ଶ୍ରୀ ଗୁରୁଗୀତା ପ୍ରଥମୋଧ୍ୟାୟଃ

ଶ୍ରୀଗୁରୁଭ୍ୟୋ ନମଃ ।
ହରିଃ ଓମ୍ ।

ଧ୍ୟାନମ୍
ହଂସାଭ୍ୟାଂ ପରିଵୃତ୍ତପତ୍ରକମଲୈର୍ଦିଵ୍ୟୈର୍ଜଗତ୍କାରଣଂ
ଵିଶ୍ଵୋତ୍କୀର୍ଣମନେକଦେହନିଲୟଂ ସ୍ଵଚ୍ଛଂଦମାନଂଦକମ୍ ।
ଆଦ୍ୟଂତୈକମଖଂଡଚିଦ୍ଘନରସଂ ପୂର୍ଣଂ ହ୍ୟନଂତଂ ଶୁଭଂ
ପ୍ରତ୍ୟକ୍ଷାକ୍ଷରଵିଗ୍ରହଂ ଗୁରୁପଦଂ ଧ୍ୟାୟେଦ୍ଵିଭୁଂ ଶାଶ୍ଵତମ୍ ॥

ଅଥ ପ୍ରଥମୋଽଧ୍ୟାୟଃ ॥

ଅଚିଂତ୍ୟାଵ୍ୟକ୍ତରୂପାୟ ନିର୍ଗୁଣାୟ ଗଣାତ୍ମନେ ।
ସମସ୍ତଜଗଦାଧାରମୂର୍ତୟେ ବ୍ରହ୍ମଣେ ନମଃ ॥ 1 ॥

ଋଷୟ ଊଚୁଃ ।
ସୂତ ସୂତ ମହାପ୍ରାଜ୍ଞ ନିଗମାଗମପାରଗ ।
ଗୁରୁସ୍ଵରୂପମସ୍ମାକଂ ବ୍ରୂହି ସର୍ଵମଲାପହମ୍ ॥ 2 ॥

ୟସ୍ୟ ଶ୍ରଵଣମାତ୍ରେଣ ଦେହୀ ଦୁଃଖାଦ୍ଵିମୁଚ୍ୟତେ ।
ୟେନ ମାର୍ଗେଣ ମୁନୟଃ ସର୍ଵଜ୍ଞତ୍ଵଂ ପ୍ରପେଦିରେ ॥ 3 ॥

ୟତ୍ପ୍ରାପ୍ୟ ନ ପୁନର୍ୟାତି ନରଃ ସଂସାରବଂଧନମ୍ ।
ତଥାଵିଧଂ ପରଂ ତତ୍ତ୍ଵଂ ଵକ୍ତଵ୍ୟମଧୁନା ତ୍ଵୟା ॥ 4 ॥

ଗୁହ୍ୟାଦ୍ଗୁହ୍ୟତମଂ ସାରଂ ଗୁରୁଗୀତା ଵିଶେଷତଃ ।
ତ୍ଵତ୍ପ୍ରସାଦାଚ୍ଚ ଶ୍ରୋତଵ୍ୟା ତତ୍ସର୍ଵଂ ବ୍ରୂହି ସୂତ ନଃ ॥ 5 ॥

ଇତି ସଂପ୍ରାର୍ଥିତଃ ସୂତୋ ମୁନିସଂଘୈର୍ମୁହୁର୍ମୁହୁଃ ॥

କୁତୂହଲେନ ମହତା ପ୍ରୋଵାଚ ମଧୁରଂ ଵଚଃ ॥ 6 ॥

ସୂତ ଉଵାଚ ।
ଶ୍ରୁଣୁଧ୍ଵଂ ମୁନୟଃ ସର୍ଵେ ଶ୍ରଦ୍ଧୟା ପରୟା ମୁଦା ।
ଵଦାମି ଭଵରୋଗଘ୍ନୀଂ ଗୀତାଂ ମାତୃସ୍ଵରୂପିଣୀମ୍ ॥ 7 ॥

ପୁରା କୈଲାସଶିଖରେ ସିଦ୍ଧଗଂଧର୍ଵସେଵିତେ ।
ତତ୍ର କଲ୍ପଲତାପୁଷ୍ପମଂଦିରେଽତ୍ୟଂତସୁଂଦରେ ॥ 8 ॥

ଵ୍ୟାଘ୍ରାଜିନେ ସମାସୀନଂ ଶୁକାଦିମୁନିଵଂଦିତମ୍ ।
ବୋଧୟଂତଂ ପରଂ ତତ୍ତ୍ଵଂ ମଧ୍ୟେ ମୁନିଗଣେ କ୍ଵଚିତ୍ ॥ 9 ॥

ପ୍ରଣମ୍ରଵଦନା ଶଶ୍ଵନ୍ନମସ୍କୁର୍ଵଂତମାଦରାତ୍ ।
ଦୃଷ୍ଟ୍ଵା ଵିସ୍ମୟମାପନ୍ନ ପାର୍ଵତୀ ପରିପୃଚ୍ଛତି ॥ 10 ॥

ପାର୍ଵତ୍ୟୁଵାଚ ।
ଓଂ ନମୋ ଦେଵ ଦେଵେଶ ପରାତ୍ପର ଜଗଦ୍ଗୁରୋ ।
ତ୍ଵାଂ ନମସ୍କୁର୍ଵତେ ଭକ୍ତ୍ୟା ସୁରାସୁରନରାଃ ସଦା ॥ 11 ॥

ଵିଧିଵିଷ୍ଣୁମହେଂଦ୍ରାଦ୍ୟୈର୍ଵଂଦ୍ୟଃ ଖଲୁ ସଦା ଭଵାନ୍ ।
ନମସ୍କରୋଷି କସ୍ମୈ ତ୍ଵଂ ନମସ୍କାରାଶ୍ରୟଃ କିଲ ॥ 12 ॥

