ଶିଵ ପାଦାଦି କେଶାଂତ ଵର୍ଣନ ସ୍ତୋତ୍ରଂ
କଳ୍ୟାଣଂ ନୋ ଵିଧତ୍ତାଂ କଟକତଟଲସତ୍କଲ୍ପଵାଟୀନିକୁଂଜ-
-କ୍ରୀଡାସଂସକ୍ତଵିଦ୍ୟାଧରନିକରଵଧୂଗୀତରୁଦ୍ରାପଦାନଃ ।
ତାରୈର୍ହେରଂବନାଦୈସ୍ତରଳିତନିନଦତ୍ତାରକାରାତିକେକୀ
କୈଲାସଃ ଶର୍ଵନିର୍ଵୃତ୍ୟଭିଜନକପଦଃ ସର୍ଵଦା ପର୍ଵତେଂଦ୍ରଃ ॥ 1 ॥
ୟସ୍ୟ ପ୍ରାହୁଃ ସ୍ଵରୂପଂ ସକଲଦିଵିଷଦାଂ ସାରସର୍ଵସ୍ଵୟୋଗଂ
ୟସ୍ୟେଷୁଃ ଶାର୍ଂଗଧନ୍ଵା ସମଜନି ଜଗତାଂ ରକ୍ଷଣେ ଜାଗରୂକଃ ।
ମୌର୍ଵୀ ଦର୍ଵୀକରାଣାମପି ଚ ପରିବୃଢଃ ପୂସ୍ତ୍ରୟୀ ସା ଚ ଲକ୍ଷ୍ୟଂ
ସୋଽଵ୍ୟାଦଵ୍ୟାଜମସ୍ମାନଶିଵଭିଦନିଶଂ ନାକିନାଂ ଶ୍ରୀପିନାକଃ ॥ 2 ॥
ଆତଂକାଵେଗହାରୀ ସକଲଦିଵିଷଦାମଂଘ୍ରିପଦ୍ମାଶ୍ରୟାଣାଂ
ମାତଂଗାଦ୍ୟୁଗ୍ରଦୈତ୍ୟପ୍ରକରତନୁଗଲଦ୍ରକ୍ତଧାରାକ୍ତଧାରଃ ।
କ୍ରୂରଃ ସୂରାୟୁତାନାମପି ଚ ପରିଭଵଂ ସ୍ଵୀୟଭାସା ଵିତନ୍ଵ-
-ନ୍ଘୋରାକାରଃ କୁଠାରୋ ଦୃଢତରଦୁରିତାଖ୍ୟାଟଵୀଂ ପାଟୟେନ୍ନଃ ॥ 3 ॥
କାଲାରାତେଃ କରାଗ୍ରେ କୃତଵସତିରୁରଃଶାଣଶାତୋ ରିପୂଣାଂ
କାଲେ କାଲେ କୁଲାଦ୍ରିପ୍ରଵରତନୟୟା କଲ୍ପିତସ୍ନେହଲେପଃ ।
ପାୟାନ୍ନଃ ପାଵକାର୍ଚିଃପ୍ରସରସଖମୁଖଃ ପାପହଂତା ନିତାଂତଂ
ଶୂଲଃ ଶ୍ରୀପାଦସେଵାଭଜନରସଜୁଷାଂ ପାଲନୈକାଂତଶୀଲଃ ॥ 4 ॥
ଦେଵସ୍ୟାଂକାଶ୍ରୟାୟାଃ କୁଲଗିରିଦୁହିତୁର୍ନେତ୍ରକୋଣପ୍ରଚାର-
-ପ୍ରସ୍ତାରାନତ୍ୟୁଦାରାନ୍ପିପଠିଷୁରିଵ ୟୋ ନିତ୍ୟମତ୍ୟାଦରେଣ ।
ଆଧତ୍ତେ ଭଂଗିତୁଂଗୈରନିଶମଵୟଵୈରଂତରଂଗଂ ସମୋଦଂ
ସୋମାପୀଡସ୍ୟ ସୋଽୟଂ ପ୍ରଦିଶତୁ କୁଶଲଂ ପାଣିରଂଗଃ କୁରଂଗଃ ॥ 5 ॥
କଂଠପ୍ରାଂତାଵସଜ୍ଜତ୍କନକମୟମହାଘଂଟିକାଘୋରଘୋଷୈଃ
କଂଠାରାଵୈରକୁଂଠୈରପି ଭରିତଜଗଚ୍ଚକ୍ରଵାଲାଂତରାଳଃ ।
