𑌮𑍁𑌂𑌡𑌕 𑌉𑌪𑌨𑌿𑌷𑌦𑍍 – 𑌤𑍃𑌤𑍀𑌯 𑌮𑍁𑌂𑌡𑌕, 𑌦𑍍𑌵𑌿𑌤𑍀𑌯 𑌕𑌾𑌂𑌡𑌃

॥ 𑌤𑍃𑌤𑍀𑌯𑌮𑍁𑌂𑌡𑌕𑍇 𑌦𑍍𑌵𑌿𑌤𑍀𑌯𑌃 𑌖𑌂𑌡𑌃 ॥

𑌸 𑌵𑍇𑌦𑍈𑌤𑌤𑍍 𑌪𑌰𑌮𑌂 𑌬𑍍𑌰𑌹𑍍𑌮 𑌧𑌾𑌮
𑌯𑌤𑍍𑌰 𑌵𑌿𑌶𑍍𑌵𑌂 𑌨𑌿𑌹𑌿𑌤𑌂 𑌭𑌾𑌤𑌿 𑌶𑍁𑌭𑍍𑌰𑌮𑍍 ।
𑌉𑌪𑌾𑌸𑌤𑍇 𑌪𑍁𑌰𑍁𑌷𑌂-𑌯𑍇𑌁 𑌹𑍍𑌯𑌕𑌾𑌮𑌾𑌸𑍍𑌤𑍇
𑌶𑍁𑌕𑍍𑌰𑌮𑍇𑌤𑌦𑌤𑌿𑌵𑌰𑍍𑌤𑌂𑌤𑌿 𑌧𑍀𑌰𑌾𑌃 ॥ 1॥

𑌕𑌾𑌮𑌾𑌨𑍍 𑌯𑌃 𑌕𑌾𑌮𑌯𑌤𑍇 𑌮𑌨𑍍𑌯𑌮𑌾𑌨𑌃
𑌸 𑌕𑌾𑌮𑌭𑌿𑌰𑍍𑌜𑌾𑌯𑌤𑍇 𑌤𑌤𑍍𑌰 𑌤𑌤𑍍𑌰 ।
𑌪𑌰𑍍𑌯𑌾𑌪𑍍𑌤𑌕𑌾𑌮𑌸𑍍𑌯 𑌕𑍃𑌤𑌾𑌤𑍍𑌮𑌨𑌸𑍍𑌤𑍁
𑌇𑌹𑍈𑌵 𑌸𑌰𑍍𑌵𑍇 𑌪𑍍𑌰𑌵𑌿𑌲𑍀𑌯𑌂𑌤𑌿 𑌕𑌾𑌮𑌾𑌃 ॥ 2॥

𑌨𑌾𑌯𑌮𑌾𑌤𑍍𑌮𑌾 𑌪𑍍𑌰𑌵𑌚𑌨𑍇𑌨 𑌲𑌭𑍍𑌯𑍋
𑌨 𑌮𑍇𑌧𑌯𑌾 𑌨 𑌬𑌹𑍁𑌨𑌾 𑌶𑍍𑌰𑍁𑌤𑍇𑌨 ।
𑌯𑌮𑍇𑌵𑍈𑌷 𑌵𑍃𑌣𑍁𑌤𑍇 𑌤𑍇𑌨 𑌲𑌭𑍍𑌯-
𑌸𑍍𑌤𑌸𑍍𑌯𑍈𑌷 𑌆𑌤𑍍𑌮𑌾 𑌵𑌿𑌵𑍃𑌣𑍁𑌤𑍇 𑌤𑌨𑍂𑌂 𑌸𑍍𑌵𑌾𑌮𑍍 ॥ 3॥

