ଶ୍ରୀ ବଟୁକ ଭୈରଵ କଵଚଂ

ଶ୍ରୀଭୈରଵ ଉଵାଚ ।
ଦେଵେଶି ଦେହରକ୍ଷାର୍ଥଂ କାରଣଂ କଥ୍ୟତାଂ ଧ୍ରୁଵମ୍ ।
ମ୍ରିୟଂତେ ସାଧକା ୟେନ ଵିନା ଶ୍ମଶାନଭୂମିଷୁ ॥
ରଣେଷୁ ଚାତିଘୋରେଷୁ ମହାଵାୟୁଜଲେଷୁ ଚ ।
ଶୃଂଗିମକରଵଜ୍ରେଷୁ ଜ୍ଵରାଦିଵ୍ୟାଧିଵହ୍ନିଷୁ ॥

ଶ୍ରୀଦେଵ୍ୟୁଵାଚ ।
କଥୟାମି ଶୃଣୁ ପ୍ରାଜ୍ଞ ବଟୋସ୍ତୁ କଵଚଂ ଶୁଭମ୍ ।
ଗୋପନୀୟଂ ପ୍ରୟତ୍ନେନ ମାତୃଜାରୋପମଂ ୟଥା ॥
ତସ୍ୟ ଧ୍ୟାନଂ ତ୍ରିଧା ପ୍ରୋକ୍ତଂ ସାତ୍ତ୍ଵିକାଦିପ୍ରଭେଦତଃ ।
ସାତ୍ତ୍ଵିକଂ ରାଜସଂ ଚୈଵ ତାମସଂ ଦେଵ ତତ୍ ଶୃଣୁ ॥

ଧ୍ୟାନମ୍ –
ଵଂଦେ ବାଲଂ ସ୍ଫଟିକସଦୃଶଂ କୁଂଡଲୋଦ୍ଭାସିଵକ୍ତ୍ରଂ
ଦିଵ୍ୟାକଲ୍ପୈର୍ନଵମଣିମୟୈଃ କିଂକିଣୀନୂପୁରାଦ୍ୟୈଃ ।
ଦୀପ୍ତାକାରଂ ଵିଶଦଵଦନଂ ସୁପ୍ରସନ୍ନଂ ତ୍ରିନେତ୍ରଂ
ହସ୍ତାବ୍ଜାଭ୍ୟାଂ ବଟୁକମନିଶଂ ଶୂଲଖଡ୍ଗୌଦଧାନମ୍ ॥ 1 ॥

ଉଦ୍ୟଦ୍ଭାସ୍କରସନ୍ନିଭଂ ତ୍ରିନୟନଂ ରକ୍ତାଂଗରାଗସ୍ରଜଂ
ସ୍ମେରାସ୍ୟଂ ଵରଦଂ କପାଲମଭୟଂ ଶୂଲଂ ଦଧାନଂ କରୈଃ ।
ନୀଲଗ୍ରୀଵମୁଦାରଭୂଷଣଶତଂ ଶୀତାଂଶୁଚୂଡୋଜ୍ଜ୍ଵଲଂ
ବଂଧୂକାରୁଣଵାସସଂ ଭୟହରଂ ଦେଵଂ ସଦା ଭାଵୟେ ॥ 2 ॥

ଧ୍ୟାୟେନ୍ନୀଲାଦ୍ରିକାଂତଂ ଶଶିଶକଲଧରଂ ମୁଂଡମାଲଂ ମହେଶଂ
ଦିଗ୍ଵସ୍ତ୍ରଂ ପିଂଗକେଶଂ ଡମରୁମଥ ସୃଣିଂ ଖଡ୍ଗଶୂଲାଭୟାନି ।
ନାଗଂ ଘଂଟାଂ କପାଲଂ କରସରସିରୁହୈର୍ଵିଭ୍ରତଂ ଭୀମଦଂଷ୍ଟ୍ରଂ
ସର୍ପାକଲ୍ପଂ ତ୍ରିନେତ୍ରଂ ମଣିମୟଵିଲସତ୍କିଂକିଣୀ ନୂପୁରାଢ୍ୟମ୍ ॥ 3 ॥

ଅସ୍ୟ ଵଟୁକଭୈରଵକଵଚସ୍ୟ ମହାକାଲ ଋଷିରନୁଷ୍ଟୁପ୍ଛଂଦଃ ଶ୍ରୀଵଟୁକଭୈରଵୋ ଦେଵତା ବଂ ବୀଜଂ ହ୍ରୀଂ ଶକ୍ତିରାପଦୁଦ୍ଧାରଣାୟେତି କୀଲକଂ ମମ ସର୍ଵାଭୀଷ୍ଟସିଦ୍ଧ୍ୟର୍ଥେ ଵିନିୟୋଗଃ ।