ଚଂଡଃ ପ୍ରୋଦ୍ଦଂଡଶୃଂଗଃ କକୁଦକବଲିତୋତ୍ତୁଂଗକୈଲାସଶୃଂଗଃ
କଂଠେକାଲସ୍ୟ ଵାହଃ ଶମୟତୁ ଶମଲଂ ଶାଶ୍ଵତଃ ଶାକ୍ଵରେଂଦ୍ରଃ ॥ 6 ॥
ନିର୍ୟଦ୍ଦାନାଂବୁଧାରାପରିମଲତରଲୀଭୂତରୋଲଂବପାଲୀ-
-ଝଂକାରୈଃ ଶଂକରାଦ୍ରେଃ ଶିଖରଶତଦରୀଃ ପୂରୟନ୍ଭୂରିଘୋଷୈଃ ।
ଶାର୍ଵଃ ସୌଵର୍ଣଶୈଲପ୍ରତିମପୃଥୁଵପୁଃ ସର୍ଵଵିଘ୍ନାପହର୍ତା
ଶର୍ଵାଣ୍ୟାଃ ପୂର୍ଵସୂନୁଃ ସ ଭଵତୁ ଭଵତାଂ ସ୍ଵସ୍ତିଦୋ ହସ୍ତିଵକ୍ତ୍ରଃ ॥ 7 ॥
ୟଃ ପୁଣ୍ୟୈର୍ଦେଵତାନାଂ ସମଜନି ଶିଵୟୋଃ ଶ୍ଲାଘ୍ୟଵୀର୍ୟୈକମତ୍ୟା-
-ଦ୍ୟନ୍ନାମ୍ନି ଶ୍ରୂୟମାଣେ ଦିତିଜଭଟଘଟା ଭୀତିଭାରଂ ଭଜଂତେ ।
ଭୂୟାତ୍ସୋଽୟଂ ଵିଭୂତ୍ୟୈ ନିଶିତଶରଶିଖାପାଟିତକ୍ରୌଂଚଶୈଲଃ
ସଂସାରାଗାଧକୂପୋଦରପତିତସମୁତ୍ତାରକସ୍ତାରକାରିଃ ॥ 8 ॥
ଆରୂଢଃ ପ୍ରୌଢଵେଗପ୍ରଵିଜିତପଵନଂ ତୁଂଗତୁଂଗଂ ତୁରଂଗଂ
ଚେଲଂ ନୀଲଂ ଵସାନଃ କରତଲଵିଲସତ୍କାଂଡକୋଦଂଡଦଂଡଃ ।
ରାଗଦ୍ଵେଷାଦିନାନାଵିଧମୃଗପଟଲୀଭୀତିକୃଦ୍ଭୂତଭର୍ତା
କୁର୍ଵନ୍ନାଖେଟଲୀଲାଂ ପରିଲସତୁ ମନଃକାନନେ ମାମକୀନେ ॥ 9 ॥
ଅଂଭୋଜାଭ୍ୟାଂ ଚ ରଂଭାରଥଚରଣଲତାଦ୍ଵଂଦ୍ଵକୁଂଭୀଂଦ୍ରକୁଂଭୈ-
-ର୍ବିଂବେନେଂଦୋଶ୍ଚ କଂବୋରୁପରି ଵିଲସତା ଵିଦ୍ରୁମେଣୋତ୍ପଲାଭ୍ୟାମ୍ ।
ଅଂଭୋଦେନାପି ସଂଭାଵିତମୁପଜନିତାଡଂବରଂ ଶଂବରାରେଃ
ଶଂଭୋଃ ସଂଭୋଗୟୋଗ୍ୟଂ କିମପି ଧନମିଦଂ ସଂଭଵେତ୍ସଂପଦେ ନଃ ॥ 10 ॥
ଵେଣୀସୌଭାଗ୍ୟଵିସ୍ମାପିତତପନସୁତାଚାରୁଵେଣୀଵିଲାସା-
-ନ୍ଵାଣୀନିର୍ଧୂତଵାଣୀକରତଲଵିଧୃତୋଦାରଵୀଣାଵିରାଵାନ୍ ।
ଏଣୀନେତ୍ରାଂତଭଂଗୀନିରସନନିପୁଣାପାଂଗକୋଣାନୁପାସେ
ଶୋଣାନ୍ପ୍ରାଣାନୁଦୂଢପ୍ରତିନଵସୁଷମାକଂଦଲାନିଂଦୁମୌଳେଃ ॥ 11 ॥