ଦୃଷ୍ଟ୍ଵୈତତ୍କର୍ମ ଵିପୁଲମାଶ୍ଚର୍ୟ ପ୍ରତିଭାତି ମେ ।
କିମେତନ୍ନ ଵିଜାନେଽହଂ କୃପୟା ଵଦ ମେ ପ୍ରଭୋ ॥ 13 ॥

ଭଗଵନ୍ ସର୍ଵଧର୍ମଜ୍ଞ ଵ୍ରତାନାଂ ଵ୍ରତନାୟକମ୍ ।
ବ୍ରୂହି ମେ କୃପୟା ଶଂଭୋ ଗୁରୁମାହାତ୍ମ୍ୟମୁତ୍ତମମ୍ ॥ 14 ॥

କେନ ମାର୍ଗେଣ ଭୋ ସ୍ଵାମିନ୍ ଦେହୀ ବ୍ରହ୍ମମୟୋ ଭଵେତ୍ ।
ତତ୍କୃପାଂ କୁରୁ ମେ ସ୍ଵାମିନ୍ ନମାମି ଚରଣୌ ତଵ ॥ 15 ॥

ଇତି ସଂପ୍ରାର୍ଥିତଃ ଶଶ୍ଵନ୍ମହାଦେଵୋ ମହେଶ୍ଵରଃ ।
ଆନଂଦଭରିତଃ ସ୍ଵାଂତେ ପାର୍ଵତୀମିଦମବ୍ରଵୀତ୍ ॥ 16 ॥

ଶ୍ରୀ ମହାଦେଵ ଉଵାଚ ।
ନ ଵକ୍ତଵ୍ୟମିଦଂ ଦେଵି ରହସ୍ୟାତିରହସ୍ୟକମ୍ ।
ନ କସ୍ୟାପି ପୁରା ପ୍ରୋକ୍ତଂ ତ୍ଵଦ୍ଭକ୍ତ୍ୟର୍ଥଂ ଵଦାମି ତତ୍ ॥ 17 ॥

ମମ ରୂପାଽସି ଦେଵି ତ୍ଵମତସ୍ତତ୍କଥୟାମି ତେ ।
ଲୋକୋପକାରକଃ ପ୍ରଶ୍ନୋ ନ କେନାପି କୃତଃ ପୁରା ॥ 18 ॥

ୟସ୍ୟ ଦେଵେ ପରା ଭକ୍ତିର୍ୟଥା ଦେଵେ ତଥା ଗୁରୌ ।
ତସ୍ୟୈତେ କଥିତା ହ୍ୟର୍ଥାଃ ପ୍ରକାଶଂତେ ମହାତ୍ମନଃ ॥ 19 ॥

ୟୋ ଗୁରୁଃ ସ ଶିଵଃ ପ୍ରୋକ୍ତୋ ୟଃ ଶିଵଃ ସ ଗୁରୁଃ ସ୍ମୃତଃ ।
ଵିକଲ୍ପଂ ୟସ୍ତୁ କୁର୍ଵୀତ ସ ନରୋ ଗୁରୁତଲ୍ପଗଃ ॥ 20 ॥

ଦୁର୍ଲଭଂ ତ୍ରିଷୁ ଲୋକେଷୁ ତଚ୍ଛୃଣୁଷ୍ଵ ଵଦାମ୍ୟହମ୍ ।
ଗୁରୁବ୍ରହ୍ମ ଵିନା ନାନ୍ୟଃ ସତ୍ୟଂ ସତ୍ୟଂ ଵରାନନେ ॥ 21 ॥

ଵେଦଶାସ୍ତ୍ରପୁରାଣାନି ଚେତିହାସାଦିକାନି ଚ ।
ମଂତ୍ରୟଂତ୍ରାଦିଵିଦ୍ୟାନାଂ ମୋହନୋଚ୍ଚାଟନାଦିକମ୍ ॥ 22 ॥

ଶୈଵଶାକ୍ତାଗମାଦୀନି ହ୍ୟନ୍ୟେ ଚ ବହଵୋ ମତାଃ ।
ଅପଭ୍ରଂଶାଃ ସମସ୍ତାନାଂ ଜୀଵାନାଂ ଭ୍ରାଂତଚେତସାମ୍ ॥ 23 ॥

ଜପସ୍ତପୋ ଵ୍ରତଂ ତୀର୍ଥଂ ୟଜ୍ଞୋ ଦାନଂ ତଥୈଵ ଚ ।
ଗୁରୁତତ୍ତ୍ଵମଵିଜ୍ଞାୟ ସର୍ଵଂ ଵ୍ୟର୍ଥଂ ଭଵେତ୍ପ୍ରିୟେ ॥ 24 ॥

ଗୁରୁବୁଦ୍ଧ୍ୟାତ୍ମନୋ ନାନ୍ୟତ୍ ସତ୍ୟଂ ସତ୍ୟଂ ଵରାନନେ ।
ତଲ୍ଲାଭାର୍ଥଂ ପ୍ରୟତ୍ନସ୍ତୁ କର୍ତଵ୍ୟଶ୍ଚ ମନୀଷିଭିଃ ॥ 25 ॥

ଗୂଢାଵିଦ୍ୟା ଜଗନ୍ମାୟା ଦେହଶ୍ଚାଜ୍ଞାନସଂଭଵଃ ।
ଵିଜ୍ଞାନଂ ୟତ୍ପ୍ରସାଦେନ ଗୁରୁଶବ୍ଦେନ କଥ୍ୟତେ ॥ 26 ॥