𑌨𑌾𑌯𑌮𑌾𑌤𑍍𑌮𑌾 𑌬𑌲𑌹𑍀𑌨𑍇𑌨 𑌲𑌭𑍍𑌯𑍋
𑌨 𑌚 𑌪𑍍𑌰𑌮𑌾𑌦𑌾𑌤𑍍 𑌤𑌪𑌸𑍋 𑌵𑌾𑌪𑍍𑌯𑌲𑌿𑌂𑌗𑌾𑌤𑍍 ।
𑌏𑌤𑍈𑌰𑍁𑌪𑌾𑌯𑍈𑌰𑍍𑌯𑌤𑌤𑍇 𑌯𑌸𑍍𑌤𑍁 𑌵𑌿𑌦𑍍𑌵𑌾𑌂-
𑌸𑍍𑌤𑌸𑍍𑌯𑍈𑌷 𑌆𑌤𑍍𑌮𑌾 𑌵𑌿𑌶𑌤𑍇 𑌬𑍍𑌰𑌹𑍍𑌮𑌧𑌾𑌮 ॥ 4॥

𑌸𑌂𑌪𑍍𑌰𑌾𑌪𑍍𑌯𑍈𑌨𑌮𑍃𑌷𑌯𑍋 𑌜𑍍𑌞𑌾𑌨𑌤𑍃𑌪𑍍𑌤𑌾𑌃
𑌕𑍃𑌤𑌾𑌤𑍍𑌮𑌾𑌨𑍋 𑌵𑍀𑌤𑌰𑌾𑌗𑌾𑌃 𑌪𑍍𑌰𑌶𑌾𑌂𑌤𑌾𑌃 ।
𑌤𑍇 𑌸𑌰𑍍𑌵𑌗𑌂 𑌸𑌰𑍍𑌵𑌤𑌃 𑌪𑍍𑌰𑌾𑌪𑍍𑌯 𑌧𑍀𑌰𑌾
𑌯𑍁𑌕𑍍𑌤𑌾𑌤𑍍𑌮𑌾𑌨𑌃 𑌸𑌰𑍍𑌵𑌮𑍇𑌵𑌾𑌵𑌿𑌶𑌂𑌤𑌿 ॥ 5॥

𑌵𑍇𑌦𑌾𑌂𑌤𑌵𑌿𑌜𑍍𑌞𑌾𑌨𑌸𑍁𑌨𑌿𑌶𑍍𑌚𑌿𑌤𑌾𑌰𑍍𑌥𑌾𑌃
𑌸𑌂𑌨𑍍𑌯𑌾𑌸𑌯𑍋𑌗𑌾𑌦𑍍 𑌯𑌤𑌯𑌃 𑌶𑍁𑌦𑍍𑌧𑌸𑌤𑍍𑌤𑍍𑌵𑌾𑌃 ।
𑌤𑍇 𑌬𑍍𑌰𑌹𑍍𑌮𑌲𑍋𑌕𑍇𑌷𑍁 𑌪𑌰𑌾𑌂𑌤𑌕𑌾𑌲𑍇
𑌪𑌰𑌾𑌮𑍃𑌤𑌾𑌃 𑌪𑌰𑌿𑌮𑍁𑌚𑍍𑌯𑌂𑌤𑌿 𑌸𑌰𑍍𑌵𑍇 ॥ 6॥

𑌗𑌤𑌾𑌃 𑌕𑌲𑌾𑌃 𑌪𑌂𑌚𑌦𑌶 𑌪𑍍𑌰𑌤𑌿𑌷𑍍𑌠𑌾
𑌦𑍇𑌵𑌾𑌶𑍍𑌚 𑌸𑌰𑍍𑌵𑍇 𑌪𑍍𑌰𑌤𑌿𑌦𑍇𑌵𑌤𑌾𑌸𑍁 ।
𑌕𑌰𑍍𑌮𑌾𑌣𑌿 𑌵𑌿𑌜𑍍𑌞𑌾𑌨𑌮𑌯𑌶𑍍𑌚 𑌆𑌤𑍍𑌮𑌾
𑌪𑌰𑍇𑌽𑌵𑍍𑌯𑌯𑍇 𑌸𑌰𑍍𑌵𑍇 𑌏𑌕𑍀𑌭𑌵𑌂𑌤𑌿 ॥ 𑍭॥