ନୃତ୍ତାରଂଭେଷୁ ହସ୍ତାହତମୁରଜଧିମିଦ୍ଧିଂକୃତୈରତ୍ୟୁଦାରୈ-
-ଶ୍ଚିତ୍ତାନଂଦଂ ଵିଧତ୍ତେ ସଦସି ଭଗଵତଃ ସଂତତଂ ୟଃ ସ ନଂଦୀ ।
ଚଂଡୀଶାଦ୍ୟାସ୍ତଥାନ୍ୟେ ଚତୁରଗୁଣଗଣପ୍ରୀଣିତସ୍ଵାମିସତ୍କା-
-ରୋତ୍କର୍ଷୋଦ୍ୟତ୍ପ୍ରସାଦାଃ ପ୍ରମଥପରିବୃଢାଃ ପାଂତୁ ସଂତୋଷିଣୋ ନଃ ॥ 12 ॥
ମୁକ୍ତାମାଣିକ୍ୟଜାଲୈଃ ପରିକଲିତମହାସାଲମାଲୋକନୀୟଂ
ପ୍ରତ୍ୟୁପ୍ତାନର୍ଘରତ୍ନୈର୍ଦିଶି ଦିଶି ଭଵନୈଃ କଲ୍ପିତୈର୍ଦିକ୍ପତୀନାମ୍ ।
ଉଦ୍ୟାନୈରଦ୍ରିକନ୍ୟାପରିଜନଵନିତାମାନନୀୟୈଃ ପରୀତଂ
ହୃଦ୍ୟଂ ହୃଦ୍ୟସ୍ତୁ ନିତ୍ୟଂ ମମ ଭୁଵନପତେର୍ଧାମ ସୋମାର୍ଧମୌଳେଃ ॥ 13 ॥
ସ୍ତଂଭୈର୍ଜଂଭାରିରତ୍ନପ୍ରଵରଵିରଚିତୈଃ ସଂଭୃତୋପାଂତଭାଗଂ
ଶୁଂଭତ୍ସୋପାନମାର୍ଗଂ ଶୁଚିମଣିନିଚୟୈର୍ଗୁଂଭିତାନଲ୍ପଶିଲ୍ପମ୍ ।
କୁଂଭୈଃ ସଂପୂର୍ଣଶୋଭଂ ଶିରସି ସୁଘଟିତୈଃ ଶାତକୁଂଭୈରପଂକୈଃ
ଶଂଭୋଃ ସଂଭାଵନୀୟଂ ସକଲମୁନିଜନୈଃ ସ୍ଵସ୍ତିଦଂ ସ୍ୟାତ୍ସଦୋ ନଃ ॥ 14 ॥
ନ୍ୟସ୍ତୋ ମଧ୍ୟେ ସଭାୟାଃ ପରିସରଵିଲସତ୍ପାଦପୀଠାଭିରାମୋ
ହୃଦ୍ୟଃ ପାଦୈଶ୍ଚତୁର୍ଭିଃ କନକମଣିମୟୈରୁଚ୍ଚକୈରୁଜ୍ଜ୍ଵଲାତ୍ମା ॥
ଵାସୋରତ୍ନେନ କେନାପ୍ୟଧିକମୃଦୁତରେଣାସ୍ତୃତୋ ଵିସ୍ତୃତଶ୍ରୀଃ
ପୀଠଃ ପୀଡାଭରଂ ନଃ ଶମୟତୁ ଶିଵୟୋଃ ସ୍ଵୈରସଂଵାସୟୋଗ୍ୟଃ ॥ 15 ॥
ଆସୀନସ୍ୟାଧିପୀଠଂ ତ୍ରିଜଗଦଧିପତେରଂଘ୍ରିପୀଠାନୁଷକ୍ତୌ
ପାଥୋଜାଭୋଗଭାଜୌ ପରିମୃଦୁଲତଲୋଲ୍ଲାସିପଦ୍ମାଦିରେଖୌ ।
ପାତାଂ ପାଦାଵୁଭୌ ତୌ ନମଦମରକିରୀଟୋଲ୍ଲସଚ୍ଚାରୁହୀର-
-ଶ୍ରେଣୀଶୋଣାୟମାନୋନ୍ନତନଖଦଶକୋଦ୍ଭାସମାନୌ ସମାନୌ ॥ 16 ॥
ୟନ୍ନାଦୋ ଵେଦଵାଚାଂ ନିଗଦତି ନିଖିଲଂ ଲକ୍ଷଣଂ ପକ୍ଷିକେତୁ-
-ର୍ଲକ୍ଷ୍ମୀସଂଭୋଗସୌଖ୍ୟଂ ଵିରଚୟତି ୟୟୋଶ୍ଚାପରେ ରୂପଭେଦେ ।