ୟଦଂଘ୍ରିକମଲଦ୍ଵଂଦ୍ଵଂ ଦ୍ଵଂଦ୍ଵତାପନିଵାରକମ୍ ।
ତାରକଂ ଭଵସିଂଧୋଶ୍ଚ ତଂ ଗୁରୁଂ ପ୍ରଣମାମ୍ୟହମ୍ ॥ 27 ॥

ଦେହୀ ବ୍ରହ୍ମ ଭଵେଦ୍ୟସ୍ମାତ୍ ତ୍ଵତ୍କୃପାର୍ଥଂ ଵଦାମି ତତ୍ ।
ସର୍ଵପାପଵିଶୁଦ୍ଧାତ୍ମା ଶ୍ରୀଗୁରୋଃ ପାଦସେଵନାତ୍ ॥ 28 ॥

ସର୍ଵତୀର୍ଥାଵଗାହସ୍ୟ ସଂପ୍ରାପ୍ନୋତି ଫଲଂ ନରଃ ।
ଗୁରୋଃ ପାଦୋଦକଂ ପୀତ୍ଵା ଶେଷଂ ଶିରସି ଧାରୟନ୍ ॥ 29 ॥

ଶୋଷଣଂ ପାପପଂକସ୍ୟ ଦୀପନଂ ଜ୍ଞାନତେଜସଃ ।
ଗୁରୋଃ ପାଦୋଦକଂ ସମ୍ୟକ୍ ସଂସାରାର୍ଣଵତାରକମ୍ ॥ 30 ॥

ଅଜ୍ଞାନମୂଲହରଣଂ ଜନ୍ମକର୍ମନିଵାରକମ୍ ।
ଜ୍ଞାନଵୈରାଗ୍ୟସିଦ୍ଧ୍ୟର୍ଥଂ ଗୁରୋଃ ପାଦୋଦକଂ ପିବେତ୍ ॥ 31 ॥

ଗୁରୁପାଦୋଦକଂ ପାନଂ ଗୁରୋରୁଚ୍ଛିଷ୍ଟଭୋଜନମ୍ ।
ଗୁରୁମୂର୍ତେଃ ସଦା ଧ୍ୟାନଂ ଗୁରୋର୍ନାମ ସଦା ଜପଃ ॥ 32 ॥

ସ୍ଵଦେଶିକସ୍ୟୈଵ ଚ ନାମକୀର୍ତନଂ
ଭଵେଦନଂତସ୍ୟ ଶିଵସ୍ୟ କୀର୍ତନମ୍ ।
ସ୍ଵଦେଶିକସ୍ୟୈଵ ଚ ନାମଚିଂତନଂ
ଭଵେଦନଂତସ୍ୟ ଶିଵସ୍ୟ ଚିଂତନମ୍ ॥ 33 ॥

ୟତ୍ପାଦାଂବୁଜରେଣୁର୍ଵୈ କୋଽପି ସଂସାରଵାରିଧୌ ।
ସେତୁବଂଧାୟତେ ନାଥଂ ଦେଶିକଂ ତମୁପାସ୍ମହେ ॥ 34 ॥

ୟଦନୁଗ୍ରହମାତ୍ରେଣ ଶୋକମୋହୌ ଵିନଶ୍ୟତଃ ।
ତସ୍ମୈ ଶ୍ରୀଦେଶିକେଂଦ୍ରାୟ ନମୋଽସ୍ତୁ ପରମାତ୍ମନେ ॥ 35 ॥

ୟସ୍ମାଦନୁଗ୍ରହଂ ଲବ୍ଧ୍ଵା ମହଦଜ୍ଞାନମୁତ୍ସୃଜେତ୍ ।
ତସ୍ମୈ ଶ୍ରୀଦେଶିକେଂଦ୍ରାୟ ନମଶ୍ଚାଭୀଷ୍ଟସିଦ୍ଧୟେ ॥ 36 ॥

କାଶୀକ୍ଷେତ୍ରଂ ନିଵାସଶ୍ଚ ଜାହ୍ନଵୀ ଚରଣୋଦକମ୍ ।
ଗୁରୁର୍ଵିଶ୍ଵେଶ୍ଵରଃ ସାକ୍ଷାତ୍ ତାରକଂ ବ୍ରହ୍ମନିଶ୍ଚୟଃ ॥ 37 ॥

ଗୁରୁସେଵା ଗୟା ପ୍ରୋକ୍ତା ଦେହଃ ସ୍ୟାଦକ୍ଷୟୋ ଵଟଃ ।
ତତ୍ପାଦଂ ଵିଷ୍ଣୁପାଦଂ ସ୍ୟାତ୍ ତତ୍ର ଦତ୍ତମନସ୍ତତମ୍ ॥ 38 ॥

ଗୁରୁମୂର୍ତିଂ ସ୍ମରେନ୍ନିତ୍ୟଂ ଗୁରୋର୍ନାମ ସଦା ଜପେତ୍ ।
ଗୁରୋରାଜ୍ଞାଂ ପ୍ରକୁର୍ଵୀତ ଗୁରୋରନ୍ୟଂ ନ ଭାଵୟେତ୍ ॥ 39 ॥

ଗୁରୁଵକ୍ତ୍ରେ ସ୍ଥିତଂ ବ୍ରହ୍ମ ପ୍ରାପ୍ୟତେ ତତ୍ପ୍ରସାଦତଃ ।
ଗୁରୋର୍ଧ୍ୟାନଂ ସଦା କୁର୍ୟାତ୍ କୁଲସ୍ତ୍ରୀ ସ୍ଵପତିଂ ୟଥା ॥ 40 ॥

