ଶିଵ ସହସ୍ର ନାମ ସ୍ତୋତ୍ରମ୍

ପୂର୍ଵପୀଠିକା ॥

ଵାସୁଦେଵ ଉଵାଚ ।
ତତଃ ସ ପ୍ରୟତୋ ଭୂତ୍ଵା ମମ ତାତ ୟୁଧିଷ୍ଠିର ।
ପ୍ରାଂଜଲିଃ ପ୍ରାହ ଵିପ୍ରର୍ଷିର୍ନାମସଂଗ୍ରହମାଦିତଃ ॥ 1 ॥

ଉପମନ୍ୟୁରୁଵାଚ ।
ବ୍ରହ୍ମପ୍ରୋକ୍ତୈରୃଷିପ୍ରୋକ୍ତୈର୍ଵେଦଵେଦାଂଗସଂଭଵୈଃ ।
ସର୍ଵଲୋକେଷୁ ଵିଖ୍ୟାତଂ ସ୍ତୁତ୍ୟଂ ସ୍ତୋଷ୍ୟାମି ନାମଭିଃ ॥ 2 ॥

ମହଦ୍ଭିର୍ଵିହିତୈଃ ସତ୍ୟୈଃ ସିଦ୍ଧୈଃ ସର୍ଵାର୍ଥସାଧକୈଃ ।
ଋଷିଣା ତଂଡିନା ଭକ୍ତ୍ୟା କୃତୈର୍ଵେଦକୃତାତ୍ମନା ॥ 3 ॥

ୟଥୋକ୍ତୈଃ ସାଧୁଭିଃ ଖ୍ୟାତୈର୍ମୁନିଭିସ୍ତତ୍ତ୍ଵଦର୍ଶିଭିଃ ।
ପ୍ରଵରଂ ପ୍ରଥମଂ ସ୍ଵର୍ଗ୍ୟଂ ସର୍ଵଭୂତହିତଂ ଶୁଭମ୍ ॥ 4 ॥

ଶ୍ରୁତୈଃ ସର୍ଵତ୍ର ଜଗତି ବ୍ରହ୍ମଲୋକାଵତାରିତୈଃ ।
ସତ୍ୟୈସ୍ତତ୍ପରମଂ ବ୍ରହ୍ମ ବ୍ରହ୍ମପ୍ରୋକ୍ତଂ ସନାତନମ୍ ॥ 5 ॥

ଵକ୍ଷ୍ୟେ ୟଦୁକୁଲଶ୍ରେଷ୍ଠ ଶୃଣୁଷ୍ଵାଵହିତୋ ମମ ।
ଵରୟୈନଂ ଭଵଂ ଦେଵଂ ଭକ୍ତସ୍ତ୍ଵଂ ପରମେଶ୍ଵରମ୍ ॥ 6 ॥

ତେନ ତେ ଶ୍ରାଵୟିଷ୍ୟାମି ୟତ୍ତଦ୍ବ୍ରହ୍ମ ସନାତନମ୍ ।
ନ ଶକ୍ୟଂ ଵିସ୍ତରାତ୍କୃତ୍ସ୍ନଂ ଵକ୍ତୁଂ ସର୍ଵସ୍ୟ କେନଚିତ୍ ॥ 7 ॥

ୟୁକ୍ତେନାପି ଵିଭୂତୀନାମପି ଵର୍ଷଶତୈରପି ।
ୟସ୍ୟାଦିର୍ମଧ୍ୟମଂତଂ ଚ ସୁରୈରପି ନ ଗମ୍ୟତେ ॥ 8 ॥

କସ୍ତସ୍ୟ ଶକ୍ନୁୟାଦ୍ଵକ୍ତୁଂ ଗୁଣାନ୍ କାର୍ତ୍ସ୍ନ୍ୟେନ ମାଧଵ ।
କିଂ ତୁ ଦେଵସ୍ୟ ମହତଃ ସଂକ୍ଷିପ୍ତାର୍ଥପଦାକ୍ଷରମ୍ ॥ 9 ॥

ଶକ୍ତିତଶ୍ଚରିତଂ ଵକ୍ଷ୍ୟେ ପ୍ରସାଦାତ୍ତସ୍ୟ ଧୀମତଃ ।
ଅପ୍ରାପ୍ୟ ତୁ ତତୋଽନୁଜ୍ଞାଂ ନ ଶକ୍ୟଃ ସ୍ତୋତୁମୀଶ୍ଵରଃ ॥ 10 ॥

ୟଦା ତେନାଭ୍ୟନୁଜ୍ଞାତଃ ସ୍ତୁତୋ ଵୈ ସ ତଦା ମୟା ।
ଅନାଦିନିଧନସ୍ୟାହଂ ଜଗଦ୍ୟୋନେର୍ମହାତ୍ମନଃ ॥ 11 ॥

ନାମ୍ନାଂ କିଂଚିତ୍ସମୁଦ୍ଦେଶଂ ଵକ୍ଷ୍ୟାମ୍ୟଵ୍ୟକ୍ତୟୋନିନଃ ।
ଵରଦସ୍ୟ ଵରେଣ୍ୟସ୍ୟ ଵିଶ୍ଵରୂପସ୍ୟ ଧୀମତଃ ॥ 12 ॥

ଶୃଣୁ ନାମ୍ନାଂ ଚ ୟଂ କୃଷ୍ଣ ୟଦୁକ୍ତଂ ପଦ୍ମୟୋନିନା ।
ଦଶନାମସହସ୍ରାଣି ୟାନ୍ୟାହ ପ୍ରପିତାମହଃ ॥ 13 ॥

ତାନି ନିର୍ମଥ୍ୟ ମନସା ଦଧ୍ନୋ ଘୃତମିଵୋଦ୍ଧୃତମ୍ ।
ଗିରେଃ ସାରଂ ୟଥା ହେମ ପୁଷ୍ପସାରଂ ୟଥା ମଧୁ ॥ 14 ॥

ଘୃତାତ୍ସାରଂ ୟଥା ମଂଡସ୍ତଥୈତତ୍ସାରମୁଦ୍ଧୃତମ୍ ।
ସର୍ଵପାପାପହମିଦଂ ଚତୁର୍ଵେଦସମନ୍ଵିତମ୍ ॥ 15 ॥

ପ୍ରୟତ୍ନେନାଧିଗଂତଵ୍ୟଂ ଧାର୍ୟଂ ଚ ପ୍ରୟତାତ୍ମନା ।
ମାଂଗଳ୍ୟଂ ପୌଷ୍ଟିକଂ ଚୈଵ ରକ୍ଷୋଘ୍ନଂ ପାଵନଂ ମହତ୍ ॥ 16 ॥

ଇଦଂ ଭକ୍ତାୟ ଦାତଵ୍ୟଂ ଶ୍ରଦ୍ଦଧାନାସ୍ତିକାୟ ଚ ।
ନାଶ୍ରଦ୍ଦଧାନରୂପାୟ ନାସ୍ତିକାୟାଜିତାତ୍ମନେ ॥ 17 ॥

ୟଶ୍ଚାଭ୍ୟସୂୟତେ ଦେଵଂ କାରଣାତ୍ମାନମୀଶ୍ଵରମ୍ ।
ସ କୃଷ୍ଣ ନରକଂ ୟାତି ସହ ପୂର୍ଵୈଃ ସହାତ୍ମଜୈଃ ॥ 18 ॥

ଇଦଂ ଧ୍ୟାନମିଦଂ ୟୋଗମିଦଂ ଧ୍ୟେୟମନୁତ୍ତମମ୍ ।
ଇଦଂ ଜପ୍ୟମିଦଂ ଜ୍ଞାନଂ ରହସ୍ୟମିଦମୁତ୍ତମମ୍ ॥ 19 ॥

ୟଂ ଜ୍ଞାତ୍ଵା ଅଂତକାଲେପି ଗଚ୍ଛେତ ପରମାଂ ଗତିମ୍ ।
ପଵିତ୍ରଂ ମଂଗଳଂ ମେଧ୍ୟଂ କଲ୍ୟାଣମିଦମୁତ୍ତମମ୍ ॥ 20 ॥

ଇଦଂ ବ୍ରହ୍ମା ପୁରା କୃତ୍ଵା ସର୍ଵଲୋକପିତାମହଃ ।
ସର୍ଵ ସ୍ତଵାନାଂ ରାଜତ୍ଵେ ଦିଵ୍ୟାନାଂ ସମକଲ୍ପୟତ୍ ॥ 21 ॥