ଶଂଭୋଃ ସଂଭାଵନୀୟେ ପଦକମଲସମାସଂଗତସ୍ତୁଂଗଶୋଭେ
ମାଂଗଳ୍ୟଂ ନଃ ସମଗ୍ରଂ ସକଲସୁଖକରେ ନୂପୁରେ ପୂରୟେତାମ୍ ॥ 17 ॥
ଅଂଗେ ଶୃଂଗାରୟୋନେଃ ସପଦି ଶଲଭତାଂ ନେତ୍ରଵହ୍ନୌ ପ୍ରୟାତେ
ଶତ୍ରୋରୁଦ୍ଧୃତ୍ୟ ତସ୍ମାଦିଷୁଧିୟୁଗମଧୋ ନ୍ୟସ୍ତମଗ୍ରେ କିମେତତ୍ ।
ଶଂକାମିତ୍ଥଂ ନତାନାମମରପରିଷଦାମଂତରଂକୂରୟତ୍ତ-
-ତ୍ସଂଘାତଂ ଚାରୁ ଜଂଘାୟୁଗମଖିଲପତେରଂହସାଂ ସଂହରେନ୍ନଃ ॥ 18 ॥
ଜାନୁଦ୍ଵଂଦ୍ଵେନ ମୀନଧ୍ଵଜନୃଵରସମୁଦ୍ରୋପମାନେନ ସାକଂ
ରାଜଂତୌ ରାଜରଂଭାକରିକରକନକସ୍ତଂଭସଂଭାଵନୀୟୌ ।
ଊରୂ ଗୌରୀକରାଂଭୋରୁହସରସସମାମର୍ଦନାନଂଦଭାଜୌ
ଚାରୂ ଦୂରୀକ୍ରିୟାସ୍ତାଂ ଦୁରିତମୁପଚିତଂ ଜନ୍ମଜନ୍ମାଂତରେ ନଃ ॥ 19 ॥
ଆମୁକ୍ତାନର୍ଘରତ୍ନପ୍ରକରକରପରିଷ୍ଵକ୍ତକଳ୍ୟାଣକାଂଚୀ-
-ଦାମ୍ନା ବଦ୍ଦେନ ଦୁଗ୍ଧଦ୍ୟୁତିନିଚୟମୁଷା ଚୀନପଟ୍ଟାଂବରେଣ ।
ସଂଵୀତେ ଶୈଲକନ୍ୟାସୁଚରିତପରିପାକାୟମାଣେ ନିତଂବେ
ନିତ୍ୟଂ ନର୍ନର୍ତୁ ଚିତ୍ତଂ ମମ ନିଖିଲଜଗତ୍ସ୍ଵାମିନଃ ସୋମମୌଳେଃ ॥ 20 ॥
ସଂଧ୍ୟାକାଲାନୁରଜ୍ୟଦ୍ଦିନକରସରୁଚା କାଲଧୌତେନ ଗାଢଂ
ଵ୍ୟାନଦ୍ଧଃ ସ୍ନିଗ୍ଧମୁଗ୍ଧଃ ସରସମୁଦରବଂଧେନ ଵୀତୋପମେନ ।
ଉଦ୍ଦୀପ୍ତୈଃ ସ୍ଵପ୍ରକାଶୈରୁପଚିତମହିମା ମନ୍ମଥାରେରୁଦାରୋ
ମଧ୍ୟୋ ମିଥ୍ୟାର୍ଥସଧ୍ର୍ୟଙ୍ମମ ଦିଶତୁ ସଦା ସଂଗତିଂ ମଂଗଳାନାମ୍ ॥ 21 ॥
ନାଭୀଚକ୍ରାଲଵାଲାନ୍ନଵନଵସୁଷମାଦୋହଦଶ୍ରୀପରୀତା-
-ଦୁଦ୍ଗଚ୍ଛଂତୀ ପୁରସ୍ତାଦୁଦରପଥମତିକ୍ରମ୍ୟ ଵକ୍ଷଃ ପ୍ରୟାଂତି ।
ଶ୍ୟାମା କାମାଗମାର୍ଥପ୍ରକଥନଲିପିଵଦ୍ଭାସତେ ୟା ନିକାମଂ
ସା ମା ସୋମାର୍ଧମୌଳେଃ ସୁଖୟତୁ ସତତଂ ରୋମଵଲ୍ଲୀମତଲ୍ଲୀ ॥ 22 ॥
ଆଶ୍ଲେଷେଷ୍ଵଦ୍ରିଜାୟାଃ କଠିନକୁଚତଟୀଲିପ୍ତକାଶ୍ମୀରପଂକ-