ସ୍ଵାଶ୍ରମଂ ଚ ସ୍ଵଜାତିଂ ଚ ସ୍ଵକୀର୍ତିଂ ପୁଷ୍ଟିଵର୍ଧନମ୍ ।
ଏତତ୍ସର୍ଵଂ ପରିତ୍ୟଜ୍ୟ ଗୁରୁମେଵ ସମାଶ୍ରୟେତ୍ ॥ 41 ॥

ଅନନ୍ୟାଶ୍ଚିଂତୟଂତୋ ୟେ ସୁଲଭଂ ପରମଂ ସୁଖମ୍ ।
ତସ୍ମାତ୍ସର୍ଵପ୍ରୟତ୍ନେନ ଗୁରୋରାରାଧନଂ କୁରୁ ॥ 42 ॥

ଗୁରୁଵକ୍ତ୍ରେ ସ୍ଥିତା ଵିଦ୍ୟା ଗୁରୁଭକ୍ତ୍ୟା ଚ ଲଭ୍ୟତେ ।
ତ୍ରୈଲୋକ୍ୟେ ସ୍ଫୁଟଵକ୍ତାରୋ ଦେଵର୍ଷିପିତୃମାନଵାଃ ॥ 43 ॥

ଗୁକାରଶ୍ଚାଂଧକାରୋ ହି ରୁକାରସ୍ତେଜ ଉଚ୍ୟତେ ।
ଅଜ୍ଞାନଗ୍ରାସକଂ ବ୍ରହ୍ମ ଗୁରୁରେଵ ନ ସଂଶୟଃ ॥ 44 ॥

ଗୁକାରଶ୍ଚାଂଧକାରସ୍ତୁ ରୁକାରସ୍ତନ୍ନିରୋଧକୃତ୍ ।
ଅଂଧକାରଵିନାଶିତ୍ଵାଦ୍ଗୁରୁରିତ୍ୟଭିଧୀୟତେ ॥

ଗୁକାରୋ ଭଵରୋଗଃ ସ୍ୟାତ୍ ରୁକାରସ୍ତନ୍ନିରୋଧକୃତ୍ ।
ଭଵରୋଗହରତ୍ଵାଚ୍ଚ ଗୁରୁରିତ୍ୟଭିଧୀୟତେ ॥ 45 ॥

ଗୁକାରଶ୍ଚ ଗୁଣାତୀତୋ ରୂପାତୀତୋ ରୁକାରକଃ ।
ଗୁଣରୂପଵିହୀନତ୍ଵାତ୍ ଗୁରୁରିତ୍ୟଭିଧୀୟତେ ॥ 46 ॥

ଗୁକାରଃ ପ୍ରଥମୋ ଵର୍ଣୋ ମାୟାଦିଗୁଣଭାସକଃ ।
ରୁକାରୋଽସ୍ତି ପରଂ ବ୍ରହ୍ମ ମାୟାଭ୍ରାଂତିଵିମୋଚକମ୍ ॥ 47 ॥

ଏଵଂ ଗୁରୁପଦଂ ଶ୍ରେଷ୍ଠଂ ଦେଵାନାମପି ଦୁର୍ଲଭମ୍ ।
ହାହାହୂହୂଗଣୈଶ୍ଚୈଵ ଗଂଧର୍ଵାଦ୍ୟୈଶ୍ଚ ପୂଜିତମ୍ ॥ 48 ॥

ଧ୍ରୁଵଂ ତେଷାଂ ଚ ସର୍ଵେଷାଂ ନାସ୍ତି ତତ୍ତ୍ଵଂ ଗୁରୋଃ ପରମ୍ ।
ଗୁରୋରାରାଧନଂ କୁର୍ୟାତ୍ ସ୍ଵଜୀଵତ୍ଵଂ ନିଵେଦୟେତ୍ ॥ 49 ॥

ଆସନଂ ଶୟନଂ ଵସ୍ତ୍ରଂ ଵାହନଂ ଭୂଷଣାଦିକମ୍ ।
ସାଧକେନ ପ୍ରଦାତଵ୍ୟଂ ଗୁରୁସଂତୋଷକାରଣମ୍ ॥ 50 ॥

କର୍ମଣା ମନସା ଵାଚା ସର୍ଵଦାଽଽରାଧୟେଦ୍ଗୁରୁମ୍ ।
ଦୀର୍ଘଦଂଡଂ ନମସ୍କୃତ୍ୟ ନିର୍ଲଜ୍ଜୋ ଗୁରୁସନ୍ନିଧୌ ॥ 51 ॥

ଶରୀରମିଂଦ୍ରିୟଂ ପ୍ରାଣମର୍ଥସ୍ଵଜନବାଂଧଵାନ୍ ।
ଆତ୍ମଦାରାଦିକଂ ସର୍ଵଂ ସଦ୍ଗୁରୁଭ୍ୟୋ ନିଵେଦୟେତ୍ ॥ 52 ॥

ଗୁରୁରେକୋ ଜଗତ୍ସର୍ଵଂ ବ୍ରହ୍ମଵିଷ୍ଣୁଶିଵାତ୍ମକମ୍ ।
ଗୁରୋଃ ପରତରଂ ନାସ୍ତି ତସ୍ମାତ୍ସଂପୂଜୟେଦ୍ଗୁରୁମ୍ ॥ 53 ॥

ସର୍ଵଶ୍ରୁତିଶିରୋରତ୍ନଵିରାଜିତପଦାଂବୁଜମ୍ ।
ଵେଦାଂତାର୍ଥପ୍ରଵକ୍ତାରଂ ତସ୍ମାତ୍ ସଂପୂଜୟେଦ୍ଗୁରୁମ୍ ॥ 54 ॥

