Mundaka Upanishad – Mundaka 3, Section 1

॥ tṛtīya muṇḍakē prathamaḥ khaṇḍaḥ ॥

dvā suparṇā sayujā sakhāyā samānaṃ vṛkṣa-mpariṣasvajātē ।
tayōranyaḥ pippalaṃ svādvattyanaśnannanyō abhichākaśīti ॥ 1॥

samānē vṛkṣē puruṣō nimagnō-‘nīśayā śōchati muhyamānaḥ ।
juṣṭaṃ yadā paśyatyanyamīśamasya
mahimānamiti vītaśōkaḥ ॥ 2॥

yadā paśyaḥ paśyatē rukmavarṇaṃ
kartāramīśa-mpuruṣa-mbrahmayōnim ।
tadā vidvā-npuṇyapāpē vidhūya
nirañjanaḥ paramaṃ sāmyamupaiti ॥ 3॥

prāṇō hyēṣa ya-ssarvabhūtairvibhāti
vijānan vidvā-nbhavatē nātivādī ।
ātmakrīḍa ātmaratiḥ kriyāvā-
nēṣa brahmavidāṃ variṣṭhaḥ ॥ 4॥

satyēna labhyastapasā hyēṣa ātmā
samyagjñānēna brahmacharyēṇa nityam ।
antasśarīrē jyōtirmayō hi śubhrō
ya-mpaśyanti yatayaḥ, kṣīṇadōṣāḥ ॥ 5॥

satyamēva jayatē nānṛtaṃ
satyēna panthā vitatō dēvayānaḥ ।
yēnākramantyṛṣayō hyāptakāmā
yatra ta-thsatyasya parama-nnidhānam ॥ 6॥

bṛhachcha tad divyamachintyarūpaṃ
sūkṣmāchcha ta-thsūkṣmataraṃ vibhāti ।
dūrā-thsudūrē tadihāntikē cha
paśyatsvihaiva nihita-ṅguhāyām ॥ 7॥

na chakṣuṣā gṛhyatē nāpi vāchā
nānyairdēvaistapasā karmaṇā vā ।
jñānaprasādēna viśuddhasattva-
statastu ta-mpaśyatē niṣkalaṃ
dhyāyamānaḥ ॥ 8॥

ēṣō-‘ṇurātmā chētasā vēditavyō
yasmi-nprāṇaḥ pañchadhā saṃvivēśa ।
prāṇaiśchittaṃ sarvamōta-mprajānāṃ
yasmin viśuddhē vibhavatyēṣa ātmā ॥ 9॥

yaṃ yaṃ lōka-mmanasā saṃvibhāti
viśuddhasattvaḥ kāmayatē yāṃścha kāmān ।
ta-ntaṃ lōka-ñjayatē tāṃścha kāmāṃ-
stasmādātmajñaṃ hyarchayēt bhūtikāmaḥ ॥ 10॥

॥ iti muṇḍakōpaniṣadi tṛtīyamuṇḍakē prathamaḥ khaṇḍaḥ ॥