ବ୍ରହ୍ମଜ୍ଞାନାଵଳୀମାଲା

ସକୃଚ୍ଛ୍ରଵଣମାତ୍ରେଣ ବ୍ରହ୍ମଜ୍ଞାନଂ ୟତୋ ଭଵେତ୍ ।
ବ୍ରହ୍ମଜ୍ଞାନାଵଲୀମାଲା ସର୍ଵେଷାଂ ମୋକ୍ଷସିଦ୍ଧୟେ ॥ 1॥

ଅସଂଗୋଽହମସଂଗୋଽହମସଂଗୋଽହଂ ପୁନଃ ପୁନଃ ।
ସଚ୍ଚିଦାନଂଦରୂପୋଽହମହମେଵାହମଵ୍ୟୟଃ ॥ 2॥

ନିତ୍ୟଶୁଦ୍ଧଵିମୁକ୍ତୋଽହଂ ନିରାକାରୋଽହମଵ୍ୟୟଃ ।
ଭୂମାନଂଦସ୍ଵରୂପୋଽହମହମେଵାହମଵ୍ୟୟଃ ॥ 3॥

ନିତ୍ୟୋଽହଂ ନିରଵଦ୍ୟୋଽହଂ ନିରାକାରୋଽହମୁଚ୍ୟତେ ।
ପରମାନଂଦରୂପୋଽହମହମେଵାହମଵ୍ୟୟଃ ॥ 4॥

ଶୁଦ୍ଧଚୈତନ୍ୟରୂପୋଽହମାତ୍ମାରାମୋଽହମେଵ ଚ ।
ଅଖଂଡାନଂଦରୂପୋଽହମହମେଵାହମଵ୍ୟୟଃ ॥ 5॥

ପ୍ରତ୍ୟକ୍ଚୈତନ୍ୟରୂପୋଽହଂ ଶାଂତୋଽହଂ ପ୍ରକୃତେଃ ପରଃ ।
ଶାଶ୍ଵତାନଂଦରୂପୋଽହମହମେଵାହମଵ୍ୟୟଃ ॥ 6॥

ତତ୍ତ୍ଵାତୀତଃ ପରାତ୍ମାହଂ ମଧ୍ୟାତୀତଃ ପରଃ ଶିଵଃ ।
ମାୟାତୀତଃ ପରଂଜ୍ୟୋତିରହମେଵାହମଵ୍ୟୟଃ ॥ 7॥

ନାନାରୂପଵ୍ୟତୀତୋଽହଂ ଚିଦାକାରୋଽହମଚ୍ୟୁତଃ ।
ସୁଖରୂପସ୍ଵରୂପୋଽହମହମେଵାହମଵ୍ୟୟଃ ॥ 8॥

ମାୟାତତ୍କାର୍ୟଦେହାଦି ମମ ନାସ୍ତ୍ୟେଵ ସର୍ଵଦା ।
ସ୍ଵପ୍ରକାଶୈକରୂପୋଽହମହମେଵାହମଵ୍ୟୟଃ ॥ 9॥

ଗୁଣତ୍ରୟଵ୍ୟତୀତୋଽହଂ ବ୍ରହ୍ମାଦୀନାଂ ଚ ସାକ୍ଷ୍ୟହମ୍ ।
ଅନଂତାନଂତରୂପୋଽହମହମେଵାହମଵ୍ୟୟଃ ॥ 10॥

ଅଂତର୍ୟାମିସ୍ଵରୂପୋଽହଂ କୂଟସ୍ଥଃ ସର୍ଵଗୋଽସ୍ମ୍ୟହମ୍ ।
ପରମାତ୍ମସ୍ଵରୂପୋଽହମହମେଵାହମଵ୍ୟୟଃ ॥ 11॥