ୟସ୍ୟ ସ୍ମରଣମାତ୍ରେଣ ଜ୍ଞାନମୁତ୍ପଦ୍ୟତେ ସ୍ଵୟମ୍ ।
ସ ଏଵ ସର୍ଵସଂପତ୍ତିଃ ତସ୍ମାତ୍ସଂପୂଜୟେଦ୍ଗୁରୁମ୍ ॥ 55 ॥

[ପାଠଭେଦଃ –
କୃମିକୋଟିଭିରାଵିଷ୍ଟଂ ଦୁର୍ଗଂଧମଲମୂତ୍ରକମ୍ ।
ଶ୍ଲେଷ୍ମରକ୍ତତ୍ଵଚାମାଂସୈର୍ନଦ୍ଧଂ ଚୈତଦ୍ଵରାନନେ ॥
]
କୃମିକୋଟିଭିରାଵିଷ୍ଟଂ ଦୁର୍ଗଂଧକୁଲଦୂଷିତମ୍ ।
ଅନିତ୍ୟଂ ଦୁଃଖନିଲୟଂ ଦେହଂ ଵିଦ୍ଧି ଵରାନନେ ॥ 56 ॥

ସଂସାରଵୃକ୍ଷମାରୂଢାଃ ପତଂତି ନରକାର୍ଣଵେ ।
ୟସ୍ତାନୁଦ୍ଧରତେ ସର୍ଵାନ୍ ତସ୍ମୈ ଶ୍ରୀଗୁରଵେ ନମଃ ॥ 57 ॥

ଗୁରୁର୍ବ୍ରହ୍ମା ଗୁରୁର୍ଵିଷ୍ଣୁର୍ଗୁରୁର୍ଦେଵୋ ମହେଶ୍ଵରଃ ।
ଗୁରୁସ୍ସାକ୍ଷାତ୍ ପରବ୍ରହ୍ମ ତସ୍ମୈ ଶ୍ରୀଗୁରଵେ ନମଃ ॥ 58 ॥

ଅଜ୍ଞାନତିମିରାଂଧସ୍ୟ ଜ୍ଞାନାଂଜନଶଲାକୟା ।
ଚକ୍ଷୁରୁନ୍ମୀଲିତଂ ୟେନ ତସ୍ମୈ ଶ୍ରୀଗୁରଵେ ନମଃ ॥ 59 ॥

ଅଖଂଡମଂଡଲାକାରଂ ଵ୍ୟାପ୍ତଂ ୟେନ ଚରାଚରମ୍ ।
ତତ୍ପଦଂ ଦର୍ଶିତଂ ୟେନ ତସ୍ମୈ ଶ୍ରୀଗୁରଵେ ନମଃ ॥ 60 ॥

ସ୍ଥାଵରଂ ଜଂଗମଂ ଵ୍ୟାପ୍ତଂ ୟତ୍କିଂଚିତ୍ସଚରାଚରମ୍ ।
ତ୍ଵଂ ପଦଂ ଦର୍ଶିତଂ ୟେନ ତସ୍ମୈ ଶ୍ରୀଗୁରଵେ ନମଃ ॥ 61 ॥

ଚିନ୍ମୟଵ୍ୟାପିତଂ ସର୍ଵଂ ତ୍ରୈଲୋକ୍ୟଂ ସଚରାଚରମ୍ ।
ଅସିତ୍ଵଂ ଦର୍ଶିତଂ ୟେନ ତସ୍ମୈ ଶ୍ରୀଗୁରଵେ ନମଃ ॥ 62 ॥

ନିମିଷାନ୍ନିମିଷାର୍ଧାଦ୍ଵା ୟଦ୍ଵାକ୍ୟାଦ୍ଵୈ ଵିମୁଚ୍ୟତେ ।
ସ୍ଵାତ୍ମାନଂ ଶିଵମାଲୋକ୍ୟ ତସ୍ମୈ ଶ୍ରୀଗୁରଵେ ନମଃ ॥ 63 ॥

ଚୈତନ୍ୟଂ ଶାଶ୍ଵତଂ ଶାଂତଂ ଵ୍ୟୋମାତୀତଂ ନିରଂଜନମ୍ ।
ନାଦବିଂଦୁକଳାତୀତଂ ତସ୍ମୈ ଶ୍ରୀଗୁରଵେ ନମଃ ॥ 64 ॥

ନିର୍ଗୁଣଂ ନିର୍ମଲଂ ଶାଂତଂ ଜଂଗମଂ ସ୍ଥିରମେଵ ଚ ।
ଵ୍ୟାପ୍ତଂ ୟେନ ଜଗତ୍ସର୍ଵଂ ତସ୍ମୈ ଶ୍ରୀଗୁରଵେ ନମଃ ॥ 65 ॥

ସ ପିତା ସ ଚ ମେ ମାତା ସ ବଂଧୁଃ ସ ଚ ଦେଵତା ।
ସଂସାରମୋହନାଶାୟ ତସ୍ମୈ ଶ୍ରୀଗୁରଵେ ନମଃ ॥ 66 ॥

ୟତ୍ସତ୍ତ୍ଵେନ ଜଗତ୍ସତ୍ତ୍ଵଂ ୟତ୍ପ୍ରକାଶେନ ଭାତି ତତ୍ ।
ୟଦାନଂଦେନ ନଂଦଂତି ତସ୍ମୈ ଶ୍ରୀଗୁରଵେ ନମଃ ॥ 67 ॥

ୟସ୍ମିନ୍ ସ୍ଥିତମିଦଂ ସର୍ଵଂ ଭାତି ୟଦ୍ଭାନରୂପତଃ ।
ପ୍ରିୟଂ ପୁତ୍ରାଦି ୟତ୍ପ୍ରୀତ୍ୟା ତସ୍ମୈ ଶ୍ରୀଗୁରଵେ ନମଃ ॥ 68 ॥

