𑌮𑌾𑌂𑌡𑍂𑌕𑍍𑌯 𑌉𑌪𑌨𑌿𑌷𑌦𑍍

𑌓𑌂 𑌭॒𑌦𑍍𑌰𑌂 𑌕𑌰𑍍𑌣𑍇॑𑌭𑌿𑌃 𑌶𑍃𑌣𑍁॒𑌯𑌾𑌮॑ 𑌦𑍇𑌵𑌾𑌃 । 𑌭॒𑌦𑍍𑌰𑌂 𑌪॑𑌶𑍍𑌯𑍇𑌮𑌾॒𑌕𑍍𑌷𑌭𑌿॒-𑌰𑍍𑌯𑌜॑𑌤𑍍𑌰𑌾𑌃 । 𑌸𑍍𑌥𑌿॒𑌰𑍈𑌰𑌂𑌗𑍈᳚𑌸𑍍𑌤𑍁𑌷𑍍𑌟𑍁॒𑌵𑌾𑌗𑍍​𑌮𑍍 𑌸॑𑌸𑍍𑌤॒𑌨𑍂𑌭𑌿𑌃॑ । 𑌵𑍍𑌯𑌶𑍇॑𑌮 𑌦𑍇॒𑌵𑌹𑌿॑𑌤𑌂॒-𑌯𑌁𑌦𑌾𑌯𑍁𑌃॑ । 𑌸𑍍𑌵॒𑌸𑍍𑌤𑌿 𑌨॒ 𑌇𑌂𑌦𑍍𑌰𑍋॑ 𑌵𑍃॒𑌦𑍍𑌧𑌶𑍍𑌰॑𑌵𑌾𑌃 । 𑌸𑍍𑌵॒𑌸𑍍𑌤𑌿 𑌨𑌃॑ 𑌪𑍂॒𑌷𑌾 𑌵𑌿॒𑌶𑍍𑌵𑌵𑍇॑𑌦𑌾𑌃 । 𑌸𑍍𑌵॒𑌸𑍍𑌤𑌿 𑌨॒𑌸𑍍𑌤𑌾𑌰𑍍𑌕𑍍𑌷𑍍𑌯𑍋॒ 𑌅𑌰𑌿॑𑌷𑍍𑌟𑌨𑍇𑌮𑌿𑌃 । 𑌸𑍍𑌵॒𑌸𑍍𑌤𑌿 𑌨𑍋॒ 𑌬𑍃𑌹॒𑌸𑍍𑌪𑌤𑌿॑-𑌰𑍍𑌦𑌧𑌾𑌤𑍁 ॥
𑌓𑌂 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॑ ॥

॥ 𑌅𑌥 𑌮𑌾𑌂𑌡𑍂𑌕𑍍𑌯𑍋𑌪𑌨𑌿𑌷𑌤𑍍 ॥

𑌹𑌰𑌿𑌃 𑌓𑌮𑍍 ।
𑌓𑌮𑌿𑌤𑍍𑌯𑍇𑌤𑌦𑌕𑍍𑌷𑌰𑌮𑌿𑌦𑌗𑍍​𑌮𑍍 𑌸𑌰𑍍𑌵𑌂 𑌤𑌸𑍍𑌯𑍋𑌪𑌵𑍍𑌯𑌾𑌖𑍍𑌯𑌾𑌨𑌂
𑌭𑍂𑌤𑌂 𑌭𑌵𑌦𑍍 𑌭𑌵𑌿𑌷𑍍𑌯𑌦𑌿𑌤𑌿 𑌸𑌰𑍍𑌵𑌮𑍋𑌂𑌕𑌾𑌰 𑌏𑌵
𑌯𑌚𑍍𑌚𑌾𑌨𑍍𑌯𑌤𑍍 𑌤𑍍𑌰𑌿𑌕𑌾𑌲𑌾𑌤𑍀𑌤𑌂 𑌤𑌦𑌪𑍍𑌯𑍋𑌂𑌕𑌾𑌰 𑌏𑌵 ॥ 1 ॥