କଵଚମ୍ –
ଓଂ ଶିରୋ ମେ ଭୈରଵଃ ପାତୁ ଲଲାଟଂ ଭୀଷଣସ୍ତଥା ।
ନେତ୍ରେ ଚ ଭୂତହନନଃ ସାରମେୟାନୁଗୋ ଭ୍ରୁଵୌ ॥ 1

ଭୂତନାଥଶ୍ଚ ମେ କର୍ଣୌ କପୋଲୌ ପ୍ରେତଵାହନଃ ।
ନାସାପୁଟୌ ତଥୋଷ୍ଠୌ ଚ ଭସ୍ମାଂଗଃ ସର୍ଵଭୂଷଣଃ ॥ 2

ଭୀଷଣାସ୍ୟୋ ମମାସ୍ୟଂ ଚ ଶକ୍ତିହସ୍ତୋ ଗଲଂ ମମ ।
ସ୍କଂଧୌ ଦୈତ୍ୟରିପୁଃ ପାତୁ ବାହୂ ଅତୁଲଵିକ୍ରମଃ ॥ 3

ପାଣୀ କପାଲୀ ମେ ପାତୁ ମୁଂଡମାଲାଧରୋ ହୃଦମ୍ ।
ଵକ୍ଷଃସ୍ଥଲଂ ତଥା ଶାଂତଃ କାମଚାରୀ ସ୍ତନଂ ମମ ॥ 4

ଉଦରଂ ଚ ସ ମେ ତୁଷ୍ଟଃ କ୍ଷେତ୍ରେଶଃ ପାର୍ଶ୍ଵତସ୍ତଥା ।
କ୍ଷେତ୍ରପାଲଃ ପୃଷ୍ଠଦେଶଂ କ୍ଷେତ୍ରାଖ୍ୟୋ ନାଭିତସ୍ତଥା ॥ 5

କଟିଂ ପାପୌଘନାଶଶ୍ଚ ବଟୁକୋ ଲିଂଗଦେଶକମ୍ ।
ଗୁଦଂ ରକ୍ଷାକରଃ ପାତୁ ଊରୂ ରକ୍ଷାକରଃ ସଦା ॥ 6

ଜାନୂ ଚ ଘୁର୍ଘୁରାରାଵୋ ଜଂଘେ ରକ୍ଷତୁ ରକ୍ତପଃ ।
ଗୁଲ୍ଫୌ ଚ ପାଦୁକାସିଦ୍ଧଃ ପାଦପୃଷ୍ଠଂ ସୁରେଶ୍ଵରଃ ॥ 7

ଆପାଦମସ୍ତକଂ ଚୈଵ ଆପଦୁଦ୍ଧାରଣସ୍ତଥା ।
ସହସ୍ରାରେ ମହାପଦ୍ମେ କର୍ପୂରଧଵଲୋ ଗୁରୁଃ ॥ 8

ପାତୁ ମାଂ ଵଟୁକୋ ଦେଵୋ ଭୈରଵଃ ସର୍ଵକର୍ମସୁ ।
ପୂର୍ଵ ସ୍ୟାମସିତାଂଗୋ ମେ ଦିଶି ରକ୍ଷତୁ ସର୍ଵଦା ॥ 9

ଆଗ୍ନେୟ୍ୟାଂ ଚ ରୁରୁଃ ପାତୁ ଦକ୍ଷିଣେ ଚଂଡଭୈରଵଃ ।
ନୈରୃତ୍ୟାଂ କ୍ରୋଧନଃ ପାତୁ ମାମୁନ୍ମତ୍ତସ୍ତୁ ପଶ୍ଚିମେ ॥ 10

ଵାୟଵ୍ୟାଂ ମେ କପାଲୀ ଚ ନିତ୍ୟଂ ପାୟାତ୍ ସୁରେଶ୍ଵରଃ ।
ଭୀଷଣୋ ଭୈରଵଃ ପାତୂତ୍ତରସ୍ୟାଂ ଦିଶି ସର୍ଵଦା ॥ 11

ସଂହାରଭୈରଵଃ ପାତୁ ଦିଶ୍ୟୈଶାନ୍ୟାଂ ମହେଶ୍ଵରଃ ।
ଊର୍ଧ୍ଵେ ପାତୁ ଵିଧାତା ଵୈ ପାତାଲେ ନଂଦିକୋ ଵିଭୁଃ ॥ 12