ୟେନେଦଂ ଦର୍ଶିତଂ ତତ୍ତ୍ଵଂ ଚିତ୍ତଚୈତ୍ୟାଦିକଂ ତଥା ।
ଜାଗ୍ରତ୍ସ୍ଵପ୍ନସୁଷୁପ୍ତ୍ୟାଦି ତସ୍ମୈ ଶ୍ରୀଗୁରଵେ ନମଃ ॥ 69 ॥

ୟସ୍ୟ ଜ୍ଞାନମିଦଂ ଵିଶ୍ଵଂ ନ ଦୃଶ୍ୟଂ ଭିନ୍ନଭେଦତଃ ।
ସଦୈକରୂପରୂପାୟ ତସ୍ମୈ ଶ୍ରୀଗୁରଵେ ନମଃ ॥ 70 ॥

ୟସ୍ୟ ଜ୍ଞାତଂ ମତଂ ତସ୍ୟ ମତଂ ୟସ୍ୟ ନ ଵେଦ ସଃ ।
ଅନନ୍ୟଭାଵଭାଵାୟ ତସ୍ମୈ ଶ୍ରୀଗୁରଵେ ନମଃ ॥ 71 ॥

ୟସ୍ମୈ କାରଣରୂପାୟ କାର୍ୟରୂପେଣ ଭାତି ୟତ୍ ।
କାର୍ୟକାରଣରୂପାୟ ତସ୍ମୈ ଶ୍ରୀଗୁରଵେ ନମଃ ॥ 72 ॥

ନାନାରୂପମିଦଂ ଵିଶ୍ଵଂ ନ କେନାପ୍ୟସ୍ତି ଭିନ୍ନତା ।
କାର୍ୟକାରଣରୂପାୟ ତସ୍ମୈ ଶ୍ରୀଗୁରଵେ ନମଃ ॥ 73 ॥

ଜ୍ଞାନଶକ୍ତିସମାରୂଢତତ୍ତ୍ଵମାଲାଵିଭୂଷିଣେ ।
ଭୁକ୍ତିମୁକ୍ତିପ୍ରଦାତ୍ରେ ଚ ତସ୍ମୈ ଶ୍ରୀଗୁରଵେ ନମଃ ॥ 74 ॥

ଅନେକଜନ୍ମସଂପ୍ରାପ୍ତକର୍ମବଂଧଵିଦାହିନେ ।
ଜ୍ଞାନାନଲପ୍ରଭାଵେନ ତସ୍ମୈ ଶ୍ରୀଗୁରଵେ ନମଃ ॥ 75 ॥

ଶୋଷଣଂ ଭଵସିଂଧୋଶ୍ଚ ଦୀପନଂ କ୍ଷରସଂପଦାମ୍ ।
ଗୁରୋଃ ପାଦୋଦକଂ ୟସ୍ୟ ତସ୍ମୈ ଶ୍ରୀଗୁରଵେ ନମଃ ॥ 76 ॥

ନ ଗୁରୋରଧିକଂ ତତ୍ତ୍ଵଂ ନ ଗୁରୋରଧିକଂ ତପଃ ।
ନ ଗୁରୋରଧିକଂ ଜ୍ଞାନଂ ତସ୍ମୈ ଶ୍ରୀଗୁରଵେ ନମଃ ॥ 77 ॥

ମନ୍ନାଥଃ ଶ୍ରୀଜଗନ୍ନାଥୋ ମଦ୍ଗୁରୁଃ ଶ୍ରୀଜଗଦ୍ଗୁରୁଃ ।
ମମାଽଽତ୍ମା ସର୍ଵଭୂତାତ୍ମା ତସ୍ମୈ ଶ୍ରୀଗୁରଵେ ନମଃ ॥ 78 ॥

ଗୁରୁରାଦିରନାଦିଶ୍ଚ ଗୁରୁଃ ପରମଦୈଵତମ୍ ।
ଗୁରୁମଂତ୍ରସମୋ ନାସ୍ତି ତସ୍ମୈ ଶ୍ରୀଗୁରଵେ ନମଃ ॥ 79 ॥

ଏକ ଏଵ ପରୋ ବଂଧୁର୍ଵିଷମେ ସମୁପସ୍ଥିତେ ।
ଗୁରୁଃ ସକଲଧର୍ମାତ୍ମା ତସ୍ମୈ ଶ୍ରୀଗୁରଵେ ନମଃ ॥ 80 ॥

ଗୁରୁମଧ୍ୟେ ସ୍ଥିତଂ ଵିଶ୍ଵଂ ଵିଶ୍ଵମଧ୍ୟେ ସ୍ଥିତୋ ଗୁରୁଃ ।
ଗୁରୁର୍ଵିଶ୍ଵଂ ନ ଚାନ୍ୟୋଽସ୍ତି ତସ୍ମୈ ଶ୍ରୀଗୁରଵେ ନମଃ ॥ 81 ॥

ଭଵାରଣ୍ୟପ୍ରଵିଷ୍ଟସ୍ୟ ଦିଙ୍ମୋହଭ୍ରାଂତଚେତସଃ ।
ୟେନ ସଂଦର୍ଶିତଃ ପଂଥାଃ ତସ୍ମୈ ଶ୍ରୀଗୁରଵେ ନମଃ ॥ 82 ॥

ତାପତ୍ରୟାଗ୍ନିତପ୍ତାନାମଶାଂତପ୍ରାଣିନାଂ ମୁଦେ ।
ଗୁରୁରେଵ ପରା ଗଂଗା ତସ୍ମୈ ଶ୍ରୀଗୁରଵେ ନମଃ ॥ 83 ॥