-ଵ୍ୟାସଂଗାଦୁଦ୍ୟଦର୍କଦ୍ୟୁତିଭିରୁପଚିତସ୍ପର୍ଧମୁଦ୍ଦାମହୃଦ୍ୟମ୍ ।
ଦକ୍ଷାରାତେରୁଦୂଢପ୍ରତିନଵମଣିମାଲାଵଲୀଭାସମାନଂ
ଵକ୍ଷୋ ଵିକ୍ଷୋଭିତାଘଂ ସତତନତିଜୁଷାଂ ରକ୍ଷତାଦକ୍ଷତଂ ନଃ ॥ 23 ॥
ଵାମାଂକେ ଵିସ୍ଫୁରଂତ୍ୟାଃ କରତଲଵିଲସଚ୍ଚାରୁରକ୍ତୋତ୍ପଲାୟାଃ
କାଂତାୟା ଵାମଵକ୍ଷୋରୁହଭରଶିଖରୋନ୍ମର୍ଦନଵ୍ୟଗ୍ରମେକମ୍ ।
ଅନ୍ୟାଂସ୍ତ୍ରୀନପ୍ୟୁଦାରାନ୍ଵରପରଶୁମୃଗାଲଂକୃତାନିଂଦୁମୌଳେ-
-ର୍ବାହୂନାବଦ୍ଧହେମାଂଗଦମଣିକଟକାନଂତରାଲୋକୟାମଃ ॥ 24 ॥
ସଂଭ୍ରାଂତାୟାଃ ଶିଵାୟାଃ ପତିଵିଲୟଭିୟା ସର୍ଵଲୋକୋପତାପା-
-ତ୍ସଂଵିଗ୍ନସ୍ୟାପି ଵିଷ୍ଣୋଃ ସରଭସମୁଭୟୋର୍ଵାରଣପ୍ରେରଣାଭ୍ୟାମ୍ ।
ମଧ୍ୟେ ତ୍ରୈଶଂକଵୀୟାମନୁଭଵତି ଦଶାଂ ୟତ୍ର ହାଲାହଲୋଷ୍ମା
ସୋଽୟଂ ସର୍ଵାପଦାଂ ନଃ ଶମୟତୁ ନିଚୟଂ ନୀଲକଂଠସ୍ୟ କଂଠଃ ॥ 25 ॥
ହୃଦ୍ୟୈରଦ୍ରୀଂଦ୍ରକନ୍ୟାମୃଦୁଦଶନପଦୈର୍ମୁଦ୍ରିତୋ ଵିଦ୍ରୁମଶ୍ରୀ-
-ରୁଦ୍ଦ୍ୟୋତଂତ୍ୟା ନିତାଂତଂ ଧଵଲଧଵଲୟା ମିଶ୍ରିତୋ ଦଂତକାଂତ୍ୟା ।
ମୁକ୍ତାମାଣିକ୍ୟଜାଲଵ୍ୟତିକରସଦୃଶା ତେଜସା ଭାସମାନଃ
ସଦ୍ୟୋଜାତସ୍ୟ ଦଦ୍ୟାଦଧରମଣିରସୌ ସଂପଦାଂ ସଂଚୟଂ ନଃ ॥ 26 ॥
କର୍ଣାଲଂକାରନାନାମଣିନିକରରୁଚାଂ ସଂଚୟୈରଂଚିତାୟାଂ
ଵର୍ଣ୍ୟାୟାଂ ସ୍ଵର୍ଣପଦ୍ମୋଦରପରିଵିଲସତ୍କର୍ଣିକାସଂନିଭାୟାମ୍ ।
ପଦ୍ଧତ୍ୟାଂ ପ୍ରାଣଵାୟୋଃ ପ୍ରଣତଜନହୃଦଂଭୋଜଵାସସ୍ୟ ଶଂଭୋ-
-ର୍ନିତ୍ୟଂ ନଶ୍ଚିତ୍ତମେତଦ୍ଵିରଚୟତୁ ସୁଖେନାସିକାଂ ନାସିକାୟାମ୍ ॥ 27 ॥
ଅତ୍ୟଂତଂ ଭାସମାନେ ରୁଚିରତରରୁଚାଂ ସଂଗମାତ୍ସନ୍ମଣୀନା-
-ମୁଦ୍ୟଚ୍ଚଂଡାଂଶୁଧାମପ୍ରସରନିରସନସ୍ପଷ୍ଟଦୃଷ୍ଟାପଦାନେ ।