ତଦା ପ୍ରଭୃତି ଚୈଵାୟମୀଶ୍ଵରସ୍ୟ ମହାତ୍ମନଃ ।
ସ୍ତଵରାଜ ଇତି ଖ୍ୟାତୋ ଜଗତ୍ୟମରପୂଜିତଃ ॥ 22 ॥

ବ୍ରହ୍ମଲୋକାଦୟଂ ସ୍ଵର୍ଗେ ସ୍ତଵରାଜୋଽଵତାରିତଃ ।
ୟତସ୍ତଂଡିଃ ପୁରା ପ୍ରାପ ତେନ ତଂଡିକୃତୋଽଭଵତ୍ ॥ 23 ॥

ସ୍ଵର୍ଗାଚ୍ଚୈଵାତ୍ର ଭୂର୍ଲୋକଂ ତଂଡିନା ହ୍ୟଵତାରିତଃ ।
ସର୍ଵମଂଗଳମାଂଗଳ୍ୟଂ ସର୍ଵପାପପ୍ରଣାଶନମ୍ ॥ 24 ॥

ନିଗଦିଷ୍ୟେ ମହାବାହୋ ସ୍ତଵାନାମୁତ୍ତମଂ ସ୍ତଵମ୍ ।
ବ୍ରହ୍ମଣାମପି ୟଦ୍ବ୍ରହ୍ମ ପରାଣାମପି ୟତ୍ପରମ୍ ॥ 25 ॥

ତେଜସାମପି ୟତ୍ତେଜସ୍ତପସାମପି ୟତ୍ତପଃ ।
ଶାଂତାନାମପି ୟଃ ଶାଂତୋ ଦ୍ୟୁତୀନାମପି ୟା ଦ୍ୟୁତିଃ ॥ 26 ॥

ଦାଂତାନାମପି ୟୋ ଦାଂତୋ ଧୀମତାମପି ୟା ଚ ଧୀଃ ।
ଦେଵାନାମପି ୟୋ ଦେଵ ଋଷୀଣାମପି ୟସ୍ତ୍ଵୃଷିଃ ॥ 27 ॥

ୟଜ୍ଞାନାମପି ୟୋ ୟଜ୍ଞଃ ଶିଵାନାମପି ୟଃ ଶିଵଃ ।
ରୁଦ୍ରାଣାମପି ୟୋ ରୁଦ୍ରଃ ପ୍ରଭା ପ୍ରଭଵତାମପି ॥ 28 ॥

ୟୋଗିନାମପି ୟୋ ୟୋଗୀ କାରଣାନାଂ ଚ କାରଣମ୍ ।
ୟତୋ ଲୋକାଃ ସଂଭଵଂତି ନ ଭଵଂତି ୟତଃ ପୁନଃ ॥ 29 ॥

ସର୍ଵଭୂତାତ୍ମଭୂତସ୍ୟ ହରସ୍ୟାମିତତେଜସଃ ।
ଅଷ୍ଟୋତ୍ତରସହସ୍ରଂ ତୁ ନାମ୍ନାଂ ଶର୍ଵସ୍ୟ ମେ ଶୃଣୁ ।
ୟଚ୍ଛ୍ରୁତ୍ଵା ମନୁଜଵ୍ୟାଘ୍ର ସର୍ଵାନ୍କାମାନଵାପ୍ସ୍ୟସି ॥ 30 ॥

ଧ୍ୟାନମ୍ ।
ଶାଂତଂ ପଦ୍ମାସନସ୍ଥଂ ଶଶିଧରମୁକୁଟଂ ପଂଚଵକ୍ତ୍ରଂ ତ୍ରିନେତ୍ରଂ
ଶୂଲଂ ଵଜ୍ରଂ ଚ ଖଡ୍ଗଂ ପରଶୁମଭୟଦଂ ଦକ୍ଷଭାଗେ ଵହଂତମ୍ ।
ନାଗଂ ପାଶଂ ଚ ଘଂଟାଂ ପ୍ରଳୟହୁତଵହଂ ସାଂକୁଶଂ ଵାମଭାଗେ
ନାନାଲଂକାରୟୁକ୍ତଂ ସ୍ଫଟିକମଣିନିଭଂ ପାର୍ଵତୀଶଂ ନମାମି ॥

ସ୍ତୋତ୍ରମ୍ ।
ଓଂ ସ୍ଥିରଃ ସ୍ଥାଣୁଃ ପ୍ରଭୁର୍ଭୀମଃ ପ୍ରଵରୋ ଵରଦୋ ଵରଃ ।
ସର୍ଵାତ୍ମା ସର୍ଵଵିଖ୍ୟାତଃ ସର୍ଵଃ ସର୍ଵକରୋ ଭଵଃ ॥ 1 ॥

ଜଟୀ ଚର୍ମୀ ଶିଖଂଡୀ ଚ ସର୍ଵାଂଗଃ ସର୍ଵଭାଵନଃ ।
ହରଶ୍ଚ ହରିଣାକ୍ଷଶ୍ଚ ସର୍ଵଭୂତହରଃ ପ୍ରଭୁଃ ॥ 2 ॥

ପ୍ରଵୃତ୍ତିଶ୍ଚ ନିଵୃତ୍ତିଶ୍ଚ ନିୟତଃ ଶାଶ୍ଵତୋ ଧ୍ରୁଵଃ ।
ଶ୍ମଶାନଵାସୀ ଭଗଵାନ୍ ଖଚରୋ ଗୋଚରୋଽର୍ଦନଃ ॥ 3 ॥

ଅଭିଵାଦ୍ୟୋ ମହାକର୍ମା ତପସ୍ଵୀ ଭୂତଭାଵନଃ ।
ଉନ୍ମତ୍ତଵେଷପ୍ରଚ୍ଛନ୍ନଃ ସର୍ଵଲୋକପ୍ରଜାପତିଃ ॥ 4 ॥

ମହାରୂପୋ ମହାକାୟୋ ଵୃଷରୂପୋ ମହାୟଶାଃ ।
ମହାତ୍ମା ସର୍ଵଭୂତାତ୍ମା ଵିଶ୍ଵରୂପୋ ମହାହନୁଃ ॥ 5 ॥

ଲୋକପାଲୋଽଂତର୍ହିତାତ୍ମା ପ୍ରସାଦୋ ହୟଗର୍ଦଭିଃ ।
ପଵିତ୍ରଂ ଚ ମହାଂଶ୍ଚୈଵ ନିୟମୋ ନିୟମାଶ୍ରିତଃ ॥ 6 ॥

ସର୍ଵକର୍ମା ସ୍ଵୟଂଭୂତ ଆଦିରାଦିକରୋ ନିଧିଃ ।
ସହସ୍ରାକ୍ଷୋ ଵିଶାଲାକ୍ଷଃ ସୋମୋ ନକ୍ଷତ୍ରସାଧକଃ ॥ 7 ॥

ଚଂଦ୍ରଃ ସୂର୍ୟଃ ଶନିଃ କେତୁର୍ଗ୍ରହୋ ଗ୍ରହପତିର୍ଵରଃ ।
ଅତ୍ରିରତ୍ର୍ୟା ନମସ୍କର୍ତା ମୃଗବାଣାର୍ପଣୋଽନଘଃ ॥ 8 ॥ [ଆଦ୍ୟଂତଲୟକର୍ତା ଚ]

ମହାତପା ଘୋରତପା ଅଦୀନୋ ଦୀନସାଧକଃ ।
ସଂଵତ୍ସରକରୋ ମଂତ୍ରଃ ପ୍ରମାଣଂ ପରମଂ ତପଃ ॥ 9 ॥

ୟୋଗୀ ୟୋଜ୍ୟୋ ମହାବୀଜୋ ମହାରେତା ମହାବଲଃ ।
ସୁଵର୍ଣରେତାଃ ସର୍ଵଜ୍ଞଃ ସୁବୀଜୋ ବୀଜଵାହନଃ ॥ 10 ॥

ଦଶବାହୁସ୍ତ୍ଵନିମିଷୋ ନୀଲକଂଠ ଉମାପତିଃ ।
ଵିଶ୍ଵରୂପଃ ସ୍ଵୟଂ ଶ୍ରେଷ୍ଠୋ ବଲଵୀରୋ ବଲୋ ଗଣଃ ॥ 11 ॥

ଗଣକର୍ତା ଗଣପତିର୍ଦିଗ୍ଵାସାଃ କାମ ଏଵ ଚ ।
ମଂତ୍ରଵିତ୍ପରମୋ ମଂତ୍ରଃ ସର୍ଵଭାଵକରୋ ହରଃ ॥ 12 ॥

କମଂଡଲୁଧରୋ ଧନ୍ଵୀ ବାଣହସ୍ତଃ କପାଲଵାନ୍ ।
ଅଶନୀ ଶତଘ୍ନୀ ଖଡ୍ଗୀ ପଟ୍ଟିଶୀ ଚାୟୁଧୀ ମହାନ୍ ॥ 13 ॥