[ପାଠଭେଦଃ –
ଅଜ୍ଞାନେନାହିନା ଗ୍ରସ୍ତାଃ ପ୍ରାଣିନସ୍ତାନ୍ ଚିକିତ୍ସକଃ ।
ଵିଦ୍ୟାସ୍ଵରୂପୋ ଭଗଵାଂସ୍ତସ୍ମୈ ଶ୍ରୀଗୁରଵେ ନମଃ ॥
]
ଅଜ୍ଞାନସର୍ପଦଷ୍ଟାନାଂ ପ୍ରାଣିନାଂ କଶ୍ଚିକିତ୍ସକଃ ।
ସମ୍ୟଗ୍​ଜ୍ଞାନମହାମଂତ୍ରଵେଦିନଂ ସଦ୍ଗୁରୁ ଵିନା ॥ 84 ॥

ହେତଵେ ଜଗତାମେଵ ସଂସାରାର୍ଣଵସେତଵେ ।
ପ୍ରଭଵେ ସର୍ଵଵିଦ୍ୟାନାଂ ଶଂଭଵେ ଗୁରଵେ ନମଃ ॥ 85 ॥

ଧ୍ୟାନମୂଲଂ ଗୁରୋର୍ମୂର୍ତିଃ ପୂଜାମୂଲଂ ଗୁରୋଃ ପଦମ୍ ।
ମଂତ୍ରମୂଲଂ ଗୁରୋର୍ଵାକ୍ୟଂ ମୁକ୍ତିମୂଲଂ ଗୁରୋଃ କୃପା ॥ 86 ॥

ସପ୍ତସାଗରପର୍ୟଂତତୀର୍ଥସ୍ନାନଫଲଂ ତୁ ୟତ୍ ।
ଗୁରୋଃ ପାଦୋଦବିଂଦୋଶ୍ଚ ସହସ୍ରାଂଶେ ନ ତତ୍ଫଲମ୍ ॥ 87 ॥

ଶିଵେ ରୁଷ୍ଟେ ଗୁରୁସ୍ତ୍ରାତା ଗୁରୌ ରୁଷ୍ଟେ ନ କଶ୍ଚନ ।
ଲବ୍ଧ୍ଵା କୁଲଗୁରୁଂ ସମ୍ୟଗ୍ଗୁରୁମେଵ ସମାଶ୍ରୟେତ୍ ॥ 88 ॥

ମଧୁଲୁବ୍ଧୋ ୟଥା ଭୃଂଗଃ ପୁଷ୍ପାତ୍ପୁଷ୍ପାଂତରଂ ଵ୍ରଜେତ୍ ।
ଜ୍ଞାନଲୁବ୍ଧସ୍ତଥା ଶିଷ୍ୟୋ ଗୁରୋର୍ଗୁର୍ଵଂତରଂ ଵ୍ରଜେତ୍ ॥ 89 ॥

ଵଂଦେ ଗୁରୁପଦଦ୍ଵଂଦ୍ଵଂ ଵାଙ୍ମନାତୀତଗୋଚରମ୍ ।
ଶ୍ଵେତରକ୍ତପ୍ରଭାଭିନ୍ନଂ ଶିଵଶକ୍ତ୍ୟାତ୍ମକଂ ପରମ୍ ॥ 90 ॥

ଗୁକାରଂ ଚ ଗୁଣାତୀତଂ ରୂକାରଂ ରୂପଵର୍ଜିତମ୍ ।
ଗୁଣାତୀତମରୂପଂ ଚ ୟୋ ଦଦ୍ୟାତ୍ସ ଗୁରୁଃ ସ୍ମୃତଃ ॥ 91 ॥

ଅତ୍ରିନେତ୍ରଃ ଶିଵଃ ସାକ୍ଷାତ୍ ଦ୍ଵିବାହୁଶ୍ଚ ହରିଃ ସ୍ମୃତଃ ।
ୟୋଽଚତୁର୍ଵଦନୋ ବ୍ରହ୍ମା ଶ୍ରୀଗୁରୁଃ କଥିତଃ ପ୍ରିୟେ ॥ 92 ॥

ଅୟଂ ମୟାଂଜଲିର୍ବଦ୍ଧୋ ଦୟାସାଗରସିଦ୍ଧୟେ ।
ୟଦନୁଗ୍ରହତୋ ଜଂତୁଶ୍ଚିତ୍ରସଂସାରମୁକ୍ତିଭାକ୍ ॥ 93 ॥

ଶ୍ରୀଗୁରୋଃ ପରମଂ ରୂପଂ ଵିଵେକଚକ୍ଷୁରଗ୍ରତଃ ।
ମଂଦଭାଗ୍ୟା ନ ପଶ୍ୟଂତି ଅଂଧାଃ ସୂର୍ୟୋଦୟଂ ୟଥା ॥ 94 ॥

କୁଲାନାଂ କୁଲକୋଟୀନାଂ ତାରକସ୍ତତ୍ର ତତ୍​କ୍ଷଣାତ୍ ।
ଅତସ୍ତଂ ସଦ୍ଗୁରୁଂ ଜ୍ଞାତ୍ଵା ତ୍ରିକାଲମଭିଵାଦୟେତ୍ ॥ 95 ॥

ଶ୍ରୀନାଥଚରଣଦ୍ଵଂଦ୍ଵଂ ୟସ୍ୟାଂ ଦିଶି ଵିରାଜତେ ।
ତସ୍ୟାଂ ଦିଶି ନମସ୍କୁର୍ୟାତ୍ ଭକ୍ତ୍ୟା ପ୍ରତିଦିନଂ ପ୍ରିୟେ ॥ 96 ॥

