Mundaka Upanishad – Mundaka 1, Section 2

॥ prathamamuṇḍakē dvitīyaḥ khaṇḍaḥ ॥

tadēta-thsatya-mmantrēṣu karmāṇi kavayō
yānyapaśyaṃstāni trētāyā-mbahudhā santatāni ।
tānyācharatha niyataṃ satyakāmā ēṣa vaḥ
panthā-ssukṛtasya lōkē ॥ 1॥

yadā lēlāyatē hyarchi-ssamiddhē havyavāhanē ।
tadā-”jyabhāgāvantarēṇā-”hutīḥ pratipādayēt ॥ 2॥

yasyāgnihōtramadar​śamapaurṇamāsa-
machāturmāsyamanāgrayaṇamatithivarjita-ñcha ।
ahutamavaiśvadēvamavidhinā huta-
māsaptamāṃstasya lōkān hinasti ॥ 3॥

kālī karālī cha manōjavā cha
sulōhitā yā cha sudhūmravarṇā ।
sphuliṅginī viśvaruchī cha dēvī
lēlāyamānā iti sapta jihvāḥ ॥ 4॥

ētēṣu yaścharatē bhrājamānēṣu yathākālaṃ
chāhutayō hyādadāyann ।
ta-nnayantyētā-ssūryasya raśmayō yatra
dēvānā-mpatirēkō-‘dhivāsaḥ ॥ 5॥

ēhyēhīti tamāhutaya-ssuvarchasaḥ
sūryasya raśmibhiryajamānaṃ vahanti ।
priyāṃ vāchamabhivadantyō-‘rchayantya
ēṣa vaḥ puṇya-ssukṛtō brahmalōkaḥ ॥ 6॥

plavā hyētē adṛḍhā yajñarūpā
aṣṭādaśōktamavaraṃ yēṣu karma ।
ētachChrēyō yē-‘bhinandanti mūḍhā
jarāmṛtyu-ntē punarēvāpi yanti ॥ 7॥

avidyāyāmantarē vartamānāḥ
svaya-ndhīrāḥ paṇḍita-mmanyamānāḥ ।
jaṅghanyamānāḥ pariyanti mūḍhā
andhēnaiva nīyamānā yathāndhāḥ ॥ 8॥

avidyāyā-mbahudhā vartamānā vayaṃ
kṛtārthā ityabhimanyanti bālāḥ ।
ya-tkarmiṇō na pravēdayanti rāgāt
tēnāturāḥ, kṣīṇalōkāśchyavantē ॥ 9॥

iṣṭāpūrta-mmanyamānā variṣṭhaṃ
nānyachChrēyō vēdayantē pramūḍhāḥ ।
nākasya pṛṣṭhē tē sukṛtē-‘nubhūtvēmaṃ
lōkaṃ hīnataraṃ vā viśanti ॥ 10॥

tapasśraddhē yē hyupavasantyaraṇyē
śāntā vidvāṃsō bhaikṣyacharyā-ñcharantaḥ ।
sūryadvārēṇa tē virajāḥ prayānti
yatrāmṛta-ssa puruṣō hyavyayātmā ॥ 11॥

parīkṣya lōkān karmachitā-nbrāhmaṇō
nirvēdamāyānnāstyakṛtaḥ kṛtēna ।
tadvijñānārthaṃ sa gurumēvābhigachChēt
samitpāṇi-śśrōtriya-mbrahmaniṣṭham ॥ 12॥

tasmai sa vidvānupasannāya samyak
praśāntachittāya śamānvitāya ।
yēnākṣara-mpuruṣaṃ vēda satya-mprōvācha
tā-ntattvatō brahmavidyām ॥ 13॥

॥ iti muṇḍakōpaniṣadi prathamamuṇḍakē dvitīyaḥ khaṇḍaḥ ॥