ନିଷ୍କଲୋଽହଂ ନିଷ୍କ୍ରିୟୋଽହଂ ସର୍ଵାତ୍ମାଦ୍ୟଃ ସନାତନଃ ।
ଅପରୋକ୍ଷସ୍ଵରୂପୋଽହମହମେଵାହମଵ୍ୟୟଃ ॥ 12॥

ଦ୍ଵଂଦ୍ଵାଦିସାକ୍ଷିରୂପୋଽହମଚଲୋଽହଂ ସନାତନଃ ।
ସର୍ଵସାକ୍ଷିସ୍ଵରୂପୋଽହମହମେଵାହମଵ୍ୟୟଃ ॥ 13॥

ପ୍ରଜ୍ଞାନଘନ ଏଵାହଂ ଵିଜ୍ଞାନଘନ ଏଵ ଚ ।
ଅକର୍ତାହମଭୋକ୍ତାହମହମେଵାହମଵ୍ୟୟଃ ॥ 14॥

ନିରାଧାରସ୍ଵରୂପୋଽହଂ ସର୍ଵାଧାରୋଽହମେଵ ଚ ।
ଆପ୍ତକାମସ୍ଵରୂପୋଽହମହମେଵାହମଵ୍ୟୟଃ ॥ 15॥

ତାପତ୍ରୟଵିନିର୍ମୁକ୍ତୋ ଦେହତ୍ରୟଵିଲକ୍ଷଣଃ ।
ଅଵସ୍ଥାତ୍ରୟସାକ୍ଷ୍ୟସ୍ମି ଚାହମେଵାହମଵ୍ୟୟଃ ॥ 16॥

ଦୃଗ୍ଦୃଶ୍ୟୌ ଦ୍ଵୌ ପଦାର୍ଥୌ ସ୍ତଃ ପରସ୍ପରଵିଲକ୍ଷଣୌ ।
ଦୃଗ୍ବ୍ରହ୍ମ ଦୃଶ୍ୟଂ ମାୟେତି ସର୍ଵଵେଦାଂତଡିଂଡିମଃ ॥ 17॥

ଅହଂ ସାକ୍ଷୀତି ୟୋ ଵିଦ୍ୟାଦ୍ଵିଵିଚ୍ୟୈଵଂ ପୁନଃ ପୁନଃ ।
ସ ଏଵ ମୁକ୍ତଃ ସୋ ଵିଦ୍ଵାନିତି ଵେଦାଂତଡିଂଡିମଃ ॥ 18॥

ଘଟକୁଡ୍ୟାଦିକଂ ସର୍ଵଂ ମୃତ୍ତିକାମାତ୍ରମେଵ ଚ ।
ତଦ୍ଵଦ୍ବ୍ରହ୍ମ ଜଗତ୍ସର୍ଵମିତି ଵେଦାଂତଡିଂଡିମଃ ॥ 19॥

ବ୍ରହ୍ମ ସତ୍ୟଂ ଜଗନ୍ମିଥ୍ୟା ଜୀଵୋ ବ୍ରହ୍ମୈଵ ନାପରଃ ।
ଅନେନ ଵେଦ୍ୟଂ ସଚ୍ଛାସ୍ତ୍ରମିତି ଵେଦାଂତଡିଂଡିମଃ ॥ 20॥

ଅଂତର୍ଜ୍ୟୋତିର୍ବହିର୍ଜ୍ୟୋତିଃ ପ୍ରତ୍ୟଗ୍ଜ୍ୟୋତିଃ ପରାତ୍ପରଃ ।
ଜ୍ୟୋତିର୍ଜ୍ୟୋତିଃ ସ୍ଵୟଂଜ୍ୟୋତିରାତ୍ମଜ୍ୟୋତିଃ ଶିଵୋଽସ୍ମ୍ୟହମ୍ ॥ 21॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ
ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ
ଶ୍ରୀମଚ୍ଛଂକରଭଗଵତଃ କୃତୌ
ବ୍ରହ୍ମଜ୍ଞାନାଵଲୀମାଲା ସଂପୂର୍ଣା ॥