ସାଷ୍ଟାଂଗପ୍ରଣିପାତେନ ସ୍ତୁଵନ୍ନିତ୍ୟଂ ଗୁରୁଂ ଭଜେତ୍ ।
ଭଜନାତ୍ ସ୍ଥୈର୍ୟମାପ୍ନୋତି ସ୍ଵସ୍ଵରୂପମୟୋ ଭଵେତ୍ ॥ 97 ॥

ଦୋର୍ଭ୍ୟାଂ ପଦ୍ଭ୍ୟାଂ ଚ ଜାନୁଭ୍ୟାମୁରସା ଶିରସା ଦୃଶା ।
ମନସା ଵଚସା ଚେତି ପ୍ରଣାମୋଽଷ୍ଟାଂଗ ଉଚ୍ୟତେ ॥ 98 ॥

ତସ୍ୟୈ ଦିଶେ ସତତମଂଜଲିରେଷ ନିତ୍ୟଂ
ପ୍ରକ୍ଷିପ୍ୟତାଂ ମୁଖରିତୈର୍ମଧୁରୈଃ ପ୍ରସୂନୈଃ ।
ଜାଗର୍ତି ୟତ୍ର ଭଗଵାନ୍ ଗୁରୁଚକ୍ରଵର୍ତୀ
ଵିଶ୍ଵସ୍ଥିତିପ୍ରଳୟନାଟକନିତ୍ୟସାକ୍ଷୀ ॥ 99 ॥

ଅଭ୍ୟସ୍ତୈଃ କିମୁ ଦୀର୍ଘକାଲଵିମଲୈର୍ଵ୍ୟାଧିପ୍ରଦୈର୍ଦୁଷ୍କରୈଃ
ପ୍ରାଣାୟାମଶତୈରନେକକରଣୈର୍ଦୁଃଖାତ୍ମକୈର୍ଦୁର୍ଜୟୈଃ ।
ୟସ୍ମିନ୍ନଭ୍ୟୁଦିତେ ଵିନଶ୍ୟତି ବଲୀ ଵାୟୁଃ ସ୍ଵୟଂ ତତ୍​କ୍ଷଣାତ୍
ପ୍ରାପ୍ତୁଂ ତତ୍ସହଜସ୍ଵଭାଵମନିଶଂ ସେଵେତ ଚୈକଂ ଗୁରୁମ୍ ॥ 100 ॥

ଜ୍ଞାନଂ ଵିନା ମୁକ୍ତିପଦଂ ଲଭ୍ୟତେ ଗୁରୁଭକ୍ତିତଃ ।
ଗୁରୋସ୍ସମାନତୋ ନାନ୍ୟତ୍ ସାଧନଂ ଗୁରୁମାର୍ଗିଣାମ୍ ॥ 101 ॥

ୟସ୍ମାତ୍ପରତରଂ ନାସ୍ତି ନେତି ନେତୀତି ଵୈ ଶ୍ରୁତିଃ ।
ମନସା ଵଚସା ଚୈଵ ସତ୍ୟମାରାଧୟେଦ୍ଗୁରୁମ୍ ॥ 102 ॥

ଗୁରୋଃ କୃପାପ୍ରସାଦେନ ବ୍ରହ୍ମଵିଷ୍ଣୁମହେଶ୍ଵରାଃ ।
ସାମର୍ଥ୍ୟମଭଜନ୍ ସର୍ଵେ ସୃଷ୍ଟିସ୍ଥିତ୍ୟଂତକର୍ମଣି ॥ 103 ॥

ଦେଵକିନ୍ନରଗଂଧର୍ଵାଃ ପିତୃୟକ୍ଷାସ୍ତୁ ତୁଂବୁରଃ ।
ମୁନୟୋଽପି ନ ଜାନଂତି ଗୁରୁଶୁଶ୍ରୂଷଣେ ଵିଧିମ୍ ॥ 104 ॥

ତାର୍କିକାଶ୍ଛାଂଦସାଶ୍ଚୈଵ ଦୈଵଜ୍ଞାଃ କର୍ମଠାଃ ପ୍ରିୟେ ।
ଲୌକିକାସ୍ତେ ନ ଜାନଂତି ଗୁରୁତତ୍ତ୍ଵଂ ନିରାକୁଲମ୍ ॥ 105 ॥

ମହାହଂକାରଗର୍ଵେଣ ତତୋଵିଦ୍ୟାବଲେନ ଚ ।
ଭ୍ରମଂତି ଚାସ୍ମିନ୍ ସଂସାରେ ଘଟୀୟଂତ୍ରଂ ୟଥା ପୁନଃ ॥ 106 ॥

ୟଜ୍ଞିନୋଽପି ନ ମୁକ୍ତାଃ ସ୍ୟୁଃ ନ ମୁକ୍ତା ୟୋଗିନସ୍ତଥା ।
ତାପସା ଅପି ନୋ ମୁକ୍ତା ଗୁରୁତତ୍ତ୍ଵାତ୍ପରାଙ୍ମୁଖାଃ ॥ 107 ॥

ନ ମୁକ୍ତାସ୍ତୁ ଚ ଗଂଧର୍ଵାଃ ପିତୃୟକ୍ଷାସ୍ତୁ ଚାରଣାଃ ।
ଋଷୟଃ ସିଦ୍ଧଦେଵାଦ୍ୟା ଗୁରୁସେଵାପରାଙ୍ମୁଖାଃ ॥ 108 ॥

ଇତି ଶ୍ରୀସ୍କଂଦପୁରାଣେ ଉତ୍ତରଖଂଡେ ଉମାମହେଶ୍ଵର ସଂଵାଦେ
ଶ୍ରୀ ଗୁରୁଗୀତାୟାଂ ପ୍ରଥମୋଽଧ୍ୟାୟଃ ॥