𑌵𑌿𑌘𑍍𑌨𑍇𑌶𑍍𑌵𑌰 𑌅𑌷𑍍𑌟𑍋𑌤𑍍𑌤𑌰 𑌶𑌤 𑌨𑌾𑌮 𑌸𑍍𑌤𑍋𑌤𑍍𑌰𑌮𑍍

𑌵𑌿𑌨𑌾𑌯𑌕𑍋 𑌵𑌿𑌘𑍍𑌨𑌰𑌾𑌜𑍋 𑌗𑍌𑌰𑍀𑌪𑍁𑌤𑍍𑌰𑍋 𑌗𑌣𑍇𑌶𑍍𑌵𑌰𑌃 ।
𑌸𑍍𑌕𑌂𑌦𑌾𑌗𑍍𑌰𑌜𑍋𑌽𑌵𑍍𑌯𑌯𑌃 𑌪𑍂𑌤𑍋 𑌦𑌕𑍍𑌷𑍋𑌽𑌧𑍍𑌯𑌕𑍍𑌷𑍋 𑌦𑍍𑌵𑌿𑌜𑌪𑍍𑌰𑌿𑌯𑌃 ॥ 1 ॥

𑌅𑌗𑍍𑌨𑌿𑌗𑌰𑍍𑌵𑌚𑍍𑌛𑌿𑌦𑌿𑌂𑌦𑍍𑌰𑌶𑍍𑌰𑍀𑌪𑍍𑌰𑌦𑍋 𑌵𑌾𑌣𑍀𑌪𑍍𑌰𑌦𑍋𑌽𑌵𑍍𑌯𑌯𑌃
𑌸𑌰𑍍𑌵𑌸𑌿𑌦𑍍𑌧𑌿𑌪𑍍𑌰𑌦-𑌶𑍍𑌶𑌰𑍍𑌵𑌤𑌨𑌯𑌃 𑌶𑌰𑍍𑌵𑌰𑍀𑌪𑍍𑌰𑌿𑌯𑌃 ॥ 2 ॥

𑌸𑌰𑍍𑌵𑌾𑌤𑍍𑌮𑌕𑌃 𑌸𑍃𑌷𑍍𑌟𑌿𑌕𑌰𑍍𑌤𑌾 𑌦𑍇𑌵𑍋𑌽𑌨𑍇𑌕𑌾𑌰𑍍𑌚𑌿𑌤𑌶𑍍𑌶𑌿𑌵𑌃 ।
𑌶𑍁𑌦𑍍𑌧𑍋 𑌬𑍁𑌦𑍍𑌧𑌿𑌪𑍍𑌰𑌿𑌯-𑌶𑍍𑌶𑌾𑌂𑌤𑍋 𑌬𑍍𑌰𑌹𑍍𑌮𑌚𑌾𑌰𑍀 𑌗𑌜𑌾𑌨𑌨𑌃 ॥ 3 ॥

𑌦𑍍𑌵𑍈𑌮𑌾𑌤𑍍𑌰𑍇𑌯𑍋 𑌮𑍁𑌨𑌿𑌸𑍍𑌤𑍁𑌤𑍍𑌯𑍋 𑌭𑌕𑍍𑌤𑌵𑌿𑌘𑍍𑌨𑌵𑌿𑌨𑌾𑌶𑌨𑌃 ।
𑌏𑌕𑌦𑌂𑌤-𑌶𑍍𑌚𑌤𑍁𑌰𑍍𑌬𑌾𑌹𑍁-𑌶𑍍𑌚𑌤𑍁𑌰-𑌶𑍍𑌶𑌕𑍍𑌤𑌿𑌸𑌂𑌯𑍁𑌤𑌃 ॥ 4 ॥

𑌲𑌂𑌬𑍋𑌦𑌰-𑌶𑍍𑌶𑍂𑌰𑍍𑌪𑌕𑌰𑍍𑌣𑍋 𑌹𑌰-𑌰𑍍𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑌃 ।
𑌕𑌾𑌲𑍋 𑌗𑍍𑌰𑌹𑌪𑌤𑌿𑌃 𑌕𑌾𑌮𑍀 𑌸𑍋𑌮𑌸𑍂𑌰𑍍𑌯𑌾𑌗𑍍𑌨𑌿𑌲𑍋𑌚𑌨𑌃 ॥ 5 ॥