𑌸𑌰𑍍𑌵𑌗𑍍​𑌮𑍍 𑌹𑍍𑌯𑍇𑌤𑌦𑍍 𑌬𑍍𑌰𑌹𑍍𑌮𑌾𑌯𑌮𑌾𑌤𑍍𑌮𑌾 𑌬𑍍𑌰𑌹𑍍𑌮 𑌸𑍋𑌽𑌯𑌮𑌾𑌤𑍍𑌮𑌾 𑌚𑌤𑍁𑌷𑍍𑌪𑌾𑌤𑍍 ॥ 2 ॥

𑌜𑌾𑌗𑌰𑌿𑌤𑌸𑍍𑌥𑌾𑌨𑍋 𑌬𑌹𑌿𑌷𑍍𑌪𑍍𑌰𑌜𑍍𑌞𑌃 𑌸𑌪𑍍𑌤𑌾𑌂𑌗 𑌏𑌕𑍋𑌨𑌵𑌿𑌂𑌶𑌤𑌿𑌮𑍁𑌖𑌃
𑌸𑍍𑌥𑍂𑌲𑌭𑍁𑌗𑍍𑌵𑍈𑌶𑍍𑌵𑌾𑌨𑌰𑌃 𑌪𑍍𑌰𑌥𑌮𑌃 𑌪𑌾𑌦𑌃 ॥ 3 ॥

𑌸𑍍𑌵𑌪𑍍𑌨𑌸𑍍𑌥𑌾𑌨𑍋𑌽𑌂𑌤𑌃𑌪𑍍𑌰𑌜𑍍𑌞𑌃 𑌸𑌪𑍍𑌤𑌾𑌂𑌗 𑌏𑌕𑍋𑌨𑌵𑌿𑌂𑌶𑌤𑌿𑌮𑍁𑌖𑌃
𑌪𑍍𑌰𑌵𑌿𑌵𑌿𑌕𑍍𑌤𑌭𑍁𑌕𑍍𑌤𑍈𑌜𑌸𑍋 𑌦𑍍𑌵𑌿𑌤𑍀𑌯𑌃 𑌪𑌾𑌦𑌃 ॥ 4 ॥

𑌯𑌤𑍍𑌰 𑌸𑍁𑌪𑍍𑌤𑍋 𑌨 𑌕𑌂𑌚𑌨 𑌕𑌾𑌮𑌂 𑌕𑌾𑌮𑌯𑌤𑍇 𑌨 𑌕𑌂𑌚𑌨 𑌸𑍍𑌵𑌪𑍍𑌨𑌂
𑌪𑌶𑍍𑌯𑌤𑌿 𑌤𑌤𑍍 𑌸𑍁𑌷𑍁𑌪𑍍𑌤𑌮𑍍 । 𑌸𑍁𑌷𑍁𑌪𑍍𑌤𑌸𑍍𑌥𑌾𑌨 𑌏𑌕𑍀𑌭𑍂𑌤𑌃 𑌪𑍍𑌰𑌜𑍍𑌞𑌾𑌨𑌘𑌨
𑌏𑌵𑌾𑌨𑌂𑌦𑌮𑌯𑍋 𑌹𑍍𑌯𑌾𑌨𑌂𑌦𑌭𑍁𑌕𑍍 𑌚𑍇𑌤𑍋𑌮𑍁𑌖𑌃 𑌪𑍍𑌰𑌾𑌜𑍍𑌞𑌸𑍍𑌤𑍃𑌤𑍀𑌯𑌃 𑌪𑌾𑌦𑌃 ॥ 5 ॥