𑌯𑌥𑌾 𑌨𑌦𑍍𑌯𑌃 𑌸𑍍𑌯𑌂𑌦𑌮𑌾𑌨𑌾𑌃 𑌸𑌮𑍁𑌦𑍍𑌰𑍇𑌽
𑌸𑍍𑌤𑌂 𑌗𑌚𑍍𑌛𑌂𑌤𑌿 𑌨𑌾𑌮𑌰𑍂𑌪𑍇 𑌵𑌿𑌹𑌾𑌯 ।
𑌤𑌥𑌾 𑌵𑌿𑌦𑍍𑌵𑌾𑌨𑍍 𑌨𑌾𑌮𑌰𑍂𑌪𑌾𑌦𑍍𑌵𑌿𑌮𑍁𑌕𑍍𑌤𑌃
𑌪𑌰𑌾𑌤𑍍𑌪𑌰𑌂 𑌪𑍁𑌰𑍁𑌷𑌮𑍁𑌪𑍈𑌤𑌿 𑌦𑌿𑌵𑍍𑌯𑌮𑍍 ॥ 𑍮॥

𑌸 𑌯𑍋 𑌹 𑌵𑍈 𑌤𑌤𑍍 𑌪𑌰𑌮𑌂 𑌬𑍍𑌰𑌹𑍍𑌮 𑌵𑍇𑌦
𑌬𑍍𑌰𑌹𑍍𑌮𑍈𑌵 𑌭𑌵𑌤𑌿 𑌨𑌾𑌸𑍍𑌯𑌾𑌬𑍍𑌰𑌹𑍍𑌮𑌵𑌿𑌤𑍍𑌕𑍁𑌲𑍇 𑌭𑌵𑌤𑌿 ।
𑌤𑌰𑌤𑌿 𑌶𑍋𑌕𑌂 𑌤𑌰𑌤𑌿 𑌪𑌾𑌪𑍍𑌮𑌾𑌨𑌂 𑌗𑍁𑌹𑌾𑌗𑍍𑌰𑌂𑌥𑌿𑌭𑍍𑌯𑍋
𑌵𑌿𑌮𑍁𑌕𑍍𑌤𑍋𑌽𑌮𑍃𑌤𑍋 𑌭𑌵𑌤𑌿 ॥ 𑍯॥

𑌤𑌦𑍇𑌤𑌦𑍃𑌚𑌾𑌽𑌭𑍍𑌯𑍁𑌕𑍍𑌤𑌮𑍍 ।
𑌕𑍍𑌰𑌿𑌯𑌾𑌵𑌂𑌤𑌃 𑌶𑍍𑌰𑍋𑌤𑍍𑌰𑌿𑌯𑌾 𑌬𑍍𑌰𑌹𑍍𑌮𑌨𑌿𑌷𑍍𑌠𑌾𑌃
𑌸𑍍𑌵𑌯𑌂 𑌜𑍁𑌹𑍍𑌵𑌤 𑌏𑌕𑌰𑍍​𑌷𑌿𑌂 𑌶𑍍𑌰𑌦𑍍𑌧𑌯𑌂𑌤𑌃 ।
𑌤𑍇𑌷𑌾𑌮𑍇𑌵𑍈𑌤𑌾𑌂 𑌬𑍍𑌰𑌹𑍍𑌮𑌵𑌿𑌦𑍍𑌯𑌾𑌂-𑌵𑌁𑌦𑍇𑌤
𑌶𑌿𑌰𑍋𑌵𑍍𑌰𑌤𑌂-𑌵𑌿𑌁𑌧𑌿𑌵𑌦𑍍 𑌯𑍈𑌸𑍍𑌤𑍁 𑌚𑍀𑌰𑍍𑌣𑌮𑍍 ॥ 10॥