ଭୂୟାସ୍ତାଂ ଭୂତୟେ ନଃ କରିଵରଜୟିନଃ କର୍ଣପାଶାଵଲଂବେ
ଭକ୍ତାଲୀଭାଲସଜ୍ଜଜ୍ଜନିମରଣଲିପେଃ କୁଂଡଲେ କୁଂଡଲେ ତେ ॥ 28 ॥
ୟାଭ୍ୟାଂ କାଲଵ୍ୟଵସ୍ଥା ଭଵତି ତନୁମତାଂ ୟୋ ମୁଖଂ ଦେଵତାନାଂ
ୟେଷାମାହୁଃ ସ୍ଵରୂପଂ ଜଗତି ମୁନିଵରା ଦେଵତାନାଂ ତ୍ରୟୀଂ ତାମ୍ ।
ରୁଦ୍ରାଣୀଵକ୍ତ୍ରପଂକେରୁହସତତଵିହାରୋତ୍ସୁକେଂଦିଂଦିରେଭ୍ୟ-
-ସ୍ତେଭ୍ୟସ୍ତ୍ରିଭ୍ୟଃ ପ୍ରଣାମାଂଜଲିମୁପରଚୟେ ତ୍ରୀକ୍ଷଣସ୍ୟେକ୍ଷଣେଭ୍ୟଃ ॥ 29 ॥
ଵାମଂ ଵାମାଂକଗାୟା ଵଦନସରସିଜେ ଵ୍ୟାଵଲଦ୍ଵଲ୍ଲଭାୟା
ଵ୍ୟାନମ୍ରେଷ୍ଵନ୍ୟଦନ୍ୟତ୍ପୁନରଲିକଭଵଂ ଵୀତନିଃଶେଷରୌକ୍ଷ୍ୟମ୍ ।
ଭୂୟୋ ଭୂୟୋପି ମୋଦାନ୍ନିପତଦତିଦୟାଶୀତଲଂ ଚୂତବାଣେ
ଦକ୍ଷାରେରୀକ୍ଷଣାନାଂ ତ୍ରୟମପହରତାଦାଶୁ ତାପତ୍ରୟଂ ନଃ ॥ 30 ॥
ୟସ୍ମିନ୍ନର୍ଧେଂଦୁମୁଗ୍ଧଦ୍ୟୁତିନିଚୟତିରସ୍କାରନିସ୍ତଂଦ୍ରକାଂତୌ
କାଶ୍ମୀରକ୍ଷୋଦସଂକଲ୍ପତମିଵ ରୁଚିରଂ ଚିତ୍ରକଂ ଭାତି ନେତ୍ରମ୍ ।
ତସ୍ମିନ୍ନୁଲ୍ଲୀଲଚିଲ୍ଲୀନଟଵରତରୁଣୀଲାସ୍ୟରଂଗାୟମାଣେ
କାଲାରେଃ ଫାଲଦେଶେ ଵିହରତୁ ହୃଦୟଂ ଵୀତଚିଂତାଂତରଂ ନଃ ॥ 31 ॥
ସ୍ଵାମିନ୍ଗଂଗାମିଵାଂଗୀକୁରୁ ତଵ ଶିରସା ମାମପୀତ୍ୟର୍ଥୟଂତୀଂ
ଧନ୍ୟାଂ କନ୍ୟାଂ ଖରାଂଶୋଃ ଶିରସି ଵହତି କିଂ ନ୍ଵେଷ କାରୁଣ୍ୟଶାଲୀ ।
ଇତ୍ଥଂ ଶଂକାଂ ଜନାନାଂ ଜନୟଦତିଘନଂ କୈଶିକଂ କାଲମେଘ-
-ଚ୍ଛାୟଂ ଭୂୟାଦୁଦାରଂ ତ୍ରିପୁରଵିଜୟିନଃ ଶ୍ରେୟସେ ଭୂୟସେ ନଃ ॥ 32 ॥
ଶୃଂଗାରାକଲ୍ପୟୋଗ୍ୟୈଃ ଶିଖରିଵରସୁତାସତ୍ସଖୀହସ୍ତଲୂନୈଃ
ସୂନୈରାବଦ୍ଧମାଲାଵଲିପରିଵିଲସତ୍ସୌରଭାକୃଷ୍ଟଭୃଂଗମ୍ ।
ତୁଂଗଂ ମାଣିକ୍ୟକାଂତ୍ୟା ପରିହସିତସୁରାଵାସଶୈଲେଂଦ୍ରଶୃଂଗଂ
ସଂଘଂ ନଃ ସଂକଟାନାଂ ଵିଘଟୟତୁ ସଦା କାଂକଟୀକଂ କିରୀଟମ୍ ॥ 33 ॥