ସ୍ରୁଵହସ୍ତଃ ସୁରୂପଶ୍ଚ ତେଜସ୍ତେଜସ୍କରୋ ନିଧିଃ ।
ଉଷ୍ଣୀଷୀ ଚ ସୁଵକ୍ତ୍ରଶ୍ଚ ଉଦଗ୍ରୋ ଵିନତସ୍ତଥା ॥ 14 ॥

ଦୀର୍ଘଶ୍ଚ ହରିକେଶଶ୍ଚ ସୁତୀର୍ଥଃ କୃଷ୍ଣ ଏଵ ଚ ।
ସୃଗାଲରୂପଃ ସିଦ୍ଧାର୍ଥୋ ମୁଂଡଃ ସର୍ଵଶୁଭଂକରଃ ॥ 15 ॥

ଅଜଶ୍ଚ ବହୁରୂପଶ୍ଚ ଗଂଧଧାରୀ କପର୍ଦ୍ୟପି ।
ଊର୍ଧ୍ଵରେତା ଊର୍ଧ୍ଵଲିଂଗ ଊର୍ଧ୍ଵଶାୟୀ ନଭଃସ୍ଥଲଃ ॥ 16 ॥

ତ୍ରିଜଟୀ ଚୀରଵାସାଶ୍ଚ ରୁଦ୍ରଃ ସେନାପତିର୍ଵିଭୁଃ ।
ଅହଶ୍ଚରୋ ନକ୍ତଂଚରସ୍ତିଗ୍ମମନ୍ୟୁଃ ସୁଵର୍ଚସଃ ॥ 17 ॥

ଗଜହା ଦୈତ୍ୟହା କାଲୋ ଲୋକଧାତା ଗୁଣାକରଃ ।
ସିଂହଶାର୍ଦୂଲରୂପଶ୍ଚ ଆର୍ଦ୍ରଚର୍ମାଂବରାଵୃତଃ ॥ 18 ॥

କାଲୟୋଗୀ ମହାନାଦଃ ସର୍ଵକାମଶ୍ଚତୁଷ୍ପଥଃ ।
ନିଶାଚରଃ ପ୍ରେତଚାରୀ ଭୂତଚାରୀ ମହେଶ୍ଵରଃ ॥ 19 ॥

ବହୁଭୂତୋ ବହୁଧରଃ ସ୍ଵର୍ଭାନୁରମିତୋ ଗତିଃ ।
ନୃତ୍ୟପ୍ରିୟୋ ନିତ୍ୟନର୍ତୋ ନର୍ତକଃ ସର୍ଵଲାଲସଃ ॥ 20 ॥

ଘୋରୋ ମହାତପାଃ ପାଶୋ ନିତ୍ୟୋ ଗିରିରୁହୋ ନଭଃ ।
ସହସ୍ରହସ୍ତୋ ଵିଜୟୋ ଵ୍ୟଵସାୟୋ ହ୍ୟତଂଦ୍ରିତଃ ॥ 21 ॥

ଅଧର୍ଷଣୋ ଧର୍ଷଣାତ୍ମା ୟଜ୍ଞହା କାମନାଶକଃ । [ମର୍ଷ]
ଦକ୍ଷୟାଗାପହାରୀ ଚ ସୁସହୋ ମଧ୍ୟମସ୍ତଥା ॥ 22 ॥

ତେଜୋପହାରୀ ବଲହା ମୁଦିତୋଽର୍ଥୋଽଜିତୋଽଵରଃ ।
ଗଂଭୀରଘୋଷୋ ଗଂଭୀରୋ ଗଂଭୀରବଲଵାହନଃ ॥ 23 ॥

ନ୍ୟଗ୍ରୋଧରୂପୋ ନ୍ୟଗ୍ରୋଧୋ ଵୃକ୍ଷକର୍ଣସ୍ଥିତିର୍ଵିଭୁଃ ।
ସୁତୀକ୍ଷ୍ଣଦଶନଶ୍ଚୈଵ ମହାକାୟୋ ମହାନନଃ ॥ 24 ॥

ଵିଷ୍ଵକ୍ସେନୋ ହରିର୍ୟଜ୍ଞଃ ସଂୟୁଗାପୀଡଵାହନଃ ।
ତୀକ୍ଷ୍ଣତାପଶ୍ଚ ହର୍ୟଶ୍ଵଃ ସହାୟଃ କର୍ମକାଲଵିତ୍ ॥ 25 ॥

ଵିଷ୍ଣୁପ୍ରସାଦିତୋ ୟଜ୍ଞଃ ସମୁଦ୍ରୋ ବଡବାମୁଖଃ ।
ହୁତାଶନସହାୟଶ୍ଚ ପ୍ରଶାଂତାତ୍ମା ହୁତାଶନଃ ॥ 26 ॥

ଉଗ୍ରତେଜା ମହାତେଜା ଜନ୍ୟୋ ଵିଜୟକାଲଵିତ୍ ।
ଜ୍ୟୋତିଷାମୟନଂ ସିଦ୍ଧିଃ ସର୍ଵଵିଗ୍ରହ ଏଵ ଚ ॥ 27 ॥

ଶିଖୀ ମୁଂଡୀ ଜଟୀ ଜ୍ଵାଲୀ ମୂର୍ତିଜୋ ମୂର୍ଧଗୋ ବଲୀ ।
ଵେଣଵୀ ପଣଵୀ ତାଲୀ ଖଲୀ କାଲକଟଂକଟଃ ॥ 28 ॥

ନକ୍ଷତ୍ରଵିଗ୍ରହମତିର୍ଗୁଣବୁଦ୍ଧିର୍ଲୟୋଽଗମଃ ।
ପ୍ରଜାପତିର୍ଵିଶ୍ଵବାହୁର୍ଵିଭାଗଃ ସର୍ଵଗୋଽମୁଖଃ ॥ 29 ॥

ଵିମୋଚନଃ ସୁସରଣୋ ହିରଣ୍ୟକଵଚୋଦ୍ଭଵଃ ।
ମେଢ୍ରଜୋ ବଲଚାରୀ ଚ ମହୀଚାରୀ ସ୍ରୁତସ୍ତଥା ॥ 30 ॥ [ମେଘଜୋ]

ସର୍ଵତୂର୍ୟନିନାଦୀ ଚ ସର୍ଵାତୋଦ୍ୟପରିଗ୍ରହଃ ।
ଵ୍ୟାଲରୂପୋ ଗୁହାଵାସୀ ଗୁହୋ ମାଲୀ ତରଂଗଵିତ୍ ॥ 31 ॥

ତ୍ରିଦଶସ୍ତ୍ରିକାଲଧୃକ୍କର୍ମସର୍ଵବଂଧଵିମୋଚନଃ ।
ବଂଧନସ୍ତ୍ଵସୁରେଂଦ୍ରାଣାଂ ୟୁଧିଶତ୍ରୁଵିନାଶନଃ ॥ 32 ॥

ସାଂଖ୍ୟପ୍ରସାଦୋ ଦୁର୍ଵାସାଃ ସର୍ଵସାଧୁନିଷେଵିତଃ ।
ପ୍ରସ୍କଂଦନୋ ଵିଭାଗଜ୍ଞୋ ଅତୁଲ୍ୟୋ ୟଜ୍ଞଭାଗଵିତ୍ ॥ 33 ॥

ସର୍ଵଵାସଃ ସର୍ଵଚାରୀ ଦୁର୍ଵାସା ଵାସଵୋଽମରଃ ।
ହୈମୋ ହେମକରୋଽୟଜ୍ଞଃ ସର୍ଵଧାରୀ ଧରୋତ୍ତମଃ ॥ 34 ॥ [ୟଜ୍ଞଃ]

ଲୋହିତାକ୍ଷୋ ମହାକ୍ଷଶ୍ଚ ଵିଜୟାକ୍ଷୋ ଵିଶାରଦଃ ।
ସଂଗ୍ରହୋ ନିଗ୍ରହଃ କର୍ତା ସର୍ପଚୀରନିଵାସନଃ ॥ 35 ॥

ମୁଖ୍ୟୋଽମୁଖ୍ୟଶ୍ଚ ଦେହଶ୍ଚ କାହଲିଃ ସର୍ଵକାମଦଃ ।
ସର୍ଵକାଲପ୍ରସାଦଶ୍ଚ ସୁବଲୋ ବଲରୂପଧୃତ୍ ॥ 36 ॥