𑌤𑌦𑍇𑌤𑌤𑍍 𑌸𑌤𑍍𑌯𑌮𑍃𑌷𑌿𑌰𑌂𑌗𑌿𑌰𑌾𑌃
𑌪𑍁𑌰𑍋𑌵𑌾𑌚 𑌨𑍈𑌤𑌦𑌚𑍀𑌰𑍍𑌣𑌵𑍍𑌰𑌤𑍋𑌽𑌧𑍀𑌤𑍇 ।
𑌨𑌮𑌃 𑌪𑌰𑌮𑌋𑌷𑌿𑌭𑍍𑌯𑍋 𑌨𑌮𑌃 𑌪𑌰𑌮𑌋𑌷𑌿𑌭𑍍𑌯𑌃 ॥ 11॥

॥ 𑌇𑌤𑌿 𑌮𑍁𑌂𑌡𑌕𑍋𑌪𑌨𑌿𑌷𑌦𑌿 𑌤𑍃𑌤𑍀𑌯𑌮𑍁𑌂𑌡𑌕𑍇 𑌦𑍍𑌵𑌿𑌤𑍀𑌯𑌃 𑌖𑌂𑌡𑌃 ॥

॥ 𑌇𑌤𑍍𑌯𑌥𑌰𑍍𑌵𑌵𑍇𑌦𑍀𑌯 𑌮𑍁𑌂𑌡𑌕𑍋𑌪𑌨𑌿𑌷𑌤𑍍𑌸𑌮𑌾𑌪𑍍𑌤𑌾 ॥

𑌓𑌂 𑌭॒𑌦𑍍𑌰𑌂 𑌕𑌰𑍍𑌣𑍇॑𑌭𑌿𑌃 𑌶𑍃𑌣𑍁॒𑌯𑌾𑌮॑ 𑌦𑍇𑌵𑌾𑌃 । 𑌭॒𑌦𑍍𑌰𑌂 𑌪॑𑌶𑍍𑌯𑍇𑌮𑌾॒𑌕𑍍𑌷𑌭𑌿॒-𑌰𑍍𑌯𑌜॑𑌤𑍍𑌰𑌾𑌃 । 𑌸𑍍𑌥𑌿॒𑌰𑍈𑌰𑌂𑌗𑍈᳚𑌸𑍍𑌤𑍁𑌷𑍍𑌟𑍁॒𑌵𑌾𑌗𑍍​𑌮𑍍 𑌸॑𑌸𑍍𑌤॒𑌨𑍂𑌭𑌿𑌃॑ । 𑌵𑍍𑌯𑌶𑍇॑𑌮 𑌦𑍇॒𑌵𑌹𑌿॑𑌤𑌂॒-𑌯𑌁𑌦𑌾𑌯𑍁𑌃॑ । 𑌸𑍍𑌵॒𑌸𑍍𑌤𑌿 𑌨॒ 𑌇𑌂𑌦𑍍𑌰𑍋॑ 𑌵𑍃॒𑌦𑍍𑌧𑌶𑍍𑌰॑𑌵𑌾𑌃 । 𑌸𑍍𑌵॒𑌸𑍍𑌤𑌿 𑌨𑌃॑ 𑌪𑍂॒𑌷𑌾 𑌵𑌿॒𑌶𑍍𑌵𑌵𑍇॑𑌦𑌾𑌃 । 𑌸𑍍𑌵॒𑌸𑍍𑌤𑌿 𑌨॒𑌸𑍍𑌤𑌾𑌰𑍍𑌕𑍍𑌷𑍍𑌯𑍋॒ 𑌅𑌰𑌿॑𑌷𑍍𑌟𑌨𑍇𑌮𑌿𑌃 । 𑌸𑍍𑌵॒𑌸𑍍𑌤𑌿 𑌨𑍋॒ 𑌬𑍃𑌹॒𑌸𑍍𑌪𑌤𑌿॑-𑌰𑍍𑌦𑌧𑌾𑌤𑍁 ॥
𑌓𑌂 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॑ ॥

॥ 𑌓𑌂 𑌶𑌾𑌂𑌤𑌿𑌃 𑌶𑌾𑌂𑌤𑌿𑌃 𑌶𑌾𑌂𑌤𑌿𑌃 ॥