𑌮𑍁𑌂𑌡𑌕 𑌉𑌪𑌨𑌿𑌷𑌦𑍍 – 𑌪𑍍𑌰𑌥𑌮 𑌮𑍁𑌂𑌡𑌕, 𑌦𑍍𑌵𑌿𑌤𑍀𑌯 𑌕𑌾𑌂𑌡𑌃

॥ 𑌪𑍍𑌰𑌥𑌮𑌮𑍁𑌂𑌡𑌕𑍇 𑌦𑍍𑌵𑌿𑌤𑍀𑌯𑌃 𑌖𑌂𑌡𑌃 ॥

𑌤𑌦𑍇𑌤𑌤𑍍 𑌸𑌤𑍍𑌯𑌂 𑌮𑌂𑌤𑍍𑌰𑍇𑌷𑍁 𑌕𑌰𑍍𑌮𑌾𑌣𑌿 𑌕𑌵𑌯𑍋
𑌯𑌾𑌨𑍍𑌯𑌪𑌶𑍍𑌯𑌂𑌸𑍍𑌤𑌾𑌨𑌿 𑌤𑍍𑌰𑍇𑌤𑌾𑌯𑌾𑌂 𑌬𑌹𑍁𑌧𑌾 𑌸𑌂𑌤𑌤𑌾𑌨𑌿 ।
𑌤𑌾𑌨𑍍𑌯𑌾𑌚𑌰𑌥 𑌨𑌿𑌯𑌤𑌂 𑌸𑌤𑍍𑌯𑌕𑌾𑌮𑌾 𑌏𑌷 𑌵𑌃
𑌪𑌂𑌥𑌾𑌃 𑌸𑍁𑌕𑍃𑌤𑌸𑍍𑌯 𑌲𑍋𑌕𑍇 ॥ 1॥

𑌯𑌦𑌾 𑌲𑍇𑌲𑌾𑌯𑌤𑍇 𑌹𑍍𑌯𑌰𑍍𑌚𑌿𑌃 𑌸𑌮𑌿𑌦𑍍𑌧𑍇 𑌹𑌵𑍍𑌯𑌵𑌾𑌹𑌨𑍇 ।
𑌤𑌦𑌾𑌽𑌽𑌜𑍍𑌯𑌭𑌾𑌗𑌾𑌵𑌂𑌤𑌰𑍇𑌣𑌾𑌽𑌽𑌹𑍁𑌤𑍀𑌃 𑌪𑍍𑌰𑌤𑌿𑌪𑌾𑌦𑌯𑍇𑌤𑍍 ॥ 2॥

𑌯𑌸𑍍𑌯𑌾𑌗𑍍𑌨𑌿𑌹𑍋𑌤𑍍𑌰𑌮𑌦𑌰𑍍​𑌶𑌮𑌪𑍌𑌰𑍍𑌣𑌮𑌾𑌸-
𑌮𑌚𑌾𑌤𑍁𑌰𑍍𑌮𑌾𑌸𑍍𑌯𑌮𑌨𑌾𑌗𑍍𑌰𑌯𑌣𑌮𑌤𑌿𑌥𑌿𑌵𑌰𑍍𑌜𑌿𑌤𑌂 𑌚 ।
𑌅𑌹𑍁𑌤𑌮𑌵𑍈𑌶𑍍𑌵𑌦𑍇𑌵𑌮𑌵𑌿𑌧𑌿𑌨𑌾 𑌹𑍁𑌤-
𑌮𑌾𑌸𑌪𑍍𑌤𑌮𑌾𑌂𑌸𑍍𑌤𑌸𑍍𑌯 𑌲𑍋𑌕𑌾𑌨𑍍 𑌹𑌿𑌨𑌸𑍍𑌤𑌿 ॥ 3॥

𑌕𑌾𑌲𑍀 𑌕𑌰𑌾𑌲𑍀 𑌚 𑌮𑌨𑍋𑌜𑌵𑌾 𑌚
𑌸𑍁𑌲𑍋𑌹𑌿𑌤𑌾 𑌯𑌾 𑌚 𑌸𑍁𑌧𑍂𑌮𑍍𑌰𑌵𑌰𑍍𑌣𑌾 ।
𑌸𑍍𑌫𑍁𑌲𑌿𑌂𑌗𑌿𑌨𑍀 𑌵𑌿𑌶𑍍𑌵𑌰𑍁𑌚𑍀 𑌚 𑌦𑍇𑌵𑍀
𑌲𑍇𑌲𑌾𑌯𑌮𑌾𑌨𑌾 𑌇𑌤𑌿 𑌸𑌪𑍍𑌤 𑌜𑌿𑌹𑍍𑌵𑌾𑌃 ॥ 4॥