ସର୍ଵକାମଵରଶ୍ଚୈଵ ସର୍ଵଦଃ ସର୍ଵତୋମୁଖଃ ।
ଆକାଶନିର୍ଵିରୂପଶ୍ଚ ନିପାତୀ ହ୍ୟଵଶଃ ଖଗଃ ॥ 37 ॥

ରୌଦ୍ରରୂପୋଽଂଶୁରାଦିତ୍ୟୋ ବହୁରଶ୍ମିଃ ସୁଵର୍ଚସୀ ।
ଵସୁଵେଗୋ ମହାଵେଗୋ ମନୋଵେଗୋ ନିଶାଚରଃ ॥ 38 ॥

ସର୍ଵଵାସୀ ଶ୍ରିୟାଵାସୀ ଉପଦେଶକରୋଽକରଃ ।
ମୁନିରାତ୍ମନିରାଲୋକଃ ସଂଭଗ୍ନଶ୍ଚ ସହସ୍ରଦଃ ॥ 39 ॥

ପକ୍ଷୀ ଚ ପକ୍ଷରୂପଶ୍ଚ ଅତିଦୀପ୍ତୋ ଵିଶାଂ ପତିଃ ।
ଉନ୍ମାଦୋ ମଦନଃ କାମୋ ହ୍ୟଶ୍ଵତ୍ଥୋଽର୍ଥକରୋ ୟଶଃ ॥ 40 ॥

ଵାମଦେଵଶ୍ଚ ଵାମଶ୍ଚ ପ୍ରାଗ୍ଦକ୍ଷିଣଶ୍ଚ ଵାମନଃ ।
ସିଦ୍ଧୟୋଗୀ ମହର୍ଷିଶ୍ଚ ସିଦ୍ଧାର୍ଥଃ ସିଦ୍ଧସାଧକଃ ॥ 41 ॥

ଭିକ୍ଷୁଶ୍ଚ ଭିକ୍ଷୁରୂପଶ୍ଚ ଵିପଣୋ ମୃଦୁରଵ୍ୟୟଃ ।
ମହାସେନୋ ଵିଶାଖଶ୍ଚ ଷଷ୍ଟିଭାଗୋ ଗଵାଂ ପତିଃ ॥ 42 ॥

ଵଜ୍ରହସ୍ତଶ୍ଚ ଵିଷ୍କଂଭୀ ଚମୂସ୍ତଂଭନ ଏଵ ଚ ।
ଵୃତ୍ତାଵୃତ୍ତକରସ୍ତାଲୋ ମଧୁର୍ମଧୁକଲୋଚନଃ ॥ 43 ॥

ଵାଚସ୍ପତ୍ୟୋ ଵାଜସନୋ ନିତ୍ୟମାଶ୍ରମପୂଜିତଃ । [ନିତ୍ୟମାଶ୍ରିତପୂଜିତଃ]
ବ୍ରହ୍ମଚାରୀ ଲୋକଚାରୀ ସର୍ଵଚାରୀ ଵିଚାରଵିତ୍ ॥ 44 ॥

ଈଶାନ ଈଶ୍ଵରଃ କାଲୋ ନିଶାଚାରୀ ପିନାକଭୃତ୍ ।
ନିମିତ୍ତସ୍ଥୋ ନିମିତ୍ତଂ ଚ ନଂଦିର୍ନଂଦିକରୋ ହରିଃ ॥ 45 ॥

ନଂଦୀଶ୍ଵରଶ୍ଚ ନଂଦୀ ଚ ନଂଦନୋ ନଂଦିଵର୍ଧନଃ ।
ଭଗହାରୀ ନିହଂତା ଚ କାଲୋ ବ୍ରହ୍ମା ପିତାମହଃ ॥ 46 ॥

ଚତୁର୍ମୁଖୋ ମହାଲିଂଗଶ୍ଚାରୁଲିଂଗସ୍ତଥୈଵ ଚ ।
ଲିଂଗାଧ୍ୟକ୍ଷଃ ସୁରାଧ୍ୟକ୍ଷୋ ୟୋଗାଧ୍ୟକ୍ଷୋ ୟୁଗାଵହଃ ॥ 47 ॥

ବୀଜାଧ୍ୟକ୍ଷୋ ବୀଜକର୍ତା ଅଧ୍ୟାତ୍ମାନୁଗତୋ ବଲଃ ।
ଇତିହାସଃ ସକଲ୍ପଶ୍ଚ ଗୌତମୋଽଥ ନିଶାକରଃ ॥ 48 ॥

ଦଂଭୋ ହ୍ୟଦଂଭୋ ଵୈଦଂଭୋ ଵଶ୍ୟୋ ଵଶକରଃ କଲିଃ ।
ଲୋକକର୍ତା ପଶୁପତିର୍ମହାକର୍ତା ହ୍ୟନୌଷଧଃ ॥ 49 ॥

ଅକ୍ଷରଂ ପରମଂ ବ୍ରହ୍ମ ବଲଵଚ୍ଛକ୍ର ଏଵ ଚ ।
ନୀତିର୍ହ୍ୟନୀତିଃ ଶୁଦ୍ଧାତ୍ମା ଶୁଦ୍ଧୋ ମାନ୍ୟୋ ଗତାଗତଃ ॥ 50 ॥

ବହୁପ୍ରସାଦଃ ସୁସ୍ଵପ୍ନୋ ଦର୍ପଣୋଽଥ ତ୍ଵମିତ୍ରଜିତ୍ ।
ଵେଦକାରୋ ମଂତ୍ରକାରୋ ଵିଦ୍ଵାନ୍ ସମରମର୍ଦନଃ ॥ 51 ॥

ମହାମେଘନିଵାସୀ ଚ ମହାଘୋରୋ ଵଶୀକରଃ ।
ଅଗ୍ନିଜ୍ଵାଲୋ ମହାଜ୍ଵାଲୋ ଅତିଧୂମ୍ରୋ ହୁତୋ ହଵିଃ ॥ 52 ॥

ଵୃଷଣଃ ଶଂକରୋ ନିତ୍ୟଵର୍ଚସ୍ଵୀ ଧୂମକେତନଃ ।
ନୀଲସ୍ତଥାଂଗଲୁବ୍ଧଶ୍ଚ ଶୋଭନୋ ନିରଵଗ୍ରହଃ ॥ 53 ॥

ସ୍ଵସ୍ତିଦଃ ସ୍ଵସ୍ତିଭାଵଶ୍ଚ ଭାଗୀ ଭାଗକରୋ ଲଘୁଃ ।
ଉତ୍ସଂଗଶ୍ଚ ମହାଂଗଶ୍ଚ ମହାଗର୍ଭପରାୟଣଃ ॥ 54 ॥

କୃଷ୍ଣଵର୍ଣଃ ସୁଵର୍ଣଶ୍ଚ ଇଂଦ୍ରିୟଂ ସର୍ଵଦେହିନାମ୍ ।
ମହାପାଦୋ ମହାହସ୍ତୋ ମହାକାୟୋ ମହାୟଶାଃ ॥ 55 ॥

ମହାମୂର୍ଧା ମହାମାତ୍ରୋ ମହାନେତ୍ରୋ ନିଶାଲୟଃ ।
ମହାଂତକୋ ମହାକର୍ଣୋ ମହୋଷ୍ଠଶ୍ଚ ମହାହନୁଃ ॥ 56 ॥

ମହାନାସୋ ମହାକଂବୁର୍ମହାଗ୍ରୀଵଃ ଶ୍ମଶାନଭାକ୍ ।
ମହାଵକ୍ଷା ମହୋରସ୍କୋ ହ୍ୟଂତରାତ୍ମା ମୃଗାଲୟଃ ॥ 57 ॥

ଲଂବନୋ ଲଂବିତୋଷ୍ଠଶ୍ଚ ମହାମାୟଃ ପୟୋନିଧିଃ ।
ମହାଦଂତୋ ମହାଦଂଷ୍ଟ୍ରୋ ମହାଜିହ୍ଵୋ ମହାମୁଖଃ ॥ 58 ॥

ମହାନଖୋ ମହାରୋମା ମହାକେଶୋ ମହାଜଟଃ ।
ପ୍ରସନ୍ନଶ୍ଚ ପ୍ରସାଦଶ୍ଚ ପ୍ରତ୍ୟୟୋ ଗିରିସାଧନଃ ॥ 59 ॥

ସ୍ନେହନୋଽସ୍ନେହନଶ୍ଚୈଵ ଅଜିତଶ୍ଚ ମହାମୁନିଃ ।
ଵୃକ୍ଷାକାରୋ ଵୃକ୍ଷକେତୁରନଲୋ ଵାୟୁଵାହନଃ ॥ 60 ॥

ଗଂଡଲୀ ମେରୁଧାମା ଚ ଦେଵାଧିପତିରେଵ ଚ ।
ଅଥର୍ଵଶୀର୍ଷଃ ସାମାସ୍ୟ ଋକ୍ସହସ୍ରାମିତେକ୍ଷଣଃ ॥ 61 ॥

ୟଜୁଃ ପାଦଭୁଜୋ ଗୁହ୍ୟଃ ପ୍ରକାଶୋ ଜଂଗମସ୍ତଥା ।
ଅମୋଘାର୍ଥଃ ପ୍ରସାଦଶ୍ଚ ଅଭିଗମ୍ୟଃ ସୁଦର୍ଶନଃ ॥ 62 ॥

