋଜଖଂଡ-
ଚଂଡଦ୍ୟୁତିଦ୍ୟୁତିମପାସିତଷଡ୍ଵିକାରାମ୍ ।
ମୋହଦ୍ଵିପେଂଦ୍ରକଦନୋଦ୍ୟତବୋଧସିଂହ-
-ଲୀଲାଗୁହାଂ ଭଗଵତୀଂ ତ୍ରିପୁରାଂ ନମାମି ॥ 24 ॥

ଗଣେଶଵଟୁକସ୍ତୁତା ରତିସହାୟକାମାନ୍ଵିତା
ସ୍ମରାରିଵରଵିଷ୍ଟରା କୁସୁମବାଣବାଣୈର୍ୟୁତା ।
ଅନଂଗକୁସୁମାଦିଭିଃ ପରିଵୃତା ଚ ସିଦ୍ଧୈସ୍ତ୍ରିଭିଃ
କଦଂବଵନମଧ୍ୟଗା ତ୍ରିପୁରସୁଂଦରୀ ପାତୁ ନଃ ॥ 25 ॥

ରୁଦ୍ରାଣି ଵିଦ୍ରୁମମୟୀଂ ପ୍ରତିମାମିଵ ତ୍ଵାଂ
ୟେ ଚିଂତୟଂତ୍ୟରୁଣକାଂତିମନନ୍ୟରୂପାମ୍ ।
ତାନେତ୍ୟ ପକ୍ଷ୍ମଲଦୃଶଃ ପ୍ରସଭଂ ଭଜଂତେ
କଂଠାଵସକ୍ତମୃଦୁବାହୁଲତାସ୍ତରୁଣ୍ୟଃ ॥ 26 ॥

ତ୍ଵଦ୍ରୂପୈକନିରୂପଣପ୍ରଣୟିତାବଂଧୋ ଦୃଶୋସ୍ତ୍ଵଦ୍ଗୁଣ-
-ଗ୍ରାମାକର୍ଣନରାଗିତା ଶ୍ରଵଣୟୋସ୍ତ୍ଵତ୍ସଂସ୍ମୃତିଶ୍ଚେତସି ।
ତ୍ଵତ୍ପାଦାର୍ଚନଚାତୁରୀ କରୟୁଗେ ତ୍ଵତ୍କୀର୍ତିତଂ ଵାଚି ମେ
କୁତ୍ରାପି ତ୍ଵଦୁପାସନଵ୍ୟସନିତା ମେ ଦେଵି ମା ଶାମ୍ୟତୁ ॥ 27 ॥

ତ୍ଵଦ୍ରୂପମୁଲ୍ଲସିତଦାଡିମପୁଷ୍ପରକ୍ତଂ
ଉଦ୍ଭାଵୟେନ୍ମଦନଦୈଵତମକ୍ଷରଂ ୟଃ ।
ତଂ ରୂପହୀନମପି ମନ୍ମଥନିର୍ଵିଶେଷଂ
ଆଲୋକୟଂତ୍ୟୁରୁନିତଂବତଟାସ୍ତରୁଣ୍ୟଃ ॥ 28 ॥

ବ୍ରହ୍ମେଂଦ୍ରରୁଦ୍ରହରିଚଂଦ୍ରସହସ୍ରରଶ୍ମି-
-ସ୍କଂଦଦ୍ଵିପାନନହୁତାଶନଵଂଦିତାୟୈ ।
ଵାଗୀଶ୍ଵରି ତ୍ରିଭୁଵନେଶ୍ଵରି ଵିଶ୍ଵମାତଃ
ଅଂତର୍ବହିଶ୍ଚ କୃତସଂସ୍ଥିତୟେ ନମସ୍ତେ ॥ 29 ॥

କସ୍ତୋତ୍ରମେତଦନୁଵାସରମୀଶ୍ଵରାୟାଃ
ଶ୍ରେୟସ୍କରଂ ପଠତି ଵା ୟଦି ଵା ଶୃଣୋତି ।
ତସ୍ୟେପ୍ସିତଂ ଫଲତି ରାଜଭିରୀଡ୍ୟତେଽସୌ
ଜାୟେତ ସ ପ୍ରିୟତମୋ ମଦିରେକ୍ଷଣାନାମ୍ ॥ 30 ॥

ଇତି ଶ୍ରୀକାଳିଦାସ ଵିରଚିତ ପଂଚସ୍ତଵ୍ୟାଂ ଦ୍ଵିତୀୟଃ ଚର୍ଚାସ୍ତଵଃ ।