𑌏𑌤𑍇𑌷𑍁 𑌯𑌶𑍍𑌚𑌰𑌤𑍇 𑌭𑍍𑌰𑌾𑌜𑌮𑌾𑌨𑍇𑌷𑍁 𑌯𑌥𑌾𑌕𑌾𑌲𑌂
𑌚𑌾𑌹𑍁𑌤𑌯𑍋 𑌹𑍍𑌯𑌾𑌦𑌦𑌾𑌯𑌨𑍍𑌨𑍍 ।
𑌤𑌂 𑌨𑌯𑌂𑌤𑍍𑌯𑍇𑌤𑌾𑌃 𑌸𑍂𑌰𑍍𑌯𑌸𑍍𑌯 𑌰𑌶𑍍𑌮𑌯𑍋 𑌯𑌤𑍍𑌰
𑌦𑍇𑌵𑌾𑌨𑌾𑌂 𑌪𑌤𑌿𑌰𑍇𑌕𑍋𑌽𑌧𑌿𑌵𑌾𑌸𑌃 ॥ 5॥

𑌏𑌹𑍍𑌯𑍇𑌹𑍀𑌤𑌿 𑌤𑌮𑌾𑌹𑍁𑌤𑌯𑌃 𑌸𑍁𑌵𑌰𑍍𑌚𑌸𑌃
𑌸𑍂𑌰𑍍𑌯𑌸𑍍𑌯 𑌰𑌶𑍍𑌮𑌿𑌭𑌿𑌰𑍍𑌯𑌜𑌮𑌾𑌨𑌂-𑌵𑌁𑌹𑌂𑌤𑌿 ।
𑌪𑍍𑌰𑌿𑌯𑌾𑌂-𑌵𑌾𑌁𑌚𑌮𑌭𑌿𑌵𑌦𑌂𑌤𑍍𑌯𑍋𑌽𑌰𑍍𑌚𑌯𑌂𑌤𑍍𑌯
𑌏𑌷 𑌵𑌃 𑌪𑍁𑌣𑍍𑌯𑌃 𑌸𑍁𑌕𑍃𑌤𑍋 𑌬𑍍𑌰𑌹𑍍𑌮𑌲𑍋𑌕𑌃 ॥ 6॥

𑌪𑍍𑌲𑌵𑌾 𑌹𑍍𑌯𑍇𑌤𑍇 𑌅𑌦𑍃𑌢𑌾 𑌯𑌜𑍍𑌞𑌰𑍂𑌪𑌾
𑌅𑌷𑍍𑌟𑌾𑌦𑌶𑍋𑌕𑍍𑌤𑌮𑌵𑌰𑌂-𑌯𑍇𑌁𑌷𑍁 𑌕𑌰𑍍𑌮 ।
𑌏𑌤𑌚𑍍𑌛𑍍𑌰𑍇𑌯𑍋 𑌯𑍇𑌽𑌭𑌿𑌨𑌂𑌦𑌂𑌤𑌿 𑌮𑍂𑌢𑌾
𑌜𑌰𑌾𑌮𑍃𑌤𑍍𑌯𑍁𑌂 𑌤𑍇 𑌪𑍁𑌨𑌰𑍇𑌵𑌾𑌪𑌿 𑌯𑌂𑌤𑌿 ॥ 𑍭॥

𑌅𑌵𑌿𑌦𑍍𑌯𑌾𑌯𑌾𑌮𑌂𑌤𑌰𑍇 𑌵𑌰𑍍𑌤𑌮𑌾𑌨𑌾𑌃
𑌸𑍍𑌵𑌯𑌂 𑌧𑍀𑌰𑌾𑌃 𑌪𑌂𑌡𑌿𑌤𑌂 𑌮𑌨𑍍𑌯𑌮𑌾𑌨𑌾𑌃 ।
𑌜𑌂𑌘𑌨𑍍𑌯𑌮𑌾𑌨𑌾𑌃 𑌪𑌰𑌿𑌯𑌂𑌤𑌿 𑌮𑍂𑌢𑌾
𑌅𑌂𑌧𑍇𑌨𑍈𑌵 𑌨𑍀𑌯𑌮𑌾𑌨𑌾 𑌯𑌥𑌾𑌂𑌧𑌾𑌃 ॥ 𑍮॥

𑌅𑌵𑌿𑌦𑍍𑌯𑌾𑌯𑌾𑌂 𑌬𑌹𑍁𑌧𑌾 𑌵𑌰𑍍𑌤𑌮𑌾𑌨𑌾 𑌵𑌯𑌂
𑌕𑍃𑌤𑌾𑌰𑍍𑌥𑌾 𑌇𑌤𑍍𑌯𑌭𑌿𑌮𑌨𑍍𑌯𑌂𑌤𑌿 𑌬𑌾𑌲𑌾𑌃 ।
𑌯𑌤𑍍 𑌕𑌰𑍍𑌮𑌿𑌣𑍋 𑌨 𑌪𑍍𑌰𑌵𑍇𑌦𑌯𑌂𑌤𑌿 𑌰𑌾𑌗𑌾𑌤𑍍
𑌤𑍇𑌨𑌾𑌤𑍁𑌰𑌾𑌃 𑌕𑍍𑌷𑍀𑌣𑌲𑍋𑌕𑌾𑌶𑍍𑌚𑍍𑌯𑌵𑌂𑌤𑍇 ॥ 𑍯॥

