ଶ୍ରୀ ଵେଂକଟେଶ୍ଵର ଶରଣାଗତି ସ୍ତୋତ୍ରମ୍ (ସପ୍ତର୍ଷି କୃତମ୍)

ଶେଷାଚଲଂ ସମାସାଦ୍ୟ କଶ୍ୟପାଦ୍ୟା ମହର୍ଷୟଃ ।
ଵେଂକଟେଶଂ ରମାନାଥଂ ଶରଣଂ ପ୍ରାପୁରଂଜସା ॥ 1 ॥

କଲିସଂତାରକଂ ମୁଖ୍ୟଂ ସ୍ତୋତ୍ରମେତଜ୍ଜପେନ୍ନରଃ ।
ସପ୍ତର୍ଷିଵାକ୍ପ୍ରସାଦେନ ଵିଷ୍ଣୁସ୍ତସ୍ମୈ ପ୍ରସୀଦତି ॥ 2 ॥

କଶ୍ୟପ ଉଵାଚ –
କାଦିହ୍ରୀମଂତଵିଦ୍ୟାୟାଃ ପ୍ରାପ୍ୟୈଵ ପରଦେଵତା ।
କଲୌ ଶ୍ରୀଵେଂକଟେଶାଖ୍ୟା ତାମହଂ ଶରଣଂ ଭଜେ ॥ 3 ॥

ଅତ୍ରିରୁଵାଚ –
ଅକାରାଦିକ୍ଷକାରାଂତଵର୍ଣୈର୍ୟଃ ପ୍ରତିପାଦ୍ୟତେ ।
କଲୌ ସ ଵେଂକଟେଶାଖ୍ୟଃ ଶରଣଂ ମେ ରମାପତିଃ ॥ 4 ॥

ଭରଦ୍ଵାଜ ଉଵାଚ –
ଭଗଵାନ୍ ଭାର୍ଗଵୀକାଂତୋ ଭକ୍ତାଭୀପ୍ସିତଦାୟକଃ ।
ଭକ୍ତସ୍ୟ ଵେଂକଟେଶାଖ୍ୟୋ ଭରଦ୍ଵାଜସ୍ୟ ମେ ଗତିଃ ॥ 5 ॥

ଵିଶ୍ଵାମିତ୍ର ଉଵାଚ –
ଵିରାଡ୍ଵିଷ୍ଣୁର୍ଵିଧାତା ଚ ଵିଶ୍ଵଵିଜ୍ଞାନଵିଗ୍ରହଃ ।
ଵିଶ୍ଵାମିତ୍ରସ୍ୟ ଶରଣଂ ଵେଂକଟେଶୋ ଵିଭୁଃ ସଦା ॥ 6 ॥

ଗୌତମ ଉଵାଚ –
ଗୌର୍ଗୌରୀଶପ୍ରିୟୋ ନିତ୍ୟଂ ଗୋଵିଂଦୋ ଗୋପତିର୍ଵିଭୁଃ ।
ଶରଣଂ ଗୌତମସ୍ୟାସ୍ତୁ ଵେଂକଟାଦ୍ରିଶିରୋମଣିଃ ॥ 7 ॥

ଜମଦଗ୍ନିରୁଵାଚ –
ଜଗତ୍କର୍ତା ଜଗଦ୍ଭର୍ତା ଜଗଦ୍ଧର୍ତା ଜଗନ୍ମୟଃ ।
ଜମଦଗ୍ନେଃ ପ୍ରପନ୍ନସ୍ୟ ଜୀଵେଶୋ ଵେଂକଟେଶ୍ଵରଃ ॥ 8 ॥

ଵସିଷ୍ଠ ଉଵାଚ –
ଵସ୍ତୁଵିଜ୍ଞାନମାତ୍ରଂ ୟନ୍ନିର୍ଵିଶେଷଂ ସୁଖଂ ଚ ସତ୍ ।
ତଦ୍ବ୍ରହ୍ମୈଵାହମସ୍ମୀତି ଵେଂକଟେଶଂ ଭଜେ ସଦା ॥ 9 ॥

ସପ୍ତର୍ଷିରଚିତଂ ସ୍ତୋତ୍ରଂ ସର୍ଵଦା ୟଃ ପଠେନ୍ନରଃ ।
ସୋଽଭୟଂ ପ୍ରାପ୍ନୁୟାତ୍ସତ୍ୟଂ ସର୍ଵତ୍ର ଵିଜୟୀ ଭଵେତ୍ ॥ 10 ॥

ଇତି ସପ୍ତର୍ଷିଭିଃ କୃତଂ ଶ୍ରୀ ଵେଂକଟେଶ୍ଵର ଶରଣାଗତି ସ୍ତୋତ୍ରମ୍ ।