ଅଷ୍ଟାଵକ୍ର ଗୀତା ଦଶମୋଽଧ୍ୟାୟଃ

ଅଷ୍ଟାଵକ୍ର ଉଵାଚ ॥
ଵିହାୟ ଵୈରିଣଂ କାମମର୍ଥଂ ଚାନର୍ଥସଂକୁଲମ୍ ।
ଧର୍ମମପ୍ୟେତୟୋର୍ହେତୁଂ ସର୍ଵତ୍ରାନାଦରଂ କୁରୁ ॥ 10-1॥

ସ୍ଵପ୍ନେଂଦ୍ରଜାଲଵତ୍ ପଶ୍ୟ ଦିନାନି ତ୍ରୀଣି ପଂଚ ଵା ।
ମିତ୍ରକ୍ଷେତ୍ରଧନାଗାରଦାରଦାୟାଦିସଂପଦଃ ॥ 10-2॥

ୟତ୍ର ୟତ୍ର ଭଵେତ୍ତୃଷ୍ଣା ସଂସାରଂ ଵିଦ୍ଧି ତତ୍ର ଵୈ ।
ପ୍ରୌଢଵୈରାଗ୍ୟମାଶ୍ରିତ୍ୟ ଵୀତତୃଷ୍ଣଃ ସୁଖୀ ଭଵ ॥ 10-3॥

ତୃଷ୍ଣାମାତ୍ରାତ୍ମକୋ ବଂଧସ୍ତନ୍ନାଶୋ ମୋକ୍ଷ ଉଚ୍ୟତେ ।
ଭଵାସଂସକ୍ତିମାତ୍ରେଣ ପ୍ରାପ୍ତିତୁଷ୍ଟିର୍ମୁହୁର୍ମୁହୁଃ ॥ 10-4॥

ତ୍ଵମେକଶ୍ଚେତନଃ ଶୁଦ୍ଧୋ ଜଡଂ ଵିଶ୍ଵମସତ୍ତଥା ।
ଅଵିଦ୍ୟାପି ନ କିଂଚିତ୍ସା କା ବୁଭୁତ୍ସା ତଥାପି ତେ ॥ 10-5॥

ରାଜ୍ୟଂ ସୁତାଃ କଲତ୍ରାଣି ଶରୀରାଣି ସୁଖାନି ଚ ।
ସଂସକ୍ତସ୍ୟାପି ନଷ୍ଟାନି ତଵ ଜନ୍ମନି ଜନ୍ମନି ॥ 10-6॥

ଅଲମର୍ଥେନ କାମେନ ସୁକୃତେନାପି କର୍ମଣା ।
ଏଭ୍ୟଃ ସଂସାରକାଂତାରେ ନ ଵିଶ୍ରାଂତମଭୂନ୍ ମନଃ ॥ 10-7॥

କୃତଂ ନ କତି ଜନ୍ମାନି କାୟେନ ମନସା ଗିରା ।
ଦୁଃଖମାୟାସଦଂ କର୍ମ ତଦଦ୍ୟାପ୍ୟୁପରମ୍ୟତାମ୍ ॥ 10-8॥