ଉପକାରଃ ପ୍ରିୟଃ ସର୍ଵଃ କନକଃ କାଂଚନଚ୍ଛଵିଃ ।
ନାଭିର୍ନଂଦିକରୋ ଭାଵଃ ପୁଷ୍କରସ୍ଥପତିଃ ସ୍ଥିରଃ ॥ 63 ॥

ଦ୍ଵାଦଶସ୍ତ୍ରାସନଶ୍ଚାଦ୍ୟୋ ୟଜ୍ଞୋ ୟଜ୍ଞସମାହିତଃ ।
ନକ୍ତଂ କଲିଶ୍ଚ କାଲଶ୍ଚ ମକରଃ କାଲପୂଜିତଃ ॥ 64 ॥

ସଗଣୋ ଗଣକାରଶ୍ଚ ଭୂତଵାହନସାରଥିଃ ।
ଭସ୍ମଶୟୋ ଭସ୍ମଗୋପ୍ତା ଭସ୍ମଭୂତସ୍ତରୁର୍ଗଣଃ ॥ 65 ॥

ଲୋକପାଲସ୍ତଥାଽଲୋକୋ ମହାତ୍ମା ସର୍ଵପୂଜିତଃ ।
ଶୁକ୍ଲସ୍ତ୍ରିଶୁକ୍ଲଃ ସଂପନ୍ନଃ ଶୁଚିର୍ଭୂତନିଷେଵିତଃ ॥ 66 ॥

ଆଶ୍ରମସ୍ଥଃ କ୍ରିୟାଵସ୍ଥୋ ଵିଶ୍ଵକର୍ମମତିର୍ଵରଃ ।
ଵିଶାଲଶାଖସ୍ତାମ୍ରୋଷ୍ଠୋ ହ୍ୟଂବୁଜାଲଃ ସୁନିଶ୍ଚଲଃ ॥ 67 ॥

କପିଲଃ କପିଶଃ ଶୁକ୍ଲ ଆୟୁଶ୍ଚୈଵ ପରୋ¶ଃ ।
ଗଂଧର୍ଵୋ ହ୍ୟଦିତିସ୍ତାର୍କ୍ଷ୍ୟଃ ସୁଵିଜ୍ଞେୟଃ ସୁଶାରଦଃ ॥ 68 ॥

ପରଶ୍ଵଧାୟୁଧୋ ଦେଵୋ ହ୍ୟନୁକାରୀ ସୁବାଂଧଵଃ ।
ତୁଂବଵୀଣୋ ମହାକ୍ରୋଧ ଊର୍ଧ୍ଵରେତା ଜଲେଶୟଃ ॥ 69 ॥

ଉଗ୍ରୋ ଵଂଶକରୋ ଵଂଶୋ ଵଂଶନାଦୋ ହ୍ୟନିଂଦିତଃ ।
ସର୍ଵାଂଗରୂପୋ ମାୟାଵୀ ସୁହୃଦୋ ହ୍ୟନିଲୋଽନଲଃ ॥ 70 ॥

ବଂଧନୋ ବଂଧକର୍ତା ଚ ସୁବଂଧନଵିମୋଚନଃ ।
ସ ୟଜ୍ଞାରିଃ ସ କାମାରିର୍ମହାଦଂଷ୍ଟ୍ରୋ ମହାୟୁଧଃ ॥ 71 ॥

ବହୁଧା ନିଂଦିତଃ ଶର୍ଵଃ ଶଂକରଃ ଶଂକରୋଽଧନଃ ।
ଅମରେଶୋ ମହାଦେଵୋ ଵିଶ୍ଵଦେଵଃ ସୁରାରିହା ॥ 72 ॥

ଅହିର୍ବୁଧ୍ନ୍ୟୋଽନିଲାଭଶ୍ଚ ଚେକିତାନୋ ହଵିସ୍ତଥା । [ହରି]
ଅଜୈକପାଚ୍ଚ କାପାଲୀ ତ୍ରିଶଂକୁରଜିତଃ ଶିଵଃ ॥ 73 ॥

ଧନ୍ଵଂତରିର୍ଧୂମକେତୁଃ ସ୍କଂଦୋ ଵୈଶ୍ରଵଣସ୍ତଥା ।
ଧାତା ଶକ୍ରଶ୍ଚ ଵିଷ୍ଣୁଶ୍ଚ ମିତ୍ରସ୍ତ୍ଵଷ୍ଟା ଧ୍ରୁଵୋ ଧରଃ ॥ 74 ॥

ପ୍ରଭାଵଃ ସର୍ଵଗୋ ଵାୟୁରର୍ୟମା ସଵିତା ରଵିଃ ।
ଉଷଂଗୁଶ୍ଚ ଵିଧାତା ଚ ମାଂଧାତା ଭୂତଭାଵନଃ ॥ 75 ॥

ଵିଭୁର୍ଵର୍ଣଵିଭାଵୀ ଚ ସର୍ଵକାମଗୁଣାଵହଃ ।
ପଦ୍ମନାଭୋ ମହାଗର୍ଭଶ୍ଚଂଦ୍ରଵକ୍ତ୍ରୋଽନିଲୋଽନଲଃ ॥ 76 ॥

ବଲଵାଂଶ୍ଚୋପଶାଂତଶ୍ଚ ପୁରାଣଃ ପୁଣ୍ୟଚଂଚୁରୀ ।
କୁରୁକର୍ତା କୁରୁଵାସୀ କୁରୁଭୂତୋ ଗୁଣୌଷଧଃ ॥ 77 ॥

ସର୍ଵାଶୟୋ ଦର୍ଭଚାରୀ ସର୍ଵେଷାଂ ପ୍ରାଣିନାଂ ପତିଃ ।
ଦେଵଦେଵଃ ସୁଖାସକ୍ତଃ ସଦସତ୍ସର୍ଵରତ୍ନଵିତ୍ ॥ 78 ॥

କୈଲାସଗିରିଵାସୀ ଚ ହିମଵଦ୍ଗିରିସଂଶ୍ରୟଃ ।
କୂଲହାରୀ କୂଲକର୍ତା ବହୁଵିଦ୍ୟୋ ବହୁପ୍ରଦଃ ॥ 79 ॥

ଵଣିଜୋ ଵର୍ଧକୀ ଵୃକ୍ଷୋ ଵକୁଲଶ୍ଚଂଦନଶ୍ଛଦଃ ।
ସାରଗ୍ରୀଵୋ ମହାଜତ୍ରୁରଲୋଲଶ୍ଚ ମହୌଷଧଃ ॥ 80 ॥

ସିଦ୍ଧାର୍ଥକାରୀ ସିଦ୍ଧାର୍ଥଶ୍ଛଂଦୋଵ୍ୟାକରଣୋତ୍ତରଃ ।
ସିଂହନାଦଃ ସିଂହଦଂଷ୍ଟ୍ରଃ ସିଂହଗଃ ସିଂହଵାହନଃ ॥ 81 ॥

ପ୍ରଭାଵାତ୍ମା ଜଗତ୍କାଲସ୍ଥାଲୋ ଲୋକହିତସ୍ତରୁଃ ।
ସାରଂଗୋ ନଵଚକ୍ରାଂଗଃ କେତୁମାଲୀ ସଭାଵନଃ ॥ 82 ॥

ଭୂତାଲୟୋ ଭୂତପତିରହୋରାତ୍ରମନିଂଦିତଃ ॥ 83 ॥

ଵାହିତା ସର୍ଵଭୂତାନାଂ ନିଲୟଶ୍ଚ ଵିଭୁର୍ଭଵଃ ।
ଅମୋଘଃ ସଂୟତୋ ହ୍ୟଶ୍ଵୋ ଭୋଜନଃ ପ୍ରାଣଧାରଣଃ ॥ 84 ॥

ଧୃତିମାନ୍ ମତିମାନ୍ ଦକ୍ଷଃ ସତ୍କୃତଶ୍ଚ ୟୁଗାଧିପଃ ।
ଗୋପାଲିର୍ଗୋପତିର୍ଗ୍ରାମୋ ଗୋଚର୍ମଵସନୋ ହରିଃ ॥ 85 ॥