𑌏𑌷 𑌸𑌰𑍍𑌵𑍇𑌶𑍍𑌵𑌰𑌃 𑌏𑌷 𑌸𑌰𑍍𑌵𑌜𑍍𑌞 𑌏𑌷𑍋𑌽𑌂𑌤𑌰𑍍𑌯𑌾𑌮𑍍𑌯𑍇𑌷 𑌯𑍋𑌨𑌿𑌃 𑌸𑌰𑍍𑌵𑌸𑍍𑌯
𑌪𑍍𑌰𑌭𑌵𑌾𑌪𑍍𑌯𑌯𑍌 𑌹𑌿 𑌭𑍂𑌤𑌾𑌨𑌾𑌮𑍍 ॥ 6 ॥

𑌨𑌾𑌂𑌤𑌃𑌪𑍍𑌰𑌜𑍍𑌞𑌂 𑌨 𑌬𑌹𑌿𑌷𑍍𑌪𑍍𑌰𑌜𑍍𑌞𑌂 𑌨𑍋𑌭𑌯𑌤𑌃𑌪𑍍𑌰𑌜𑍍𑌞𑌂 𑌨 𑌪𑍍𑌰𑌜𑍍𑌞𑌾𑌨𑌘𑌨𑌂
𑌨 𑌪𑍍𑌰𑌜𑍍𑌞𑌂 𑌨𑌾𑌪𑍍𑌰𑌜𑍍𑌞𑌮𑍍 । 𑌅𑌦𑍃𑌷𑍍𑌟𑌮𑌵𑍍𑌯𑌵𑌹𑌾𑌰𑍍𑌯𑌮𑌗𑍍𑌰𑌾𑌹𑍍𑌯𑌮𑌲𑌕𑍍𑌷𑌣𑌂
𑌅𑌚𑌿𑌂𑌤𑍍𑌯𑌮𑌵𑍍𑌯𑌪𑌦𑍇𑌶𑍍𑌯𑌮𑍇𑌕𑌾𑌤𑍍𑌮𑌪𑍍𑌰𑌤𑍍𑌯𑌯𑌸𑌾𑌰𑌂 𑌪𑍍𑌰𑌪𑌂𑌚𑍋𑌪𑌶𑌮𑌂
𑌶𑌾𑌂𑌤𑌂 𑌶𑌿𑌵𑌮𑌦𑍍𑌵𑍈𑌤𑌂 𑌚𑌤𑍁𑌰𑍍𑌥𑌂 𑌮𑌨𑍍𑌯𑌂𑌤𑍇 𑌸 𑌆𑌤𑍍𑌮𑌾 𑌸 𑌵𑌿𑌜𑍍𑌞𑍇𑌯𑌃 ॥ 𑍭 ॥

𑌸𑍋𑌽𑌯𑌮𑌾𑌤𑍍𑌮𑌾𑌧𑍍𑌯𑌕𑍍𑌷𑌰𑌮𑍋𑌂𑌕𑌾𑌰𑍋𑌽𑌧𑌿𑌮𑌾𑌤𑍍𑌰𑌂 𑌪𑌾𑌦𑌾 𑌮𑌾𑌤𑍍𑌰𑌾 𑌮𑌾𑌤𑍍𑌰𑌾𑌶𑍍𑌚 𑌪𑌾𑌦𑌾
𑌅𑌕𑌾𑌰 𑌉𑌕𑌾𑌰𑍋 𑌮𑌕𑌾𑌰 𑌇𑌤𑌿 ॥ 𑍮 ॥

𑌜𑌾𑌗𑌰𑌿𑌤𑌸𑍍𑌥𑌾𑌨𑍋 𑌵𑍈𑌶𑍍𑌵𑌾𑌨𑌰𑍋𑌽𑌕𑌾𑌰𑌃 𑌪𑍍𑌰𑌥𑌮𑌾 𑌮𑌾𑌤𑍍𑌰𑌾𑌽𑌽𑌪𑍍𑌤𑍇𑌰𑌾𑌦𑌿𑌮𑌤𑍍𑌤𑍍𑌵𑌾𑌦𑍍
𑌵𑌾𑌽𑌽𑌪𑍍𑌨𑍋𑌤𑌿 𑌹 𑌵𑍈 𑌸𑌰𑍍𑌵𑌾𑌨𑍍 𑌕𑌾𑌮𑌾𑌨𑌾𑌦𑌿𑌶𑍍𑌚 𑌭𑌵𑌤𑌿 𑌯 𑌏𑌵𑌂-𑌵𑍇𑌁𑌦 ॥ 𑍯 ॥