𑌪𑌾𑌶𑌾𑌂𑌕𑍁𑌶𑌧𑌰-𑌶𑍍𑌚𑌂𑌡𑍋 𑌗𑍁𑌣𑌾𑌤𑍀𑌤𑍋 𑌨𑌿𑌰𑌂𑌜𑌨𑌃 ।
𑌅𑌕𑌲𑍍𑌮𑌷-𑌸𑍍𑌸𑍍𑌵𑌯𑌂𑌸𑌿𑌦𑍍𑌧-𑌸𑍍𑌸𑌿𑌦𑍍𑌧𑌾𑌰𑍍𑌚𑌿𑌤𑌪𑌦𑌾𑌂𑌬𑍁𑌜𑌃 ॥ 6 ॥

𑌬𑍀𑌜𑌪𑍂𑌰𑌫𑌲𑌾𑌸𑌕𑍍𑌤𑍋 𑌵𑌰𑌦-𑌶𑍍𑌶𑌾𑌶𑍍𑌵𑌤𑌃 𑌕𑍃𑌤𑍀 ।
𑌵𑌿𑌦𑍍𑌵𑌤𑍍 𑌪𑍍𑌰𑌿𑌯𑍋 𑌵𑍀𑌤𑌭𑌯𑍋 𑌗𑌦𑍀 𑌚𑌕𑍍𑌰𑍀𑌕𑍍𑌷𑍁𑌚𑌾𑌪𑌧𑍃𑌤𑍍 ॥ 𑍭 ॥

𑌶𑍍𑌰𑍀𑌦𑍋𑌽𑌜 𑌉𑌤𑍍𑌪𑌲𑌕𑌰𑌃 𑌶𑍍𑌰𑍀𑌪𑌤𑌿𑌃 𑌸𑍍𑌤𑍁𑌤𑌿𑌹𑌰𑍍𑌷𑌿𑌤𑌃 ।
𑌕𑍁𑌲𑌾𑌦𑍍𑌰𑌿𑌭𑍇𑌤𑍍𑌤𑌾 𑌜𑌟𑌿𑌲𑌃 𑌕𑌲𑌿𑌕𑌲𑍍𑌮𑌷𑌨𑌾𑌶𑌨𑌃 ॥ 𑍮 ॥

𑌚𑌂𑌦𑍍𑌰𑌚𑍂𑌡𑌾𑌮𑌣𑌿𑌃 𑌕𑌾𑌂𑌤𑌃 𑌪𑌾𑌪𑌹𑌾𑌰𑍀 𑌸𑌮𑌾𑌹𑌿𑌤𑌃 ।
𑌅𑌶𑍍𑌰𑌿𑌤-𑌶𑍍𑌰𑍀𑌕𑌰-𑌸𑍍𑌸𑍌𑌮𑍍𑌯𑍋 𑌭𑌕𑍍𑌤𑌵𑌾𑌂𑌛𑌿𑌤𑌦𑌾𑌯𑌕𑌃 ॥ 𑍯 ॥

𑌶𑌾𑌂𑌤𑌃 𑌕𑍈𑌵𑌲𑍍𑌯𑌸𑍁𑌖𑌦-𑌸𑍍𑌸𑌚𑍍𑌚𑌿𑌦𑌾𑌨𑌂𑌦𑌵𑌿𑌗𑍍𑌰𑌹𑌃 ।
𑌜𑍍𑌞𑌾𑌨𑍀 𑌦𑌯𑌾𑌯𑍁𑌤𑍋 𑌦𑌾𑌂𑌤𑍋 𑌬𑍍𑌰𑌹𑍍𑌮𑌦𑍍𑌵𑍇𑌷𑌵𑌿𑌵𑌰𑍍𑌜𑌿𑌤𑌃 ॥ 10 ॥

𑌪𑍍𑌰𑌮𑌤𑍍𑌤𑌦𑍈𑌤𑍍𑌯𑌭𑌯𑌦𑌃 𑌶𑍍𑌰𑍀𑌕𑌂𑌠𑍋 𑌵𑌿𑌬𑍁𑌧𑍇𑌶𑍍𑌵𑌰𑌃 ।
𑌰𑌮𑌾𑌰𑍍𑌚𑌿𑌤𑍋 𑌨𑌿𑌧𑌿-𑌰𑍍𑌨𑌾𑌗𑌰𑌾𑌜𑌯𑌜𑍍𑌞𑍋𑌪𑌵𑍀𑌤𑌵𑌾𑌨𑍍 ॥ 11 ॥

𑌸𑍍𑌥𑍂𑌲𑌕𑌂𑌠𑌃 𑌸𑍍𑌵𑌯𑌂𑌕𑌰𑍍𑌤𑌾 𑌸𑌾𑌮𑌘𑍋𑌷𑌪𑍍𑌰𑌿𑌯𑌃 𑌪𑌰𑌃 ।
𑌸𑍍𑌥𑍂𑌲𑌤𑍁𑌂𑌡𑍋𑌽𑌗𑍍𑌰𑌣𑍀-𑌰𑍍𑌧𑍀𑌰𑍋 𑌵𑌾𑌗𑍀𑌶𑌃-𑌸𑌿𑌦𑍍𑌧𑌿𑌦𑌾𑌯𑌕𑌃 ॥ 12 ॥