ସଦ୍ୟୋଜାତସ୍ତୁ ମାଂ ପାୟାତ୍ ସର୍ଵତୋ ଦେଵସେଵିତଃ ।
ଵାମଦେଵୋଽଵତୁ ପ୍ରୀତୋ ରଣେ ଘୋରେ ତଥାଵତୁ ॥ 13

ଜଲେ ତତ୍ପୁରୁଷଃ ପାତୁ ସ୍ଥଲେ ପାତୁ ଗୁରୁଃ ସଦା ।
ଡାକିନୀପୁତ୍ରକଃ ପାତୁ ଦାରାଂସ୍ତୁ ଲାକିନୀସୁତଃ ॥ 14

ପାତୁ ସାକଲକୋ ଭ୍ରାତୄନ୍ ଶ୍ରିୟଂ ମେ ସତତଂ ଗିରଃ ।
ଲାକିନୀପୁତ୍ରକଃ ପାତୁ ପଶୂନଶ୍ଵାନଜାଂସ୍ତଥା ॥ 15

ମହାକାଲୋଽଵତୁ ଚ୍ଛତ୍ରଂ ସୈନ୍ୟଂ ଵୈ କାଲଭୈରଵଃ ।
ରାଜ୍ୟଂ ରାଜ୍ୟଶ୍ରିୟଂ ପାୟାତ୍ ଭୈରଵୋ ଭୀତିହାରକଃ ॥ 16

ରକ୍ଷାହୀନଂତୁ ୟତ୍ ସ୍ଥାନଂ ଵର୍ଜିତଂ କଵଚେନ ଚ ।
ତତ୍ ସର୍ଵଂ ରକ୍ଷ ମେ ଦେଵ ତ୍ଵଂ ୟତଃ ସର୍ଵରକ୍ଷକଃ ॥ 17

ଏତତ୍ କଵଚମୀଶାନ ତଵ ସ୍ନେହାତ୍ ପ୍ରକାଶିତମ୍ ।
ନାଖ୍ୟେୟଂ ନରଲୋକେଷୁ ସାରଭୂତଂ ଚ ସୁଶ୍ରିୟମ୍ ॥ 18

ୟସ୍ମୈ କସ୍ମୈ ନ ଦାତଵ୍ୟଂ କଵଚେଶଂ ସୁଦୁର୍ଲଭମ୍ ।
ନ ଦେୟଂ ପରଶିଷ୍ୟେଭ୍ୟଃ କୃପଣେଭ୍ୟଶ୍ଚ ଶଂକର ॥ 19

ୟୋ ଦଦାତି ନିଷିଦ୍ଧେଭ୍ୟଃ ସ ଵୈ ଭ୍ରଷ୍ଟୋ ଭଵେଦ୍ଧ୍ରୁଵମ୍ ।
ଅନେନ କଵଚେଶେନ ରକ୍ଷାଂ କୃତ୍ଵା ଦ୍ଵିଜୋତ୍ତମଃ ॥ 20

ଵିଚରନ୍ ୟତ୍ର କୁତ୍ରାପି ଵିଘ୍ନୌଘୈଃ ପ୍ରାପ୍ୟତେ ନ ସଃ ।
ମଂତ୍ରେଣ ମ୍ରିୟତେ ୟୋଗୀ କଵଚଂ ୟନ୍ନ ରକ୍ଷିତଃ ॥ 21

ତସ୍ମାତ୍ ସର୍ଵପ୍ରୟତ୍ନେନ ଦୁର୍ଲଭଂ ପାପଚେତସାମ୍ ।
ଭୂର୍ଜେ ରଂଭାତ୍ଵଚେ ଵାପି ଲିଖିତ୍ଵା ଵିଧିଵତ୍ ପ୍ରଭୋ ॥ 22

ଧାରୟେତ୍ ପାଠୟେଦ୍ଵାପି ସଂପଠେଦ୍ଵାପି ନିତ୍ୟଶଃ ।
ସଂପ୍ରାପ୍ନୋତି ପ୍ରଭାଵଂ ଵୈ କଵଚସ୍ୟାସ୍ୟ ଵର୍ଣିତମ୍ ॥ 23

ନମୋ ଭୈରଵଦେଵାୟ ସାରଭୂତାୟ ଵୈ ନମଃ ।
ନମସ୍ତ୍ରୈଲୋକ୍ୟନାଥାୟ ନାଥନାଥାୟ ଵୈ ନମଃ ॥ 24

ଇତି ଵିଶ୍ଵସାରୋଦ୍ଧାରତଂତ୍ରେ ଆପଦୁଦ୍ଧାରକଲ୍ପେ ଭୈରଵଭୈରଵୀସଂଵାଦେ ଵଟୁକଭୈରଵକଵଚଂ ସମାପ୍ତମ୍ ॥