ହିରଣ୍ୟବାହୁଶ୍ଚ ତଥା ଗୁହାପାଲଃ ପ୍ରଵେଶିନାମ୍ ।
ପ୍ରକୃଷ୍ଟାରିର୍ମହାହର୍ଷୋ ଜିତକାମୋ ଜିତେଂଦ୍ରିୟଃ ॥ 86 ॥

ଗାଂଧାରଶ୍ଚ ସୁଵାସଶ୍ଚ ତପଃସକ୍ତୋ ରତିର୍ନରଃ ।
ମହାଗୀତୋ ମହାନୃତ୍ୟୋ ହ୍ୟପ୍ସରୋଗଣସେଵିତଃ ॥ 87 ॥

ମହାକେତୁର୍ମହାଧାତୁର୍ନୈକସାନୁଚରଶ୍ଚଲଃ ।
ଆଵେଦନୀୟ ଆଦେଶଃ ସର୍ଵଗଂଧସୁଖାଵହଃ ॥ 88 ॥

ତୋରଣସ୍ତାରଣୋ ଵାତଃ ପରିଧୀ ପତିଖେଚରଃ ।
ସଂୟୋଗୋ ଵର୍ଧନୋ ଵୃଦ୍ଧୋ ଅତିଵୃଦ୍ଧୋ ଗୁଣାଧିକଃ ॥ 89 ॥

ନିତ୍ୟ ଆତ୍ମସହାୟଶ୍ଚ ଦେଵାସୁରପତିଃ ପତିଃ ।
ୟୁକ୍ତଶ୍ଚ ୟୁକ୍ତବାହୁଶ୍ଚ ଦେଵୋ ଦିଵିସୁପର୍ଵଣଃ ॥ 90 ॥

ଆଷାଢଶ୍ଚ ସୁଷାଢଶ୍ଚ ଧ୍ରୁଵୋଽଥ ହରିଣୋ ହରଃ ।
ଵପୁରାଵର୍ତମାନେଭ୍ୟୋ ଵସୁଶ୍ରେଷ୍ଠୋ ମହାପଥଃ ॥ 91 ॥

ଶିରୋହାରୀ ଵିମର୍ଶଶ୍ଚ ସର୍ଵଲକ୍ଷଣଲକ୍ଷିତଃ ।
ଅକ୍ଷଶ୍ଚ ରଥୟୋଗୀ ଚ ସର୍ଵୟୋଗୀ ମହାବଲଃ ॥ 92 ॥

ସମାମ୍ନାୟୋଽସମାମ୍ନାୟସ୍ତୀର୍ଥଦେଵୋ ମହାରଥଃ ।
ନିର୍ଜୀଵୋ ଜୀଵନୋ ମଂତ୍ରଃ ଶୁଭାକ୍ଷୋ ବହୁକର୍କଶଃ ॥ 93 ॥

ରତ୍ନପ୍ରଭୂତୋ ରକ୍ତାଂଗୋ ମହାର୍ଣଵନିପାନଵିତ୍ । [ରତ୍ନାଂଗୋ]
ମୂଲଂ ଵିଶାଲୋ ହ୍ୟମୃତୋ ଵ୍ୟକ୍ତାଵ୍ୟକ୍ତସ୍ତପୋନିଧିଃ ॥ 94 ॥

ଆରୋହଣୋଽଧିରୋହଶ୍ଚ ଶୀଲଧାରୀ ମହାୟଶାଃ ।
ସେନାକଲ୍ପୋ ମହାକଲ୍ପୋ ୟୋଗୋ ୟୁଗକରୋ ହରିଃ ॥ 95 ॥ [ୟୋଗକରୋ]

ୟୁଗରୂପୋ ମହାରୂପୋ ମହାନାଗହନୋ ଵଧଃ ।
ନ୍ୟାୟନିର୍ଵପଣଃ ପାଦଃ ପଂଡିତୋ ହ୍ୟଚଲୋପମଃ ॥ 96 ॥

ବହୁମାଲୋ ମହାମାଲଃ ଶଶୀ ହରସୁଲୋଚନଃ ।
ଵିସ୍ତାରୋ ଲଵଣଃ କୂପସ୍ତ୍ରିୟୁଗଃ ସଫଲୋଦୟଃ ॥ 97 ॥

ତ୍ରିଲୋଚନୋ ଵିଷଣ୍ଣାଂଗୋ ମଣିଵିଦ୍ଧୋ ଜଟାଧରଃ ।
ବିଂଦୁର୍ଵିସର୍ଗଃ ସୁମୁଖଃ ଶରଃ ସର୍ଵାୟୁଧଃ ସହଃ ॥ 98 ॥

ନିଵେଦନଃ ସୁଖାଜାତଃ ସୁଗଂଧାରୋ ମହାଧନୁଃ ।
ଗଂଧପାଲୀ ଚ ଭଗଵାନୁତ୍ଥାନଃ ସର୍ଵକର୍ମଣାମ୍ ॥ 99 ॥

ମଂଥାନୋ ବହୁଲୋ ଵାୟୁଃ ସକଲଃ ସର୍ଵଲୋଚନଃ ।
ତଲସ୍ତାଲଃ କରସ୍ଥାଲୀ ଊର୍ଧ୍ଵସଂହନନୋ ମହାନ୍ ॥ 100 ॥

ଛତ୍ରଂ ସୁଚ୍ଛତ୍ରୋ ଵିଖ୍ୟାତୋ ଲୋକଃ ସର୍ଵାଶ୍ରୟଃ କ୍ରମଃ ।
ମୁଂଡୋ ଵିରୂପୋ ଵିକୃତୋ ଦଂଡୀ କୁଂଡୀ ଵିକୁର୍ଵଣଃ ॥ 101 ॥

ହର୍ୟକ୍ଷଃ କକୁଭୋ ଵଜ୍ରୀ ଶତଜିହ୍ଵଃ ସହସ୍ରପାତ୍ ।
ସହସ୍ରମୂର୍ଧା ଦେଵେଂଦ୍ରଃ ସର୍ଵଦେଵମୟୋ ଗୁରୁଃ ॥ 102 ॥

ସହସ୍ରବାହୁଃ ସର୍ଵାଂଗଃ ଶରଣ୍ୟଃ ସର୍ଵଲୋକକୃତ୍ ।
ପଵିତ୍ରଂ ତ୍ରିକକୁନ୍ମଂତ୍ରଃ କନିଷ୍ଠଃ କୃଷ୍ଣପିଂଗଳଃ ॥ 103 ॥

ବ୍ରହ୍ମଦଂଡଵିନିର୍ମାତା ଶତଘ୍ନୀପାଶଶକ୍ତିମାନ୍ ।
ପଦ୍ମଗର୍ଭୋ ମହାଗର୍ଭୋ ବ୍ରହ୍ମଗର୍ଭୋ ଜଲୋଦ୍ଭଵଃ ॥ 104 ॥

ଗଭସ୍ତିର୍ବ୍ରହ୍ମକୃଦ୍ବ୍ରହ୍ମୀ ବ୍ରହ୍ମଵିଦ୍ବ୍ରାହ୍ମଣୋ ଗତିଃ ।
ଅନଂତରୂପୋ ନୈକାତ୍ମା ତିଗ୍ମତେଜାଃ ସ୍ଵୟଂଭୁଵଃ ॥ 105 ॥

ଊର୍ଧ୍ଵଗାତ୍ମା ପଶୁପତିର୍ଵାତରଂହା ମନୋଜଵଃ ।
ଚଂଦନୀ ପଦ୍ମନାଲାଗ୍ରଃ ସୁରଭ୍ୟୁତ୍ତରଣୋ ନରଃ ॥ 106 ॥

କର୍ଣିକାରମହାସ୍ରଗ୍ଵୀ ନୀଲମୌଳିଃ ପିନାକଧୃତ୍ ।
ଉମାପତିରୁମାକାଂତୋ ଜାହ୍ନଵୀଧୃଦୁମାଧଵଃ ॥ 107 ॥

ଵରୋ ଵରାହୋ ଵରଦୋ ଵରେଣ୍ୟଃ ସୁମହାସ୍ଵନଃ ।
ମହାପ୍ରସାଦୋ ଦମନଃ ଶତ୍ରୁହା ଶ୍ଵେତପିଂଗଳଃ ॥ 108 ॥

ପୀତାତ୍ମା ପରମାତ୍ମା ଚ ପ୍ରୟତାତ୍ମା ପ୍ରଧାନଧୃତ୍ । [ପ୍ରୀତାତ୍ମା]
ସର୍ଵପାର୍ଶ୍ଵମୁଖସ୍ତ୍ର୍ୟକ୍ଷୋ ଧର୍ମସାଧାରଣୋ ଵରଃ ॥ 109 ॥