𑌦𑍂𑌰𑍍𑌵𑌾𑌬𑌿𑌲𑍍𑌵𑌪𑍍𑌰𑌿𑌯𑍋𑌽𑌵𑍍𑌯𑌕𑍍𑌤𑌮𑍂𑌰𑍍𑌤𑌿-𑌰𑌦𑍍𑌭𑍁𑌤𑌮𑍂𑌰𑍍𑌤𑌿𑌮𑌾𑌨𑍍 ।
𑌶𑍈𑌲𑍇𑌂𑌦𑍍𑌰𑌤𑌨𑍁𑌜𑍋𑌤𑍍𑌸𑌂𑌗𑌖𑍇𑌲𑌨𑍋𑌤𑍍𑌸𑍁𑌕𑌮𑌾𑌨𑌸𑌃 ॥ 13 ॥

𑌸𑍍𑌵𑌲𑌾𑌵𑌣𑍍𑌯𑌸𑍁𑌧𑌾𑌸𑌾𑌰𑌜𑌿𑌤𑌮𑌨𑍍𑌮𑌥𑌵𑌿𑌗𑍍𑌰𑌹𑌃 ।
𑌸𑌮𑌸𑍍𑌤𑌜𑌗𑌦𑌾𑌧𑌾𑌰𑍋 𑌮𑌾𑌯𑍀 𑌮𑍂𑌷𑌕𑌵𑌾𑌹𑌨𑌃 ॥ 14 ॥

𑌹𑍃𑌷𑍍𑌟-𑌸𑍍𑌤𑍁𑌷𑍍𑌟𑌃 𑌪𑍍𑌰𑌸𑌨𑍍𑌨𑌾𑌤𑍍𑌮𑌾 𑌸𑌰𑍍𑌵𑌸𑌿𑌦𑍍𑌧𑌿𑌪𑍍𑌰𑌦𑌾𑌯𑌕𑌃 ।
𑌅𑌷𑍍𑌟𑍋𑌤𑍍𑌤𑌰𑌶𑌤𑍇𑌨𑍈𑌵𑌂 𑌨𑌾𑌮𑍍𑌨𑌾𑌂 𑌵𑌿𑌘𑍍𑌨𑍇𑌶𑍍𑌵𑌰𑌂 𑌵𑌿𑌭𑍁𑌮𑍍 ॥ 15 ॥

𑌤𑍁𑌷𑍍𑌟𑌾𑌵 𑌶𑌂𑌕𑌰𑌃 𑌪𑍁𑌤𑍍𑌰𑌂 𑌤𑍍𑌰𑌿𑌪𑍁𑌰𑌂 𑌹𑌂𑌤𑍁𑌮𑍁𑌦𑍍𑌯𑌤𑌃 ।
𑌯𑌃 𑌪𑍂𑌜𑌯𑍇𑌦𑌨𑍇𑌨𑍈𑌵 𑌭𑌕𑍍𑌤𑍍𑌯𑌾 𑌸𑌿𑌦𑍍𑌧𑌿𑌵𑌿𑌨𑌾𑌯𑌕𑌮𑍍 ॥ 16 ॥

𑌦𑍂𑌰𑍍𑌵𑌾𑌦𑌳𑍈-𑌰𑍍𑌬𑌿𑌲𑍍𑌵𑌪𑌤𑍍𑌰𑍈𑌃 𑌪𑍁𑌷𑍍𑌪𑍈𑌰𑍍𑌵𑌾 𑌚𑌂𑌦𑌨𑌾𑌕𑍍𑌷𑌤𑍈𑌃 ।
𑌸𑌰𑍍𑌵𑌾𑌨𑍍𑌕𑌾𑌮𑌾𑌨𑌵𑌾𑌪𑍍𑌨𑍋𑌤𑌿 𑌸𑌰𑍍𑌵𑌵𑌿𑌘𑍍𑌨𑍈𑌃 𑌪𑍍𑌰𑌮𑍁𑌚𑍍𑌯𑌤𑍇 ॥

𑌇𑌤𑌿 𑌵𑌿𑌘𑍍𑌨𑍇𑌶𑍍𑌵𑌰𑌾𑌷𑍍𑌟𑍋𑌤𑍍𑌤𑌰 𑌶𑌤𑌨𑌾𑌮𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