𑌇𑌷𑍍𑌟𑌾𑌪𑍂𑌰𑍍𑌤𑌂 𑌮𑌨𑍍𑌯𑌮𑌾𑌨𑌾 𑌵𑌰𑌿𑌷𑍍𑌠𑌂
𑌨𑌾𑌨𑍍𑌯𑌚𑍍𑌛𑍍𑌰𑍇𑌯𑍋 𑌵𑍇𑌦𑌯𑌂𑌤𑍇 𑌪𑍍𑌰𑌮𑍂𑌢𑌾𑌃 ।
𑌨𑌾𑌕𑌸𑍍𑌯 𑌪𑍃𑌷𑍍𑌠𑍇 𑌤𑍇 𑌸𑍁𑌕𑍃𑌤𑍇𑌽𑌨𑍁𑌭𑍂𑌤𑍍𑌵𑍇𑌮𑌂
𑌲𑍋𑌕𑌂 𑌹𑍀𑌨𑌤𑌰𑌂-𑌵𑌾𑌁 𑌵𑌿𑌶𑌂𑌤𑌿 ॥ 10॥

𑌤𑌪𑌃𑌶𑍍𑌰𑌦𑍍𑌧𑍇 𑌯𑍇 𑌹𑍍𑌯𑍁𑌪𑌵𑌸𑌂𑌤𑍍𑌯𑌰𑌣𑍍𑌯𑍇
𑌶𑌾𑌂𑌤𑌾 𑌵𑌿𑌦𑍍𑌵𑌾𑌂𑌸𑍋 𑌭𑍈𑌕𑍍𑌷𑍍𑌯𑌚𑌰𑍍𑌯𑌾𑌂 𑌚𑌰𑌂𑌤𑌃 ।
𑌸𑍂𑌰𑍍𑌯𑌦𑍍𑌵𑌾𑌰𑍇𑌣 𑌤𑍇 𑌵𑌿𑌰𑌜𑌾𑌃 𑌪𑍍𑌰𑌯𑌾𑌂𑌤𑌿
𑌯𑌤𑍍𑌰𑌾𑌮𑍃𑌤𑌃 𑌸 𑌪𑍁𑌰𑍁𑌷𑍋 𑌹𑍍𑌯𑌵𑍍𑌯𑌯𑌾𑌤𑍍𑌮𑌾 ॥ 11॥

𑌪𑌰𑍀𑌕𑍍𑌷𑍍𑌯 𑌲𑍋𑌕𑌾𑌨𑍍 𑌕𑌰𑍍𑌮𑌚𑌿𑌤𑌾𑌨𑍍 𑌬𑍍𑌰𑌾𑌹𑍍𑌮𑌣𑍋
𑌨𑌿𑌰𑍍𑌵𑍇𑌦𑌮𑌾𑌯𑌾𑌨𑍍𑌨𑌾𑌸𑍍𑌤𑍍𑌯𑌕𑍃𑌤𑌃 𑌕𑍃𑌤𑍇𑌨 ।
𑌤𑌦𑍍𑌵𑌿𑌜𑍍𑌞𑌾𑌨𑌾𑌰𑍍𑌥𑌂 𑌸 𑌗𑍁𑌰𑍁𑌮𑍇𑌵𑌾𑌭𑌿𑌗𑌚𑍍𑌛𑍇𑌤𑍍
𑌸𑌮𑌿𑌤𑍍𑌪𑌾𑌣𑌿𑌃 𑌶𑍍𑌰𑍋𑌤𑍍𑌰𑌿𑌯𑌂 𑌬𑍍𑌰𑌹𑍍𑌮𑌨𑌿𑌷𑍍𑌠𑌮𑍍 ॥ 12॥

𑌤𑌸𑍍𑌮𑍈 𑌸 𑌵𑌿𑌦𑍍𑌵𑌾𑌨𑍁𑌪𑌸𑌨𑍍𑌨𑌾𑌯 𑌸𑌮𑍍𑌯𑌕𑍍
𑌪𑍍𑌰𑌶𑌾𑌂𑌤𑌚𑌿𑌤𑍍𑌤𑌾𑌯 𑌶𑌮𑌾𑌨𑍍𑌵𑌿𑌤𑌾𑌯 ।
𑌯𑍇𑌨𑌾𑌕𑍍𑌷𑌰𑌂 𑌪𑍁𑌰𑍁𑌷𑌂-𑌵𑍇𑌁𑌦 𑌸𑌤𑍍𑌯𑌂 𑌪𑍍𑌰𑍋𑌵𑌾𑌚
𑌤𑌾𑌂 𑌤𑌤𑍍𑌤𑍍𑌵𑌤𑍋 𑌬𑍍𑌰𑌹𑍍𑌮𑌵𑌿𑌦𑍍𑌯𑌾𑌮𑍍 ॥ 13॥

॥ 𑌇𑌤𑌿 𑌮𑍁𑌂𑌡𑌕𑍋𑌪𑌨𑌿𑌷𑌦𑌿 𑌪𑍍𑌰𑌥𑌮𑌮𑍁𑌂𑌡𑌕𑍇 𑌦𑍍𑌵𑌿𑌤𑍀𑌯𑌃 𑌖𑌂𑌡𑌃 ॥