ଵକ୍ରାକାରଃ କଲଂକୀ ଜଡତନୁରହମପ୍ୟଂଘ୍ରିସେଵାନୁଭାଵା-
-ଦୁତ୍ତଂସତ୍ଵଂ ପ୍ରୟାତଃ ସୁଲଭତରଘୃଣାସ୍ୟଂଦିନଶ୍ଚଂଦ୍ରମୌଳେଃ ।
ତତ୍ସେଵଂତାଂ ଜନୌଘାଃ ଶିଵମିତି ନିଜୟାଵସ୍ଥୟୈଵ ବ୍ରୁଵାଣଂ
ଵଂଦେ ଦେଵସ୍ୟ ଶଂଭୋର୍ମୁକୁଟସୁଘଟିତଂ ମୁଗ୍ଧପୀୟୂଷଭାନୁମ୍ ॥ 34 ॥
କାଂତ୍ୟା ସଂଫୁଲ୍ଲମଲ୍ଲୀକୁସୁମଧଵଳୟା ଵ୍ୟାପ୍ୟ ଵିଶ୍ଵଂ ଵିରାଜ-
-ନ୍ଵୃତ୍ତାକାରୋ ଵିତନ୍ଵନ୍ମୁହୁରପି ଚ ପରାଂ ନିର୍ଵୃତିଂ ପାଦଭାଜାମ୍ ।
ସାନଂଦଂ ନଂଦିଦୋଷ୍ଣା ମଣିକଟକଵତା ଵାହ୍ୟମାନଃ ପୁରାରେଃ
ଶ୍ଵେତଚ୍ଛତ୍ରାଖ୍ୟଶୀତଦ୍ୟୁତିରପହରତାଦାପଦସ୍ତାପଦା ନଃ ॥ 35 ॥
ଦିଵ୍ୟାକଲ୍ପୋଜ୍ଜ୍ଵଲାନାଂ ଶିଵଗିରିସୁତୟୋଃ ପାର୍ଶ୍ଵୟୋରାଶ୍ରିତାନାଂ
ରୁଦ୍ରାଣୀସତ୍ସଖୀନାଂ ମଦତରଲକଟାକ୍ଷାଂଚଲୈରଂଚିତାନାମ୍ ।
ଉଦ୍ଵେଲ୍ଲଦ୍ବାହୁଵଲ୍ଲୀଵିଲସନସମୟେ ଚାମରାଂଦୋଲନୀନା-
-ମୁଦ୍ଭୂତଃ କଂକଣାଲୀଵଲୟକଲକଲୋ ଵାରୟେଦାପଦୋ ନଃ ॥ 36 ॥
ସ୍ଵର୍ଗୌକଃସୁଂଦରୀଣାଂ ସୁଲଲିତଵପୁଷାଂ ସ୍ଵାମିସେଵାପରାଣାଂ
ଵଲ୍ଗଦ୍ଭୂଷାଣି ଵକ୍ରାଂବୁଜପରିଵିଗଲନ୍ମୁଗ୍ଧଗୀତାମୃତାନି ।
ନିତ୍ୟଂ ନୃତ୍ତାନ୍ୟୁପାସେ ଭୁଜଵିଧୁତିପଦନ୍ୟାସଭାଵାଵଲୋକ-
-ପ୍ରତ୍ୟୁଦ୍ୟତ୍ପ୍ରୀତିମାଦ୍ୟତ୍ପ୍ରମଥନଟନଟୀଦତ୍ତସଂଭାଵନାନି ॥ 37 ॥
ସ୍ଥାନପ୍ରାପ୍ତ୍ୟା ସ୍ଵରାଣାଂ କିମପି ଵିଶଦତାଂ ଵ୍ୟଂଜୟନ୍ମଂଜୁଵୀଣା-
-ସ୍ଵାନାଵଚ୍ଛିନ୍ନତାଲକ୍ରମମମୃତମିଵାସ୍ଵାଦ୍ୟମାନଂ ଶିଵାଭ୍ୟାମ୍ ।
ନାନାରାଗାତିହୃଦ୍ୟଂ ନଵରସମଧୁରସ୍ତୋତ୍ରଜାତାନୁଵିଦ୍ଧଂ
ଗାନଂ ଵୀଣାମହର୍ଷେଃ କଲମତିଲଲିତଂ କର୍ଣପୂରୟତାଂ ନଃ ॥ 38 ॥
ଚେତୋ ଜାତପ୍ରମୋଦଂ ସପଦି ଵିଦଧତୀ ପ୍ରାଣିନାଂ ଵାଣିନୀନାଂ