ଚରାଚରାତ୍ମା ସୂକ୍ଷ୍ମାତ୍ମା ଅମୃତୋ ଗୋଵୃଷେଶ୍ଵରଃ ।
ସାଧ୍ୟର୍ଷିର୍ଵସୁରାଦିତ୍ୟୋ ଵିଵସ୍ଵାନ୍ସଵିତାମୃତଃ ॥ 110 ॥

ଵ୍ୟାସଃ ସର୍ଗଃ ସୁସଂକ୍ଷେପୋ ଵିସ୍ତରଃ ପର୍ୟୟୋ ନରଃ ।
ଋତୁଃ ସଂଵତ୍ସରୋ ମାସଃ ପକ୍ଷଃ ସଂଖ୍ୟାସମାପନଃ ॥ 111 ॥

କଳା କାଷ୍ଠା ଲଵା ମାତ୍ରା ମୁହୂର୍ତାହଃ କ୍ଷପାଃ କ୍ଷଣାଃ ।
ଵିଶ୍ଵକ୍ଷେତ୍ରଂ ପ୍ରଜାବୀଜଂ ଲିଂଗମାଦ୍ୟସ୍ତୁ ନିର୍ଗମଃ ॥ 112 ॥

ସଦସଦ୍ଵ୍ୟକ୍ତମଵ୍ୟକ୍ତଂ ପିତା ମାତା ପିତାମହଃ ।
ସ୍ଵର୍ଗଦ୍ଵାରଂ ପ୍ରଜାଦ୍ଵାରଂ ମୋକ୍ଷଦ୍ଵାରଂ ତ୍ରିଵିଷ୍ଟପମ୍ ॥ 113 ॥

ନିର୍ଵାଣଂ ହ୍ଲାଦନଶ୍ଚୈଵ ବ୍ରହ୍ମଲୋକଃ ପରା ଗତିଃ ।
ଦେଵାସୁରଵିନିର୍ମାତା ଦେଵାସୁରପରାୟଣଃ ॥ 114 ॥

ଦେଵାସୁରଗୁରୁର୍ଦେଵୋ ଦେଵାସୁରନମସ୍କୃତଃ ।
ଦେଵାସୁରମହାମାତ୍ରୋ ଦେଵାସୁରଗଣାଶ୍ରୟଃ ॥ 115 ॥

ଦେଵାସୁରଗଣାଧ୍ୟକ୍ଷୋ ଦେଵାସୁରଗଣାଗ୍ରଣୀଃ ।
ଦେଵାତିଦେଵୋ ଦେଵର୍ଷିର୍ଦେଵାସୁରଵରପ୍ରଦଃ ॥ 116 ॥ [ଦେଵାଦି]

ଦେଵାସୁରେଶ୍ଵରୋ ଵିଶ୍ଵୋ ଦେଵାସୁରମହେଶ୍ଵରଃ ।
ସର୍ଵଦେଵମୟୋଽଚିଂତ୍ୟୋ ଦେଵତାତ୍ମାଽଽତ୍ମସଂଭଵଃ ॥ 117 ॥

ଉଦ୍ଭିତ୍ତ୍ରିଵିକ୍ରମୋ ଵୈଦ୍ୟୋ ଵିରଜୋ ନୀରଜୋଽମରଃ ।
ଈଡ୍ୟୋ ହସ୍ତୀଶ୍ଵରୋ ଵ୍ୟାଘ୍ରୋ ଦେଵସିଂହୋ ନରର୍ଷଭଃ ॥ 118 ॥

ଵିବୁଧୋଽଗ୍ରଵରଃ ସୂକ୍ଷ୍ମଃ ସର୍ଵଦେଵସ୍ତପୋମୟଃ ।
ସୁୟୁକ୍ତଃ ଶୋଭନୋ ଵଜ୍ରୀ ପ୍ରାସାନାଂ ପ୍ରଭଵୋଽଵ୍ୟୟଃ ॥ 119 ॥

ଗୁହଃ କାଂତୋ ନିଜଃ ସର୍ଗଃ ପଵିତ୍ରଂ ସର୍ଵପାଵନଃ ।
ଶୃଂଗୀ ଶୃଂଗପ୍ରିୟୋ ବଭ୍ରୂ ରାଜରାଜୋ ନିରାମୟଃ ॥ 120 ॥

ଅଭିରାମଃ ସୁରଗଣୋ ଵିରାମଃ ସର୍ଵସାଧନଃ ।
ଲଲାଟାକ୍ଷୋ ଵିଶ୍ଵଦେଵୋ ହରିଣୋ ବ୍ରହ୍ମଵର୍ଚସଃ ॥ 121 ॥

ସ୍ଥାଵରାଣାଂ ପତିଶ୍ଚୈଵ ନିୟମେଂଦ୍ରିୟଵର୍ଧନଃ ।
ସିଦ୍ଧାର୍ଥଃ ସିଦ୍ଧଭୂତାର୍ଥୋଽଚିଂତ୍ୟଃ ସତ୍ୟଵ୍ରତଃ ଶୁଚିଃ ॥ 122 ॥

ଵ୍ରତାଧିପଃ ପରଂ ବ୍ରହ୍ମ ଭକ୍ତାନାଂ ପରମା ଗତିଃ । [ଭକ୍ତାନୁଗ୍ରହକାରକଃ]
ଵିମୁକ୍ତୋ ମୁକ୍ତତେଜାଶ୍ଚ ଶ୍ରୀମାନ୍ ଶ୍ରୀଵର୍ଧନୋ ଜଗତ୍ ॥ 123 ॥

ଉତ୍ତରପୀଠିକା (ଫଲଶୃତି)
ୟଥା ପ୍ରଧାନଂ ଭଗଵାନିତି ଭକ୍ତ୍ୟା ସ୍ତୁତୋ ମୟା ।
ୟଂ ନ ବ୍ରହ୍ମାଦୟୋ ଦେଵା ଵିଦୁସ୍ତତ୍ତ୍ଵେନ ନର୍ଷୟଃ ॥ 1 ॥

ସ୍ତୋତଵ୍ୟମର୍ଚ୍ୟଂ ଵଂଦ୍ୟଂ ଚ କଃ ସ୍ତୋଷ୍ୟତି ଜଗତ୍ପତିମ୍ ।
ଭକ୍ତ୍ୟା ତ୍ଵେଵଂ ପୁରସ୍କୃତ୍ୟ ମୟା ୟଜ୍ଞପତିର୍ଵିଭୁଃ ॥ 2 ॥

ତତୋଽଭ୍ୟନୁଜ୍ଞାଂ ସଂପ୍ରାପ୍ୟ ସ୍ତୁତୋ ମତିମତାଂ ଵରଃ ।
ଶିଵମେଭିଃ ସ୍ତୁଵନ୍ ଦେଵଂ ନାମଭିଃ ପୁଷ୍ଟିଵର୍ଧନୈଃ ॥ 3 ॥

ନିତ୍ୟୟୁକ୍ତଃ ଶୁଚିର୍ଭକ୍ତଃ ପ୍ରାପ୍ନୋତ୍ୟାତ୍ମାନମାତ୍ମନା ।
ଏତଦ୍ଧି ପରମଂ ବ୍ରହ୍ମ ପରଂ ବ୍ରହ୍ମାଧିଗଚ୍ଛତି ॥ 4 ॥

ଋଷୟଶ୍ଚୈଵ ଦେଵାଶ୍ଚ ସ୍ତୁଵଂତ୍ୟେତେନ ତତ୍ପରମ୍ ।
ସ୍ତୂୟମାନୋ ମହାଦେଵସ୍ତୁଷ୍ୟତେ ନିୟତାତ୍ମଭିଃ ॥ 5 ॥

ଭକ୍ତାନୁକଂପୀ ଭଗଵାନାତ୍ମସଂସ୍ଥାକରୋ ଵିଭୁଃ ।
ତଥୈଵ ଚ ମନୁଷ୍ୟେଷୁ ୟେ ମନୁଷ୍ୟାଃ ପ୍ରଧାନତଃ ॥ 6 ॥

ଆସ୍ତିକାଃ ଶ୍ରଦ୍ଦଧାନାଶ୍ଚ ବହୁଭିର୍ଜନ୍ମଭିଃ ସ୍ତଵୈଃ ।
ଭକ୍ତ୍ୟା ହ୍ୟନନ୍ୟମୀଶାନଂ ପରଂ ଦେଵଂ ସନାତନମ୍ ॥ 7 ॥