𑌸𑍍𑌵𑌪𑍍𑌨𑌸𑍍𑌥𑌾𑌨𑌸𑍍𑌤𑍈𑌜𑌸 𑌉𑌕𑌾𑌰𑍋 𑌦𑍍𑌵𑌿𑌤𑍀𑌯𑌾 𑌮𑌾𑌤𑍍𑌰𑍋𑌤𑍍𑌕𑌰𑍍​𑌷𑌾𑌤𑍍
𑌉𑌭𑌯𑌤𑍍𑌵𑌾𑌦𑍍𑌵𑍋𑌤𑍍𑌕𑌰𑍍​𑌷𑌤𑌿 𑌹 𑌵𑍈 𑌜𑍍𑌞𑌾𑌨𑌸𑌂𑌤𑌤𑌿𑌂 𑌸𑌮𑌾𑌨𑌶𑍍𑌚 𑌭𑌵𑌤𑌿
𑌨𑌾𑌸𑍍𑌯𑌾𑌬𑍍𑌰𑌹𑍍𑌮𑌵𑌿𑌤𑍍𑌕𑍁𑌲𑍇 𑌭𑌵𑌤𑌿 𑌯 𑌏𑌵𑌂-𑌵𑍇𑌁𑌦 ॥ 10 ॥

𑌸𑍁𑌷𑍁𑌪𑍍𑌤𑌸𑍍𑌥𑌾𑌨𑌃 𑌪𑍍𑌰𑌾𑌜𑍍𑌞𑍋 𑌮𑌕𑌾𑌰𑌸𑍍𑌤𑍃𑌤𑍀𑌯𑌾 𑌮𑌾𑌤𑍍𑌰𑌾 𑌮𑌿𑌤𑍇𑌰𑌪𑍀𑌤𑍇𑌰𑍍𑌵𑌾
𑌮𑌿𑌨𑍋𑌤𑌿 𑌹 𑌵𑌾 𑌇𑌦𑌂 𑌸𑌰𑍍𑌵𑌮𑌪𑍀𑌤𑌿𑌶𑍍𑌚 𑌭𑌵𑌤𑌿 𑌯 𑌏𑌵𑌂-𑌵𑍇𑌁𑌦 ॥ 11 ॥

𑌅𑌮𑌾𑌤𑍍𑌰𑌶𑍍𑌚𑌤𑍁𑌰𑍍𑌥𑍋𑌽𑌵𑍍𑌯𑌵𑌹𑌾𑌰𑍍𑌯𑌃 𑌪𑍍𑌰𑌪𑌂𑌚𑍋𑌪𑌶𑌮𑌃 𑌶𑌿𑌵𑍋𑌽𑌦𑍍𑌵𑍈𑌤
𑌏𑌵𑌮𑍋𑌂𑌕𑌾𑌰 𑌆𑌤𑍍𑌮𑍈𑌵 𑌸𑌂​𑌵𑌿𑌁𑌶𑌤𑍍𑌯𑌾𑌤𑍍𑌮𑌨𑌾𑌽𑌽𑌤𑍍𑌮𑌾𑌨𑌂-𑌯𑌁 𑌏𑌵𑌂-𑌵𑍇𑌁𑌦 ॥ 12 ॥

॥ 𑌇𑌤𑌿 𑌮𑌾𑌂𑌡𑍂𑌕𑍍𑌯𑍋𑌪𑌨𑌿𑌷𑌤𑍍 𑌸𑌮𑌾𑌪𑍍𑌤𑌾 ॥