ପାଣିଦ୍ଵଂଦ୍ଵାଗ୍ରଜାଗ୍ରତ୍ସୁଲଲିତରଣିତସ୍ଵର୍ଣତାଲାନୁକୂଲା ।
ସ୍ଵୀୟାରାଵେଣ ପାଥୋଧରରଵପଟୁନା ନାଦୟଂତୀ ମୟୂରୀଂ
ମାୟୂରୀ ମଂଦଭାଵଂ ମଣିମୁରଜଭଵା ମାର୍ଜନା ମାର୍ଜୟେନ୍ନଃ ॥ 39 ॥
ଦେଵେଭ୍ୟୋ ଦାନଵେଭ୍ୟଃ ପିତୃମୁନିପରିଷତ୍ସିଦ୍ଧଵିଦ୍ୟାଧରେଭ୍ୟଃ
ସାଧ୍ୟେଭ୍ୟଶ୍ଚାରଣେଭ୍ୟୋ ମନୁଜପଶୁପତଜ୍ଜାତିକୀଟାଦିକେଭ୍ୟଃ ।
ଶ୍ରୀକୈଲାସପ୍ରରୂଢାସ୍ତୃଣଵିଟପିମୁଖାଶ୍ଚାପି ୟେ ସଂତି ତେଭ୍ୟଃ
ସର୍ଵେଭ୍ୟୋ ନିର୍ଵିଚାରଂ ନତିମୁପରଚୟେ ଶର୍ଵପାଦାଶ୍ରୟେଭ୍ୟଃ ॥ 40 ॥
ଧ୍ୟାୟନ୍ନିତ୍ଥଂ ପ୍ରଭାତେ ପ୍ରତିଦିଵସମିଦଂ ସ୍ତୋତ୍ରରତ୍ନଂ ପଠେଦ୍ୟଃ
କିଂ ଵା ବ୍ରୂମସ୍ତଦୀୟଂ ସୁଚରିତମଥଵା କୀର୍ତୟାମଃ ସମାସାତ୍ ।
ସଂପଜ୍ଜାତଂ ସମଗ୍ରଂ ସଦସି ବହୁମତିଂ ସର୍ଵଲୋକପ୍ରିୟତ୍ଵଂ
ସଂପ୍ରାପ୍ୟାୟୁଃଶତାଂତେ ପଦମୟତି ପରବ୍ରହ୍ମଣୋ ମନ୍ମଥାରେଃ ॥ 41 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଶ୍ରୀ ଶିଵ ପାଦାଦିକେଶାଂତଵର୍ଣନ ସ୍ତୋତ୍ରମ୍ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ଶିଵ ପାଦାଦି କେଶାଂତ ଵର୍ଣନ ସ୍ତୋତ୍ରଂ?
ଶିଵ ପାଦାଦି କେଶାଂତ ଵର୍ଣନ ସ୍ତୋତ୍ରଂ is a Shiva Stotrams available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ଶିଵ ପାଦାଦି କେଶାଂତ ଵର୍ଣନ ସ୍ତୋତ୍ରଂ online?
Yes. The imported text is available directly on this page for online reading and recitation.
Can I download ଶିଵ ପାଦାଦି କେଶାଂତ ଵର୍ଣନ ସ୍ତୋତ୍ରଂ as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.