କର୍ମଣା ମନସା ଵାଚା ଭାଵେନାମିତତେଜସଃ ।
ଶୟାନା ଜାଗ୍ରମାଣାଶ୍ଚ ଵ୍ରଜନ୍ନୁପଵିଶଂସ୍ତଥା ॥ 8 ॥

ଉନ୍ମିଷନ୍ନିମିଷଂଶ୍ଚୈଵ ଚିଂତୟଂତଃ ପୁନଃ ପୁନଃ ।
ଶୃଣ୍ଵଂତଃ ଶ୍ରାଵୟଂତଶ୍ଚ କଥୟଂତଶ୍ଚ ତେ ଭଵମ୍ ॥ 9 ॥

ସ୍ତୁଵଂତଃ ସ୍ତୂୟମାନାଶ୍ଚ ତୁଷ୍ୟଂତି ଚ ରମଂତି ଚ ।
ଜନ୍ମକୋଟିସହସ୍ରେଷୁ ନାନାସଂସାରୟୋନିଷୁ ॥ 10 ॥

ଜଂତୋର୍ଵିଗତପାପସ୍ୟ ଭଵେ ଭକ୍ତିଃ ପ୍ରଜାୟତେ ।
ଉତ୍ପନ୍ନା ଚ ଭଵେ ଭକ୍ତିରନନ୍ୟା ସର୍ଵଭାଵତଃ ॥ 11 ॥

ଭାଵିନଃ କାରଣେ ଚାସ୍ୟ ସର୍ଵୟୁକ୍ତସ୍ୟ ସର୍ଵଥା ।
ଏତଦ୍ଦେଵେଷୁ ଦୁଷ୍ପ୍ରାପଂ ମନୁଷ୍ୟେଷୁ ନ ଲଭ୍ୟତେ ॥ 12 ॥

ନିର୍ଵିଘ୍ନା ନିଶ୍ଚଲା ରୁଦ୍ରେ ଭକ୍ତିରଵ୍ୟଭିଚାରିଣୀ ।
ତସ୍ୟୈଵ ଚ ପ୍ରସାଦେନ ଭକ୍ତିରୁତ୍ପଦ୍ୟତେ ନୃଣାମ୍ ॥ 13 ॥

ୟେନ ୟାଂତି ପରାଂ ସିଦ୍ଧିଂ ତଦ୍ଭାଵଗତଚେତସଃ ।
ୟେ ସର୍ଵଭାଵାନୁଗତାଃ ପ୍ରପଦ୍ୟଂତେ ମହେଶ୍ଵରମ୍ ॥ 14 ॥

ପ୍ରପନ୍ନଵତ୍ସଲୋ ଦେଵଃ ସଂସାରାତ୍ତାନ୍ସମୁଦ୍ଧରେତ୍ ।
ଏଵମନ୍ୟେ ଵିକୁର୍ଵଂତି ଦେଵାଃ ସଂସାରମୋଚନମ୍ ॥ 15 ॥

ମନୁଷ୍ୟାଣାମୃତେ ଦେଵଂ ନାନ୍ୟା ଶକ୍ତିସ୍ତପୋବଲମ୍ ।
ଇତି ତେନେଂଦ୍ରକଲ୍ପେନ ଭଗଵାନ୍ ସଦସତ୍ପତିଃ ॥ 16 ॥

କୃତ୍ତିଵାସାଃ ସ୍ତୁତଃ କୃଷ୍ଣ ତଂଡିନା ଶୁଭବୁଦ୍ଧିନା ।
ସ୍ତଵମେତଂ ଭଗଵତୋ ବ୍ରହ୍ମା ସ୍ଵୟମଧାରୟତ୍ ॥ 17 ॥

ଗୀୟତେ ଚ ସ ବୁଦ୍ଧ୍ୟେତ ବ୍ରହ୍ମା ଶଂକରସନ୍ନିଧୌ ।
ଇଦଂ ପୁଣ୍ୟଂ ପଵିତ୍ରଂ ଚ ସର୍ଵଦା ପାପନାଶନମ୍ ॥ 18 ॥

ୟୋଗଦଂ ମୋକ୍ଷଦଂ ଚୈଵ ସ୍ଵର୍ଗଦଂ ତୋଷଦଂ ତଥା ।
ଏଵମେତତ୍ପଠଂତେ ୟ ଏକଭକ୍ତ୍ୟା ତୁ ଶଂକରମ୍ ॥ 19 ॥

ୟା ଗତିଃ ସାଂଖ୍ୟୟୋଗାନାଂ ଵ୍ରଜଂତ୍ୟେତାଂ ଗତିଂ ତଦା ।
ସ୍ତଵମେତଂ ପ୍ରୟତ୍ନେନ ସଦା ରୁଦ୍ରସ୍ୟ ସନ୍ନିଧୌ ॥ 20 ॥

ଅବ୍ଦମେକଂ ଚରେଦ୍ଭକ୍ତଃ ପ୍ରାପ୍ନୁୟାଦୀପ୍ସିତଂ ଫଲମ୍ ।
ଏତଦ୍ରହସ୍ୟଂ ପରମଂ ବ୍ରହ୍ମଣୋ ହୃଦି ସଂସ୍ଥିତମ୍ ॥ 21 ॥

ବ୍ରହ୍ମା ପ୍ରୋଵାଚ ଶକ୍ରାୟ ଶକ୍ରଃ ପ୍ରୋଵାଚ ମୃତ୍ୟଵେ ।
ମୃତ୍ୟୁଃ ପ୍ରୋଵାଚ ରୁଦ୍ରେଭ୍ୟୋ ରୁଦ୍ରେଭ୍ୟସ୍ତଂଡିମାଗମତ୍ ॥ 22 ॥

ମହତା ତପସା ପ୍ରାପ୍ତସ୍ତଂଡିନା ବ୍ରହ୍ମସଦ୍ମନି ।
ତଂଡିଃ ପ୍ରୋଵାଚ ଶୁକ୍ରାୟ ଗୌତମାୟ ଚ ଭାର୍ଗଵଃ ॥ 23 ॥

ଵୈଵସ୍ଵତାୟ ମନଵେ ଗୌତମଃ ପ୍ରାହ ମାଧଵ ।
ନାରାୟଣାୟ ସାଧ୍ୟାୟ ସମାଧିଷ୍ଠାୟ ଧୀମତେ ॥ 24 ॥

ୟମାୟ ପ୍ରାହ ଭଗଵାନ୍ ସାଧ୍ୟୋ ନାରାୟଣୋଽଚ୍ୟୁତଃ ।
ନାଚିକେତାୟ ଭଗଵାନାହ ଵୈଵସ୍ଵତୋ ୟମଃ ॥ 25 ॥

ମାର୍କଂଡେୟାୟ ଵାର୍ଷ୍ଣେୟ ନାଚିକେତୋଽଭ୍ୟଭାଷତ ।
ମାର୍କଂଡେୟାନ୍ମୟା ପ୍ରାପ୍ତୋ ନିୟମେନ ଜନାର୍ଦନ ॥ 26 ॥

ତଵାପ୍ୟହମମିତ୍ରଘ୍ନ ସ୍ତଵଂ ଦଦ୍ୟାଂ ହ୍ୟଵିଶ୍ରୁତମ୍ ।
ସ୍ଵର୍ଗ୍ୟମାରୋଗ୍ୟମାୟୁଷ୍ୟଂ ଧନ୍ୟଂ ଵେଦେନ ସମ୍ମିତମ୍ ॥ 27 ॥

ନାସ୍ୟ ଵିଘ୍ନଂ ଵିକୁର୍ଵଂତି ଦାନଵା ୟକ୍ଷରାକ୍ଷସାଃ ।
ପିଶାଚା ୟାତୁଧାନା ଵା ଗୁହ୍ୟକା ଭୁଜଗା ଅପି ॥ 28 ॥

ୟଃ ପଠେତ ଶୁଚିଃ ପାର୍ଥ ବ୍ରହ୍ମଚାରୀ ଜିତେଂଦ୍ରିୟଃ । [ଭୂତ୍ଵା]
ଅଭଗ୍ନୟୋଗୋ ଵର୍ଷଂ ତୁ ସୋଽଶ୍ଵମେଧଫଲଂ ଲଭେତ୍ ॥ 29 ॥

ଇତି ଶ୍ରୀମହାଭାରତେ ଅନୁଶାସନପର୍ଵଣି ମହାଦେଵସହସ୍ରନାମ ସ୍ତୋତ୍ରଂ ନାମ ସପ୍ତଦଶୋଽଧ୍ୟାୟଃ ॥